4 Yinh hunun tzꞌayikal xewilal chibꞌeykꞌo yaꞌ Pablo yalno Istzotiꞌ Komam Dios yul iscapilla anma Israel,

yu iskuynikano yaꞌ anma Israel yebꞌ anma mach Israeloj.

5 Yet yapni yaꞌ Silas yebꞌ naj Timoteo bꞌey yul konhobꞌ Corinto,

ispeto ebꞌnaj bꞌey yul ismajul Macedonia,

yaꞌ Pablo tuꞌ xin,

kaw yinhxanhe Istzotiꞌ Komam Dios ok yaꞌ munlahoj.

Chalni yaꞌ yinh kaw habꞌan tet ebꞌnaj Israel tato haꞌ Komam Jesús haꞌ ton Cristo Kokolomal,

Komam echmabꞌil yuli.

6 Kaw xin tit ishowal ebꞌnaj israel yet yabꞌen ebꞌnaj hakaꞌ tuꞌ,

istzabꞌniko ebꞌnaj isbꞌuchwa yinh yaꞌ Pablo.

Hak tuꞌ xin yu istzikobꞌtanhenkano yaꞌ Pablo tuꞌ xil isqꞌap yunhe isyenikanilo yaꞌ tet anma tato kaw matxa yok yaꞌ yinh anma tuꞌ.

Yalni yaꞌ:

—Hex kaw hex cheyiti isyaꞌtajil teyibꞌanh,

wal hinan kaw matxa wokan teyinh,

yuxin tinanh intoxahan walnolojan huneꞌ kuybꞌanil tiꞌ tet anma mach Israeloj,

xhi yaꞌ.

7 Lahwi yalnikano yaꞌ Pablo hakaꞌ tuꞌ,

yelti yaꞌ yul iscapilla ebꞌnaj Israel,

isto yaꞌ bꞌey yatut huneꞌ naj chiyij Ticio Justo,

huneꞌ naj mach Israeloj,

naj chiyiyo isbꞌa tet Komam Dios.

Ayayo yatut naj iskawilal capilla tuꞌ.

8 Ay xin hunxa naj kaw yahawil yeko yinh iscapilla ebꞌnaj Israel,

Crispo isbꞌi,

yayto naj yul yanma yinh Komam yebꞌ sunil mak ay yul yatut.

Txꞌiꞌalpaxo anma ay bꞌey Corinto tuꞌ hayet yabꞌen Istzotiꞌ Komam Dios,

yaniko isbꞌa yul isqꞌabꞌ Komam,

yahkano haꞌ iswiꞌ.

9 Yinh huneꞌ aqꞌbꞌalil xin yal Komam Dios tet yaꞌ Pablo yul iswayik hakaꞌ tiꞌ:

«Mach chaxhxiwi,

lahiko hawalni Intzotiꞌan xol anma tiꞌ.

10 »Wal xin,

ayinikojan hawetbꞌihoj,

yuxin machi hunu mak chu yok kaxhistzabꞌnoyoj.

Kaw ayxa anma sikꞌbꞌilkanh wuhan bꞌey yul huneꞌ konhobꞌ tiꞌ,»

xhi Komam tet yaꞌ.

11 Yuxin kaw yikta iskabꞌ habꞌil ekꞌ yaꞌ Pablo yul konhobꞌ Corinto iskuyni anma yinh Istzotiꞌ Komam.

12 Yet ayko huneꞌ naj romano,

Galión isbꞌi,

yahawilo yinh txꞌotxꞌ Acaya tuꞌ,

islahtiꞌnhen isbꞌa ebꞌnaj Israel yinh tzet wal yuten ebꞌnaj yaꞌ Pablo.

Hak tuꞌ yu yinito ebꞌnaj yaꞌ Pablo yul kapil.

13 Yalni ebꞌnaj hakaꞌ tiꞌ:

—Huneꞌ naj tiꞌ chiꞌekꞌ naj aqꞌokꞌule tet anma yunhe yinayo isbꞌa tet Komam Dios,

yaj mach hakaꞌo yalni ley,

xhi ebꞌnaj yinh yaꞌ Pablo tuꞌ.

14 Hayet lanhanxa istzotelkanh yaꞌ Pablo,

yalni naj Galión hakaꞌ tiꞌ:

—Hex israelita hex tiꞌ,

kaw mach chꞌelikti heyaw wetan bꞌey tiꞌ,

tato ay hunu ismachiswalilal iswatxꞌe huneꞌ naj tiꞌ,

maka tato ay hunu ismul naj kaw nanxa islowi,

wal tuꞌ kaw chimwabꞌetojan tzet cheyala.

15 Yajaꞌ ta yunhe tzotiꞌ chal naj,

yebꞌ xin yu huneꞌ bꞌihe chiyaqꞌ bꞌinaho naj,

yebꞌ yunhe heley yuxin cheyako hehowal yinh naj,

wal xin watxꞌewe huneꞌ tiꞌ hechukil.

Wal hinan mach chiwako hinbꞌahan inwatxꞌehan huneꞌ tiꞌ,

xhi naj Galión tet ebꞌnaj.

16 Lahwi yalni naj hakaꞌ tuꞌ,

istzumbꞌelaxilti ebꞌnaj tuꞌ yul kapil.

17 Wal ebꞌnaj griego ay bꞌey tuꞌ,

istzabꞌayo ebꞌnaj naj Sóstenes,

naj ayko yahawilo iscapilla ebꞌnaj Israel.

Yok ebꞌnaj ishateno naj bꞌey istiꞌ kapil,

yaj tonhe yil naj Galión huneꞌ tuꞌ,

machi nichꞌano tzet yal naj.

18 Kaw txꞌiꞌalto tzꞌayik ekꞌ yaꞌ Pablo bꞌey Corinto.

Lahwi tuꞌ xin istaqꞌlikano yaꞌ tet makta ayxako yul isqꞌabꞌ Komam bꞌey tuꞌ yuto istzabꞌiko yaꞌ isto yinh isbꞌel bꞌey yul ismajul Siria.

Istopaxo ix Priscila yebꞌ naj Aquila.

Yet yapni bꞌey yul konhobꞌ Cencrea,

yinilo yaꞌ Pablo xil iswiꞌ yunhe yijni isbꞌa huneꞌ tzet halbꞌil yu yaꞌ tet Komam Dios.

Lahwi tuꞌ xin yokto yaꞌ Pablo yebꞌ ix priscila yebꞌ naj Aquila yul barco.

19 Yet yapni yul konhobꞌ Efeso xin,

iskankano ix Priscila yebꞌ naj Aquila bꞌey tuꞌ.

Okto yaꞌ Pablo yul iscapilla ebꞌnaj Israel,

istzabꞌniko yaꞌ istzotel yebꞌ ebꞌnaj kutxanikoj.

20 Kaw ok ebꞌnaj yalaꞌ tet yaꞌ Pablo tato chikankano yaꞌ hayebꞌo tzꞌayikalil xol ebꞌnaj,

yaj xin mach chisje yaꞌ.

21 Yet lanhan istaqꞌlikano yaꞌ Pablo tuꞌ tet ebꞌnaj,

yalni yaꞌ hakaꞌ tiꞌ:

—Kaw yilal chintohan bꞌey Jerusalén yinh qꞌinh.

Yaj ta chꞌel yinh iskꞌul Komam Dios chinekꞌan tekꞌatanh hunelxa,

xhikano yaꞌ.

Hak tuꞌ xin yu yel yaꞌ yul konhobꞌ Efeso,

yokpaxo yaꞌ yul barco.

22 Lahwi tuꞌ yapni yaꞌ yul konhobꞌ Cesarea,

istopaxahto yaꞌ yul konhobꞌ Jerusalén tzotelo yebꞌ ebꞌnaj ayxako yul isqꞌabꞌ Komam Jesús bꞌey tuꞌ.

Lahwi yekꞌ yaꞌ bꞌey yul konhobꞌ Jerusalén tuꞌ,

isto yaꞌ yul konhobꞌ Antioquía.

23 Haꞌ bꞌey tuꞌ xin ekꞌ yaꞌ Pablo huneꞌ tiempohal.

Lahwi tuꞌ isto yaꞌ hunelxa yinh isbꞌel.

Yekꞌ yaꞌ sunil yulaj konhobꞌ bꞌey yul ismajul Galacia yebꞌ yul ismajul Frigia,

yiptzenkano yaꞌ ebꞌnaj ayxako yul isqꞌabꞌ Komam Jesucristo.

24 Ay huneꞌ yaꞌ Israel,

Apolos isbꞌi,

ah konhobꞌ Alejandría.

Yaꞌ Apolos tiꞌ,

apni yaꞌ yul konhobꞌ Efeso bꞌay kankano ix Priscila yebꞌ naj Aquila.

Kaw helan yaꞌ istzoteli,

yebꞌ kaw yohta yaꞌ tzet ayayo yul Yum Komam Dios tzꞌibꞌnhebꞌilkano yet payat.

25 Kuybꞌilpaxo yaꞌ yinh kuybꞌanile yinh yet Komam Jesucristo,

yuxin yinh kaw sunil yanma yaꞌ iskuy yaꞌ anma yinh yet Komam.

Waxanhka hanhechꞌan kuybꞌanile yal yaꞌ Juan yinh yahbꞌal haꞌ iswiꞌ anma yohta yaꞌ.

26 Yet hunel ok yaꞌ yalaꞌ Istzotiꞌ Komam Dios xol anma yul iscapilla ebꞌnaj Israel,

yinh kaw sunil iskꞌul yaꞌ yal kuybꞌanile tuꞌ.

Yet lahwi yabꞌen ix Priscila yebꞌ naj Aquila kuybꞌanile yaqꞌ yaꞌ,

yinito naj yebꞌ ix yaꞌ Apolos tuꞌ yatut.

Yok naj yebꞌ ix yalnolo yinh kaw habꞌan yinh sunil kuybꞌanile yinh Komam Jesucristo.

27 Lahwi tuꞌ xin,

yok yinh isnabꞌal yaꞌ Apolos isto bꞌey ismajul Acaya.

Yuxin yato ebꞌnaj ayxako yul isqꞌabꞌ Komam bꞌey Efeso tuꞌ huneꞌ carta bꞌay taqꞌelaxto yaꞌ tet ebꞌnaj ayxako yul isqꞌabꞌ Komam,

yunhe kꞌul chu ischahlax yaꞌ bꞌey tuꞌ.

Yet yapni yaꞌ bꞌey yul ismajul Acaya tuꞌ,

yok yaꞌ yiptzeno sunil anma xayako isbꞌa yul isqꞌabꞌ Komam,

yu iskꞌulchꞌanil iskꞌul Komam Dios.

28 Kaw wiyom yok yaꞌ yalno isyelal tet ebꞌnaj Israel yinh sat anma.

Chisyenilo yaꞌ bꞌaytet yinh maxhtaj yeko ebꞌnaj tuꞌ,

chalni yaꞌ ta haꞌ yul Yum Komam Dios chala ta haꞌ Komam Jesús,

haꞌ Cristo Kokolomal echmabꞌil yuli.