4
Ay hunxa yechel chiwalan teyet.
Qꞌinalo hunu nichꞌan unin chischah ismajul tet ismam,
kaw yahawil chuko yinh tzet ay ismam tuꞌ,
yaj xin yet nichꞌanto kaw maxhto yip yinh tzet chiꞌaqꞌlax ismajulo tuꞌ,
to hakaꞌto chejabꞌ yehi.
2 Yet nichꞌanto ay mak chitanheni,
yebꞌ xin ilbꞌiltopaxo huneꞌ ismajul tuꞌ masanto yet chꞌapni istiempohal bꞌay halbꞌilkano yu ismam,
kat yokkano yahawo yinh ismajul tuꞌ.
3 Kaw xin hak tuꞌ je hanhonh tiꞌ;
yet yalanhtokanoj ayonhayo yalanh yip sunil tzet chal anma.
4 Haxa yet yijni isbꞌa yapni istiempohal xin,
yaniti Komam Dios Iskꞌahol,
pitzkꞌana yinh huneꞌ ix ix yalanh yip isley yaꞌ Moisés.
5 Hul Komam yunhe konhyinilo yalanh ley,
yebꞌ yunhe konhischahni Komam Dios yuninaloj.
6 Yunhe isyenilo Komam tato kaw yuninalxa Komam jehi,
yuxin yati Komam Yespíritu Iskꞌahol yul janma.
Yu Yespíritu Komam tuꞌ yuxinto chijal tet Komam Dios yinh sunil janma hakaꞌ tiꞌ:
«Hach Inmaman,»
konhchi.
7 Wal tinanh xin,
matxa chejabꞌo jehi,
to kaw yuninalxa Komam jehi.
Yu huneꞌ tuꞌ xin,
kaw el yinh iskꞌul Komam Dios yaqꞌni huneꞌ komatan,
yaj yu Komam Jesucristo,
Iskꞌahol Komam tuꞌ.
Kaw ok yinh iskꞌul yaꞌ Pablo yinh ebꞌnaj ayxako yul isqꞌabꞌ Komam Jesucristo
8 Yet yalanhto tuꞌ yet maxhto cheyohtanhelo Komam Dios,
kaw chejabꞌ heyehiko tet hunteqꞌan chal anma diosalil.
Wal xin,
kaw mach dioso hunteqꞌan tuꞌ.
9 Tinanh xin,
heyohtaxa Komam Dios,
maka haꞌ chijute jalni,
to kaw ohtabꞌilhexxa yu Komam.
¿Tzet yinh yuxinto chexmeltzopaxto yinh hunteqꞌanxa nan kuybꞌanilehal kaw mach tꞌinhano yehikoj,
kat heyokpaxo ischejabꞌo hunelxa?
10 wal hex hex tiꞌ,
cheyije qꞌinh chiꞌekꞌtzelax yinh isbꞌi tzꞌayik,
yebꞌ yinh isbꞌi ixahaw,
yebꞌ yet chishelni isbꞌa tiempo,
yebꞌ qꞌinh chiꞌekꞌtzelax yinh hunun habꞌil.
11 ¡Kaw chiꞌok yinh inkꞌulan yet chinnanitijan,
waqꞌaꞌ tato kaw nabꞌnhe kinmunlahan texol!
12 Hex wuxhtaj,
hex wanabꞌ,
kaw chiwalan teyet,
lahanojabꞌ cheyute henabꞌal hakaꞌ innabꞌalan,
yuto yet wekꞌan texol wute innabꞌalan hakaꞌ hex.
Wal xin matolo yu ay hunu istxꞌojal heyute winhan yuxin hak tuꞌ walnitojan teyet,
machoj.
13 Wal xin kaw heyohtaxa ta hayet bꞌabꞌelal,
yet walnikꞌojan kuybꞌanile yet kolbꞌanile teyet kaw yaꞌay hinan yu huneꞌ yabꞌil.
14 Haꞌ huneꞌ yabꞌil tuꞌ,
kaw ilwebꞌal teyinh,
yajaꞌ mach kinhehinkꞌulnhehan,
mach xin kinhemanhkꞌotojan yu huneꞌ yabꞌil tuꞌ.
Wal xin kaw hakaꞌ hunu ischejabꞌ Komam Dios satkanh,
hak tuꞌ yu kinhechahnihan,
yebꞌ hakaꞌ kaw Komam Jesucristo.
15 ¿Tzet yinh yuxin matxa huneꞌ tzalahilal tuꞌ yul heyanma tinanh?
Chiwalan huneꞌ iskꞌulal tiꞌ teyinh,
hex tiꞌ kaw heyoche heyilti isbꞌaqꞌ hesat heyaqꞌni wetan yu iskꞌulchꞌanil hekꞌul winhan.
16 Wal tinanh xin,
¿tom ayko inhowalan teyinh yet chiwalnitojan isyelal tiꞌ teyet?
17 Haꞌ hunteqꞌan anma chexmonten tuꞌ,
kaw ayko yanma ebꞌnaj teyinh,
yajaꞌ xin kaw mach kꞌulo nabꞌil teyinh yu ebꞌnaj.
Tonhe choche ebꞌnaj kexyiqꞌalo koxolanh yunhe heyaniko heyanma yinh ebꞌnaj.
18 Kaw kꞌul janiko anma yinh kokꞌul,
yajaꞌ tanhe kꞌul chikonako yinh,
yebꞌ tato istoholal nabꞌil ju.
Aytam saqꞌal ta hak tuꞌ chinheyutehan yinh hunun tzꞌayik,
maxhnhetaj yet ayinan tekꞌatanh chinheyanikojan yinh hekꞌul.
19 Hex tiꞌ kaw hakaꞌ wuninalan heyehi,
lanhan yekꞌyaꞌ wanmahan hunelxa heyu,
hakaꞌ hunu ix ix chiꞌabꞌen isyaꞌil yet chiwatxꞌi iskꞌul.
Yaj mach chisbꞌej wabꞌenan huneꞌ isyaꞌtajil tiꞌ masanto chiwatxꞌikaniko Komam Jesucristo teyinh.
20 Majal ayinan texol tinanh yunhe insaynihan hunuxa tzet chiyu intzotelan teyet.
Wal xin kaw kꞌaynajilo inkꞌulan teyinh.
Kuybꞌanil yinh istzotiꞌal ix Agar yebꞌ xin yaꞌ Sara
21 Makex chexmeltzopaxto heyijen tzet chal isley yaꞌ Moisés heyalni,
halwe wetan:
¿Tom kaw maxhto bꞌay cheyabꞌe tzet chal huneꞌ ley tuꞌ?
22 Chal yul Yum Komam Dios tato ay kawanh iskꞌahol icham Abraham;
huneꞌ naj yebꞌ ix Agar,
ix chejabꞌ;
huneꞌxa naj xin yebꞌ yaꞌ Sara,
yaꞌ kaw yixal yaꞌ Abraham tuꞌ;
yaꞌ Sara tuꞌ mach chejabꞌo yaꞌ.
23 Naj Ismael,
yunin ix Agar,
mach kꞌaybꞌalokꞌule yu ispitzkꞌa naj.
Wal yaꞌ Isaac,
yunin yaꞌ Sara,
kꞌaybꞌalkꞌule yu ispitzkꞌa yaꞌ yu Komam Dios,
yuto kaw ixnamxa yaꞌ yet ispitzkꞌahi,
yunhe yijni isbꞌa tzet haltebꞌilkano yu Komam Dios yinh yaꞌ.
24 Haꞌ kawanh ebꞌix tuꞌ,
yechel kabꞌebꞌ istrato Komam Dios ye ebꞌix.
Ix Agar,
ix mebꞌaꞌ yehi,
yechel huneꞌ trato iswatxꞌe Komam Dios bꞌey iswiꞌ witz Sinaí,
yuxinto sunil makta ayko yinh huneꞌ trato tuꞌ,
hakaꞌta pitzkꞌana yu yok chejabꞌoj.
25 Ix Agar tuꞌ,
yechel istrato Komam Dios yaqꞌ tet yaꞌ Moisés bꞌey witz Sinaí yul ismajul Arabia,
yechelpaxo konhobꞌ Jerusalén ye ix.
Anma ay yul konhobꞌ Jerusalén tuꞌ,
ayko yalanh ley aqꞌbꞌil bꞌey iswiꞌ witz Sinaí.
26 Wal huneꞌxa istrato Komam Dios xin,
yechel yaꞌ Sara yixal icham Abraham yehi,
yuto mach chejabꞌo ye yaꞌ yalanh ley.
Yajaꞌ wal huneꞌ Jerusalén ay yul satkanh,
mach ayoko yalanh chejbꞌanile,
hanhonh tiꞌ xin yuninal jehi.
27 Yuto chal yul Yum Komam Dios:
«Hach ix machi hawunin,
yebꞌ maxhtikꞌa chil yinh hunu yunin,
tzalahanh.
Awanh yinh tzalahilal hach maxhtikꞌa hawohtajo isyaꞌtajil ispitzkꞌa nixhte unin,
yuto haꞌ ix ix hinbꞌilkanoj kaw txꞌiꞌalto yunin ix sata ix ay yichamil,»a
xhihayoj.
28 Hex wuxhtaj,
hex wanabꞌ,
hex tiꞌ hakaꞌ yaꞌ Isaac heyehi,
uninale halbꞌilkano yu Komam Dios ta chipitzkꞌahi.
29 Yet payxa tuꞌ naj mach kꞌaybꞌalkꞌule yu ispitzkꞌahi,
kaw kaj yil naj yaꞌ pitzkꞌa yu yip Komam Espíritu Santo.
Hakaꞌ yu iskajlax yaꞌ Isaac yu naj Ismael,
hak tuꞌ xin yepaxo tinanh.
30 Yajaꞌ ¿tzet xhi yul Yum Komam Dios?
Wal xin chal hakaꞌ tiꞌ:
«Tzumbꞌeto ix chejabꞌ yebꞌ yunin,
yuto naj yunin ix tuꞌ,
kaw mach chu yaqꞌni kabꞌo isbꞌa naj yinh tzettaj chischah naj yunin ix mach chejabꞌoj,»b
xhihayoj.
31 Yuxin,
hex wuxhtaj,
hex wanabꞌ,
wal hanhonh tiꞌ mach yuninalo ix chejabꞌ jehi,
to yuninal ix mach chejabꞌoj.