Isbꞌeybꞌal anma yinh islahobꞌal tzꞌayik
3
Yilal hawohtanheni tato yet islahobꞌal tzꞌayik kaw ay ej isyaꞌtajil chihuli.
2 Ay anma tiꞌ hanhechꞌan chisxahannhe isbꞌa.
Chaniko yanma yinh chꞌen melyu,
chisloloꞌnhen isbꞌa kat yinipaxokanh isbꞌa,
kat yok yalno tzotiꞌ txꞌoj yinh Komam Dios.
Matxa chisyije tzet chal ismam ismiꞌ.
Matxa chiyaqꞌ yuchꞌandiosal yinh tzet chiꞌaqꞌlax tet,
matxa tzet chalilo kuybꞌanile yet Komam Dios yul sat.
3 Mach choche yet anmahil,
yebꞌ machi tzꞌay iskꞌul yinh hunuxa yet anmahil.
Chisbꞌalkanh tzotiꞌ machiswalil yinh yet anmahil.
Kaw mach chu istoholbꞌanheniko isbꞌa yinh iskꞌulal,
hakaꞌ hunu no noqꞌ kaw how hak tuꞌ chute isbꞌa,
chiskajpaxo iskꞌulal.
4 Chipakꞌiko yinh yet anmahil,
kaw mach chixiw iswatxꞌen istxꞌojal,
nohna yu tzet ye tuꞌ matzet chaliloj.
Haꞌ tzet ye tuꞌ choche isnimanil haꞌ chiswatxꞌe selelo tzet choche Komam Dios.
5 Chiyalni tato ayko isnabꞌal yinh Komam Dios,
yajaꞌ isbꞌeybꞌal chiyeniloj ta mach ayoko Komam Dios yinh isnabꞌal.
Mach chawako habꞌa xol hunteqꞌan mak tuꞌ.
6 Yuto xol anma chiwaltiꞌan,
ay ebꞌnaj chiꞌokto yul nha,
kat yok ebꞌnaj ismonten ebꞌix ix yunhe issomchato iswiꞌ,
yuto machi yip isnabꞌal ebꞌix yu nohna yanma ebꞌix yu istxꞌojal,
chisyijento ebꞌix tzet choche iskꞌul.
7 Hunteqꞌan ebꞌix tuꞌ xin,
aynhetikꞌako ebꞌix iskuywi,
yajaꞌ maxhtikꞌa chiqꞌoji ebꞌix istxumnilo huneꞌ kuybꞌanile kaw kꞌul.
8 Hakaꞌ yu iskajwa naj Janes yebꞌ naj Jambres yinh yaꞌ Moisés,
hak tuꞌ chu iskajwa hunteqꞌan ebꞌnaj tiꞌ yinh kuybꞌanile yel chala.
Kaw etaxnalo isnabꞌal,
mach yeloj ta kꞌul yeko yanma yinh Komam Dios.
9 Wal xin machi nahatli istxꞌojal ebꞌnaj tuꞌ,
yuto chiꞌixtanhwoti issukal ebꞌnaj yu anma,
hakaꞌ yu yixtanhwilo ebꞌnaj kajni yaꞌ Moisés.
Islahobꞌal chejbꞌanile yalto yaꞌ Pablo tet yaꞌ Timoteo
10 Yajaꞌ wal hach tiꞌ,
kaw tzujan hach yinh kuybꞌanile walkanojan,
yebꞌ sunil yinh inbꞌeybꞌalan yebꞌ innabꞌalan.
Ilbꞌil hawu tzet wute waniko wanmahan yinh Komam Dios,
yebꞌ innimankꞌulalan,
yebꞌpaxo yinh inxahannhenan wet anmahilan.
Waqꞌnipaxo techahojan sunil isyaꞌtajil.
11 Hawilpaxo yet yaqꞌlax ekꞌoyaꞌ wanmahan,
yebꞌ yet yul isyaꞌtajil wibꞌanhan.
Hunteqꞌan waqꞌlehan yet wekꞌan yul konhobꞌ Antioquía,
yebꞌ bꞌey konhobꞌ Iconio,
yebꞌpaxo bꞌey konhobꞌ Listra.
Yinh hunteqꞌan isyaꞌtajil wabꞌe tuꞌan,
Komam Dios kinkolnilojan xol sunil.
12 Yinh kaw yeli,
maknhetikꞌa choche kꞌul chute isbꞌeybꞌal yu ayko yanma yinh Komam Jesucristo,
kaw masan chabꞌe isyaꞌtajil yu yet anmahil.
13 Wal ebꞌnaj matzwalil chute isbꞌa yebꞌ ebꞌnaj subꞌcham anma tuꞌ,
ip islahniko yanito isbꞌa ebꞌnaj xol istxꞌojal,
chetato ebꞌnaj isnabꞌal yet anmahil kat xin yetanpaxto isbꞌa ebꞌnaj.
14 Yaj wal hach tiꞌ,
lahiko halinhbꞌan habꞌa yinh kuybꞌanil kuybꞌilxa hawu,
huneꞌ hawayto yul hawanma.
Hawohtaj mak kuynhe hach yinh.
15 Hach tiꞌ nichꞌan hachto hakuyni kuybꞌanile yet Komam Dios.
Huneꞌ kuybꞌanile chiꞌaqꞌni ishelanil hanabꞌal,
kaxhyinito yinh kolbꞌanile yu hawayto yul hawanma yinh Komam Jesucristo.
16 Sunilal tzet ayayo yul Yum Komam Dios yalanh ischejbꞌanil Komam watxꞌina yu ebꞌyaꞌ ischejabꞌ.
Kaw xin chꞌokniko konhiskuyni yinh isyelal kat isyenilo bꞌay mach tꞌinhano jekoj,
kat iskachwa jinh yinh kotxꞌojal,
yebꞌ konhiskuyni yinh sunil istoholal.
17 Yunhe tzꞌajan lahan chukano mak yetxa Komam Dios yehi,
kaw helanxa chiꞌelkaniko iswatxꞌen sunil iskꞌulal.