Kolbꞌilonhxa yu iskꞌulal iskꞌul Komam Dios
2
Wal xin,
hex mach Israelo hex tiꞌ,
yaqꞌkano Komam Dios heqꞌinal yu yip Komam Jesucristo,
yuto yet yalanhtokanoj kamnajextikꞌa yu hemul yebꞌ yu istxꞌojal chewatxꞌe.
2 Yet yalanhto tuꞌ hanhkꞌanhe yinta istxꞌojal tzet ayayo yul sat yibꞌanhqꞌinal tiꞌ bꞌay tzujan hex;
heyijen tzet chal iskꞌul yespíritu naj chimunla xol jaqꞌeqꞌ,
huneꞌ chiꞌaniko yip anma chimanhkꞌon tzet chal Komam Dios.
3 Hakonhpax tuꞌanh,
hanhonh Israel honhtiꞌanh,
kaw hak tuꞌ jute kobꞌahanh yet payxa.
Tzujan honhanh yinta tzet choche konimanilanh,
chikoyijenanh tzet chal konimanil tiꞌanh,
koyijenpaxojanh tzet chal konabꞌalanh.
Kaw mulum yu kotitikojanh,
yuxin haꞌ hunonhanh ayonhtikꞌaktojanh yalanh isyaꞌtajil chati Komam Dios,
hakaꞌ anma mach ohtanheho Komam.
4 Yaj wal Komam xin,
kaw hantakano chitzꞌay iskꞌul Komam jinh,
yebꞌ kaw xahan ayonh yu.
5 Yu iskꞌulchꞌanil iskꞌul Komam,
yuxinto kochahkano huneꞌ kokolbꞌanil,
hun xin yu yaqꞌnikano Komam koqꞌinal yebꞌ Komam Jesucristo yet ayonhtoko yul isqꞌabꞌ kamikal yu sunil komul.
6 Kaw hun yu jitzitzbꞌikanh yinta Komam Jesucristo yu Komam Dios,
hunpaxo yu konhistzꞌonhbꞌan Komam Dios yebꞌ Komam Jesucristo bꞌey yul satkanh.
7 Yunhe isyenilo Komam yinh huneꞌ tiempohal chul kosataj tato kaw xahan ayonh yu,
yebꞌ ta kaw hanta iskꞌulchꞌanil iskꞌul Komam jinh yu Komam Jesucristo.
8 Yuto yu iskꞌulal iskꞌul Komam Dios,
yuxin kolbꞌilonh,
yu jako janma yinh Komam.
Maxhtajonh jichekanh huneꞌ tiꞌ,
to haꞌ Komam Dios sanhe jet.
9 Maxhtaj yu iskꞌulal chikowatxꞌe yuxinto chonhkolchahi,
machoj,
yuto ta hak tuꞌ chimjal kobꞌa kꞌulal.
10 Wal xin haꞌ Komam Dios konhwatxꞌeni,
konhyaniko yinh Komam Jesucristo yunhe kowatxꞌen sunil iskꞌulal;
hunteqꞌan tꞌinhbꞌabꞌilkano yu Komam Dios yet yalanhtokanoj yu koyijeni.
Xakonhok yinh aqꞌankꞌulal yebꞌ Komam Dios yu Komam Jesucristo
11 Wal tinanh xin,
nawetij ta hayet yalanhtokanoj hex mach Israelo hex tiꞌ chexhal-lax manhcircuncisiónal yu ebꞌnaj Israel.
Ebꞌnaj tuꞌ chal isbꞌa ebꞌnaj circuncisiónal,
yuto ayxako huneꞌ yechel circuncisión yinh isnimanil ebꞌnaj.
12 Wal yet payxa tuꞌ kaw machijexiko yul isqꞌabꞌ Komam Jesucristo;
machi heyok yinh konhobꞌ Israel,
yebꞌ yinh huneꞌ trato aqꞌbꞌilkano yu Komam Dios,
yebꞌ yinh tzet haltebꞌilkano yu Komam.
Yuxinto machi bꞌaytet yinh chikawxi hekꞌul,
machipaxo heDios yul sat yibꞌanhqꞌinal tiꞌ.
13 Yet payxa tuꞌ,
nahat heyehilo yinh Komam Dios,
wal tinanh xin ayexxako yul isqꞌabꞌ Komam Jesucristo,
yuxinto kaw hitznajexiko iskꞌatanh Komam Dios yu iskamikal Komam Jesucristo.
14 Haꞌ iskamikal Komam aqꞌnikano aqꞌankꞌulal koxol hanhonh Israel honhtiꞌanh yebꞌ hex mach Israelo hex tiꞌ;
hunxanhe konhobꞌal jukanoj.
Istanhtzenkanilo Komam huneꞌ kajlebꞌahil hakaꞌ peyabꞌ yeko koxol,
hanhonh Israel honhtiꞌanh yebꞌ hex mach Israelo hex tiꞌ.
15 Yet iskam Komam Jesucristo istanhtzenkanilo huneꞌ isley yaꞌ Moisés iqꞌnhe chejbꞌanile yebꞌ yinh tzet chu isyijelaxi.
Iswatxꞌenkanayo Komam huneꞌ akꞌ konhobꞌ yinh kabꞌebꞌ konhobꞌ tuꞌ,
hunxanhe xin yukanayo yinh Komam,
hak tuꞌ yu yanikaniko Komam aqꞌankꞌulal xol.
16 Yu iskamikal Komam Jesucristo yinh teꞌ kulus yuxinto yaqꞌkano tanho Komam huneꞌ howal ayko koxol,
konhyaniko Komam yinh aqꞌankꞌulal yebꞌ Komam Dios,
hunxanhe nimanilehal konhyutekanayoj.
17 Komam Jesucristo hul aqꞌno Tzotiꞌ kꞌul yet aqꞌankꞌulal teyet,
hex kaw nahattikꞌa heyehilo yinh Komam Dios,
yebꞌ xin jetanh hanhonh kawiltikꞌa jekojanh yinh Komam.
18 Yuton Komam Jesucristo,
yuxin hanhonh Israel honhtiꞌanh yebꞌ hex mach Israelo hex tiꞌ,
xayu kohitziko iskꞌatanh Komam Dios Mame,
huneꞌnhe xin Komam Espíritu Santo chonhhitznikoj.
19 Yuxin hex tiꞌ,
kaw matxa nan konhobꞌalo hex tinanh,
matxa tonhe chexekꞌ kolohi,
ayxa heyok yinh iskonhobꞌ Komam Dios,
ayexxapaxiko istzꞌajo yuninal Komam.
20 Hex tiꞌ lahan hex hakaꞌ hunu teꞌ nha watxꞌebꞌilkanh yibꞌanh xeꞌal.
Haxa hanhonhanh ischejabꞌ Komam Jesucristo jetiꞌanh xin yebꞌ ebꞌnaj chihalni tzotiꞌ chitit tet Komam Dios,
hakaꞌ xeꞌ huneꞌ nha tuꞌ jehanh.
Haxa Komam Jesucristo xin hakaꞌ chꞌen chꞌen kaw niman yelapno ayayto xeꞌo istxikin teꞌ nha,
hak tuꞌ ye Komam.a
21 Hakaꞌ hunu nha lanhan islatzꞌlaxkanh islokꞌal,
kaw xin kꞌulchꞌan ischahlen isbꞌa islatzꞌbꞌanil masan chijkano isbꞌa iswatxꞌikanoj,
hak tuꞌ je yinh Komam Jesucristo,
yatutxa Komam jehi.
Kaw yetonhxa,
yuto hunxa je yebꞌi.b
22 Haꞌ tinanh hunxanhe jehi yu xakexok yatuto Komam Dios yunhe yehikꞌo Komam Dios yul heyanma yu Komam Espíritu Santo.c