2 Hayet yabꞌen anma tato yinh yabꞌxubꞌal ebꞌnaj Israel chitzotel yaꞌ,

isbꞌejni ebꞌnaj yel yaw,

matxa hunu mak tzoteli.

Yalni yaꞌ Pablo tuꞌ hakaꞌ tiꞌ:

3 «Hanintiꞌan Israel hinan,

kinpitzkꞌahan yul konhobꞌ Tarso ay yul ismajul Cilicia,

yajaꞌ kinchꞌibꞌkanhan yul konhobꞌ Jerusalén tiꞌ.

Haꞌ xin yaꞌ Gamaliel kinkuynihan hakaꞌtikꞌa isley ebꞌnaj ichamta jichmam.

Yuxin yinh sunil wanmahan inyijenan isley Komam Dios hakaꞌtikꞌa cheyute hex tiꞌ tinanh.

4 Yet yalanhtokanoj kaw ekꞌyaꞌ yanma anma chihalnikꞌo huneꞌ akꞌ kuybꞌanile tiꞌ wuhan.

Ay bꞌay inpotxꞌkamojan anma tuꞌ,

ay bꞌay intzabꞌayojan ebꞌnaj winaj yebꞌ ebꞌix ix winitojan yul teꞌ preso.

5 Yajaꞌ naj yahawil ebꞌnaj sacerdote,

yebꞌ xin sunil ebꞌnaj iswiꞌehal konhobꞌ yinh lahtiꞌ xol ebꞌnaj Israel,

kaw testigo ebꞌnaj yinh huneꞌ tuꞌ yuto haꞌ ebꞌnaj aqꞌni hunteqꞌan carta wetan yu winitojan tet ebꞌnaj jet konhobꞌ ay yul konhobꞌ Damasco.

Intohan bꞌey tuꞌ xin,

yunhe insaynayojan ebꞌnaj xachahnayto Komam Jesucristo yul yanma,

winitijan ebꞌnaj bꞌey yul konhobꞌ Jerusalén tiꞌ yu yaqꞌlax ekꞌoyaꞌ yanma ebꞌnaj.

6 »Yajaꞌ hayet ayinikojan yinh bꞌel xin,

yet lanhanxa wapnihan yul konhobꞌ Damasco,

yinhmi chuman,

yinh haꞌmataj istit jopla huneꞌ issajilqꞌinal winhan yul satkanh kaw aykano yip.

7 »Waykꞌayan sat txꞌotxꞌ.

Lahwi tuꞌ xin wabꞌenan huneꞌ yul nuqꞌe halni hunteqꞌan tzotiꞌ hakaꞌ tiꞌ:

“Saulo,

Saulo,

¿tzet yinh yuxin chawaqꞌ ekꞌoyaꞌ wanmahan?”

xhi wetan.

8 »Inqꞌambꞌenan hakaꞌ tiꞌ:

“¿Mak hach anmahil Mamin?”

kinchihan.

Yalni wetan xin:

“Hanintiꞌan Jesús hinan ah Nazaret,

huneꞌ ayachiko hawaqꞌni ekꞌoyaꞌ yanma tiꞌ,”

xhi wetan.

9 Hunteqꞌan ebꞌnaj tzujan wintajan kaw yil ebꞌnaj huneꞌ issajilqꞌinal tuꞌ,

isxiwkanh ebꞌnaj,

yaj machi yabꞌe ebꞌnaj hunteqꞌan tzotiꞌ hal-lax wettuꞌan.

10 »Lahwi tuꞌ xin inqꞌambꞌenan hakaꞌ tiꞌ:

“¿Tzet wal wuten hinbꞌahan Mamin?”

kinchihan.

Yalni Komam wetan hakaꞌ tiꞌ:

“Ahanhwanoj,

kat xin hato yul konhobꞌ Damasco,

haꞌ tuꞌ xin chihal-laxo tawet tzet wal hawuten habꞌa,”

xhi Komam wetan.

11 »Yaj kaw tanhilo inmujlubꞌalan yu yip huneꞌ issajilqꞌinal tuꞌ,

yuxin haxa ebꞌnaj wetbꞌihan okto yalanh inqꞌabꞌan,

kinyinitojan ebꞌnaj yul konhobꞌ Damasco.

12 »Haꞌ tuꞌ xin ay huneꞌ yaꞌ Ananías isbꞌi,

kaw yijemkano yaꞌ yinh isley yaꞌ Moisés.

Kaw xin sunil ebꞌnaj ah Israel ay yul konhobꞌ Damasco,

kaw kꞌul istzotel yinh yaꞌ.

13 Haꞌ xin yaꞌ Ananías tuꞌ apni kinistukleꞌan.

Hayet yok linhno yaꞌ inkꞌatanhan yalni wetan:

“Wuxhta Saulo,

hajlohojabꞌ hasat hunelxa,”

xhi yaꞌ wetan.

Yinhnhena tuꞌ xin ishajlo insatan,

inhakxikojan yinh yaꞌ.

14 »Yalni yaꞌ wetan:

“Haꞌ isDiosal ebꞌnaj jichmam,

makaxhsaynikoj yunhe hawohtanhenilo tzet chiyoche yanma Komam,

yebꞌ yu hawilni Iskꞌahol Komam Dios kaw tohol isnabꞌal,

yebꞌ xin hawabꞌenpaxo yul isnuqꞌ.

15 Hach xin chawaqꞌako habꞌa hawalnokꞌo Komam tet sunil anma ay yul sat yibꞌanhqꞌinal tiꞌ,

kat xin hawalnopaxo tzettaj hawilah yebꞌ xin tzet hawabꞌepaxoj.

16 Wal tinanh xin,

¿tzet chawechma?

Ahanhwanoj,

haꞌojabꞌ haꞌ hawiꞌ.

Ako hawanma yinh Komam Jesucristo haxinwal chitxꞌahlaxkanilo sunil hamul,”

xhi yaꞌ Ananías tuꞌ wetan,»

xhi yaꞌ Pablo.

17 Yalnipaxo yaꞌ Pablo:

—Hayet inmeltzotijan yul konhobꞌ Jerusalén xin,

intohan yul Yatut Komam Dios txahloj,

isyeniko isbꞌa Komam yinh insatan yinh sajsatil.

18 Wilnihan yinh Komam,

yalni Komam wetan hakaꞌ tiꞌ:

“Chalahiko hawel yul konhobꞌ Jerusalén tiꞌ,

yuto mach chiyabꞌeto ebꞌnaj bꞌey tiꞌ tzettaj chawal winhan,”

xhi Komam.

19 »Lahwi tuꞌ xin walnihan:

“Mamin,

kaw yohta ebꞌnaj tato kaw kinekꞌan yulaj capilla intzabꞌayojan anma chabꞌil hachxa yu,

winitojan yul teꞌ preso,

inmaqꞌnipaxojan.

20 Yebꞌ xin yet isqꞌojlaxkamo yaꞌ Esteban hachejabꞌ,

yaꞌ kaw kaxhhalnikꞌo tet anma;

hanhun hinan linhan hintojan xol ebꞌnaj,

walnipaxojan tato chipotxꞌlax hachejabꞌ tuꞌ.

Wokpaxojan intanhenojan xil isqꞌap ebꞌnaj qꞌojni kamo yaꞌ Esteban tuꞌ,”

kinchihan tet Komam.

21 »Yaj xin yal Komam wetan hakaꞌ tiꞌ:

“Asiꞌ xin,

yuto nahat chaxhwatojan.

Hata xol ebꞌnaj mach Israelo chaxhto kinhawalaꞌkꞌojan,”

xhi Komam wetan,

xhi yaꞌ Pablo tuꞌ.

22 Haꞌ yinh tuꞌ xin,

kachna yabꞌen ebꞌnaj tzet yal yaꞌ Pablo,

istzabꞌniko ebꞌnaj yalni yinh kaw ip hakaꞌ tiꞌ:

—¡Kamojabꞌ naj!

¡Matxa yeto ay ischahni isqꞌinal naj tiꞌ tinanh!

xhi ebꞌnaj.

23 Yaj kaw islahiko ebꞌnaj yel yaw,

chistzilnilo ebꞌnaj xil isqꞌap,

chispulnipaxokanh ebꞌnaj pojoj istixhnikanh ebꞌnaj satkanh yu ishowal.

24 Yuxin yal naj komandante romano tuꞌ tato chiꞌalaxikto yaꞌ yul cuartel,

yalnipaxo naj tato chihatelax yaꞌ Pablo tuꞌ yunhe yalnati yaꞌ tzet yinh yuxin hak tuꞌ yel yaw anma Israel tuꞌ yinh yaꞌ.

25 Yajaꞌ yet kꞌalbꞌilxayo yaꞌ Pablo tuꞌ yunhe ishatelax yaꞌ,

yalni yaꞌ tet huneꞌ naj capitán ayayo iskawilal tuꞌ:

—¿Tom kaw ay heyip kinhehatenan?

Hanintiꞌan romano hinan,

yebꞌpaxo xin maxhto cheqꞌambꞌe tzet inmulan,

xhi yaꞌ Pablo.

26 Hayet yabꞌen naj capitán huneꞌ tuꞌ,

isto naj yalno tet naj komandante hakaꞌ tiꞌ:

—Kaw nannhe hawu yinh tzet chawatxꞌe yuto huneꞌ naj tiꞌ kaw romano naj,

xhi naj.

27 Lahwi tuꞌ xin istit naj komandante iskꞌatanh yaꞌ Pablo,

isqꞌambꞌen naj hakaꞌ tiꞌ:

—¿Tom yeli romano hach?

xhi naj.

Istaqꞌwi yaꞌ Pablo:

—Hoꞌ,

kaw romano hinan,

xhi yaꞌ.

28 Yalni naj komandante tuꞌ xin:

—Hanintiꞌan,

kaw hanta melyu inkꞌaytzehan yet wokan romanohal,

xhi naj.

Yalnipaxo yaꞌ Pablo tuꞌ tet naj:

—Wal hinan to kaw romanotikꞌa yu inpitzkꞌahan,

xhi yaꞌ.

29 Yu huneꞌ tuꞌ xin ishekꞌilo isbꞌa ebꞌnaj soldado etza maqꞌni yaꞌ Pablo tuꞌ.

Hakpax tuꞌ xin naj komandante,

yet yabꞌen naj tato kaw romano yaꞌ Pablo,

isxiwkanh naj yuto haꞌ naj chejni alaxoko chꞌen cadena yinh yaꞌ Pablo tuꞌ.

30 Haxa yet huneꞌxa tzꞌayik xin,

yoche naj komandante tuꞌ yabꞌe tzet kaw ismul yaꞌ Pablo tet ebꞌnaj Israel,

yuxin yilo naj chꞌen cadena yinh yaꞌ Pablo tuꞌ,

yawten naj ebꞌnaj yahawil ebꞌnaj sacerdote yebꞌ ebꞌnaj iswiꞌehal yinh lahtiꞌ xol ebꞌnaj Israel tuꞌ.

Lahwi tuꞌ xin yilaxilti yaꞌ Pablo yu naj,

yalaxiko yaꞌ sata ebꞌnaj yu naj komandante tuꞌ.