Yet issomchakanh isnabꞌal anma bꞌey konhobꞌ Tesalónica
17
Yinh isbꞌel yaꞌ Pablo yebꞌ yaꞌ Silas,
ekꞌ ebꞌyaꞌ bꞌey konhobꞌ Anfípolis,
yebꞌ bꞌey konhobꞌ Apolonia.
Lahwi tuꞌ xin yapni ebꞌyaꞌ yul konhobꞌ Tesalónica bꞌay ay huneꞌ iscapilla ebꞌnaj Israel.
2 Yokto yaꞌ Pablo yul capilla tuꞌ hakaꞌtikꞌa chu yaꞌ yul hunun konhobꞌ.
Yulbꞌal oxebꞌ semana yinh hunun tzꞌayik xewilal kuywa yaꞌ yinh ebꞌnaj tuꞌ.
3 Yalnikano yaꞌ Pablo yinh kaw habꞌan ta aykanayo yul Yum Komam Dios ta kaw yilal yekꞌyaꞌ yanma Kokolomal,
yebꞌ yilal iskami kat yitzitzbꞌikanh.
Yalnipaxo yaꞌ hakaꞌ tiꞌ:
«Huneꞌ mak lanhan walnihan teyet tiꞌ,
haꞌ Komam Jesús,
haꞌ ton Komam Cristo Kokolomal,»
xhi yaꞌ Pablo tet anma ayikto bꞌey tuꞌ.
4 Ay hunteqꞌan ebꞌnaj Israel yayto yul yanma yinh tzet yal yaꞌ Pablo,
yokkano ebꞌnaj yetbꞌiho yaꞌ Pablo yebꞌ yaꞌ Silas.
Kaw txꞌiꞌalpaxo ebꞌnaj griego ayxako yanma yinh Komam Dios yako isbꞌa yul isqꞌabꞌ Komam Jesucristo,
yebꞌpaxo xin hunteqꞌan ebꞌix ix kaw ay yelapno ye yul issat anma yul konhobꞌ tuꞌ yako isbꞌa yul isqꞌabꞌ Komam.
5 Yaj wal hunmajanxa ebꞌnaj Israel mach yayto yul yanma yinh tzet chal yaꞌ Pablo,
kaw tit ishowal ebꞌnaj yuto kaw txꞌiꞌal anma yako isbꞌa yinh tzet yal yaꞌ Pablo tuꞌ.
Iskutxbꞌaniko ebꞌnaj hunteqꞌan ebꞌnaj kaw isah,
tonhe chiꞌekꞌ yul calla,
kaw maxhtikꞌa iswalil.
Haꞌ ebꞌnaj tuꞌ xin ok aqꞌokꞌule tet ebꞌnaj yul konhobꞌ tuꞌ yunhe yah wejna ebꞌnaj sunil.
Yipikto ebꞌnaj yul yatut huneꞌ naj chiyij Jasón yu chisnah ebꞌnaj tato haꞌ tuꞌ ay yaꞌ Pablo yebꞌ yaꞌ Silas,
yuto kaw choche ebꞌnaj istzabꞌayo ebꞌyaꞌ kawanh tuꞌ kat yalaxiko ebꞌyaꞌ yul isqꞌabꞌ konhobꞌ.
6 Yu mach ilcha ebꞌyaꞌ yul huneꞌ nha tuꞌ,
yuxin haxa juxhta Jasón yebꞌ haywanhxa ebꞌnaj juxhtaj ishatxto ebꞌnaj tet ebꞌnaj yahaw konhobꞌ.
Yalni ebꞌnaj yinh kaw ip hakaꞌ tiꞌ:
«Naj Pablo yebꞌ naj Silas,
kaw sunil anma yul sat yibꞌanhqꞌinal tiꞌ chisomchakanh isnabꞌal yu ebꞌnaj,
wal tinanh xin xahulpaxo ebꞌnaj koxol.
7 Haꞌ xin naj Jasón tiꞌ,
chichahni ebꞌnaj yul yatut;
ebꞌnaj tuꞌ kaw mach chisyije ebꞌnaj isley naj jahaw ay Roma.
Chalpaxo ebꞌnaj ta ay huneꞌxa naj rey,
chiyij Jesús,»
xhi ebꞌnaj tet ebꞌnaj yahaw konhobꞌ tuꞌ.
8 Yet yabꞌen sunil anma yebꞌ ebꞌnaj yahaw konhobꞌ tzet yal ebꞌnaj tuꞌ,
kaw tit ishowal,
issomchakanh isnabꞌal ebꞌnaj.
9 Wal ebꞌnaj yahaw konhobꞌ tuꞌ,
isqꞌan ebꞌnaj melyu ok selelo juxhta Jasón yebꞌ ebꞌnaj tzabꞌlaxto yinta tuꞌ,
isbꞌejtzolaxilo ebꞌnaj.
To yaꞌ Pablo yebꞌ yaꞌ Silas yul konhobꞌ Berea
10 Haxa yet aqꞌbꞌalil xin,
ischejlaxto yaꞌ Pablo yebꞌ yaꞌ Silas yul konhobꞌ Berea yinh anhe yu ebꞌnaj juxhtaj.
Yet yapni ebꞌyaꞌ bꞌey tuꞌ,
yok ebꞌyaꞌ yul iscapilla ebꞌnaj Israel.
11 Ekꞌna kaw kꞌulto isnabꞌal anma Israel ay bꞌey konhobꞌ Berea tuꞌ sata anma Israel ay bꞌey konhobꞌ Tesalónica.
Kaw yako yinh iskꞌul yabꞌen Istzotiꞌ Komam Dios yal ebꞌyaꞌ kawanh tuꞌ.
Kaw xin hunun tzꞌayik iskuyni anma Istzotiꞌ Komam yunhe yilni ta kaw yel tzet chal ebꞌyaꞌ.
12 Yuxin,
kaw txꞌiꞌal anma Israel yako isbꞌa yul isqꞌabꞌ Komam Jesucristo,
yebꞌ txꞌiꞌalpaxo ebꞌnaj griego yebꞌ ebꞌix griego kaw nime ix yul sat konhobꞌ tuꞌ yako isbꞌa yul isqꞌabꞌ Komam.
13 Yet yabꞌen ebꞌnaj Israel ay bꞌey Tesalónica tato lanhan yalni yaꞌ Pablo Istzotiꞌ Komam Dios bꞌey konhobꞌ Berea,
yapni ebꞌnaj aqꞌokꞌule tet anma yunhe issomchakanh isnabꞌal yinh tzet chal yaꞌ Pablo.
14 Yuxin ebꞌnaj juxhta tuꞌ yinh anhe ischejto ebꞌnaj yaꞌ Pablo bꞌey istiꞌ haꞌ mar.
Wal yaꞌ Silas yebꞌ naj Timoteo kankano yul konhobꞌ Berea tuꞌ.
15 Haꞌ ebꞌnaj juxhta inito yaꞌ Pablo,
hata bꞌey yul konhobꞌ Atenas bꞌey ebꞌnaj yaqꞌaꞌkano yaꞌ.
Haxa yet lanhan ismeltzo ebꞌnaj bꞌey Berea,
yalni yaꞌ Pablo tet ebꞌnaj:
—Cheyal apno tet yaꞌ Silas yebꞌ tet naj Timoteo ta chitit ebꞌnaj yinh anhe inkꞌatanhan bꞌey tiꞌ,
xhi yaꞌ Pablo tuꞌ.
Yet ayxakꞌo yaꞌ Pablo yul konhobꞌ Atenas
16 Hayet aykꞌo yaꞌ Pablo yechman yapni yaꞌ Silas yebꞌ naj Timoteo bꞌey yul konhobꞌ Atenas,
kaw tak iskꞌul yaꞌ yilni tato kaw tzetkꞌa istioxh anma yul huneꞌ konhobꞌ tuꞌ.
17 Yuxin chibꞌeykꞌo yaꞌ yul iscapilla ebꞌnaj Israel,
kat iskuywa yaꞌ yinh ebꞌnaj Israel tuꞌ yebꞌ yinh ebꞌnaj mach Israelo chitikꞌa yiyo isbꞌa tet Komam Dios.
Hunun tzꞌayik xin,
istzotelpaxo yaꞌ tet anma chꞌekꞌ bꞌey yul yamaqꞌil kapil.
18 Ay hunteqꞌan ebꞌnaj kuywawom chiyij epicúreo yebꞌpaxo hunteqꞌan ebꞌnaj chiyij estoico tzotel yebꞌ yaꞌ Pablo.
Ay ebꞌnaj halni hakaꞌ tiꞌ:
—¿Tzettaxka chalilo hunteqꞌan tzet chal huneꞌ naj kaw tzetkꞌa istzotel tiꞌ?
xhi ebꞌnaj.
Wal hunmajanxa ebꞌnaj xin,
halni hakaꞌ tiꞌ:
—Chitzotel naj yinh hunteqꞌanxa nan tioxhal,
xhi ebꞌnaj.
Yal ebꞌnaj hakaꞌ tuꞌ yu istzotiꞌal Komam Jesucristo chal yaꞌ Pablo,
chalnipaxo yaꞌ tato chiꞌitzitzbꞌikanh anma kamomxa.
19 Yuxin ilaxto yaꞌ bꞌey huneꞌ tzalan chiyij Areópago,
bꞌay chaqꞌ ebꞌnaj lahtiꞌ,
isqꞌambꞌen ebꞌnaj tet yaꞌ:
—¿Chimyu hawalni jetanh tzet ye huneꞌ kuybꞌanile chawalikꞌoj?
20 Yuto maxhto bꞌay chijabꞌehanh hunteqꞌan tiꞌ,
yuxin chijochehanh chijohtanhelojanh tzet kaw chiyal yelapnoj,
xhi ebꞌnaj.
21 Hak tuꞌ yute yalni ebꞌnaj yuto sunil anma ay yul konhobꞌ Atenas yebꞌ anma nan konhobꞌal ay yul konhobꞌ tuꞌ,
kaw nantikꞌa isbꞌeybꞌal anma.
Yuto yet ay hunu akꞌ kuybꞌanil chꞌapni hal-laxo xol ebꞌnaj kaw chiꞌekꞌ txꞌiꞌal tiempo yibꞌanh,
yuto kaw chiyoche ebꞌnaj ispichꞌalo yinh kaw kꞌul,
kat iskayeꞌnhe ebꞌnaj.
22 Yahwano yaꞌ Pablo xol ebꞌnaj bꞌey huneꞌ Areópago tuꞌ,
istzabꞌniko yaꞌ yalni:
—Wal tinanh,
hex ah konhobꞌ Atenas,
kaw chiwilan tato kaw ayko henabꞌal yinh ej tioxh.
23 Yet chinekꞌan yul konhobꞌ tiꞌ,
chiwilnihan bꞌaytaj tet hediosal bꞌay kaw cheyiyo hebꞌa.
Chiwilnipaxojan huneꞌ chꞌen yet hexahanbꞌal bꞌay tzꞌibꞌnhebꞌiliko hayebꞌ tzꞌibꞌ chalni hakaꞌ tiꞌ:
—Haꞌ tiꞌ chijiyo kobꞌa tet Dios mach ohtabꞌiloj,
xhi yinh huneꞌ chꞌen tuꞌ.
Wal xin haꞌ huneꞌ Dios mach heyohtajo bꞌay cheyiyo hebꞌa tuꞌ,
haꞌ ton huneꞌ Dios tuꞌ chinhulan walaꞌan istzotiꞌal texol.
24 »Haꞌ huneꞌ Dios tuꞌ,
watxꞌenhe yul sat yibꞌanhqꞌinal tiꞌ yebꞌ sunil tzet ayayo sat;
kaw yahawil yeko yinh satkanh yebꞌ yul sat yibꞌanhqꞌinal tiꞌ.
Haꞌ huneꞌ Dios tuꞌ,
mach yulo nha watxꞌebꞌil yu anma aya.
25 Mach yilalo ay tzet chꞌaqꞌlax tet huneꞌ Dios tuꞌ yu anma.
Wal xin haꞌ Komam chꞌaqꞌni kokawil kosunil,
haꞌ Komam chꞌaqꞌnipaxo jaqꞌeqꞌ kohiqꞌaꞌ,
yebꞌ sunil tzet ayonh.
26 Haꞌ Komam Dios watxꞌen naj bꞌabꞌel winaj;
yinh naj tuꞌ xin titna sunil anma ay yulaj konhobꞌ yul sat yibꞌanhqꞌinal tiꞌ.
Yet yalanhtokanoj yalkano Komam bꞌaqꞌinh chiwatxꞌi hunun nimeta konhobꞌ,
yebꞌ bꞌaytuꞌwal chꞌekꞌ ismohonal hunun konhobꞌ tuꞌ.
27 »Iswatxꞌe Komam Dios hakaꞌ tuꞌ yunhe issayni anma Komam,
kꞌuxanta chiꞌohtanhelaxilo Komam yu anma.
Yaj chiwalkanojan teyet tato mach nahato yelo Komam Dios jinh,
wal xin kawil yeko Komam jinh.
28 Yu Komam Dios yuxinto itzitzonh,
yu Komam yuxin chonhbꞌili,
yu Komam yuxin ayonhikꞌo bꞌey yul sat yibꞌanhqꞌinal tiꞌ.
Ay hunteqꞌan ebꞌnaj heyet konhobꞌ kaw helan istzoteli,
chalni hakaꞌ tiꞌ:
“Kaw yuninal Dios jehanh,”
xhi ebꞌnaj.
29 »Kaw yel chal ebꞌnaj tuꞌ ta kaw yuninal Komam Dios jehi,
yuxin kaw mach chu jalni tato lahan Komam hakaꞌ hunteqꞌan tioxh watxꞌebꞌil yu anma yinh chꞌen oro maka yinh chꞌen plata,
maka hunuxa nan chꞌenal watxꞌebꞌilayo yu anma yu ishelanil isnabꞌal.
30 Yet payxa,
mach ohtanhebꞌilo Komam Dios yu anma,
yuxin yaqꞌ nimankꞌulal Komam yinh issukal anma.
Wal tinanh xin chal Komam Dios tato kaw yilal chisnah isbꞌa sunil anma ay yul sat yibꞌanhqꞌinal tiꞌ,
kat ismeltzoko yul isqꞌabꞌ Komam.
31 Halbꞌilkano yu Komam tato chꞌapni huneꞌ tzꞌayikal bꞌay chil Komam tzet chiꞌeliko anma ay yul sat yibꞌanhqꞌinal tiꞌ,
hatatikꞌa tzet chiswatxꞌe hunun anma.
Wal xin ay huneꞌ Iskꞌahol Komam Dios sikꞌbꞌililoj,
haꞌ chiꞌilni tzet chiꞌeliko hunun anma.
Isyelo Komam Dios tet sunil anma tato kaw yel huneꞌ tiꞌ yet yaqꞌni itzitzbꞌokanh Komam Dios Iskꞌahol xol anma kamom,
xhi yaꞌ Pablo tet ebꞌnaj tuꞌ.
32 Yet yabꞌen ebꞌnaj yalni yaꞌ Pablo tato chiꞌitzitzbꞌikanh anma kamom,
ay ebꞌnaj bꞌuchwa yinh yaꞌ,
aypaxo ebꞌnaj halni:
«Xakoqꞌambꞌeꞌanh huneꞌ tiꞌ tawet yet hunuxa tiempohal,»
xhi ebꞌnaj.
33 Yet lahwi yabꞌen yaꞌ Pablo tzet yal ebꞌnaj tuꞌ,
yel yaꞌ xol ebꞌnaj.
34 Yajaꞌ ay haywanh ebꞌnaj tuꞌ yayto yul yanma yinh tzet yal yaꞌ Pablo,
yok ebꞌnaj yetbꞌiho yaꞌ.
Xol ebꞌnaj tuꞌ xin,
ay huneꞌ naj chiyij Dionisio,
yetbꞌi isbꞌa naj yebꞌ ebꞌnaj chiskutxbꞌa isbꞌa bꞌey Areópago tuꞌ.
Aypaxo hunteqꞌanxa anma yayto yul yanma yinh Komam yebꞌ xin huneꞌ ix ix chiyij Dámaris.