Kolwahanhwe teyinh hunun hex
6
Hex wuxhtaj,
hex wanabꞌ,
tato cheyila ta ay hunu ebꞌnaj juxhta chiꞌaykꞌay yinh hunu mule,
haxa hex yijom hex tet Komam Espíritu Santo,
kolwahanhwe yinh heyinikanh.
Yaj chewchotanhe chu hetzotel tet,
kaw nannhe heyu,
kꞌuxantaxka heyalaxpaxiko yinh hunu ilwebꞌal.
2 Wal xin kolwahanhwe teyinh yinh ej isyaꞌtajil chul teyibꞌanh,
hak tuꞌ xin chu heyijen isley Komam Jesucristo.
3 Tato ay mak chihalni ta kaw ay yelapno yehi,
yajaꞌ xin machi nino yelapnoj,
kaw haꞌtikꞌa chaqꞌ subꞌchaho isbꞌa ischukil.
4 Yuxin yilal jilni yinh tzet chikobꞌeybꞌalnhe hununonh,
ta kꞌul tzet chikobꞌeybꞌalnhe tuꞌ jaqꞌaꞌ tzalaho kokꞌul,
machojabꞌ tzet chaliko kokꞌul yinh hunuxa maka.
5 Wal xin kaw nananta jalni tet Komam yinh tzet chikowatxꞌe hununonh.
6 Haꞌ mak chichahni kuybꞌanile yinh Istzotiꞌ Komam Dios,
yaqꞌabꞌ hanikꞌo tzet ay yul isqꞌabꞌ tet mak chikuyni tuꞌ.
7 Mach cheyaqꞌ subꞌchaho hebꞌa,
yuto machi hunu mak chu yetliko yinh Komam Dios.
Haꞌ tzet chikotzꞌunu,
haꞌ chikohatxꞌpaxoj.
8 Tato haꞌ istxꞌojal tzet choche janma chikowatxꞌe,
haꞌtikꞌa kamikal chikochah ispajoj.
Wal tato haꞌ tzet chal Komam Espíritu Santo chikowatxꞌe,
haꞌ qꞌinal mach istanhbꞌal chikochah tet Komam Espíritu.
9 Yuxin kaw machojabꞌ chonhsikilo kowatxꞌen sunil iskꞌulal,
yuto ta mach chonhpax jintaj kaw chitikꞌa kochah ispaj sunil iskꞌulal chikowatxꞌe.
10 Yuxin kowatxꞌewe iskꞌulal yinh jet anmahil hatatikꞌa hanta chonhqꞌoji,
yaj ekꞌbꞌalto yilal kokolwa yinh makta ayxako yul isqꞌabꞌ Komam Dios.
Kachannhe yinh iskamikal Komam Jesucristo yaqꞌ tzalaho iskꞌul yaꞌ Pablo
11 ¡Ilwekꞌanabꞌi,
hankawinan chintzꞌibꞌnhetojan ichamta tzꞌibꞌ tiꞌ teyet!
12 Ebꞌnaj chischilbꞌa yalni teyet tato kaw yilal heyaqꞌni circuncidar hebꞌa,
to yunhe yokkano ebꞌnaj kꞌulal yul sat anma yuxin chal ebꞌnaj,
yebꞌ yunhe mach chiꞌaqꞌlax ekꞌoyaꞌ yanma ebꞌnaj yinta ebꞌnaj chihalnikꞌo iskamikal Komam Jesucristo.
13 Ebꞌnaj chichahni circuncisión tuꞌ,
kaw maxhtikꞌa chiqꞌoji ebꞌnaj isyijen tzet chal ley,
yajaꞌ chischilbꞌa ebꞌnaj yalni teyet tato yilal heyaqꞌni circuncidar hebꞌa,
yunhe yok iswinajil ebꞌnaj yet cheyijen yechel circuncisión yinh henimanil.
14 Wal hinan xin,
kaw matxa hunuxa bꞌaytet yinh wal waniko inwinajilan,
kachannhechꞌan yinh iskamikal Komam Jesucristo yinh teꞌ kulus.
Yuxin kaw kamom inxahan yinh sunil ismachiswalilal yul sat yibꞌanhqꞌinal tiꞌ.
Haxa huneꞌ sat yibꞌanhqꞌinal tiꞌ,
kamnaxapaxilo winhan yu iskamikal Komam Cristo.
15 Kaw matxa tzet chal yelapnoj ta chabꞌilxa circuncisión ju maka machoj,
haꞌ huneꞌ kaw aykano yip to pitzkꞌanajonhxa yinh iskayelal yinh Komam Jesucristo.
16 Yaqꞌabꞌ Komam Dios aqꞌankꞌulal,
yebꞌ xin tzꞌayojabꞌ iskꞌul Komam yinh sunil mak tzujan yinta huneꞌ kuybꞌanile tiꞌ,
haꞌ ton hunteqꞌan mak tuꞌ kaw Israel,
iskonhobꞌ Komam Dios yinh kaw isyelal.
17 Wal yinh tiempo chito insatatiꞌan xin,
matxa chiwochehan chinetalaxan,
yuto ayxako islutꞌal innimanilan yu anma.
Haꞌ xin chiyeniloj tato kaw ischejabꞌ Komam Jesucristo wehan.
18 Hex wuxhtaj,
hex wanabꞌ,
yaqꞌabꞌayo Komam Jesucristo iskꞌulchꞌanil iskꞌul teyibꞌanh hesunil.
¡Hakojabꞌ tuꞌ!