Maxhtaj ley ayko yipo janma
3
Hex ah Galacia hex tiꞌ,
kaw suk hex.
¿Mak aqꞌni etanoto henabꞌal yuxin mach cheyije kuybꞌanile kaw yeli?
Hanhonhtiꞌanh xajalanh teyet yinh iskamikal Komam Jesucristo yinh teꞌ kulus hakaꞌojtam kaw heyil iskam Komam.
2 Tinanh xin,
hanhkꞌanhe huneꞌ tiꞌ chinqꞌambꞌehan teyet:
¿Tom hechah Yespíritu Komam Dios yu heyijen isley yaꞌ Moisés,
mato yu heyayto huneꞌ kuybꞌanile yet kolbꞌanile yul heyanma?
3 ¿Tom kaw hunelnhe machi hewiꞌ?
Hayet heyok yul isqꞌabꞌ Komam Dios,
haꞌ Komam Espíritu Santo haꞌ ok heyetbꞌihoj.
Haxa tinanh xin ¿tom cheyoche hekolbꞌanil yu tzet chewatxꞌe cheyute heyalni?
4 Kaw tzetkꞌa isyaꞌtajil heyil yu ayexxako yul isqꞌabꞌ Komam Jesucristo,
yajaꞌ etza kaw nabꞌnhe.
Hantam saqꞌal ta mach nabꞌnheho heyil isyaꞌtajil tuꞌ.
5 Yaqꞌ Komam Dios Espíritu Santo jet,
isyenipaxo kꞌaybꞌalkꞌule koxol;
yajaꞌ ¿tzet yu cheyabꞌeko tiꞌ?
Wal xin mach yuho koyijen isley yaꞌ Moisés;
to yu janiko janma yinh Tzotiꞌ Kꞌul yet Kolbꞌanile aqꞌbꞌil jet.
6 Hakaꞌ icham Abraham,
yayto icham yul yanma yinh Komam Dios,
yuxinto ok icham kꞌulal yul sat Komam.
7 Yuxin tinanh yilal heyohtanhenkaniloj mak yeli titna yinh yuninal icham Abraham,
to hanhkꞌanhe mak chayto yul yanma yinh Komam Dios.a
8 Yet payat tiempo tuꞌ,
tzꞌibꞌnhebꞌilkanayo yul Yum Komam Dios tato ebꞌnaj mach Israeloj chikan ebꞌnaj kꞌulal yul sat Komam Dios yuto chayto ebꞌnaj yul yanma yinh Komam.
Yuxinto halbꞌilkano huneꞌ tzotiꞌ tiꞌ tet icham Abraham,
bꞌay chala:
«Hawu yuxinto kaw sunil anma yulajla konhobꞌ bꞌay chiwaqꞌan iskꞌulal inkꞌulan,»b
xhihayoj.
9 Yuxin maknhetikꞌa chichahnayto Istzotiꞌ Komam yul yanma,
haꞌ hun chichahni iskꞌulchꞌanil iskꞌul Komam yinta icham Abraham,
yuto haꞌ icham bꞌabꞌel chahnayto yul yanma yinh Komam.
10 Sunil hunteqꞌan anma ayko yanma yinh isley yaꞌ Moisés,
chitit ishowal Komam Dios yinh,
hakaꞌ yalni yul Yum Komam bꞌay chala:
«Chitit ishowal Komam Dios yibꞌanh hunteqꞌan anma mach chiqꞌoji isyijen sunil ley tzꞌibꞌnhebꞌilkanayo yul Yum Komam,»
xhihayoj.
11 Yuxinto habꞌan kotxumni tato machi hunu anma chikankano kꞌulal yul sat Komam Dios yu isyijen tzet chal ley,
yuto chal yul Yum Komam hakaꞌ tiꞌ:
«Haꞌ mak xakan kꞌulal yul sat Komam Dios,
yinhnhe Komam ayko yanma,
yuxin ay isqꞌinal mach istanhbꞌal,»c
xhihayoj.
12 Wal isley yaꞌ Moisés tuꞌ,
matzet chala tato yilal kochahnayto yul janma yinh kat kochahni koqꞌinal mach istanhbꞌal.
To haꞌ koyijeni haꞌ chischilbꞌa yalni jet,
yuto chal yul Yum Komam hakaꞌ tiꞌ:
«Maknhetikꞌa chiyijen sunil tzet chal ley,
ay isqꞌinal,»d
xhihayoj.
13 Yajaꞌ xin Komam Jesucristo kolnhehonhilo yalanh isyaꞌtajil huneꞌ ley tuꞌ,
yaniko isbꞌa Komam yalanh isyaꞌtajil koseleloj.
Yuxinto chal yul Yum Komam Dios:
«Kaw tzꞌaktiꞌnhebꞌil mak chiꞌah lokno yinh hunu teꞌ kulus,»e
xhihayoj.
14 Hak tuꞌ xin yaqꞌle Komam Jesucristo yunhe sunil anma mach Israeloj chichahnipaxo iskꞌulal iskꞌul Komam,
huneꞌ haltebꞌil tet icham Abraham.
Hak tuꞌ xin kosunil chikochah Yespíritu Komam Dios yu chijayto yul janma yinh Komam Jesucristo,
huneꞌ haltebꞌilkano yu Komam.
Isley yaꞌ Moisés yebꞌ tzet haltebꞌilkano yu Komam Dios
15 Hex wuxhtaj,
hex wanabꞌ,
chiwakojan huneꞌ yechel tiꞌ teyet.
Hakaꞌ yet ay hunu mak chiwatxꞌen hunu istrato,
chako isbꞌi yinh yumal huneꞌ trato tuꞌ,
hak tuꞌ xin kaw tꞌinhan chukanoj.
Kaw matxa hunuxa mak chiyu yetantoj,
yebꞌ xin machi hunu mak chiyu yanipaxiko yaqꞌbꞌil.
16 Hak tuꞌ yu iswatxꞌenkano Komam Dios huneꞌ istrato tet jichmam Abraham yebꞌ tet iskꞌahol.
Mach chal yul Yum Komam Dios hakaꞌ tiꞌ:
«Tet sunil hakꞌahol,»
mach xhihoj.
Wal xin kaw mach txꞌiꞌalo yute yalni,
haꞌ yute yal-laxkano tet icham Abraham tuꞌ tato huneꞌnhe,
chalni hakaꞌ tiꞌ:
«Hakꞌahol,»
xhikanoj.
Huneꞌ tuꞌ yinh Komam Jesucristo chitzoteli.f
17 Haꞌ chal yelapno huneꞌ chiwaltiꞌan,
to iswatxꞌe Komam Dios istrato yebꞌ icham Abraham,
kaw xin tꞌinhan yutekano Komam.
430 habꞌilxa iswatxꞌenkano Komam huneꞌ istrato tuꞌ yul isley yaꞌ Moisés,
yuxin kaw mach chu istanhtzenilo isley yaꞌ Moisés tuꞌ tzet haltebꞌilkano yu Komam,
yebꞌ xin mach chu yinilo yip.
18 Yaj tato yu koyijen ley,
yuxinto yaqꞌ Komam Dios huneꞌ haltebꞌil jet,
kaw machim chiyu jalni tato matanil ye huneꞌ tuꞌ.
Wal xin haltebꞌil tet icham Abraham yu Komam yinh yaqꞌnikano ismatanoj.
19 Yuxin ¿tzet chiꞌokniko isley yaꞌ Moisés chal tuꞌ?
Wal xin kaw tzujanxa aqꞌlax huneꞌ ley tuꞌ yunhe isyeniloj tato mach yijemo anma.
Aqꞌlax huneꞌ ley tuꞌ masanto yet ispitzkꞌa huneꞌ mak titna yinh yuninal icham Abraham,
huneꞌ mak ay yet ischahni tzet haltebꞌil yu Komam Dios.
Huneꞌ ley tuꞌ,
ángel ebꞌnaj aqꞌnhe tet yaꞌ Moisés yunhe yalnilto yaꞌ tet konhobꞌ Israel.
20 Yajaꞌ matxa yilalo ay hunuxa mak chiꞌok xolbꞌal,
yuto huneꞌxanhe mak yaqꞌkano istrato,
haꞌ ton Komam Dios.
Ismunil isley yaꞌ Moisés
21 ¿Tom xin kaw chikajwa isley yaꞌ Moisés yinh tzet haltebꞌilkano yu Komam Dios chal tuꞌ?
¡Machoj!
Qꞌinalo tato chiqꞌoji ley tuꞌ yaqꞌni koqꞌinal,
¿chimyu jok kꞌulal yul sat Komam Dios yu koyijen tzet chal ley?
Wal xin machoj.
22 Chal yul Yum Komam Dios hakaꞌ tiꞌ:
«Kaw sunil mak ayikto yalanh mule,
yuxin makta chiyako yanma yinh tzet chal Komam Jesucristo chischah tzet haltebꞌil yu Komam Dios,»
xhihayoj.
23 Yet yalanhto maxhto chihul huneꞌ mak bꞌay wal janiko janma,
kaw yalanh yip ley ayonhiktoj,
yet ayonhiko jechman isyelax mak bꞌay chijako janma.
24 Yuxin haꞌ huneꞌ ley tuꞌ jilomalnhe yehi,
hakaꞌ chu yilni hunu naj chejabꞌ hunu nichꞌan unin,
hak tuꞌ konhisbꞌeytzenti ley tuꞌ iskꞌatanh Komam Jesucristo,
yunhe janiko janma yinh Komam,
kat xin jokkano kꞌulal yul sat Komam Dios.
25 Yaj xin xajako janma yinh Komam tinanh,
yuxin matxa ayonhoko yul isqꞌabꞌ huneꞌ ley chitikꞌa konhijbꞌani.
26 Yu xaheyako heyanma yinh Komam Jesucristo,
yuxinto yuninalxa Komam Dios heye tinanh.
27 Hayet yahkano haꞌ hewiꞌ hehunikaniko yinh Komam Jesucristo,
haxa Komam ayko hakaꞌ xilqꞌapehal teyinh.
28 Kaw xin machi yok yinh tato Israel maka mach Israeloj.
Kaw matxa yok yinh ta winaj maka ix,
yuto kaw hunxanhe je yinh Komam Jesucristo.
29 Yuxin tato ayonhxako yul isqꞌabꞌ Komam Jesucristo,
kaw hakaꞌ yuninal icham Abraham jehi,
haꞌ hunonh chikochah tzet haltebꞌilkano yu Komam Dios tet icham Abraham tuꞌ.