4
Hex yahaw munil kaw kꞌulojabꞌ cheyute hebꞌa,
yebꞌ watxꞌewe istoholal yinh hekꞌamteꞌ.
Nawepaxtij tato ay huneꞌ heYahawil ay bꞌey yul satkanh.
2 Txahlanhwe yinh hunun tzꞌayik,
majwahanhwej,
aqꞌwe yuchꞌandiosal tet Komam Dios.
3 Txahlanhwepaxo jinhanh haxinwal chisye Komam bꞌaytuꞌwal chijalikꞌojanh Istzotiꞌ,
huneꞌ Tzotiꞌ ewan ye yinh Komam Jesucristo.
Yu Istzotiꞌ Komam tuꞌ yuxin ayinikojan preso.
4 Txahlanhwepaxoj yunhe walnikꞌojan huneꞌ kuybꞌanile tiꞌ xol anma yinh kaw hakaꞌ yelapno yehi.
5 Kaw kꞌulojabꞌ cheyute hebꞌa xol mak maxhto ayoko yul isqꞌabꞌ Komam.
Mach nabꞌnheho chiꞌekꞌ hetiempo.
6 Hayet chextzotel tet anma,
haꞌojabꞌ tzotiꞌ kaw kꞌul cheyal tet,
hunteqꞌan tzotiꞌ kaw chiyoche yabꞌeꞌ,
yebꞌ xin tzꞌajanojabꞌ cheyute hekꞌul hetxumnilo tzet chu heyaqꞌni ispaj isqꞌambꞌebꞌal chiyaqꞌ teyet.
Yalto yaꞌ Pablo ta chil isbꞌa ebꞌnaj juxhta ay bꞌey konhobꞌ Colosas
7 Naj juxhta Tíquico,
kaw xahan ay naj wuhan,
kaw yijemkano naj yebꞌ kaw chikolwa naj wintajan yinh jalnikꞌojanh Istzotiꞌ Komam Dios.
Haꞌ naj chiꞌinipaxto tzotiꞌ teyet yinh hanikꞌ wehikojan bꞌey tiꞌ.
8 Yuxin chiwatojan naj ilwal teyinh yunhe yalni naj teyet hanikꞌ jekojanh,
kat xin kexyiptzenpaxo naj.
9 Chitopaxo juxhta Onésimo yetbꞌiho naj,
naj tiꞌ kaw xahan ay naj juhanh,
kaw yijem naj yinh tzet chal Komam Dios,
heyet konhobꞌpaxo naj.
Haꞌ ebꞌnaj xin chihalni teyet tzettaj chiyu bꞌey tiꞌ.
10 Naj juxhta Aristarco ayko preso wintajan bꞌey tiꞌ,
chiyalpaxto naj ta cheyil hebꞌa yinh hekawil yebꞌ xin juxhta Marcos,
yaꞌ yuxhtato isbꞌa yebꞌ yaꞌ Bernabé.
Xaheyabꞌe isqꞌumal yaꞌ Marcos tiꞌ,
tato chiꞌapni yaꞌ kexistukleꞌ bꞌey tuꞌ,
chahwe yaꞌ yinh kaw kꞌul.
11 Chalpaxto juxhta Jesús ta cheyil hebꞌa yinh hekawil,
naj chiyijpaxo Justo.
Hanhkꞌanhe ebꞌnaj tiꞌ xol ebꞌnaj Israel ayxako yul isqꞌabꞌ Komam chikolwa wintajan yinh walnikꞌojan kuybꞌanile yinh tzet chu yok anma yul isqꞌabꞌ Komam Jesucristo.
Kaw xin ayko ebꞌnaj tiꞌ yipo wanmahan.
12 Chalpaxto juxhta Epafras ta cheyil hebꞌa yinh hekawil,
naj ischejabꞌ Komam Jesucristo,
kaw heyet konhobꞌpaxo naj.
Aynhetikꞌako naj istxahli teyinh yunhe kaw toholnhetikꞌa cheyute hebꞌa,
yebꞌ xin yunhe tzꞌajan chiyij isbꞌa sunil tzet chal iskꞌul Komam Dios teyinh.
13 Testigo hinan yinh tato ayko yinh iskꞌul juxhta Epafras teyinh yebꞌ yinh ebꞌnaj juxhta ay bꞌey yul konhobꞌ Laodicea,
yebꞌ xin ebꞌnaj ay yul konhobꞌ Hierápolis.
14 Yebꞌpaxo xin juxhta Lucas anhlom,
kaw xahan ay juhanh,
chalpaxtoj ta cheyil hebꞌa yinh hekawil;
hakpax tuꞌ juxhta Demas,
chalpaxtoj ta cheyil hebꞌa.
15 Halwe tet ebꞌnaj juxhta yebꞌ ebꞌix janabꞌ ay bꞌey konhobꞌ Laodicea ta chil isbꞌa.
Halwepaxo tet janabꞌ Ninfas ta chil isbꞌa,
yebꞌ xin sunil makta ayxako yul isqꞌabꞌ Komam Jesucristo chiskutxbꞌa isbꞌa bꞌey yatut janabꞌ tuꞌ.
16 Hayet chilahwi heyawten huneꞌ hum tiꞌ tet ebꞌnaj juxhta yebꞌ ebꞌix janabꞌ,
kat xin heyanito teꞌ il-laxo bꞌey konhobꞌ Laodicea.
Haktikꞌapax tuꞌ xin,
cheyilpaxo teꞌ chati ebꞌnaj juxhta bꞌey tuꞌ.
17 Halwe huneꞌ tiꞌ tet juxhta Arquipo:
«Ako hawanma hayijen hamunil aqꞌbꞌil tawet yu Komam Jesús,
Jahawil,»
kexchi tet naj.
18 Hanin Pablo intiꞌan,
hankawinan chintzꞌibꞌnhetojan ta cheyil hebꞌa yinh hekawil.
Nawetij tato preso wehan.
Yaqꞌabꞌayo Komam Dios issaqꞌalil iskꞌul texol bꞌey tuꞌ.
¡Hakojabꞌ tuꞌ!