Huneꞌ ischejabꞌ Komam Jesucristo kaw kꞌul
2
Hach kaw inkꞌaholtiꞌan,
kaw aqꞌ hawip hawatxꞌeniko habꞌa yinh iskꞌulchꞌanil iskꞌul Komam Dios chiyaqꞌ jet,
yuto hunxa je yebꞌ Komam Jesucristo.
2 Hunteqꞌan kuybꞌanile hawabꞌe walnikꞌojan xol anma,
haꞌ chataqꞌe tet ebꞌnaj juxhtaj yijem chute isbꞌa,
yebꞌ tzꞌajan chute iskꞌul ebꞌnaj iskuyni hunuxa yet anmahil.
3 Hach tiꞌ xin techahojabꞌ isyaꞌtajil hawu hakaꞌ hunu naj soldado,
yuto ischejabꞌ Komam Jesucristo hawehi.
4 Machi hunu naj soldado tiꞌ ayko soldadohal kat istopaxo iswatxꞌeno hunuxa nan munilal,
yuto yilal isyijen naj tzet chal yahawil.
5 Hakpax tuꞌ hunu naj chiꞌaqꞌni anhe,
mach chischah naj ismatan ta mach chisyije naj yinh tzet chu istzujcha apno huneꞌ matan tuꞌ.
6 Hakaꞌ hunu naj tzꞌunum awal,
yilal ismunla naj bꞌabꞌel kat ischahni naj sat istzꞌunubꞌ tuꞌ.
7 Ako hawanma yinh hunteqꞌan kuybꞌanile chiwalan tawet tiꞌ,
haꞌ xin Komam chꞌaqꞌni kam hatxumuꞌ yinh tzet yehi.
8 Nati Komam Jesucristo,
Komam pitzkꞌakanh xol kamom,
Komam tit yinh yuninal yaꞌ jichmam David,
hakaꞌ yalni Tzotiꞌ yet kolbꞌanile chiwalikꞌojan xol anma.
9 Yu chiwalikꞌojan huneꞌ kuybꞌanile tiꞌ,
yuxin chiwabꞌehan isyaꞌtajil.
Kaw xin ayinikojan preso hakaꞌ hunu mak kaw xiwkilta ismul,
yaj wal Tzotiꞌ yet kolbꞌanile xin mach ayoko preso.
10 Yuxin,
sunil chiwaqꞌtechahojan yu ayko wanmahan yinh makta sikꞌbꞌilxakanh yu Komam,
yunhe ischahni iskolbꞌanil kaw kꞌulchꞌankanoj,
mach istanhbꞌal,
huneꞌ chiꞌaqꞌlax jet yu hunxa je yebꞌ Komam Jesucristo.
11 Huneꞌ kuybꞌanile tiꞌ kaw yel chala:
Tato xakonhkam yebꞌ Komam,
chonhitzitzbꞌipaxokanh yebꞌ Komam.
12 Tato chijabꞌe isyaꞌtajil,
chonhokpaxo yahawilo yebꞌ Komam.
Ta chijala ta mach johtajo Komam,
chiyalpaxo Komam ta mach konhyohtajoj.a
13 Ta mach kꞌulo chijute kobꞌa,
wal Komam Dios kꞌul Komam,
yuto mach chismanhkꞌo Komam yinh tzet chala.
Hakaꞌ hunu naj chejabꞌ kaw yijem, hak tuꞌ chijute kobꞌa
14 Nati hunteqꞌan tzet chiwaltiꞌan tet ebꞌnaj juxhta inqꞌanaꞌan.
Kam taqꞌekano tet ebꞌnaj sata Komam Dios ta mach chꞌok ebꞌnaj isteyele isbꞌa yinh ej tzotiꞌ matzet chal yelapnoj,
yuto matzet kꞌul chiswatxꞌe,
tonhe chetato isnabꞌal makta chiꞌabꞌeni.
15 Kaw ako yinh hakꞌul hawekꞌ yinh iskꞌulal sata Komam Dios,
haxinwal chitzala Komam tawinh,
hakaꞌ hunu munlawom matzet yinh wal istxꞌixwikanh,
huneꞌ mak haꞌ kuybꞌanile kaw yel chalikꞌoj.
16 Kaw mach chachah hawabꞌe hunteqꞌan txꞌojla tzotiꞌ chal anma,
yebꞌ tzotiꞌ matzet kꞌul chaqꞌa,
yuto haꞌ mak chihalni hunteqꞌan tzotiꞌ tuꞌ nixhtejal isto sutsun xol istxꞌojal.
17 Hakaꞌ hunu txꞌak chiqꞌatoj kat yekꞌ lebꞌohi,
hak tuꞌ chiyu yekꞌ lebꞌo hunteqꞌan tzotiꞌ chiyal ebꞌnaj tuꞌ.
Hak tuꞌ yute isbꞌa naj Himeneo yebꞌ naj Fileto.
18 Xaꞌisbꞌejkano ebꞌnaj huneꞌ kuybꞌanile kaw yel chala,
chalni ebꞌnaj tato xapitzkꞌakanh ej kamom.
Ay xin hunteqꞌan mak ayxako yanma yinh Komam chikabꞌkonkanh iskꞌul yu tzet chal ebꞌnaj.
19 Yajaꞌ wal Istzotiꞌ Komam Dios yaqꞌkano jet,
kaw ay yip,
lahan hakaꞌ hunu xeꞌ nha machi nino chibꞌili.
Ayko huneꞌ sello yinh chalni hakaꞌ tiꞌ:
«Yohta Komam Dios makta yetxa Komam yehi,»b
xhi.
Chalnipaxoj:
«Makxanhetikꞌa anmahil chako isbꞌa yul isqꞌabꞌ Komam Jesucristo,
yilal chisbꞌejkano sunil istxꞌojal,»
xhi.
20 Qꞌinalo hunu niman nha tinanh,
kaw tzetkꞌa qꞌuybꞌe ayikto yul;
ay munlabꞌal nabꞌa oro yebꞌ nabꞌa plata ayikto yul.
Aypaxo munlabꞌal nabꞌa teꞌnhe,
aypaxo nabꞌa txꞌotxꞌnhe.
Hunteqꞌan munlabꞌal tuꞌ ay ekꞌbꞌal yelapno ismunil,
aypaxo xin komontanhe ismunil.
21 Lahanonh hakaꞌ hunteqꞌan munlabꞌal tuꞌ.
Tato sunil machiswalilal chikobꞌejkanoj,
niman jelapno yul sat Komam Dios.
Haxa Komam ayonh yet,
xakonhokniko yu Komam yinh ismunil,
helanonhxa kowatxꞌen sunil iskꞌulal.
22 Elanh tet sunil istxꞌojal choche ebꞌnaj hawet tzehal iswatxꞌe;
wal xin okanh tzujno yinta istoholal.
Kam lahiko hawaniko hawanma yinh Komam,
xahan chawil hawet anmahil.
Kaw ayojabꞌ aqꞌankꞌulal yul hawanma hakaꞌ sunil makta chiꞌawten Komam yinh.
23 Yaj mach chawabꞌeto tzotiꞌ machiswalil matzet chaliloj,
yuto hawohtaj tato howal chíti hunteqꞌan tuꞌ.
24 Yuto huneꞌ ischejabꞌ Komam Dios,
mach chiyu yanito isbꞌa xol howal.
Wal xin kꞌul chute isbꞌa yinh sunil anma,
helanpaxo iskuywahi,
yebꞌ xin niman chute iskꞌul.
25 Aqꞌankꞌulal xin chiyu iskuywa yinh mak mach chischah kuybꞌanile,
yuto chálo yaniko hunteqꞌan mak tuꞌ Komam Dios yinh iskꞌul kat ishelni isbꞌeybꞌal,
kat yohtanhenilo huneꞌ kuybꞌanile kaw yeli,
26 yunhe iskolchalo yul isqꞌabꞌ naj matzwalil bꞌay preso yeko yu naj;
chiswatxꞌen bꞌaytet choche iskꞌul naj.