Yalni ebꞌnaj tet yaꞌ Pablo ta mach chito yaꞌ bꞌey Jerusalén,

yuto hak tuꞌ yu yalni Komam Espíritu Santo tet ebꞌnaj.

5 Yajaꞌ yet yekꞌto hujebꞌ tzꞌayik tuꞌ xin,

jelanh bꞌey tuꞌ.

Sunil ebꞌnaj juxhtaj yebꞌ yixal yebꞌ yuninal hul konhanokanojanh istxam konhobꞌ bꞌey istiꞌ haꞌ mar,

haꞌ tuꞌ xin konhay jahnojanh kotxahlihanh tet Komam Dios.

6 Kolaqꞌlenayo kobꞌahanh kotaqꞌlikanojanh jetanh hununonhanh,

lahwi tuꞌ xin jahkantojanh yul teꞌ barco,

ispaxkanto ebꞌnaj juxhta tuꞌ yatut.

7 Jelanh yul konhobꞌ Tiro,

japnihanh yul konhobꞌ Tolemaida.

Haꞌ bꞌey tuꞌ xin konhelkanojanh yul teꞌ barco,

koqꞌambꞌehanh hanikꞌ ye ebꞌnaj juxhta sunil.

Kokankanojanh iskꞌatanh ebꞌnaj huneꞌ tzꞌayik.

8 Haxa yet hunxa tzꞌayik xin jelanh yebꞌ yaꞌ Pablo bꞌey tuꞌ,

japnihanh yul konhobꞌ Cesarea,

kotohanh yatut yaꞌ Felipe,

yaꞌ chihalnikꞌo Istzotiꞌ Komam Jesucristo,

yaꞌ oklena diáconohal xol ebꞌyaꞌ hujwanh yul konhobꞌ Jerusalén,

haꞌ bꞌey tuꞌ xin konhkankanojanh iskꞌatanh yaꞌ.

9 Wal yaꞌ Felipe tuꞌ xin,

ay kanhwanh iskutzꞌin yaꞌ maxhto yichamil,

haꞌ ebꞌix tiꞌ xin chihalni kuybꞌanile chischah tet Komam Dios.

10 Hayet ayxana japnihanh bꞌey tuꞌ,

yapni huneꞌ naj chiyij Agabo kokꞌatanhanh,

titnaj yul ismajul Judea.

Naj tiꞌ,

chiyalpaxo naj tzotiꞌ chischah tet Komam Dios.

11 Hayet yapni naj konhistukleꞌanh tuꞌ,

yinilo naj istxꞌambꞌal yaꞌ Pablo yinh yiktaj,

iskꞌalnayo naj yoj yebꞌ isqꞌabꞌ yu huneꞌ txꞌambꞌale tuꞌ,

yalni naj hakaꞌ tiꞌ:

—Komam Espíritu Santo chihalni tato yul konhobꞌ Jerusalén,

hak tiꞌ chiyubꞌ iskꞌal-laxayo yaꞌ yahaw huneꞌ txꞌambꞌale tiꞌ yu ebꞌnaj Israel,

kat yalaxiko yaꞌ yul isqꞌabꞌ ebꞌnaj mach Israeloj,

xhi Komam wetan,

xhi naj.

12 Hayet jabꞌenanh yebꞌ ebꞌnaj ay bꞌey Cesarea yinh tzet yal naj tuꞌ,

jokanh jalnojanh tet yaꞌ Pablo tato mach chito yaꞌ bꞌey Jerusalén.

13 Yaj xin taqꞌwi yaꞌ Pablo tuꞌ:

—¿Tzet yinh yuxin chexoqꞌi,

kat heyaniko bꞌiskꞌulal yinh wanmahan?

Wal intiꞌan kaw hinaninan,

waxanhka chiniskꞌalbꞌahan ebꞌnaj,

walka xin chinmaqꞌlaxpaxo kamojan yul konhobꞌ Jerusalén,

yaj yu walnikꞌojan Istzotiꞌ Komam Jesucristo Jahawil,

xhi yaꞌ Pablo jetanh.

14 Yaj yu mach chiꞌay iskꞌul yaꞌ juhanh,

yuxin jalanh tet yaꞌ hakaꞌ tiꞌ:

—Yubꞌojabꞌ hakaꞌ tzet choche iskꞌul Komam Dios tawinh,

konhchihanh.

15 Lahwi yekꞌayo hayebꞌ tzꞌayik kowatxꞌenayo jetanh,

kotohanh yul konhobꞌ Jerusalén.

16 Ay xin hunteqꞌan ebꞌnaj juxhta ay bꞌey konhobꞌ Cesarea topaxo jintajanh.

Japnihanh bꞌey yatut naj Mnasón,

huneꞌ naj tiꞌ ah Chipre naj.

Payxa xin ok naj yul isqꞌabꞌ Komam.

Haꞌ iskꞌatanh naj tuꞌ xin konhkankanojanh wayoj.

17 Hayet japnihanh yul konhobꞌ Jerusalén,

kaw tzalahilal yu konhischahnihanh ebꞌnaj juxhtaj yinh Komam.

18 Haxa hunxa tzꞌayik xin kotohanh yebꞌ yaꞌ Pablo,

kotuklenojanh yaꞌ Jacobo.

Kaw xin kutxaniko ebꞌyaꞌ juxhta anciano yet japnihanh bꞌey tuꞌ.

19 Isqꞌambꞌen yaꞌ Pablo tuꞌ hanikꞌ ye iskꞌul ebꞌyaꞌ.

Lahwi tuꞌ xin yok yaꞌ yalno yinh hununtajil yinh tzettaj iskꞌulal iswatxꞌe Komam Dios xol ebꞌnaj mach Israeloj yu ismunil yaꞌ Pablo tuꞌ.

20 Hayet yabꞌen ebꞌyaꞌ tuꞌ xin,

yaqꞌni tzalaho yanma yinh Komam Dios.

Lahwi tuꞌ xin yalni ebꞌyaꞌ tet yaꞌ Pablo hakaꞌ tiꞌ:

—Kaw kꞌul wuxhtaj,

yajaꞌ hawohtaj tato kaw yinhxa ismilal ebꞌnaj jet Israel tiꞌ xayako isbꞌa yul isqꞌabꞌ Komam Jesucristo,

yajaꞌ sunil ebꞌnaj chihalni ta kaw yilal koyijen isley yaꞌ Moisés.

21 Yabꞌe ebꞌnaj isqꞌumal tato yet chaxhekꞌ hakuyno anma Israel pujanto xol anma mach Israeloj,

tolabꞌ chawala tato matxa yechtoho chisyije ebꞌnaj tzet chal isley yaꞌ Moisés,

yebꞌ xin ta matxa yilalo chꞌaqꞌlax circuncidar nixhte iskꞌahol ebꞌnaj,

mach yilalopaxo isyijelax kobꞌeybꞌal,

hanhonh Israel honh tiꞌ,

hawalni.

22 ¿Tzet xin wal juten huneꞌ tiꞌ?

Wal tinanh kaw chiꞌabꞌelaxiloj tato ayachxakꞌo bꞌey tiꞌ.

23 »Tinanh xin yije hunteqꞌan chijaltiꞌanh,

koxol tiꞌ ayxakꞌo kanhwanh ebꞌnaj kaw yilal isyijen huneꞌ tzet halbꞌilxa yu.

24 Ito ebꞌnaj tawintaj,

kat heto hesajnheno hebꞌa hakaꞌ yalni isley yaꞌ Moisés,

kat xin hatohlan sunil tzet chꞌokniko yu ebꞌnaj,

lahwi tuꞌ xin,

kat yaqꞌni elo ebꞌnaj xil iswiꞌ.

Hak tuꞌ xin chu istxumnilo sunil anma tato leqꞌtiꞌal sunil chihal-lax tawinh tuꞌ,

wal xin to chayepaxo yilaꞌ anma tato chayije isley yaꞌ Moisés.

25 »Wal ebꞌnaj mach Israeloj,

ebꞌnaj xachahni Komam yul yanma,

xajaltojanh yinh huneꞌ teꞌ carta tet ebꞌnaj ta mach yechto chisyije ebꞌnaj huneꞌ tiꞌ,

kachannhe hunteqꞌan kuybꞌanile chihalni hakaꞌ tiꞌ.

Mach chiskꞌux ebꞌnaj chibꞌe haltebꞌilxa yinh xahanbꞌalil tet tioxh,

yebꞌ xin mach chislo ebꞌnaj noꞌ chikꞌ,

yebꞌpaxo mach chubꞌ iskꞌuxuꞌ ebꞌnaj ischibꞌehal noꞌ noqꞌ chihojlax kamoj.

Mach chiꞌixli ebꞌnaj winaj,

mach chiwinajlipaxo ebꞌix ix.

Hak tuꞌ jute jalnitojanh yinh cocarta tuꞌanh,

xhi ebꞌyaꞌ.

26 Hak tuꞌ xin yu yilaxto ebꞌnaj kanhwanh tuꞌ yu yaꞌ Pablo.

Haxa yet hunxa tzꞌayik xin,

issajnhen isbꞌa yaꞌ yebꞌ ebꞌnaj,

hakaꞌ yalni isley yaꞌ Moisés.

Lahwi tuꞌ xin,

yokto yaꞌ yul Yatut Komam Dios yu yalni yaꞌ bꞌaqꞌinh chilahwi isyijen ebꞌnaj huneꞌ haltebꞌilkano yu tet Komam Dios,

yebꞌ xin tzet tzꞌayikal chiyaqꞌ hunun ebꞌnaj isxahanbꞌal tet Komam.

27 Yajaꞌ yet lanhanxa islahwi hujebꞌ tzꞌayik xin,

ay hunteqꞌan ebꞌnaj Israel ay yul ismajul Asia,

ilni yaꞌ Pablo yul Yatut Komam tuꞌ,

yok ebꞌnaj aqꞌokꞌule tet sunil anma,

hak tuꞌ xin yu yah wejla anma yinh yaꞌ Pablo,

isto lemna ebꞌnaj istzabꞌnoyo yaꞌ.

28 Yah yaw ebꞌnaj yinh kaw ip hakaꞌ tiꞌ:

—¡Hex wet konhobꞌ Israel,

kolwahanhwe jinhanh!

Haꞌ huneꞌ naj tiꞌ chꞌekꞌ kuywal yinh anma yulajla konhobꞌ.

Chalni naj ta matzet chꞌokniko kokonhobꞌ Israel tiꞌ,

yebꞌ xin chal naj ta matzet chꞌokniko isley yaꞌ Moisés,

yebꞌ xin kaw txꞌoj istzotelpaxo naj yinh Yatut Komam Dios tiꞌ.

Wal tinanh xin,

mayikto naj hunteqꞌan ebꞌnaj griego yul Yatut Komam tiꞌ,

yuxin lanhan yetaxto Yatut Komam kaw sajkano tiꞌ,

xhi ebꞌnaj.

29 Hak tuꞌ yute yalni ebꞌnaj yuto yil ebꞌnaj yekꞌ yaꞌ Pablo yet yalanhtokano yebꞌ naj Trófimo yul konhobꞌ Jerusalén;

naj tiꞌ ah konhobꞌ Efeso naj.

Haꞌ yute isnahni ebꞌnaj to yikto yaꞌ Pablo huneꞌ naj mach Israelo yul Yatut Komam Dios,

yaj machoj.

30 Kaw sunil anma ay yul konhobꞌ tuꞌ ah wejnahi.

Istit yinh anhe,

istzabꞌnoyo ebꞌnaj yaꞌ Pablo tuꞌ,

ishatxnilti ebꞌnaj yaꞌ yul Yatut Komam Dios.

Kaw yinh anhe xin pebꞌalaxkano ispultahil Yatut Komam tuꞌ.

31 Kaw lanhanxa iskam yaꞌ yu ebꞌnaj,

yet yapni huneꞌ tzotiꞌ tet naj komandante,

yahawil yeko yinh ebꞌnaj soldado ah Roma tato kaw sunil anma ay yul konhobꞌ Jerusalén ah wejnahi.

32 Hak tuꞌ xin yu iskutxbꞌaniko naj komandante tuꞌ ebꞌnaj soldado yebꞌ hunteqꞌan ebꞌnaj oficial,

isto ebꞌnaj yinh anhe yilno bꞌay chiwejcha anma tuꞌ.

Hayet yilni anma naj komandante yebꞌ issoldado,

isbꞌejni ebꞌnaj ismaqꞌni yaꞌ Pablo tuꞌ.

33 Ishitziko naj komandante iskꞌatanh yaꞌ Pablo,

istzabꞌnayo naj yaꞌ.

Yalni naj tato chikꞌal-laxayo yaꞌ yu kabꞌebꞌ chꞌen cadena.

Lahwi tuꞌ xin yok naj komandante isqꞌambꞌen tet anma:

—¿Mak najil huneꞌ tiꞌ?

¿Tzet masmulnhe naj?

xhi naj tet anma tuꞌ.

34 Wal anma tuꞌ xin,

nanantaxanhe chiyala.

Matxatikꞌa chiyu yabꞌen naj komandante tzet chiyal anma tuꞌ isyayil toxanhe chiwejchahi.

Lahwi tuꞌ,

yalni naj tet ebꞌnaj soldado ta chiꞌilaxto yaꞌ Pablo yul cuartel.

35 Hayet yapni ebꞌnaj yebꞌ yaꞌ Pablo tuꞌ yinh isqꞌochal cuartel,

isbꞌatxnahto ebꞌnaj soldado yaꞌ Pablo,

yuto kaw aytoko ishowal anma yinh yaꞌ.

36 Sunil anma tzujan yinta ebꞌnaj,

toxanhe chiwejchahi,

chiyalnipaxo yinh kaw ip:

—Maqꞌbꞌil iskam naj tinanh,

xhixanhe anma tuꞌ.

37 Yet lanhanxa yanikto ebꞌnaj yaꞌ Pablo tuꞌ yul cuartel,

yalni yaꞌ tet naj komandante:

—¿Chimyu intzotelninojan tawet?

xhi yaꞌ.

Yalni naj komandante tuꞌ:

—¿Chimyu hawalni abꞌxubꞌal griego?

xhi naj.

38 Yalnipaxo naj:

—¿Machmi taj hach tiꞌ naj ay bꞌey Egipto,

naj aniko howal yinh naj jahaw yet tolto tiꞌ,

naj kutxbꞌanayo kanhebꞌ mil ebꞌnaj potxꞌom anma yinito naj ebꞌnaj bꞌey txꞌotxꞌ desierto?

xhi naj.

39 Istaqꞌwikanh yaꞌ Pablo tuꞌ:

—Hanintiꞌan Israel hinan.

Yul konhobꞌ Tarso kinpitzkꞌahan,

huneꞌ konhobꞌ kaw niman yelapno yul ismajul Cilicia.

Wal tinanh xin ta chaje chintzotelninojan tet anma tiꞌ,

xhi yaꞌ tet naj komandante tuꞌ.

40 Yalni naj komandante hakaꞌ tiꞌ:

—Kꞌultikꞌa,

chisje hatzoteli,

xhi naj.

Yah linhno yaꞌ yibꞌanh isqꞌochal cuartel tuꞌ,

isyeni yaꞌ isqꞌabꞌ yunhe matxa chitzotel anma.

Haxa yet matxa hunu mak chitzoteli yok yaꞌ tzotelo yul abꞌxubꞌal hebreo,

yalni yaꞌ hakaꞌ tiꞌ: