3 Haxa yet hunxa tzꞌayik xin,

japnihanh bꞌey puerto Sidón,

bꞌay kaw kꞌul yute iskꞌul naj Julio yinh yaꞌ Pablo,

yuto chahlaxikꞌo yaꞌ yilaꞌ yamigo yu naj,

ischahnipaxo yaꞌ Pablo tuꞌ tzet chiꞌaqꞌlax tet.

4 Yet jelanh bꞌey Sidón tuꞌ konhekꞌanh yinh ismotx txꞌotxꞌ Chipre ayayo xol haꞌ mar bꞌay chu kokolni kobꞌahanh tet jaqꞌeqꞌ,

yuto mach toholo isbꞌelwi teꞌ barco yu jaqꞌeqꞌ tuꞌ.

5 Lahwi tuꞌ xin kokulusnhenanh haꞌ mar yinh ismotxiko ej txꞌotxꞌ ay yul ismajul Cilicia yebꞌ Panfilia,

japnipaxojanh yul konhobꞌ Mira ay yul ismajul Licia.

6 Haꞌ tuꞌ ilchayo huneꞌ teꞌ barco ah Alejandría yu naj capitán yinh ebꞌnaj soldado,

istoxa teꞌ bꞌey Italia,

konhokanh yul teꞌ,

kotopaxojanh.

7 Kaw xin txꞌiꞌal tzꞌayik konhbꞌelwihanh yinh kaw nanhkꞌulal yuto kaw ay jaqꞌeqꞌ,

kaw xin yaꞌta yu japnikanojanh iskawilal konhobꞌ Gnido.

Yaj yu kaw ayto yip islow jaqꞌeqꞌ yinh teꞌ barco tuꞌ,

yuxin konhekꞌanh iskawilal Salmón,

kaw xin konhekꞌtojanh kohoyoꞌanh bꞌey ismotx txꞌotxꞌ Creta ayayo xol haꞌ mar tuꞌ.

8 Kaw yaꞌtanhetikꞌa jaqꞌlehanh yet jekꞌanh yinh ismotx txꞌotxꞌ Creta yinh huneꞌ bꞌel tuꞌ,

yuxin kaw lanho konhapnihanh bꞌey Buenos Puertos,

ayko iskawilal konhobꞌ Lasea.

9 Kaw nimanxa tiempo chikokꞌaytojanh,

yebꞌpaxo xin kaw txahulxa kobꞌelwihanh yibꞌanh haꞌ mar yuto kawilxa yeti yokbꞌal haꞌ nhabꞌ.

Yuton huneꞌ tuꞌ,

yuxin ok yaꞌ Pablo yalaꞌ tet ebꞌnaj yahawil yeko yinh teꞌ barco tuꞌ,

10 yalni yaꞌ hakaꞌ tiꞌ:

—Hex wetbꞌi yinh huneꞌ kobꞌel tiꞌ,

kaw txahulxa jeko chiwilan,

yuto ay ismay yetaxto teꞌ barco tiꞌ,

kat iskꞌayto jijatz,

aypaxo ismay hanhhunonh chonhkami,

xhi yaꞌ.

11 Wal naj capitán yinh ebꞌnaj soldado xin,

kaw ekꞌna yabꞌeto naj tzet yal naj yahawil yeko yinh teꞌ barco,

yebꞌ tzet yal naj chiꞌinikꞌo teꞌ barco tuꞌ sata tzet yal yaꞌ Pablo.

12 Bꞌey huneꞌ Buenos Puertos tuꞌ xin,

kaw machi bꞌay chiyu iskolni isbꞌa ebꞌnaj yinh huneꞌ nhabꞌil tuꞌ,

yuxin etza sunil ebꞌnaj halni tato chonhelanh bꞌey tuꞌ,

etzami chu japnikanojanh bꞌey Fenice,

ay yul ismajul Creta.

Huneꞌ txꞌotxꞌ tuꞌ xin kaw chismaj txꞌotxꞌ jaqꞌeqꞌ chitit bꞌay chiꞌahilo tzꞌayik,

yuxin haꞌ tuꞌ chꞌelto huneꞌ nhabꞌil jibꞌanhanh,

chiyute yalni ebꞌnaj.

13 Lahwi tuꞌ xin yichiko yekꞌ jaqꞌeqꞌ yinh kaw nanhkꞌulal chitit yinh sur,

yuxin ok yinh isnabꞌal ebꞌnaj isto yinh isbꞌel tuꞌ hunelxa,

yinikanh ebꞌnaj chꞌen ancla,

kotohanh xin.

Kaw istiꞌlanhetikꞌa txꞌotxꞌ Creta ekꞌ teꞌ barco tuꞌ.

14 Yaj hanikꞌixto chonhtohanh,

yul huneꞌ niman jaqꞌeqꞌ tit yinh nordeste,

ismaqꞌniko isbꞌa yinh teꞌ barco.

15 Hak tuꞌ xin yu yichiko istenlaxto teꞌ yu jaqꞌeqꞌ,

yaj yu matxa chiqꞌoji ebꞌnaj yinito teꞌ bꞌay chiyal yanma,

yuxin toxanhe chijilanh konhyinitojanh teꞌ bꞌay kaw chito jaqꞌeqꞌ tuꞌ.

16 Konhekꞌanh yinh ismotx huneꞌ nichꞌan konhobꞌ ay xol haꞌ mar,

Clauda isbꞌi,

bꞌay matxa kaw yip yekꞌ jaqꞌeqꞌ.

Wal teꞌ nichꞌan lancha tzujan yinta teꞌ barco tuꞌ kaw lanho yij isbꞌa yahkanto teꞌ yul teꞌ niman barco tuꞌ yu ebꞌnaj.

17 Lahwi tuꞌ xin iskꞌalni ebꞌnaj teꞌ barco tuꞌ yu hunteqꞌan nimeta lasu yunhe yiqꞌni yip teꞌ.

Yaj yu chixiw ebꞌnaj ta chálo iskawxikanayto teꞌ xol hunteqꞌan arena ayko yinh ismotx txꞌotxꞌ Libia,

chiyij Sirte,

yuxin isholayo ebꞌnaj qꞌap vela chismaqꞌiko jaqꞌeqꞌ yunhe nankꞌulalxa chito teꞌ.

18 Haxa yet huneꞌxa tzꞌayik xin,

yu kaw ayto yip yekꞌ jaqꞌeqꞌ,

yuxin ichiko ebꞌnaj yanayto ijatz ayko yul teꞌ barco tuꞌ yul haꞌ mar.

19 Haxa yet iskabꞌwihalxa xin,

haxa ismunlabꞌal teꞌ barco tuꞌ,

istirayto ebꞌnaj xol haꞌ.

20 Kaw txꞌiꞌal tzꞌayik matxatikꞌa chijilanh yinh tzꞌayik yebꞌ txꞌumel,

yu huneꞌ niman jaqꞌeqꞌ chonhmaqꞌobꞌtanhen tuꞌanh,

yuxin kaw kꞌaykanilo kokꞌulanh,

kaw matxa chikonahanh tato chito konhkolchahanh.

21 Yaj yu kaw payxa matxa chonhwaꞌanh,

yuxin ah linhno yaꞌ Pablo,

yalni yaꞌ tet ebꞌnaj hakaꞌ tiꞌ:

—Hex wetbꞌi,

majaltam heyije tzet walan.

Kaw kꞌulmi tato machi konhel bꞌey Creta tuꞌ,

machim kꞌayto hunteqꞌan ijatz yebꞌ hunteqꞌan munlabꞌal tiꞌ yebꞌ jabꞌen isyaꞌtajil tiꞌ.

22 »Wal tinanh xin,

machi kabꞌkonkanh hekꞌul yuto machi hunujex chexkamoj,

hanhkꞌanhe teꞌ barco tiꞌ chꞌetaxtoj,

23 yuto mayati Komam Dios huneꞌ ángel tzotelo wetan may aqꞌbꞌal,

Komam Dios ayinyetan yebꞌ bꞌay chinyijehan.

24 Haꞌ huneꞌ ángel tuꞌ xin,

mahalni wetan hakaꞌ tiꞌ:

“Mach chaxhxiw hach Pablo,

yuto kaw yilal hawapni yinh sat naj yahawil Roma,

hawupaxoj yuxin chikolcha sunil anma ayikto yul teꞌ barco tiꞌ,

machi hunu mak chikamoj,”

xhi naj wetan.

25 Yuxin tinanh hex wetbꞌi,

aweko yip heyanma,

yuto chikawxi inkꞌulan yinh Komam Dios ta kaw yilal yijni isbꞌa tzet mahulikꞌo naj ángel tuꞌ yalaꞌ wetan.

26 Yaj chonhtirlaxolo istiꞌ haꞌ mar bꞌey huneꞌ txꞌotxꞌ ay xol haꞌ mar,

xhi yaꞌ Pablo tuꞌ.

27 Yet huneꞌ aqꞌbꞌal xin,

yinhxa 14 (iskanhlanhebꞌ) tzꞌayik jekꞌanh yibꞌanh haꞌ mar,

japnihanh yibꞌanh haꞌ mar Adriático,

bꞌay nanantaxanhe chito teꞌ barco yu jaqꞌeqꞌ.

Kaw yinhmi chuman aqꞌbꞌal xin,

isnahni ebꞌnaj chimunlakto yul teꞌ barco tato japnixahanh yinh txꞌo txꞌotxꞌ.

28 Yok ebꞌnaj ismaleno hanta isnahatil yehayto yich haꞌ,

kaw 36 (wajlahonhebꞌ iskawinaj) metro yehayto yich haꞌ tuꞌ.

Kotohanh hanikꞌxa,

yokpaxo ebꞌnaj ismalenoj,

25 (howebꞌ iskawinaj) metroxanhe yehayto yich haꞌ.

29 Yaj yu chixiw ebꞌnaj ta chálo ay bꞌay chismaqꞌiko isbꞌa teꞌ yinh chꞌen nime chꞌen,

yuxin isbꞌejtzoto ebꞌnaj kanhebꞌ chꞌen ancla yinta teꞌ barco tuꞌ.

Kaw xin ayko ebꞌnaj isqꞌanni tet Komam Dios ta chisajbꞌinaloj.

30 Wal ebꞌnaj chimunla yul teꞌ barco tuꞌ,

isnah ebꞌnaj yelkanh yul teꞌ,

yuxin ok ebꞌnaj yaqꞌayto teꞌ lancha yul haꞌ,

yaniko ebꞌnaj leqꞌtiꞌal tato chiyayto ebꞌnaj yaqꞌbꞌil chꞌen ancla sata teꞌ barco tuꞌ.

31 Wal yaꞌ Pablo xin,

kaw yinh anhe yal yaꞌ tet naj capitán yebꞌ tet ebꞌnaj soldado hakaꞌ tiꞌ:

—Tato chiꞌel ebꞌnaj yul teꞌ barco tiꞌ,

kaw mach chexkolcha hex tiꞌ,

xhi yaꞌ.

32 Hak tuꞌ xin kaw yinh anhexanhe iskꞌupilo ebꞌnaj soldado tuꞌ txꞌanh lasu bꞌay tꞌunhan teꞌ lancha tuꞌ,

isbꞌejtzonto ebꞌnaj teꞌ yul haꞌ.

33 Yet lanhanxa issajbꞌilo xin,

yalni yaꞌ Pablo tet ebꞌnaj sunil tato yilal iswaꞌ ebꞌnaj,

yalni yaꞌ:

—Kaw kabꞌxa semana mach chexwaꞌi yu heyilni tzet chextanhi.

34 Yaj chiwalan teyet tato yilal hewaꞌi yunhe yok heyip.

Kaw machi hunu mak chikam koxol tiꞌ,

nitam hunkꞌitano xil hewiꞌ chikꞌaytoj,

xhi yaꞌ.

35 Lahwi yalni yaꞌ Pablo huneꞌ tuꞌ xin,

yinikanh yaꞌ huneꞌ ixim pan,

yaqꞌni yaꞌ yuchꞌandiosal tet Komam Dios yinh sat ebꞌnaj sunil.

Lahwi tuꞌ isqꞌaxpon yaꞌ ixim,

yok yaꞌ iswahno ixim.

36 Hayet yilni ebꞌnaj tuꞌ xin,

yaqꞌlokanh iskꞌul ebꞌnaj,

yokpaxo ebꞌnaj waꞌo sunil.

37 Kaw 276 honhanh ayonhikojanh yul teꞌ barco tuꞌ.

38 Yet islahwi iswaꞌkano sunil ebꞌnaj xin,

isbꞌejtzonayto ebꞌnaj ixim trigo xol ha haꞌ yunhe ishanhqꞌo yijatz teꞌ barco tuꞌ.

39 Hayet issajbꞌilo xin,

yilnito ebꞌnaj chimunla yul teꞌ barco tuꞌ txꞌo txꞌotxꞌ,

yaj mach istxum ebꞌnaj bꞌaytuꞌwal ayonh tuꞌanh,

yaj xin yil ebꞌnaj huneꞌ isqꞌabꞌ haꞌ mar tuꞌ,

kaw nabꞌa arena-la-nhe istiꞌ,

isnahni ebꞌnaj yinito teꞌ barco bꞌey tuꞌ.

40 Hak tuꞌ xin yu iskꞌupnito ebꞌnaj txꞌanh lasu ayko yinh ancla tuꞌ iskankano xol haꞌ mar.

Istoybꞌan ebꞌnaj istxꞌanhal remo chꞌokniko yinh yijbꞌan teꞌ barco tuꞌ.

Lahwi tuꞌ xin yanikanh ebꞌnaj qꞌap vela yinh sat teꞌ yul isbꞌeh jaqꞌeqꞌ yunhe kꞌul isbꞌelwi teꞌ,

hak tuꞌ xin yu ishitzniko ebꞌnaj teꞌ istiꞌ haꞌ.

41 Yaj kꞌuxan yapni teꞌ yinh kabꞌebꞌ nixhte isqꞌabꞌ haꞌ,

iskan txꞌapno teꞌ xol arena xol haꞌ tuꞌ.

Haꞌ sata teꞌ kankano txꞌapno xol arena tuꞌ,

matxatikꞌa chiyu isbꞌili,

wal yinta teꞌ xin kaw uchkꞌakantoj yuto kaw ekꞌnaxa yip haꞌ chismaqꞌiko isbꞌa yinh teꞌ.

42 Haꞌ ebꞌnaj soldado tuꞌ xin yoche ebꞌnaj ispotxꞌoꞌ ebꞌnaj presowom,

yunhe machi hunu ebꞌnaj chimaqꞌni haꞌ kat yelkanh.

43 Wal naj iscapitán ebꞌnaj soldado tuꞌ,

kaw yoche naj iskoloꞌ yaꞌ Pablo,

yuxin mach chisje naj ispotxꞌlax ebꞌnaj presowom.

Haꞌ yute naj,

to yal naj tet ebꞌnaj ta mak yohta ismaqꞌni haꞌ,

kaw yilal bꞌabꞌel chiꞌayto xol haꞌ yunhe yapni istiꞌ haꞌ.

44 Wal mak mach chu ismaqꞌni haꞌ xin,

yibꞌanh yaqꞌinteꞌal teꞌ barco uchkꞌato tuꞌ ok ebꞌnaj.

Hak tuꞌ jutehanh,

yuxin kosunilanh konhkolchahanh,

japnihanh istiꞌ haꞌ.