Ismunil yaꞌ Pablo haꞌ yalni Istzotiꞌ Komam Dios xol anma mach Israeloj
3
Yuton huneꞌ tuꞌ,
yuxin chintxahlihan teyinh.
Hanin Pablo intiꞌan,
kaw preso wehan yu ismunil Komam Jesucristo,
yu iskꞌulalo teyinh,
hex mach Israelo hex tiꞌ.
2 Wal xin heyohtaxa tato yu iskꞌulal iskꞌul Komam Dios,
yuxin yaqꞌ huneꞌ inmuniltiꞌan yinh walnihan Istzotiꞌ Komam texol hex mach Israelo hex tiꞌ,
yunhe hewatxꞌiko yinh iskꞌulal.
3 Kaw isye Komam tzet nabꞌil yu wetan,
yaqꞌni wohtanhelojan huneꞌ ewantikꞌa ye yet payat.
Haꞌ xin tzꞌibꞌnhebꞌilxa nichꞌan teyet wuhan yul huneꞌ hum tiꞌ.
4 Yet cheyilni xin kat istxumchalo heyu tato wohtajan tzet ewantikꞌa ye yinh Komam Jesucristo.
5 Haꞌ huneꞌ tzet ewantikꞌa ye tuꞌ,
maxhtikꞌa aqꞌlax yohtanhelo anma yet payat,
yajaꞌ tinanh xin xayaqꞌ Komam Dios johtanhelojanh yu Yespíritu,
hanhonh sikꞌbꞌilonhilojanh ischejabꞌo Komam Jesús,
yebꞌ hunteqꞌanxa ebꞌyaꞌ ischejabꞌ Komam chihalni tzotiꞌ chitit tet Komam Dios.a
6 Huneꞌ ewantikꞌa ye tuꞌ chala tato yu huneꞌ kuybꞌanile yet kolbꞌanile hex hunex mach Israelo hex tiꞌ,
chechah huneꞌ hematan chikochahanh hanhonh Israel honhtiꞌanh.
Hak tuꞌ xin hunxa je yinh Komam,
kaw ay heyokpaxo yinh huneꞌ haltebꞌilkano jetanh yu Komam Dios yinh Komam Jesucristo.
7 Yu iskꞌulchꞌanil iskꞌul Komam Dios,
yuxin yaqꞌ inmunilan walnikꞌojan Tzotiꞌ Kꞌul yet Kolbꞌanile xol anma yu yip Komam kaw munlako winhan.
8 Haninan xin islahobꞌal wekanilojan xol anma ayxako yul isqꞌabꞌ Komam Dios,
yaj xin yaqꞌ Komam iskꞌulchꞌanil iskꞌul wetan,
yuxinto chinekꞌan walaꞌkꞌojan teyet,
hex mach Israelo hex tiꞌ,
tato hantanhekano iskꞌulal iskꞌul Komam Jesucristo chaqꞌkano jet.
9 Komam Dios watxꞌenhe sunil sat yibꞌanhqꞌinal tiꞌ,
haꞌ aqꞌnhe huneꞌ inmuniltiꞌan yunhe waqꞌnihan heyohtanhelo yinh tzet chiyu yijni isbꞌa tzet nabꞌil yu Komam,
huneꞌ ewantikꞌa ye yet yalanhtokanoj.
10 Yuxin tinanh,
haꞌ yuninal Komam Dios chiꞌaqꞌni ohtanhelo sunilal ishelanil Komam tet ebꞌnaj yahawil yebꞌ ebꞌnaj ijbꞌalom ay yul satkanh.
11 Yaj yijkano isbꞌa huneꞌ tiꞌ yinh Komam Jesucristo Jahawil,
hakaꞌtikꞌa nabꞌil yu Komam Dios yettaxtikꞌa maxhto chiwatxꞌi yul sat yibꞌanhqꞌinal tiꞌ.
12 Yu hunxa je yebꞌ Komam Jesucristo,
yuxinto xayu kohitziko iskꞌatanh Komam Dios yinh sunil kokꞌul,
yuto xajayto yul janma yinh Komam.
13 Kaw chiwalan teyet machojabꞌ chikabꞌkonkanh hekꞌul yinh huneꞌ bꞌay lanhan yekꞌyaꞌ wanmatiꞌan,
to yu iskꞌulalo teyinh,
yuxin hak tuꞌ chiwaqꞌlehan.
Wal xin haꞌ kaw chiꞌaniko heyip.
Kaw xahan ayonh yu Komam Jesucristo
14 Yuton huneꞌ tiꞌ,
yuxinto kaw chinay jahnojan yinh sat Komam Dios,
Ismam Komam Jesucristo Jahawil.
15 Haꞌ Komam Dios kaw Mame,
haꞌ chiyeni isbꞌeybꞌal ebꞌnaj mame yul sat yibꞌanhqꞌinal tiꞌ yebꞌ yul satkanh.
16 Chinqꞌanan tet Komam Dios ta yu hanta issaqꞌalil iskꞌul,
chaqꞌ yip heyanma yinh Komam yu Komam Espíritu Santo,
17 kat yehikꞌo Komam Jesucristo yul heyanma yu heyaniko heyanma yinh,
yunhe ischꞌibꞌ hexahannhen Komam,
haxinwal hakaꞌ isnahatil yehayto xeꞌ hunu te teꞌ yul txꞌotxꞌ,
hak tuꞌ hexahannhen hebꞌa.
18 Hak tuꞌ xin chu istxumchalo heyu,
yebꞌ xin sunil anma yetxa Komam yehi,
tato mach isbꞌi hantakano issaqꞌalil iskꞌul Komam Jesucristo.
19 Chinqꞌanpaxojan tato cheyohtanhelo iskꞌulchꞌanil iskꞌul Komam tuꞌ.
Huneꞌ iskꞌulchꞌanil iskꞌul Komam Jesucristo tuꞌ kaw ekꞌbꞌal yibꞌanh tzet chijohtanheloj.
Hak tuꞌ xin kaw tzꞌajan chukaniko iskꞌulal Komam Dios teyinh.