3 Hak tuꞌ xin yu yok yaꞌ Pablo iskutxbꞌano kabꞌxa yaqꞌbꞌil teꞌ siꞌ kaw tajin,

hayet yanikto yaꞌ teꞌ yul qꞌaꞌ xin,

isxiwilti huneꞌ noꞌ labꞌa xol qꞌaꞌ,

yul noꞌ ischino isqꞌabꞌ yaꞌ,

yokkano tꞌunhno noꞌ yinh isqꞌabꞌ yaꞌ Pablo tuꞌ.

4 Hayet yilni ebꞌnaj ah konhobꞌ tuꞌ ta tꞌunhaniko noꞌ labꞌa tuꞌ yinh isqꞌabꞌ yaꞌ,

yalni ebꞌnaj tet hunun hakaꞌ tiꞌ:

—Huneꞌ naj tiꞌ kaw potxꞌom anmami naj,

wal xin walka kaw yaꞌta mayu iskolcha naj yibꞌanh haꞌ mar,

yaj kaw yilal istohlan naj ismul yuxin kaw chikamo naj,

xhi ebꞌnaj.

5 Wal yaꞌ Pablo tuꞌ xin,

istzikayo yaꞌ isqꞌabꞌ yibꞌanh qꞌaꞌ,

yaykꞌay noꞌ labꞌa tuꞌ,

maxhtikꞌa xin nichꞌano tzet yu yaꞌ yu noꞌ.

6 Kaw sunil ebꞌnaj chꞌechman ismalkanh isqꞌabꞌ yaꞌ Pablo tuꞌ,

maka iskamayo yaꞌ.

Kaw xin hunep ismaj ebꞌnaj tato ay chu yaꞌ Pablo tuꞌ,

yajaꞌ yet yilni ebꞌnaj tato maxhtikꞌa tzet yu yaꞌ,

ishelni ebꞌnaj isnabꞌal,

yichiko ebꞌnaj yalni hakaꞌ tiꞌ:

—Huneꞌ naj tiꞌ kꞌuxan tato dios naj,

xhi ebꞌnaj.

7 Iskawilal tuꞌ xin ay istxꞌotxꞌ naj iswiꞌehal yeko xol anma tuꞌ,

Publio isbꞌi.

Haꞌ naj xin konhchahnihanh yatut,

kaw kꞌul konhyilanh naj yinh oxebꞌ tzꞌayik.

8 Kꞌuxan ayto ismam naj Publio tuꞌ sat txꞌat yu huneꞌ niman qꞌaꞌ yebꞌ xin yu chiꞌkꞌul.

Hak tuꞌ xin yu yokto yaꞌ Pablo istukleno naj bꞌay hilan tuꞌ,

yok yaꞌ txahlo xin.

Lahwi istxahli yaꞌ,

yanayo yaꞌ isqꞌabꞌ yibꞌanh naj yaꞌay tuꞌ,

iskawxikanh naj.

9 Yu huneꞌ tzet yu tuꞌ xin sunil anma yaꞌay apni iskꞌatanh yaꞌ Pablo,

iskawxikanh anma sunil.

10 Kaw tzetkꞌa tzettaj ye tuꞌ salax jetanh yu anma tuꞌ.

Haxa yet kotohanh yul barco xin yaqꞌnipaxo ebꞌnaj tzettaj ye tuꞌ chiꞌokniko juhanh yinh kobꞌelanh.

11 Oxebꞌ ixahaw xin ayonhanh bꞌey huneꞌ isla Malta tuꞌ,

lahwi tuꞌ xin jokanh yul huneꞌ teꞌ barco tonhe txajan yechman yekꞌ nhabꞌil,

ah Alejandría teꞌ.

Yinh sat teꞌ barco tuꞌ xin ayko yechel kabꞌebꞌ tioxh,

Cástor isbꞌi huneꞌ,

wal hunxa xin Pólux isbꞌi.

12 Hak tuꞌ xin yu japnihanh bꞌey yul konhobꞌ Siracusa,

jehayojanh bꞌey tuꞌ yinh oxebꞌ tzꞌayik.

13 Lahwi tuꞌ xin kotopaxojanh,

japnihanh yul konhobꞌ Regio.

Haxa hunxa tzꞌayik xin,

yichiko huneꞌ jaqꞌeqꞌ chitit yinh sur,

haxa yinh iskabꞌ tzꞌayik japnihanh bꞌey konhobꞌ Puteoli.

14 Haꞌ tuꞌ chahloyo hunteqꞌan ebꞌnaj ayxako yul isqꞌabꞌ Komam juhanh,

yalni ebꞌnaj jetanh tato chonhkankanojanh huneꞌ semanahil iskꞌatanh ebꞌnaj.

Lahwi tuꞌ xin kotopaxojanh yinh kobꞌelanh bꞌey konhobꞌ Roma.

15 Ebꞌnaj xachahni Komam yul yanma ay yul konhobꞌ Roma tuꞌ,

kaw yohtaxa ebꞌnaj tato chonhapnihanh yuxin tit ebꞌnaj konhischahbꞌanh yul bꞌeh;

ay ebꞌnaj hata bꞌey huneꞌ niman txonhbꞌal,

Apio isbꞌi,

konhyechmahanh.

Aypaxo ebꞌnaj juxhta bꞌey bꞌay chihal-lax Oxebꞌ Waybꞌalil.

Hayet yilni yaꞌ Pablo ebꞌnaj tuꞌ,

yaqꞌni yaꞌ yuchꞌandiosal tet Komam Dios,

yiqꞌni yip yanma yaꞌ.

16 Hayet japnihanh yul konhobꞌ Roma tuꞌ,

yaniko naj capitán ebꞌnaj presowom yul isqꞌabꞌ naj yahawil ebꞌnaj soldado,

wal yaꞌ Pablo xin nan alaxikto yaꞌ yul huneꞌ nha yebꞌ huneꞌ naj soldado chitanheni.

17 Iskabꞌwihalxa japnihanh xin,

yawten yaꞌ Pablo ebꞌnaj iswiꞌehal yeko xol ebꞌnaj Israel ay yul konhobꞌ Roma tuꞌ,

yet iskutxiko ebꞌnaj xin,

yalni yaꞌ Pablo tuꞌ hakaꞌ tiꞌ:

—Hex wuxhtaj,

walka kaw machi inmulan insayikojan yinh ebꞌnaj Israel yebꞌ yinh iskuywabꞌal ebꞌnaj ichamta jichmam,

yaj xin kinyakojan ebꞌnaj yahawil Israel tiꞌ preso yul konhobꞌ Jerusalén;

lahwi tuꞌ kinyanipaxikojan ebꞌnaj yul isqꞌabꞌ ebꞌnaj romano tiꞌ.

18 Yajaꞌ yet isqꞌambꞌen ebꞌnaj ah Roma tuꞌ wetan tzet inmulan,

kaw yoche ebꞌnaj kinisbꞌejtzoꞌan yuto kaw machi hunu inmulan wakojan chiqꞌanni kamikal winhan.

19 Wal ebꞌnaj Israel xin kaw mach isje ebꞌnaj kinisbꞌejtzoꞌan,

yuxin hinqꞌanti hinbꞌahan tet naj emperador,

jahaw ay Roma tiꞌ,

yunhe haꞌ naj chiꞌilni tzet chinelikojan.

Wal hinan xin kaw matzet chiwakojan ismulo ebꞌnaj jet konhobꞌ tuꞌ.

20 Yuton huneꞌ tiꞌ yuxin makexwawtehan,

yunhe kexwilnihan kat walnihan teyet;

yuto ay huneꞌ mak echmabꞌil yul ju hanhonh Israel honh tiꞌ,

yuton huneꞌ tuꞌ yuxin kꞌalbꞌil hinan yu chꞌen cadena tiꞌ,

xhi yaꞌ.

21 Yalni ebꞌnaj tet yaꞌ Pablo tuꞌ:

—Wal honhtiꞌanh maxhto hunu carta chihul jetanh yu ebꞌnaj ay yul ismajul Judea tuꞌ yinh tzet haweh hach tiꞌ,

machipaxo hunu ebꞌnaj juxhta israelita ay bꞌey tuꞌ chul halno jetanh yinh hunu tzet ye tuꞌ txꞌoj tawinh.

22 Wal tinanh chijochehanh jabꞌehanh tzet chꞌekꞌ yinh hanabꞌal,

yuto kaw johtajanh tato kaw sunil bꞌay txꞌoj istzotel anma yinh huneꞌ kuybꞌanile tiꞌ,

xhi ebꞌnaj tet yaꞌ Pablo tuꞌ.

23 Hak tuꞌ yu yalnikano ebꞌnaj tzet tzꞌayikal chiꞌapni ebꞌnaj iskꞌatanh yaꞌ Pablo tuꞌ.

Hayet yapni istzꞌayikal tuꞌ xin,

kaw tzetkꞌa yu yapni ebꞌnaj iskꞌatanh yaꞌ.

Yichiko yaꞌ yalni Istzotiꞌ Komam Dios tet ebꞌnaj yinh sakꞌayalil masanta yinh qꞌejbꞌiyal.

Tzotel yaꞌ tet ebꞌnaj yinh tzet tzꞌibꞌnhebꞌilkano yu yaꞌ Moisés yebꞌ tzet tzꞌibꞌnhebꞌilpaxkano yu ebꞌyaꞌ ischejabꞌ Komam Dios ekꞌlena yet payat,

yunhe yanayto ebꞌnaj yul yanma,

kat yaniko isbꞌa ebꞌnaj yul isqꞌabꞌ Komam Jesucristo.

24 Ay xin ebꞌnaj anayto yul yanma yinh tzet yal yaꞌ Pablo tuꞌ,

aypaxo xin ebꞌnaj mach anayto yul yanma.

25 Yaj yu mach lahano istxumni ebꞌnaj yinh tzet yal yaꞌ Pablo tuꞌ,

istzabꞌniko ebꞌnaj istohi.

Yuxin yal yaꞌ Pablo tet ebꞌnaj hakaꞌ tiꞌ:

—Kaw yeltikꞌa chiyal Komam Espíritu Santo yet yaqꞌni Komam yalaꞌ yaꞌ Isaías,

ischejabꞌ Komam Dios,

tet ebꞌnaj jichmam,

yet yalni Komam tet yaꞌ hakaꞌ tiꞌ:

28 »Tinanh xin kaw kam cheyabꞌekanoj tato yinh huneꞌ tiempo chijicheko tiꞌ,

chihal-laxikꞌo huneꞌ kolbꞌanile chiyaqꞌ Komam Dios tiꞌ tet anma mach Israeloj,

yajaꞌ ekꞌna chiyaqꞌayto anma yul yanma,

xhi yaꞌ Pablo.

29 Yet yalni yaꞌ Pablo huneꞌ tuꞌ,

isto ebꞌnaj Israel,

yok ebꞌnaj iskajlen isbꞌa yinh tzet yal yaꞌ.

30 Wal yaꞌ Pablo xin,

kaw kabꞌ habꞌil kankano yaꞌ yul huneꞌ nha kꞌamnhebꞌil yu tuꞌ.

Kaw xin chitzala iskꞌul yaꞌ chischahni yaꞌ anma chꞌapni tuklenoj.

31 Yinh sunil yanma yaꞌ Pablo yalikꞌo Istzotiꞌ Komam Dios yinh tzet chu yok anma yul isqꞌabꞌ Komam,

chiskuynipaxo yaꞌ anma yinh tzet yelapno ye Komam Jesucristo.

Machi xin mak chihalni hunu tzet ye tuꞌ yinh tzet chal yaꞌ Pablo.