Isbꞌeybꞌal makta yuninalxa Komam Dios
5
Hanhonh yuninalxa Komam Dios je tiꞌ,
kaw xahan ayonh yu Komam,
yuxin ekꞌojonhwe hakaꞌ isbꞌeybꞌal Komam.
2 Xahannhewe hebꞌa hunun tzꞌayik hakaꞌ yu konhisxahannhen Komam Jesucristo;
yaqꞌnikamo isbꞌa Komam jinh,
hakaꞌ hunu xahanbꞌal kaw xuqꞌ chiꞌaqꞌlax tet Komam Dios.
3 Kaw yetonhxa Komam Dios,
yuxin matxa jeto ay jalni tzotiꞌ yet ixloj,
yebꞌ tzettaj chisyah Komam Dios,
machojabꞌ xin chijocheto qꞌalomal.
4 Mach chu heyalni tzotiꞌ kaw txꞌixobꞌal yoki,
yebꞌ suk tzotiꞌ,
yebꞌ xin maxil kaw machiswalil jabꞌeni;
yuto hunteqꞌan tzotiꞌ tuꞌ,
kaw matxa jeto ay jalni.
Haꞌ jet,
to jalaꞌ kꞌul-la tzotiꞌ yinh Komam Dios.
5 Kaw heyohtaxa ta sunil mak chito ixli,
maka chiwinajli,
yebꞌ anma chiwatxꞌen tzettaj chisyah Komam Dios,
mach chiꞌapni iskꞌatanh Komam Jesucristo yebꞌ iskꞌatanh Komam Dios.
Yebꞌpaxo anma chito ocheniko qꞌalomal lahan yebꞌ anma chiꞌay jahno tet tioxh,
haꞌ anma tuꞌ mach chiꞌapni iskꞌatanh Komam.
6 Machojabꞌ mak chexaqꞌni subꞌchahoj yu tzotiꞌ kaw sukal yehi.
Yuton sunil hunteqꞌan machiswalil tuꞌ,
yuxinto chitit ishowal Komam Dios yibꞌanh anma mach chiyijen tzet chala.
7 Yuxin kaw chiwalkanojan teyet,
mach cheyako hebꞌa xol hunteqꞌan anma tuꞌ.
8 Yet yalanhtokanoj ayextoko xol qꞌejholo,
yajaꞌ wal tinanh xin ayexxako xol sajilqꞌinal yuto hunxa heye yinh Komam Jesucristo Jahawil.
Yuxin ekꞌanhwe yinh iskꞌulal yuto ayexxako xol issajilqꞌinal.
9 Wal xin,
yu ayexxako xol issajilqꞌinal tiꞌ,
kaw kꞌulchꞌanojabꞌ cheyute heyanma.
Toholojabꞌ sunil tzet chewatxꞌe,
yebꞌ sunilojabꞌ tzet cheyala yelojabꞌi.
10 Kaw chelahweko hewatxꞌen bꞌaytet choche iskꞌul Komam Dios.
11 Mach cheyato hebꞌa xol hunteqꞌan tzet chiswatxꞌe anma xolto qꞌejholo ayko yanma,
yuto haꞌ tzet chiswatxꞌe tuꞌ,
kaw machi nichꞌano iskꞌulal.
Wal xin halwej tet kat heyenilo tet ta machi nichꞌano kꞌulo tzet chiswatxꞌe tuꞌ.
12 Kaw txꞌixobꞌal jalni yinh tzet chiswatxꞌe hunteqꞌan anma tuꞌ yinh ewantajil.
13 Yuxin yet chiꞌel yenhel hunteqꞌan tuꞌ yu issajilqꞌinal,
kaw habꞌan chukanoj.
Haꞌ issajilqꞌinal chiꞌaniko sunil tzet ye tuꞌ yinh habꞌan.
14 Yuxin chihal-lax hakaꞌ tiꞌ:
«Ilo hawayanh hach wayanhto chawu.
Ahanhwano xol kamom,
kat xin yaqꞌni Komam Jesucristo issajilqꞌinal tawet,»
xhi.
15 Yuxin kaw nannhe heyu yinh tzet chilahewatxꞌe.
Mach chexekꞌ yinh sukal,
wal xin tzꞌajanojabꞌ cheyute hekꞌul.
16 Kaw mach nabꞌnhehojabꞌ chiꞌelto tiempo teyibꞌanh,
yuto yinh huneꞌ tiempo tiꞌ kaw hantanhe tzet chonhinito yinh istxꞌojal.
17 Machojabꞌtaj issukal cheyu,
aqꞌwe heyip hetxumnilo bꞌaytet kaw choche iskꞌul Komam Dios Jahawil chewatxꞌe.
18 Mach cheyukꞌ teꞌ ukꞌe yu chexyito teꞌ yinh sunil istxꞌojal.
Wal xin haꞌojabꞌ Komam Espíritu Santo chinohayto yul heyanma.
19 Cheyalni salmo teyet hunun hex,
yebꞌ ej himno,
yebꞌ bꞌit chitit yul heyanma,
kat hebꞌitnhen isbꞌi Komam Dios,
kat heyalni kꞌul-la tzotiꞌ yinh Komam yinh sunil heyanma.
20 Aqꞌwe yuchꞌandiosal tet Komam Dios Mame yinh sunil tzettaj ye tuꞌ,
yinh isbꞌi Komam Jesucristo.
Kuybꞌanile yinh naj ichamile yebꞌ yixal yebꞌ xin yuninal
21 Yijem cheyute hebꞌa teyet hunun hex,
hak tuꞌ chu heyeniloj tato chexxiw tet Komam Dios.
22 Hex ixale,
kaw yijewe tzet chal heyichamil teyet,
hakaꞌtikꞌa chiyu heyijen tzet chal Komam Dios Jahawil.
23 Yuto naj ichamile iswiꞌehal yehiko naj yinh yixal,
hakaꞌtikꞌa yehiko Komam Jesucristo iswiꞌehalo yinh sunil anma ayxako yul isqꞌabꞌ;
haꞌ Komam xin Iskolomal yuto kaw hakaꞌ isnimanil Komam yehi.
24 Hakaꞌojabꞌ isyijemal anma ayxako yul isqꞌabꞌ Komam Jesucristo,
hakojabꞌ tuꞌ chute isbꞌa ebꞌix ixale isyijen yinh sunil tzet chal yichamil.
25 Hex ichamile,
xahan cheyil heyixal,
hakaꞌ isxahanil chiyil Komam Jesucristo anma ayxako yul isqꞌabꞌ,
yaqꞌnipaxo kamo isbꞌa Komam yinh.
26 Hak tuꞌ yute isbꞌa Komam,
yaqꞌkamo isbꞌa yunhe jok yeto Komam Dios;
konhissajnhenkano yinh komul hakaꞌ konhistxꞌah yu ha haꞌ,
27 yunhe yapni yuninal tuꞌ sataj yinh kaw kꞌulchꞌankanoj,
kaw matxa nino istzꞌilal,
machipaxo nino istxꞌojal maka hunuxa ismachiswalilal.
Wal xin kaw yetxa Komam yehi,
yebꞌ tzꞌajan lahanxa yehi.
28 Hakaꞌtikꞌa isxahanil chil naj ichamile isnimanil,
hakojabꞌ tuꞌ isxahanil chil naj yixal.
Yuxin haꞌ mak xahan chil yixal,
kaw xahan chilpaxo isbꞌa chal tuꞌ.
29 Kaw machi hunu mak tiꞌ chiyahni isnimanil,
wal xin chislotze isbꞌa kat isyaꞌilnhen isbꞌa,
hakaꞌ chiyu isyaꞌilnhen Komam Jesucristo makta ayxako yul isqꞌabꞌ,
30 yuto isnimanil Komam yehi;
hanhonh tiꞌ yetbꞌixa isnimanil Komam jehi.
31 Yuto chal Istzotiꞌ Komam Dios hakaꞌ tiꞌ:
«Yuxin chákano naj winaj ismam ismiꞌ,
kat xin ishunbꞌan isbꞌa naj yebꞌ yixal,
hak tuꞌ xin kaw hunxanhe anmahil chukano iskawanhil,»a
xhihayoj.
32 Huneꞌ tiꞌ niman yelapnoj,
yajaꞌ haꞌ huneꞌ chiwalan haꞌ ton yinh tzet ye Komam Jesucristo yebꞌ makta ayxako yul isqꞌabꞌ.
33 Yajaꞌ hex ichamile hex tiꞌ,
xahanojabꞌ cheyil heyixal hakaꞌ isxahanil ay henimanil heyu.
Hakexpax tuꞌ hex ixale hex tiꞌ,
yijewe tzet chal heyichamil.