—Wal tinanh chisje hatzoteli yu hakolni habꞌa,

xhi naj.

Yanikanh isqꞌabꞌ yaꞌ Pablo tuꞌ,

yok yaꞌ tzotelo hakaꞌ tiꞌ:

2 —Kaw chitzala inkꞌulan yuto chawaqꞌ hamanil wetan wokan tzotelo tawet,

mam rey Agripa,

kat inkolni hinbꞌahan yinh sunil tzet chiyal ebꞌnaj jet konhobꞌ Israel winhan.

3 Yuto hach tiꞌ kaw hawohta koley hanhonh Israel honh tiꞌ,

yebꞌ xin sunil tzettaj chikowatxꞌe.

Yuxin kaw chinqꞌanan tawet tato kaw niman chawute hakꞌul hawabꞌen nino tzet chiwalan,

xhi yaꞌ Pablo.

4 Yalnipaxo yaꞌ Pablo:

—Kaw sunil ebꞌnaj Israel ohtanhe tzet inbꞌeybꞌalan yet inchꞌibꞌkanhan yul inkonhobꞌan yebꞌ xin yet ayinan yul konhobꞌ Jerusalén.

5 Kaw xin yohtapaxo ebꞌnaj,

yebꞌ xin ta chisje iskꞌul ebꞌnaj chisje yalni ebꞌnaj ta yettaxtikꞌa tzeh hinan,

kaw fariseo hinan.

Ebꞌnaj fariseo tuꞌ xin,

ekꞌna kaw yijem ebꞌnaj yinh tzet chal koreligión.

6 Tinanh xin makinyitijan ebꞌnaj sata ley tiꞌ,

yuto chikawxi wanmahan yinh tzet haltebꞌilkano yu Komam tet ebꞌnaj jichmam tato chiꞌitzitzbꞌikanh anma kamom yu Komam.

7 12 (Kabꞌlahonhebꞌ) majan ye jet konhobꞌ Israel,

chechma ebꞌnaj yijni isbꞌa tzet halbꞌilkano yu Komam;

yuxin chiyiyo isbꞌa ebꞌnaj tet Komam hunun tzꞌayik yebꞌ hunun aqꞌbꞌal kat isyijen ebꞌnaj tzet chiyal Komam.

Haꞌ yinh huneꞌ halbꞌil yu Komam tuꞌ,

haꞌ bꞌay chikawxi wanmatiꞌan,

mam rey Agripa,

haꞌ xin chiyako ebꞌnaj Israel tiꞌ inmulojan tinanh.

8 Wal xin hex Israel hex tiꞌ,

¿tzet yinh xin mach cheyayto yul heyanma tato chiꞌitzitzbꞌikanh anma kamom?

xhi yaꞌ Pablo tuꞌ.

9 Yalnipaxo yaꞌ Pablo:

—Yet yalanhtokano tuꞌ,

ok yinh innabꞌalan wokan inkachnojan anma yunhe mach chischayto Komam Jesús ah Nazaret yul yanma.

10 Hak tuꞌ xin wutepaxojan yul konhobꞌ Jerusalén yu huneꞌ wipan aqꞌbꞌil yu ebꞌnaj yahawil sacerdote,

yuxin hantanhe anma chahnhe Komam Jesucristo yul yanma,

waktojan yul preso;

kaw xin haꞌ huninan walan ta chipotxꞌlaxkamoj.

11 Kaw txꞌiꞌal el wakojan anma tuꞌ yinh isyaꞌtajil yunhe yinilo isbꞌa yinh Komam.

Hunteqꞌan tiꞌ inwatxꞌehan yul sunil iscapilla ebꞌnaj Israel.

Kaw xin ayko inhowalan yinh yuxin kinbꞌeypaxojan yulaj nan konhobꞌal waqꞌaꞌkojan anma ayxako yul isqꞌabꞌ Komam yinh isyaꞌtajil,

xhi yaꞌ Pablo.

12 Yalnipaxo yaꞌ Pablo:

—Haꞌ ton huneꞌ tuꞌ kaw nabꞌil wuhan yuxin kintohan yul konhobꞌ Damasco,

iqꞌbꞌil teꞌ carta wuhan,

teꞌ yaqꞌ ebꞌnaj yahawil sacerdote Israel wetan,

yunhe kaw ay wipan wekꞌan.

13 Yaj haxa yul bꞌeh xin mam rey,

yinhmi chuman tzꞌayik,

yayilo jopna huneꞌ issajilqꞌinal yul satkanh wibꞌanhan yebꞌ ebꞌnaj tzujan wintajan.

Kaw ekꞌna kaw ay yip isqꞌaqꞌal huneꞌ sajilqꞌinal tuꞌ yibꞌanh yoj tzꞌayik.

14 Hak tuꞌ xin kaw kosunilanh konhaykꞌayanh sat txꞌotxꞌ.

Wabꞌenan huneꞌ yul nuqꞌe halni wetan yul abꞌxubꞌal hebreo hakaꞌ tiꞌ:

“Saulo,

Saulo,

¿tzet yinh yuxin chinhatzumbꞌekꞌojan?

Hach kaw hach,

chawaqꞌ lahwo habꞌa hakaꞌ hunu noꞌ wakax chixanhwa yinh hunu te teꞌ qꞌaqꞌiꞌ iswiꞌ,”

xhi wetan.

15 »Lahwi tuꞌ xin walnihan:

“¿Mak anmahil hach,

Mamin?”

kinchihan.

Yalni Komam wetan xin:

“Hanintiꞌan,

Jesús hinan,

huneꞌ ayachiko hasaynikꞌoj.

16 Wal xin ahanhlinhnoj.

Manyekanh hinbꞌahan tawet yunhe hayijen tzet chiwalan kat xin hawalnikꞌo huneꞌ maxawil tiꞌ,

yebꞌpaxo xin tzettaj chitoinyebꞌan tawet.

17 Chaxhinkolan tet ebꞌnaj Israel,

yebꞌ xin tet ebꞌnaj nan konhobꞌal bꞌay chaxhinchejtojan tinanh.

18 Chaxhwatojan xol anma tuꞌ yunhe hato hawaqꞌno hajloho sat,

yebꞌ xin yunhe matxa chislahiko isbꞌelwi xol qꞌejholo,

to haxa xol issajilqꞌinal chꞌekꞌi.

Yebꞌpaxo xin yunhe matxa chislahiko isyijen tzet chiyal naj matzwalil,

haxa tzet chal Komam Dios haꞌ chiswatxꞌe,

kat xin kinischahnaytojan yul yanma kat yaqꞌlax nimankꞌulal yinh ismul,

kat ischahnipaxo ismajul xol anma saybꞌilxa yu Komam Dios,”

xhi Komam Jesús wetan,

xhi yaꞌ Pablo tuꞌ.

19 Yalnipaxo yaꞌ Pablo:

—Yuxin mam rey Agripa,

maxhtikꞌa inmanhkꞌohan huneꞌ tzotiꞌ tit wetan yul satkanh tuꞌ,

yet isyeniko isbꞌa yinh insatan yinh sajsatil.

20 To kaw bꞌabꞌel walikꞌojan Istzotiꞌ Komam xol anma ay yul konhobꞌ Damasco,

lahwi tuꞌ intohan walnokꞌojan xol anma ay yul konhobꞌ Jerusalén yebꞌ yul ismajul Judea,

yebꞌpaxo xol anma mach Israeloj,

yunhe isbꞌejnikano isbꞌeybꞌal txꞌoj iqꞌbꞌiltikꞌa yu,

kat ismeltzoko iswatxꞌen tzet chiyoche iskꞌul Komam Dios,

kat yokpaxo anma tuꞌ iswatxꞌen iskꞌulal,

haꞌ xin chiyeniloj tato helbꞌilxa isbꞌeybꞌal anma tuꞌ.

21 Yuton huneꞌ tuꞌ,

yuxin kinistzabꞌayojan ebꞌnaj Israel yul Yatut Komam Dios,

kinyanikojan ebꞌnaj preso,

kaw xin yoche ebꞌnaj kinispotxꞌoꞌan.

22 Yaj yu iskolwal Komam Dios,

yuxinto linhan intohan tinanh yinh walnikꞌojan Istzotiꞌ Komam tet sunil anma;

tet anma komon yebꞌ xin tet anma kaw ay yelapno yehi.

Kaw maxhtikꞌa hunelo inhelan tzet walan,

to hanhechꞌan tzet yal ischejabꞌ Komam Dios yet payat yebꞌ xin jichmam Moisés;

hunteqꞌan yilal yijni isbꞌa,

haꞌ walikꞌojan,

23 tato kaw yilal yabꞌen Komam Jesucristo Kokolomal isyaꞌtajil,

yebꞌ xin ta chikampaxoj.

Yebꞌ xin ta haꞌ bꞌabꞌel chiꞌitzitzbꞌikanh xol anma kamom,

yunhe yalnikꞌoj tato ay iskolbꞌanil anma Israel yebꞌ xin anma mach Israeloj;

haꞌ huneꞌ yal tuꞌ,

haꞌ ton sajilqꞌinal,

xhi yaꞌ Pablo.

24 Yet yalni yaꞌ Pablo hunteqꞌan tzotiꞌ tuꞌ iskolbꞌaniloj,

yah yaw naj Festo hakaꞌ tiꞌ:

—¡Kaw loco hachxa hach Pablo!

Yu tzetkꞌaxa chakuykanoj yuxin chaxhpakꞌi locohal,

xhi naj.

25 Istaqꞌwikanh yaꞌ Pablo:

—Mach locohoj hinan mam Festo,

wal xin haꞌ tzet chiwaltiꞌan kaw kꞌul,

kaw yelpaxoj.

26 Yaꞌ rey Agripa tiꞌ kaw yohta yaꞌ sunil hunteqꞌan tiꞌ,

yuxin kaw sunil wanmahan chintzotelan yinh sat yaꞌ,

yuto kaw wohtajan tato kaw yohta yaꞌ sunil tuꞌ yuto mach ewantajo yehi.

27 ¿Chimhawayto yul hawanma mam rey Agripa hunteqꞌan yal ebꞌyaꞌ ischejabꞌ Komam Dios payat tuꞌ?

Wal xin,

kaw wohtajan tato chawayto yul hawanma,

xhi yaꞌ Pablo tuꞌ.

28 Yalni naj rey Agripa tuꞌ xin:

—¿Ham hawalni ta yu nichꞌan tzet chawal tiꞌ chinokan Cristianohal hawu?

xhi naj.

29 Istaqꞌwipaxo yaꞌ Pablo:

—Wal xin walka yu nichꞌan tzotiꞌ maka yu niman tzotiꞌ chiwalan teyet,

tzettam saqꞌal tato chꞌel yinh iskꞌul Komam Dios,

ta maxhnhetaj hach,

to sunilojabꞌ anma lanhan yabꞌen tiꞌ chichahnayto yul yanma,

kat yok hakaꞌ intiꞌan,

yajaꞌ tanhe mach chikꞌal-laxayo yu chꞌen cadena hakaꞌ wetiꞌan,

xhi yaꞌ Pablo.

30 Lahwi yalnikano yaꞌ Pablo hunteqꞌan tuꞌ xin,

yah lemna naj rey Agripa,

yebꞌ naj gobernador,

yebꞌ ix Berenice,

yebꞌ xin sunil anma tzꞌonhan bꞌey tuꞌ.

31 Ishekꞌnilo isbꞌa ebꞌnaj tzotelo ischukil yinh huneꞌ tuꞌ,

leyalni ebꞌnaj hakaꞌ tiꞌ:

—Huneꞌ naj tiꞌ kaw maxhtikꞌa nichꞌano ismul naj chiqꞌanni kamikal yinh,

yebꞌ kaw mach yeto ay naj yokto yul teꞌ preso,

xhi ebꞌnaj.

32 Yalni naj rey Agripa tuꞌ tet naj Festo:

—Chisje kobꞌejtzon naj tato maxhto chisqꞌanto isbꞌa naj yinh sat yaꞌ jahaw ay bꞌey Roma,

yajaꞌ haꞌ tuꞌ choche naj chꞌil-laxi tzet chꞌeliko naj yalni,

xhi naj.