4 Ay xin hunteqꞌan ebꞌnaj juxhta to yinta yaꞌ Pablo;

haꞌ ton naj Sópater ah Berea,

yebꞌ naj Aristarco,

yebꞌ naj Segundo ah Tesalónica,

yebꞌ yaꞌ Gayo ah Derbe,

yebꞌ naj Timoteo,

yebꞌpaxo kawanh ebꞌnaj ay bꞌey Asia,

naj Tíquico yebꞌ naj Trófimo.

5 Haꞌ ton ebꞌnaj juxhta tiꞌ bꞌabꞌito kosatajanh,

konhyechmananh ebꞌnaj bꞌey yul konhobꞌ Troas.

6 Wal honhanh xin,

yet islahwikano qꞌinh yet chiwahlax ixim pan machi yanhal,

jokanh yul huneꞌ teꞌ barco yul konhobꞌ Filipos,

yinhxa ishowebꞌ tzꞌayik japnihanh iskꞌatanh ebꞌnaj yul konhobꞌ Troas,

kokankanojanh hujebꞌ tzꞌayik bꞌey tuꞌ.

7 Hayet bꞌabꞌel tzꞌayik yinh semana,

kokutxbꞌan kobꞌahanh yebꞌ ebꞌnaj ayxako yul isqꞌabꞌ Komam,

kowahnihanh ixim pan yu konanitijanh iskamikal Komam Jesucristo.

Yok yaꞌ Pablo iskuywa yinh Istzotiꞌ Komam Dios;

yaj yu kaw yilal isto yaꞌ yinh isbꞌel yinh hunxa tzꞌayik,

yuxin kaw nimajal yute yaꞌ yoj kuybꞌanile tuꞌ,

yapnikano yinh chuman aqꞌbꞌal.

8 Kutxanonhikojanh yul huneꞌ cuarto nahat yekanh bꞌay kaw tzetkꞌa chꞌen lámpara kaj qꞌaꞌ yinh.

9 Ay xin huneꞌ naj tzeh,

Eutico isbꞌi,

tzꞌonhan yul wentanah;

yaj yu kaw nimajal yute yaꞌ Pablo yoj kuybꞌanile,

yuxin tit iswayanh naj.

Haxa yet kaw chiway naj tuꞌ xin,

istitkꞌay naj yinh yox piso.

Kamomxa naj xin yet yilaxkanh naj.

10 Yuxin ayti yaꞌ Pablo tuꞌ yay pajno yaꞌ yibꞌanh naj tzeh tuꞌ,

yok laqꞌno yaꞌ yinh naj,

yalni yaꞌ tet ebꞌnaj juxhta tuꞌ hakaꞌ tiꞌ:

—Mach chexxiwi,

itzitz naj,

xhi yaꞌ.

11 Lahwi tuꞌ xin yahpaxto yaꞌ Pablo yul cuarto hunelxa.

Isqꞌaxponayo yaꞌ ixim pan yu konanitijanh iskamikal Komam,

kowahnihanh ixim kosunilanh.

Istzabꞌnipaxiko yaꞌ Pablo yalni kuybꞌanile tuꞌ hunelxa masanto yet issajbꞌiloj.

Lahwi tuꞌ xin,

isto yaꞌ.

12 Wal naj tzeh titkꞌay tuꞌ xin;

hulkanh iskꞌul naj,

yilaxto naj yatut.

Kaw okkano tzalahilal yinh ebꞌnaj juxhtaj tuꞌ.

13 Wal honhanh konhbꞌabꞌitojanh,

jokanh yul huneꞌ teꞌ barco chꞌapni bꞌey konhobꞌ Asón,

haꞌ tuꞌ xin jechmahanh yaꞌ Pablo yuto haktikꞌa tuꞌ jute jalnihanh,

wal yaꞌ Pablo tuꞌ bꞌelwito yaꞌ yu yoj.

14 Hayet yapni yaꞌ Pablo bꞌey Asón,

yok yaꞌ yul barco jintajanh kotohanh yul konhobꞌ Mitilene.

15 Lahwi tuꞌ xin jelpaxojanh bꞌey tuꞌ,

yinh huneꞌ tzꞌayik tuꞌ xin konhekꞌanh iskawil konhobꞌ Quío.

Haxa yet hunxa tzꞌayik japnihanh bꞌey konhobꞌ Samos,

haxapaxo yinh hunxa tzꞌayik xin,

japnikanojanh bꞌey konhobꞌ Mileto.

16 Yajaꞌ yal yaꞌ Pablo ta bꞌeh jekꞌanh bꞌey Efeso yunhe mach kaw chꞌekꞌ tiempo jibꞌanhanh yul ismajul Asia tuꞌ,

haxinwal haꞌ bꞌey konhobꞌ Jerusalén ayonhanh yet chꞌayilo qꞌinh Pentecostés,

tato kaw chiyuhi.

17 Hayet ayonhanh yul konhobꞌ Mileto tuꞌ,

yanito yaꞌ Pablo yawtemal ebꞌnaj anciano xol ebꞌnaj juxhta ay yul konhobꞌ Efeso.

18 Hayet yapni ebꞌnaj xin,

yalni yaꞌ tet ebꞌnaj:

—Hex tiꞌ kaw heyohta tzet yu wekꞌan texol,

yebꞌ tzet yu inmunlahan yettaxtikꞌa wulikꞌojan bꞌey Asia tiꞌ.

19 Sunilbꞌal tiempo yet wekꞌan texol,

kaw chewchotanhe wute hinbꞌahan yinh ismunil Komam Dios.

Kaw kinoqꞌan yu isyaꞌtajil hul wibꞌanhan,

yu tzet iswatxꞌe ebꞌnaj Israel winhan.

20 Yaj maxhtikꞌa inbꞌejan walnikꞌojan kuybꞌanile kaw kolwa teyinh,

inkuywapaxojan xol anma,

yebꞌ xin yulajla heyatut.

21 »Waxanhka Israel maka mach Israeloj,

lahan yu intzotelan tet.

Walnihan tato yilal isbꞌejnikano istxꞌojal chiswatxꞌe,

kat yaniko isbꞌa yul isqꞌabꞌ Komam Jesucristo Jahawil.

22 Wal tinanh xin,

chintohan bꞌey konhobꞌ Jerusalén yuto hak tuꞌ yalni Komam Espíritu Santo wetan;

yaj kaw mach wohtajojan tzet chihul wibꞌanhan bꞌey tuꞌ.

23 Kaw kachannhe wohtajan tato hayet chinapnihan yul hunun konhobꞌ,

chiyalni Komam Espíritu Santo wetan tato chihul isyaꞌtajil wibꞌanhan,

kat walaxiktojan yul preso.

24 Yajaꞌ machi hunu tiꞌ kaw chiꞌaqꞌni kabꞌkonokanh wanmahan;

waxanhka chinkaman kaw matzet chal inkꞌulan.

Tanhe kꞌuxan ayinikojan yinh tzalahilal yet chilahwikano inmuniltiꞌan,

huneꞌ aqꞌbꞌil wetan yu Komam Jesucristo Jahawil,

huneꞌ inmunilan walnikꞌojan Tzotiꞌ Kꞌul yet Kolbꞌanile yu iskꞌulchꞌanil iskꞌul Komam.

25 »Kaw kinekꞌan walaꞌkꞌojan texol yinh tzet chu heyok yul isqꞌabꞌ Komam Dios.

Tinanh xin,

wohtajan tato matxa bꞌaqꞌinhal chinheyilan hunelxa.

26 Yuxin chiwalan teyet tato maxhtaj hinan ay inmulan ta ay hunujex cheyetato hebꞌa.

27 Kaw sunil wanmahan walikꞌojan Istzotiꞌ Komam Dios teyet.

Machi xin hunu tzet ye tuꞌ webꞌahan yinh hesat.

28 Wal xin kaw cheyil hebꞌa,

kat xin heyaꞌilnhen ebꞌnaj ayxako yul isqꞌabꞌ Komam Dios,

yuto haꞌ teyet yaqꞌ Komam Espíritu Santo huneꞌ munil yinh heyaꞌilnhen ebꞌnaj juxhtaj yebꞌ ebꞌix janabꞌ ayxako yul isqꞌabꞌ Komam,

hunteqꞌan mak isloqꞌ Komam Jesucristo yu ischikꞌil yet iskami.

29 Wal xin kaw wohtajan tato hayet chintokanotiꞌan chihul hunteqꞌanxa ebꞌnaj chiꞌaniko pohlebꞌahil texol,

hakaꞌ chiyute noꞌ oj yet chꞌokto noꞌ yulaj ispeyabꞌil noꞌ meꞌ kat ispujnakanto noꞌ.

30 Texoltikꞌa tiꞌ xin chiꞌaho hunteqꞌanxa ebꞌnaj,

chihalnikꞌo leqꞌtiꞌal yunhe yok tzujno mak chabꞌilxa Komam yul yanma yinta ebꞌnaj yalni.

31 Kaw cheyil hebꞌa xin;

nawetij tato yinh oxebꞌ habꞌil,

hunun tzꞌayik yebꞌ hunun aqꞌbꞌal,

kaw kexwiptzenan hunun hex,

ay tiempo kaw kinoqꞌan yet walnihan teyet.

32 »Wal tinanh xin hex wuxhtaj,

kaw chexwabꞌenhekantojan yul isqꞌabꞌ Komam Dios,

yebꞌ xin yinh iskꞌulchꞌanil Istzotiꞌ Komam,

yuto ay yip Komam kexyaqꞌni chꞌibꞌo yinh Istzotiꞌ,

kat yaqꞌnipaxo Komam huneꞌ tzet halbꞌilkano tet sunil mak sikꞌbꞌilxalo yu Komam.

33 »Wal intiꞌan,

maxhtikꞌa wochehan wiqꞌalojan hunu tzet ye tuꞌ teyet,

machi melyu,

machipaxo xilqꞌape inqꞌanan tet hunu maka.

34 Wal xin,

kaw heyohtaj tato kaw kinmunlahan yunhe wiqꞌnihan tzet chꞌokniko wuhan yebꞌ xin yinh tzet chꞌokniko yu ebꞌyaꞌ tzujan wintajan.

35 Yebꞌilxa wuhan teyet ta hak tuꞌ chu komunlahi,

kat kokolwa yinh anma matzet aya.

Kaw xin yilal konaniti tzet yalkano Komam Jesús,

yet yalni Komam hakaꞌ tiꞌ:

“Ekꞌna kaw kꞌul yet anma chiꞌaqꞌni,

sata anma chichahni,”

xhi Komam,

xhi yaꞌ Pablo.

36 Yet yalnikano yaꞌ Pablo huneꞌ tuꞌ,

yay jahno yaꞌ yebꞌ ebꞌnaj anciano tuꞌ,

istxahli tet Komam.

37 Sunil ebꞌnaj juxhta tuꞌ oqꞌi,

islaqꞌlenkano isbꞌa ebꞌnaj yebꞌ yaꞌ Pablo tuꞌ,

istzꞌohnipaxo ebꞌnaj isqꞌotx yaꞌ.

38 Kaw okkano bꞌiskꞌulal yinh yanma ebꞌnaj yuto yal yaꞌ Pablo tato matxa bꞌaqꞌinh chiyil ebꞌnaj yinh yaꞌ hunelxa.

Lahwi tuꞌ xin,

isto ebꞌnaj yaqꞌnokano yaꞌ Pablo bꞌay chꞌok yaꞌ yul teꞌ barco.