—¿Hechahmi Komam Espíritu Santo yet heyaniko hebꞌa yul isqꞌabꞌ Komam Jesucristo?

xhi yaꞌ tet ebꞌnaj.

Istaqꞌwi ebꞌnaj:

—Machoj,

maxhtikꞌa bꞌay chijabꞌehanh ta ay huneꞌ Komam Espíritu Santo,

xhi ebꞌnaj.

3 Isqꞌambꞌenpaxo yaꞌ:

—¿Tzet kuybꞌanile ilchalo heyu yet yah haꞌ hewiꞌ?

xhi yaꞌ Pablo tuꞌ.

Istaqꞌwi ebꞌnaj:

—Wal xin,

ah haꞌ kowiꞌanh hakaꞌ kuybꞌanile yal yaꞌ Juan,

xhi ebꞌnaj.

4 Yalnipaxo yaꞌ Pablo tet ebꞌnaj:

—Wal yaꞌ Juan yakanh yaꞌ haꞌ iswiꞌ anma yunhe isyenilo anma tato chisnah isbꞌa yinh ismul.

Yaj xin yalpaxkano yaꞌ Juan tuꞌ tet anma tato ay huneꞌxa mak tzujan yul yinta yaꞌ,

yuxin kaw yilal yinh huneꞌxa yaꞌ tuꞌ chako yanma anma,

haꞌ ton Komam Jesucristo,

haꞌ chal yaꞌ Juan tuꞌ,

xhi yaꞌ Pablo.

5 Hayet yabꞌen ebꞌnaj huneꞌ tzet yal yaꞌ Pablo tuꞌ,

yahkano haꞌ iswiꞌ ebꞌnaj yinh isbꞌi Komam Jesucristo.

6 Lahwi tuꞌ yanahto yaꞌ Pablo isqꞌabꞌ yibꞌanh iswiꞌ ebꞌnaj,

hak tuꞌ yu ischahnikano ebꞌnaj Komam Espíritu Santo.

Istzabꞌniko ebꞌnaj istzotel yinh nan abꞌxubꞌal,

chalni ebꞌnaj Tzotiꞌ chitit tet Komam Dios.

7 Aymi ebꞌnaj 12 (kabꞌlahonhwanh) yinh sunil.

8 Kaw oxebꞌ ixahaw yalilto yaꞌ Pablo Istzotiꞌ Komam Jesucristo yul iscapilla ebꞌnaj Israel bꞌey tuꞌ.

Kaw xin machi xiw yaꞌ yalni Istzotiꞌ Komam.

Chiskuyni yaꞌ anma yu yok yul isqꞌabꞌ Komam Dios.

9 Yajaꞌ ay hunteqꞌan ebꞌnaj mach ischah yabꞌeꞌ tzet yal yaꞌ Pablo tuꞌ.

Yalni ebꞌnaj sata sunil anma ta mach kꞌulo huneꞌ kuybꞌanil yet kolbꞌanile yinh Komam Jesucristo.

Yuxin el yaꞌ Pablo xol ebꞌnaj,

yinito yaꞌ ebꞌnaj ayxako yul isqꞌabꞌ Komam tuꞌ bꞌey yescuela huneꞌ naj chiyij Tiranno.

Haꞌ tuꞌ xin iskuy yaꞌ Pablo ebꞌnaj tuꞌ yinh hunun tzꞌayik.

10 Kaw kabꞌ habꞌil kuywa yaꞌ yuxin sunil anma bꞌey yul ismajul Asia abꞌenkano huneꞌ kuybꞌanil yinh Komam Jesucristo;

anma Israel,

yebꞌpaxo anma mach Israeloj.

11 Kaw isye yaꞌ Pablo hunteqꞌan nimeta kꞌaybꞌalkꞌule yu yip Komam Dios yinh sat anma.

12 Wal xin waxanhka payuꞌe maka hunuxa xilqꞌape ekꞌlenaxa yinh isnimanil yaꞌ Pablo tuꞌ,

chito anma kat yaniko yinh isyawubꞌ kat iskawxikanh.

Aypaxo anma chꞌelkano ischejabꞌ naj matzwalil yinh.

13 Aypaxo xin hunteqꞌan ebꞌnaj Israel chiꞌekꞌ bꞌey tuꞌ chilo ischejabꞌ naj matzwalil yinh anma.

Yaqꞌlen ebꞌnaj yawten isbꞌi Komam Jesús yu yinilo ischejabꞌ naj matzwalil yinh anma.

Yalni ebꞌnaj hakaꞌ tiꞌ:

«Yinh isbꞌi yaꞌ Jesús,

yaꞌ chiꞌekꞌ yaꞌ Pablo yalaꞌkꞌo istzotiꞌ,

chijalanh elanhwej,»

xhi ebꞌnaj.

14 Hak tuꞌ yute hujwanh iskꞌahol huneꞌ naj Israel chiyij Esceva,

yahawil yeko yinh ebꞌnaj sacerdote Israel.

15 Yajaꞌ yet hunel yaqꞌle ebꞌnaj yinilo ischejabꞌ naj matzwalil yinh huneꞌ naj,

istaqꞌwikanh ischejabꞌ naj matzwalil tuꞌ tet ebꞌnaj:

«Yaꞌ Jesús cheyal tiꞌ,

kaw wohtajan yaꞌ,

kaw wohtapaxojan yaꞌ Pablo.

Wal hex hex tiꞌ xin,

¿mak anmahil hex?»

xhi ischejabꞌ naj matzwalil tuꞌ tet ebꞌnaj.

16 Haꞌ naj bꞌay ayko ischejabꞌ naj matzwalil tuꞌ xin,

tit lemna naj yibꞌanh ebꞌnaj,

isyuqꞌlaxayo ebꞌnaj yu naj yinh sunil yip,

kaw xin ok islahwilal isnimanil ebꞌnaj.

Tꞌilanxa ebꞌnaj yet yelkanh tet ischejabꞌ naj matzwalil tuꞌ.

17 Yet yabꞌen anma ah Efeso isqꞌumal yinh tzet yu tuꞌ,

anma Israel yebꞌpaxoj anma mach Israeloj kaw xiwkanh.

Hak tuꞌ xin yu yahkanh isbꞌina isbꞌi Komam Jesucristo xol anma.

18 Kaw ay anma chabꞌilxa Komam Jesucristo yu apni bꞌey tuꞌ,

yichiko yalnati sunilal istxꞌojal xaleiswatxꞌe yet yalanhtokanoj.

19 Yebꞌpaxo xin ay hunteqꞌan ebꞌnaj ahbꞌelomtikꞌa,

initi islibro chiyaqꞌbꞌalnhe yet chitxumli,

isnhusnikanto ebꞌnaj teꞌ yul qꞌaꞌ yinh sat sunil anma.

Hayet yil-laxi hanta istohol teꞌ libro tzꞌato tuꞌ,

aymi cincuenta mil melyu nabꞌa platanhe.

20 Hak tuꞌ xin yu ispujnakanh Istzotiꞌ Komam Jesucristo Jahawil,

isyenikanilo yip Komam xol anma.

21 Yet lahwi yuni hunteqꞌan tuꞌ xin,

yok yinh isnabꞌal yaꞌ Pablo isto yul ismajul Macedonia yebꞌ yul ismajul Acaya,

yebꞌpaxo yul konhobꞌ Jerusalén.

Yalni yaꞌ hakaꞌ tiꞌ:

«Chilahwi intokꞌojan bꞌey Jerusalén tuꞌ,

kaw yilal intohan yul konhobꞌ Roma,»

xhi yaꞌ.

22 Yuxin ischejto yaꞌ kawanh ebꞌnaj yet munlawomal bꞌey ismajul Macedonia;

haꞌ ton naj Timoteo yebꞌ naj Erasto.

Wal yaꞌ Pablo tuꞌ xin,

kankano yaꞌ hayebꞌxa ixahaw bꞌey ismajul Asia tuꞌ.

23 Yinh huneꞌ tiempohal tuꞌ,

ah wejla anma howal yinh kuybꞌanile yet Komam Jesús bꞌey Efeso.

24 Yuto ay huneꞌ naj chiyij Demetrio,

chakꞌom plata,

chiswatxꞌe naj yechel yatut huneꞌ istioxh anma chiyij Diana.

Kaw hantanhe melyu chiqꞌ naj yebꞌ ebꞌnaj chimunla yinh huneꞌ munil tuꞌ.

25 Wal xin iskutxbꞌayo naj sunil ebꞌnaj ismunlawom yebꞌ hunteqꞌanxa ebꞌnaj chichakꞌni chꞌen plata,

yalni naj tet ebꞌnaj hakaꞌ tiꞌ:

—Wal tinanh hex wet munlawomal,

kaw heyohtaj ta kaw ay melyu chijiqꞌ yinh huneꞌ komunil tiꞌ.

26 Yaj kaw cheyila kat heyabꞌenpaxo tzet lanhan yalni naj Pablo.

Tolabꞌ hunteqꞌan tioxh watxꞌebꞌil yu anma,

kaw mach diosoj.

Kaw xin hantaxa anma lanhan yaniko yanma yinh tzet chal naj.

Maxhnhetaj bꞌey Efeso tiꞌ,

wal xin kaw hantaxa anma ayko yinta naj bꞌey sunil ismajul Asia tiꞌ.

27 Kaw xin ay ismay istanhilo huneꞌ kotxonh tiꞌ,

yebꞌ ay ismay matxa yelapno chꞌeloko huneꞌ yatut kotioxh Diana yul sat anma,

yebꞌpaxo chꞌelo ispixan kotioxh Diana tiꞌ,

huneꞌ kaw ay yelapno yul sat anma ay yul ismajul Asia tiꞌ yebꞌ sunil yul sat yibꞌanhqꞌinal,

xhi naj tet ebꞌnaj tuꞌ.

28 Hayet yabꞌen ebꞌnaj hunteqꞌan tiꞌ,

kaw titkano ishowal ebꞌnaj sikꞌlebꞌil.

Yah yaw ebꞌnaj yinh kaw ip,

yalni ebꞌnaj:

«Kaw aykano yelapno ix kotioxh Diana hanhonh ayonh yul konhobꞌ Efeso tiꞌ,»

xhi ebꞌnaj.

29 Hak tuꞌ xin kaw tit ishowal ebꞌnaj,

yah wejna anma sunil yul konhobꞌ tuꞌ.

Istzabꞌnayo ebꞌnaj huneꞌ juxhta chiyij Gayo yebꞌ huneꞌxa naj juxhta chiyij Aristarco.

Haꞌ kawanh ebꞌnaj tiꞌ yul ismajul Macedonia tit ebꞌnaj yinta juxhta Pablo.

Yet istzabꞌlaxayo ebꞌnaj tuꞌ,

ishatxlaxto ebꞌnaj yul huneꞌ niman salón.

30 Yoche yaꞌ Pablo isto tzotelo sata anma tuꞌ,

yaj mach chisje ebꞌnaj ayxako yul isqꞌabꞌ Komam ta chꞌokto yaꞌ.

31 Aypaxo haywanh ebꞌnaj ayko yahawil yul ismajul Asia tuꞌ,

yamigo isbꞌa ebꞌnaj yebꞌ yaꞌ Pablo,

haꞌ ebꞌnaj anito ischejabꞌ tet yaꞌ Pablo ta mach chisye isbꞌa yaꞌ bꞌey huneꞌ salón tuꞌ.

32 Haꞌ anma kutxaniko tuꞌ toxanhe chiwejchahi,

nanantaxanhe chal anma yet chiꞌawi yinh kaw ip.

Ekꞌbꞌal yikta ebꞌnaj xol anma tuꞌ mach yohtajo tzet yinh yuxin iskutxbꞌako isbꞌa.

33 Yajaꞌ xol anma tuꞌ ayko huneꞌ naj chiyij Alejandro,

tenlaxikto naj sata sunil anma yu ebꞌnaj yet Israelal.

Lahwi tuꞌ xin,

isyeni naj yu isqꞌabꞌ tet anma tato chislinhbꞌa yel yaw yu yoche naj yalaꞌ tet ebꞌnaj ta mach yuho ebꞌnaj Israel yuxin ay huneꞌ howal tuꞌ.

34 Yet yilni anma tato israelita naj,

yah wejla anma yel yaw.

Aymi kabꞌo hora el yaw anma,

chalni hakaꞌ tiꞌ:

«Kaw aykano yelapno ye ix Diana,

kotioxh hanhonh Efeso honh tiꞌ,»

xhi ebꞌnaj.

35 Haxa naj tzꞌibꞌlom yul konhobꞌ tuꞌ,

linhbꞌan yel yaw anma,

yalni naj hakaꞌ tiꞌ:

«Hex wet konhobꞌ,

sunil anma ohtanhe tato hanhonh ayonh yul konhobꞌ Efeso tiꞌ,

hanhonh ay jip jalni tzet wal yuni yatut ix kotioxh Diana,

yebꞌ huneꞌ yechel ix titna yul satkanh.

36 Machi hunu mak chiyu yalni tato leqꞌtiꞌal ye huneꞌ chiwaltiꞌan,

yuxin bꞌejwe yel heyaw.

Nawe hebꞌa yinh tzet chewatxꞌe haxinwal machi hunu istxꞌojal cheyiti teyibꞌanh.

37 Yuto haꞌ ebꞌnaj maxeyiti tiꞌ,

machi hunu tzet xayelqꞌa ebꞌnaj yul yatut ix kodiosal tiꞌ,

machipaxo hunu ebꞌnaj tiꞌ bꞌuchwa yinh ix.

38 Tato chiyoche naj Demetrio tiꞌ yebꞌ xin hunteqꞌanxa ebꞌnaj chakꞌom plata tiꞌ yichekanh howal yinh hunu maka,

chu isto ebꞌnaj isqꞌanaꞌ tet naj juez,

kat iswatxꞌenayo ebꞌnaj hakaꞌ chal iskꞌul ebꞌnaj.

39 Ta ayto tzet cheyoche hewatxꞌeꞌ,

halwe tet ebꞌnaj yahaw konhobꞌ,

kat islahtiꞌnhelaxi,

kat iswatxꞌenkano ebꞌnaj sata sunil anma.

40 Yuto hakaꞌ mayu tiꞌ,

aytaxka tzet chisnakanh ebꞌnaj ah Roma jinh,

lanhantaxka kopakꞌiko yinh ebꞌnaj,

yalni.

¿Tzet ye hunteqꞌan anma lanhan iswejcha tiꞌ?

xhikaxta ebꞌnaj.

¿Tzet chijute kotaqꞌwi heyalni?

Hakaꞌ tuꞌ matxa chu kokolni kobꞌa,»

xhi naj tzꞌibꞌlom tuꞌ tet anma.

41 Yet lahwi yalni naj hunteqꞌan tiꞌ xin,

istaqꞌli naj tet anma tuꞌ,

ispaxto anma sunil.