Hunxa je yu Komam Espíritu Santo
4
Yuton Komam Jesucristo yuxinto preso wehan.
Kaw chiwaltojan teyet:
kꞌul cheyute hebꞌa inqꞌanaꞌan hakaꞌ kaw yehi,
yuto kaw awtebꞌilexxa yu Komam Dios.
2 Chewojabꞌ cheyute hebꞌa,
saqꞌalojabꞌ cheyute hekꞌul.
Aqꞌwe techaho mak txꞌoj chute isbꞌa teyinh,
niman cheyute hekꞌul teyinh hunun hex,
xahanojabꞌ cheyil hebꞌa.
3 Hunxanhehojabꞌ cheyute hebꞌa yu yip Komam Espíritu Santo,
yuto haꞌ Komam kexhunbꞌankanoj,
yanikaniko aqꞌankꞌulal texol.
4 Hunxanhe nimanile je tinanh,
yebꞌ xin hunnhepaxo Espíritu aqꞌbꞌil jet kosunil.
Huneꞌnhe tzet ayko yipo janma huneꞌ bꞌay awtebꞌilonh yu Komam.
5 Huneꞌnhe Komam Jahawil,
huneꞌnhe mak bꞌay ayko janma;
huneꞌnhepaxo mak yinh bꞌay ah haꞌ kowiꞌ.
6 Kaw huneꞌnhechꞌan Komam Dios,
haꞌ Mame yeko jinh kosunil.
Haꞌ kaw yahawil yeko jinh,
haꞌ chimunlako jinh,
haꞌ ayko jinh kosunil.
7 Wal xin,
kaw nananta komunil kochah yu Komam Jesucristo,
hakaꞌtikꞌa tzet yoche iskꞌul Komam yaqꞌ jet.
8 Yuxin chal yul Yum Komam Dios:
Yet isto Komam yul satkanh,
txꞌiꞌal ebꞌnaj presowom yito Komam yintaj.
Yaqꞌnipaxkano Komam iskꞌulal tet anma,a
xhihayoj.
9 ¿Tzet chalilo huneꞌ yet isto Komam tuꞌ?
Chaliloj tato bꞌabꞌel bꞌeyayto Komam yul txꞌotxꞌ.
10 Haꞌ Komam bꞌeyayto yul txꞌotxꞌ,
haꞌ Komam topaxo yul satkanh bꞌay kaw nahat yekanokanh yunhe isnohilo sunil bꞌayejtuꞌwal yu yip.
11 Haꞌ xin Komam aniko ismunil hunun mak yul isqꞌabꞌ,
yuxin ay ebꞌyaꞌ ayko ischejabꞌo Komam Jesucristo,
ay ebꞌyaꞌ xin chihalni tzotiꞌ chitit tet Komam Dios.
Aypaxo ebꞌyaꞌ chihalnikꞌo Tzotiꞌ yet kolbꞌanile,
ay ebꞌyaꞌ xin chiꞌijbꞌali yinh makta ayxako yul isqꞌabꞌ Komam Dios,
aypaxo xin ebꞌyaꞌ kuywawom xol makta ayxako yul isqꞌabꞌ Komam.
12 Hakton tiꞌ xin yu yaqꞌlaxkano iskuybꞌanil makta yetxa Komam yehi,
yunhe yok yinh ismunil Komam,
yunhe ischꞌibꞌ isnimanil Komam Jesucristo.
Huneꞌ isnimanil Komam tuꞌ hanhonhtoni.
13 Yuxinto hunlahanxanhe iskawxi kokꞌul yinh Komam,
yebꞌ xin kaw johtanhelo Iskꞌahol Komam Dios,
hak tuꞌ xin chiyu yiqꞌni yip konabꞌal,
kat istzujcha apno kotxumni hakaꞌ isnabꞌal Komam Jesucristo.
14 Hak tuꞌ xin matxa lahanojonh yebꞌ nixhte unin,
kaw yinh anhe chishel isnabꞌal.
Matxa komono chijato konabꞌal yinh hunuxa nan kuybꞌanile,
yuto ay anma tiꞌ kaw helan yaqꞌni subꞌchaho anma yinh hunuxa nan kuybꞌanile,
hakaꞌ chiyu yinito jaqꞌeqꞌ hunu tzet ye tuꞌ bꞌayejtuꞌwalil.
15 Wal xin to haꞌ isyelal wal jalni,
yajaꞌ yinh iskꞌulchꞌanil kokꞌul.
Hak tuꞌ xin chu kochꞌibꞌi,
haxinwal lahanxa chonheliko yebꞌ Komam Jesucristo,
yuto iswiꞌehal ye Komam jinh.
16 Hanhonh konhisnimanil Komam tiꞌ xin,
kaw hunxa je yu Komam.
Qꞌinalo hakaꞌ konimanil tiꞌ,
kaw yetbꞌinhe isbꞌa sunil yu kotxꞌanhal,
kaw xin kꞌul yekano iswatxꞌebꞌanil hunun majan.
Hakton tuꞌ xin je yu Komam Jesucristo,
haꞌ Komam chonhaqꞌni chꞌibꞌo yinh sunil,
kat kolahniko koxahannhen kobꞌa.
Huneꞌ akꞌ bꞌeybꞌale yinh Komam Jesucristo
17 Kaw xin chiwalan yebꞌ chinqꞌanan teyet yinh isbꞌi Komam Jesús:
kaw matxa chexekꞌ hakaꞌ anma mach ohtanheho Komam Dios.
Hunteqꞌan anma tuꞌ,
hanhkꞌanhe istxꞌojal chiꞌekꞌ yinh isnabꞌal,
haꞌ chiswatxꞌe.
18 Kaw xin qꞌejholo yekanilo isnabꞌal hunteqꞌan anma tuꞌ.
Kaw mach chu ischahni huneꞌ akꞌ bꞌeybꞌale chaqꞌ Komam Dios yuto mach yohtajo tzettaj iskꞌulal chiswatxꞌe Komam,
yuto kawkano yanma.
19 Yuto hipbꞌikanilo ebꞌnaj,
yuxin yakaniko isbꞌa yul isqꞌabꞌ istxꞌojal,
matxatikꞌa xin yanma ebꞌnaj iswatxꞌen sunil ismachiswalilal.
20 Wal hex tiꞌ xin,
mach hako tuꞌ yu hekuywi yinh yet Komam Jesucristo.
21 Wal xin kaw heyabꞌe tzet hal-lax yinh Komam Jesucristo,
hechahnikano hekuybꞌanil,
hakaꞌtikꞌa isyelal yinh Komam.
22 Kaw bꞌejwekano huneꞌ icham bꞌeybꞌal iqꞌbꞌiltikꞌa heyu yet yalanhtokanoj,
huneꞌ bꞌeybꞌale etaxnatoj qꞌaytzenhexiko yinh istxꞌojal cheyoche.
23 Yilal hehelnikano heyanma yebꞌ henabꞌal,
24 kat heyok heyiqꞌno huneꞌ akꞌ bꞌeybꞌale watxꞌebꞌil hakaꞌ choche Komam Dios,
yunhe heyekꞌ yinh istoholal yebꞌ yinh isyelal.
25 Yuxin tinanh,
kaw matxahojabꞌ cheyako leqꞌtiꞌal,
hanhehojabꞌ isyelal cheyal teyet hunun hex,
yuto kaw huneꞌxanhechꞌan nimanile je kosunil.
26 Tato ay bꞌay cheyaqꞌ chíwaho hekꞌul,
machojabꞌ cheyako hemul.
Machojabꞌ xin cheyako hehowal tuꞌ yinh hekꞌul yinh sunilbꞌal tzꞌayik.
27 Machojabꞌ cheyaqꞌ yubꞌ naj matzwalil.
28 Mak qꞌaynatikꞌa yelqꞌawi,
isbꞌejabꞌkano yelqꞌawi kat yok munil,
kat iswatxꞌen yu isqꞌabꞌ tzet ye tuꞌ kꞌul,
haxinwal chu iskolwapaxo yinh anma kaw machi nichꞌano tzet aya.
29 Machojabꞌ cheyal yajla abꞌix,
to haꞌ tzotiꞌ kaw kꞌul yoki haꞌ cheyala,
haxinwal chiswatxꞌeko isnabꞌal mak chiꞌabꞌeni,
kat xin yaqꞌni iskꞌulal tet.
30 Kaw mach cheyako bꞌiskꞌulal yinh Komam Espíritu Santo ayxako teyinh yu Komam Dios.
Haꞌ huneꞌ tuꞌ aqꞌbꞌil teyet yu Komam yunhe yok yecheloj ta yetexxa Komam masanta chiꞌapni istzꞌayikal yet chonhiskolnikanilo Komam.
31 Bꞌejwekano ischiwa hekꞌul,
yebꞌ istit hehowal,
yebꞌ hekajtzakanh,
yebꞌ hepohli yinh heyet anmahil.
Bꞌejwepaxo hebꞌahwahi yebꞌ sunil tzettaj istxꞌojal chewatxꞌe.
32 Wal xin kꞌulchꞌanojabꞌ cheyute hekꞌul,
tzꞌayojabꞌ hekꞌul teyinh hunun hex.
Cheyaqꞌnipaxo nimankꞌulal teyinh hunun hex,
hakaꞌ yu yaqꞌni nimankꞌulal Komam Dios yinh hemul yu Komam Jesucristo.