6
Hex uninale,
kaw yijemojabꞌ cheyute hebꞌa tet hemam hemiꞌ yuto ayexxako yul isqꞌabꞌ Komam Dios,
huneꞌ tuꞌ kaw kꞌulkanoj.
2 Huneꞌ bꞌabꞌel chejbꞌanile aqꞌbꞌilkano yu Komam Dios iqꞌbꞌil haltebꞌanil yu,
chal hakaꞌ tiꞌ:
«Ayojabꞌ yelapno ye hemam hemiꞌ yul hesat,
3 haxinwal kꞌul cheyila,
yebꞌpaxo xin chexnahatli yul sat yibꞌanhqꞌinal tiꞌ,»a
xhihayoj.
4 Walpaxo hex mame miꞌe hex tiꞌ,
kaw mach cheyaqꞌtij ishowal heyuninal,
haꞌ heyet to kaw kꞌul chu hekuyni yebꞌ hekachni,
haxinwal chixiw tet Komam Dios.
5 Wal hex kꞌamteꞌ hex xin,
yijemojabꞌ cheyute hebꞌa tet hepatrón yul sat yibꞌanhqꞌinal tiꞌ.
Ayojabꞌ yelapno ebꞌnaj yul hesat,
xiwanhwe tet ebꞌnaj.
Sunilojabꞌ heyanma chexmunlahi,
hakaꞌojtam tet Komam Jesucristo cheyije.
6 Wal xin machojabꞌnhetaj yet chexyilni ebꞌnaj hepatrón tuꞌ kat hemunlahi yunhe istzalako ebꞌnaj teyinh,
machoj,
wal xin munlahanhwe yinh sunil heyanma hakaꞌ choche Komam Dios,
hakaꞌojtam tet Komam Jesucristo lanhan heyijeni.
7 Kaw sunilojabꞌ heyanma chexmunlahi,
hakaꞌojtam ismunil Komam lanhan hewatxꞌeni,
maxhtaj ismunil anma.
8 Heyohtaxa xin,
waxanhka kꞌamteꞌonh,
maka jet kobꞌa kochukil,
kaw hakaꞌtikꞌa iskꞌulal chihulikꞌo jubꞌ yul sat yibꞌanhqꞌinal tiꞌ,
hakpax tuꞌ xin ispaj chikochah tet Komam Dios.
9 Haxa hex yahaw munil hex xin,
haktikꞌapax tuꞌ cheyutepaxo hebꞌa yinh ebꞌnaj hekꞌamteꞌ.
Kaw mach howo cheyute hebꞌa yinh ebꞌnaj,
yuto kaw lahan heyehiko yalanh yip Komam Dios Jahawil ay satkanh.
Wal xin kaw machi hunu mak ekꞌbꞌal yelapno ye yibꞌanh hunuxa mak yul sat Komam.
Kuybꞌanile yinh hakaꞌ hunu naj soldado chito yinh howal
10 Wal tinanh hex wuxhtaj,
hex wanabꞌ,
yiqꞌabꞌ yip heyanma yinh Komam Jesucristo yuto kaw aykano ishelanil yip Komam.
11 Chahwe tzet chaqꞌ Komam Dios teyet,
hakaꞌ hunteqꞌan chiꞌokniko yu ebꞌnaj soldado aqꞌom howal,
yunhe chu hepahni sunil isleqꞌtiꞌal naj matzwalil chaqꞌ teyet.
12 Maxhtaj yebꞌ anma chijaqꞌ howal,
wal xin lanhan jaqꞌni howal yinh yespíritu naj matzwalil chiꞌekꞌ satkanh xol jaqꞌeqꞌ.
Hunteqꞌan espíritu tuꞌ kaw ay yip yebꞌ chonhischej kowatxꞌen istxꞌojal,
yebꞌ yahaw yeko yinh istxꞌojal ay yul sat yibꞌanhqꞌinal tiꞌ.
13 Yuxin chahwe hunteqꞌan yip Komam Dios chaqꞌ teyet,
haxinwal yet chaqꞌni howal naj matzwalil teyinh chitecha heyu.
Lahwi heyaqꞌni techaho tuꞌ xin kaw linhanojabꞌnhetikꞌa hex.
14 Yuxin linhbꞌawe hebꞌa,
káwxeweko isyelal yul heyanma,
hakaꞌ chu iskawxeniko naj soldado issincho yinh yiktaj,
yebꞌ xin heyekꞌ yinh istoholal,
hakaꞌ chu yaniko naj soldado hunteqꞌan xilqꞌape nabꞌa chꞌen yinh istxam iskꞌul yu iskolwa yinh.
15 Hakaꞌojabꞌ yaniko naj soldado isxanhabꞌ yinh yoj yu isto yinh howal,
hakojabꞌ tuꞌ chu hekawxen hebꞌa heto heyalnokꞌo kolbꞌanile yet aqꞌankꞌulal.
16 Hakaꞌ yiqꞌni naj soldado chꞌen escudo chipahni lanza yet ayko howal,
hakojabꞌ tuꞌ heyaniko heyanma yinh Komam,
yunhe chu hepahni hunteqꞌan isyaꞌtajil chati naj matzwalil teyinh.
17 Hakaꞌ yahnato naj soldado chꞌen casco yinh iswiꞌ,
hak tuꞌ xin chu hekolni hebꞌa yu huneꞌ hekolbꞌanil aqꞌbꞌilxa yu Komam.
Hakaꞌtikꞌa yiqꞌni naj soldado yespada yet chito yinh howal,
hakojabꞌ tuꞌ heyiqꞌni Istzotiꞌ Komam Dios chaqꞌ Komam Espíritu Santo jet.
18 Txahlanhwe yinh sunilbꞌal tiempo tet Komam Dios,
ayojabꞌexnhetikꞌako heqꞌanni tet Komam tzettaj iskꞌulal choche Komam Espíritu Santo.
Kaw nanojabꞌnhetikꞌa heyu,
machojabꞌ chexpax teyintaj.
Txahlanhwe yinh sunil mak ayxako yul isqꞌabꞌ Komam Dios.
19 Txahlanhwepaxo winhan,
haxinwal yet chintzotelan chaqꞌ Komam Dios inhelanilan yebꞌ xin wipan yunhe walnilojan tzet yelapno ye Tzotiꞌ Kꞌul yet Kolbꞌanile xayaqꞌ Komam Dios johtanheloj.
20 Komam Dios anheintijan yunhe walnikꞌojan huneꞌ kuybꞌanile bꞌay chiꞌilcha kolbꞌanile,
yuxin preso wehan.
Chiwalan teyet tato kaw chextxahli winhan,
haxinwal ay wipan walnihan huneꞌ kolbꞌanile tiꞌ xol anma.
Islahobꞌal iscarta yaꞌ Pablo
21 Haꞌ naj juxhta Tíquico,
naj kaw xahan ay ju,
yebꞌ kaw yijem iskolwa yinh ismunil Komam Jesucristo,
haꞌ naj chiꞌinapno tzotiꞌ teyet yinh tzet kaw wehikojan,
yebꞌ xin tzet lanhan wunihan bꞌey tiꞌ.
22 Chiwatojan naj kexyilaꞌ,
haꞌ naj chihalni teyet hanikꞌ jehanh,
haxinwal chaqꞌ naj yaqꞌlobꞌal heyanma.