2 Wal hanin Pablo intiꞌan,

kaw chiwalkanojan teyet tato cheyije hechahni huneꞌ circuncisión,

kaw matzet chal yelapno Komam Jesucristo teyinh.

3 Kaw chiwalpaxkanojan teyet,

makxanhetikꞌa chiyijen ischahni huneꞌ circuncisión tuꞌ,

kaw yilal isyijenpaxo sunil tzet chal isley yaꞌ Moisés.

4 Makex chesayilo heyok kꞌulal yul sat Komam Dios yu heyijen tzet chal ley,

xahehekꞌilo hebꞌa yinh Komam Cristo yebꞌ yinh iskꞌulchꞌanil iskꞌul Komam Dios.

5 Wal hanhonh tiꞌ,

yu Yespíritu Komam Dios ayko jinh,

yuxinto kaw chijako yinh janma tato chonhok kꞌulal yul sat Komam Dios,

yu chijako janma yinh Komam.

6 Yuto hanhonh ayonhxako yul isqꞌabꞌ Komam Jesucristo,

kaw matxa tzet chaliloj ta ayko maka mach ayko huneꞌ circuncisión jinh,

wal xin haꞌ huneꞌ kaw yilal haꞌ ton janayto yul janma yinh Komam,

hak tuꞌ xin kaw xahan chijil jet anmahil.

7 Hex tiꞌ,

kaw tꞌinhanxatikꞌa heyehikoj.

¿Mak ok aqꞌokꞌule teyet yuxinto matxa cheyije kuybꞌanile kaw yel chala?

8 Haꞌ huneꞌ montebꞌal tuꞌ,

mach yinho Komam Dios chitita,

Komam awtenhe hex.

9 Naweti huneꞌ chihal-lax hakaꞌ tiꞌ:

«Kaw hanikꞌnhechꞌan yanhal ixim pan chiꞌaqꞌni sipkꞌaho sunil ixim harina,»

xhi.

10 Hanintiꞌan chikawxi inkꞌulan yinh Komam Dios tato mach nano chiyu hetxumni kuybꞌanile chiwaltotiꞌan.

Wal mak chiꞌok aqꞌokꞌule teyet yinh heyetanto hebꞌa tuꞌ xin,

kaw chiꞌay isyaꞌtajil yibꞌanh yu Komam Dios,

mach chiyok yinh makxanhetikꞌa anmahil.

11 Hex wuxhtaj,

hex wanabꞌ,

ta haꞌ jaqꞌni circuncidar kobꞌa chinekꞌan walaꞌkꞌojan,

kaw machim ayoko ishowal ebꞌnaj Israel winhan.

Yuto haꞌ iskamikal Komam Jesucristo yinh kulus,

haꞌ chiꞌaqꞌni chíwaho iskꞌul ebꞌnaj,

yuxin chiꞌok ebꞌnaj kajwal yinh.

12 ¡Haꞌ ebꞌnaj chꞌekꞌ aqꞌokꞌule ta cheyaqꞌ circuncidar hebꞌa,

qꞌaꞌkꞌulmi ta wiyom ishosnilo ebꞌnaj yetbꞌi isnimanil tuꞌ yinh hunelnhe!

13 Hex wuxhtaj,

hex wanabꞌ,

kaw awtebꞌil hex yu hekol-laxkanoj,

yajaꞌ maxhtaj yu hewatxꞌen istxꞌojal choche henimanil.

Haꞌ wal heyuten hebꞌa to cheyaqꞌle chejaꞌ hebꞌa teyet hunun hex,

yunhe heyeniloj tato kaw xahan cheyil hebꞌa.

14 Wal xin sunil tzet chal ley hunxanhechꞌan chejbꞌanilehal chukanoj,

chalni hakaꞌ tiꞌ:

«Xahan chawil hawet anmahil,

hakaꞌ hayaꞌilnhen habꞌa,»

xhihayoj.

15 Kaw nannhe heyu,

yuto ta chexok hechile hebꞌa kat hekꞌuxlenayto hebꞌa,

hex kaw hex cheyetato hebꞌa yinh hakaꞌ tuꞌ.

16 Chiwalan teyet hex wuxhtaj,

hex wanabꞌ,

bꞌeybꞌalnhewe hakaꞌ tzet choche Komam Espíritu.

Mach cheyaqꞌ yubꞌ istxꞌojal choche henimanil.

17 Sunil istxꞌojal choche konimanil iswatxꞌeꞌ,

chikajwa yinh tzet choche Komam Espíritu Santo,

hakpax tuꞌ Komam Espíritu chikajwa yinh istxꞌojal choche konimanil iswatxꞌeꞌ.

Yuxin chiskajle isbꞌa Komam Espíritu Santo yebꞌ sunil istxꞌojal choche konimanil iswatxꞌeꞌ.

Chiskajle isbꞌa hunun,

yuxinto mach chu hewatxꞌen tzet choche hekꞌul.

18 Yaj tato haꞌ Komam Espíritu Santo chexijbꞌani,

kaw matxa ayexokto yalanh yip ley chal tuꞌ.

19 Kaw ixtanh ye sunil istxꞌojal chitoiswatxꞌe anma tzujan yinta tzet choche isnimanil;

chiꞌixli,

chiwinajli,

chiswatxꞌen tzettaj txꞌixobꞌal,

chisqꞌaytzeniko istxꞌojal jinh.

20 Chiꞌay jahno sata tioxh,

chiskunnhe yet anmahil,

machi aqꞌankꞌulal xol yebꞌ yet anmahil,

howalnhetikꞌa chu,

kaw tzꞌeꞌ yinh yetbꞌi,

chako ishowal yinh yet anmahil.

Txꞌojnhetikꞌa chu istxumni,

chako pohlebꞌahil kat isbꞌosnilo isbꞌa.

21 Mach choche yilaꞌ tzet ay yet anmahil,

chismaqꞌkamo yet anmahil,

ukꞌum teꞌ,

istzannhetikꞌa yaniko isbꞌa xol hunteqꞌan qꞌinh machiswalil,

yebꞌ peqꞌ chute isbꞌa.

Kaw xin aytopaxo hunteqꞌan lahan yebꞌ hunteqꞌan tiꞌ chitoiswatxꞌe.

Kaw xatikꞌa walan teyet yet yalanhtokanoj,

mak chiꞌuten hunteqꞌan tiꞌ,

mach chiꞌapni iskꞌatanh Komam Dios.

22 Wal sunil tzet chaqꞌ Komam Espíritu Santo kowatxꞌeꞌ;

haꞌ koxahannhen kobꞌa,

tzalahilal,

aqꞌankꞌulal,

nimankꞌulal,

hunkuentanhe kokꞌul,

iskꞌulchꞌanil kokꞌul,

yebꞌ xin janayto yul janma yinh Komam.

23 Jinayo kobꞌa,

kokachni kobꞌa yinh istxꞌojal.

Haꞌ hunteqꞌan tiꞌ machi ley chu iskachwa yinh.

24 Yuxinto sunil mak ayxako yul isqꞌabꞌ Komam Jesucristo,

kaw xaꞌisbꞌejkano bꞌeybꞌale iqꞌbꞌiltikꞌa yu,

yebꞌ tzet choche yanma,

yebꞌ sunil istxꞌojal choche isnimanil,

hunteqꞌan tuꞌ xaꞌelkano yu iskamikal Komam yinh kulus.

25 Wal xin yu ayxako Komam Espíritu Santo jinh,

yuxin kaw ekꞌojonhwe hakaꞌ choche iskꞌul Komam.

26 Mach loloꞌo chijute kobꞌa,

mach chonhbꞌuchwa jinh hununonh,

yebꞌ xin machojabꞌ chichiwa kokꞌul jinh.