Ok naj Timoteo yetbꞌiho yaꞌ Pablo yebꞌ yaꞌ Silas yinh isbꞌel
16
Lahwi tuꞌ xin,
yapni yaꞌ Pablo yebꞌ yaꞌ Silas bꞌey yul konhobꞌ Derbe.
Tzujan tuꞌ yel ebꞌyaꞌ bꞌey tuꞌ,
isto ebꞌyaꞌ yul konhobꞌ Listra.
Haꞌ bꞌey tuꞌ xin yilayo isbꞌa ebꞌyaꞌ yebꞌ huneꞌ naj ayxako yul isqꞌabꞌ Komam,
Timoteo isbꞌi;
yunin huneꞌ ix israelita ayxako yul isqꞌabꞌ Komam Jesús,
walpaxo ismam naj griego naj.
2 Haꞌ ebꞌnaj juxhta yul konhobꞌ Listra yebꞌ konhobꞌ Iconio,
chal ebꞌnaj ta kaw kꞌul isbꞌeybꞌal naj Timoteo tuꞌ.
3 Yu choche yaꞌ Pablo yiqꞌato naj Timoteo yetbꞌiho yinh isbꞌel,
yuxinto aqꞌlax circuncidar naj yunhe matzet chal ebꞌnaj israelita bꞌay chilaekꞌ naj yinta yaꞌ,
yuto ohtabꞌil ta griego ismam naj.
4 Yul hunun konhobꞌ bꞌay chilaekꞌ ebꞌyaꞌ xol ebꞌnaj juxhtaj chaqꞌni ebꞌyaꞌ chejbꞌanile abꞌebꞌilti yinta yu ebꞌyaꞌ ischejabꞌ Komam Jesús yebꞌ yu ebꞌyaꞌ anciano ay bꞌey yul konhobꞌ Jerusalén.
Yalnikano ebꞌyaꞌ tet makta ayxako yul isqꞌabꞌ Komam tato kaw yilal isyijen hunteqꞌan kuybꞌanile tuꞌ.
5 Yuxin haꞌ anma ayxako yul isqꞌabꞌ Komam yul hunun konhobꞌ,
kaw iptzelaxkano yaniko yanma yinh Komam Jesucristo.
Hak tuꞌ xin yu ischꞌibꞌ isbꞌisil hunun tzꞌayik.
Yil yaꞌ Pablo huneꞌ naj ay bꞌey Macedonia yul iswayik
6 Komam Espíritu Santo,
haꞌ mach chanito yaꞌ Pablo yebꞌ ebꞌyaꞌ yetbꞌi yalnokꞌo Istzotiꞌ Komam bꞌey yul ismajul Asia,
yuxin bꞌeh isto ebꞌyaꞌ bꞌey ismajul Frigia yebꞌ bꞌey yul ismajul Galacia.
7 Yet yapni ebꞌyaꞌ yinh ismohonal txꞌotxꞌ chiyij Misia,
yokpaxo yinh isnabꞌal ebꞌyaꞌ isto bꞌey huneꞌxa txꞌotxꞌ chiyij Bitinia,
yaj maxhtikꞌa chalaxto ebꞌyaꞌ yu Komam Espíritu Santo.
8 Yuxin palan isqꞌaxponikꞌto ebꞌyaꞌ yul ismajul Misia,
yayapno ebꞌyaꞌ yul konhobꞌ Troas ayko istiꞌ haꞌ mar.
9 Haxa yinh aqꞌbꞌalil xin,
isyeni isbꞌa huneꞌ naj ay bꞌey ismajul txꞌotxꞌ Macedonia tet yaꞌ Pablo yul iswayik,
isqꞌan naj tet yaꞌ,
yalni naj hakaꞌ tiꞌ:
«Ekꞌanhti bꞌey txꞌotxꞌ Macedonia tiꞌ kat hakolwa jinhanh,»
xhi naj tet yaꞌ Pablo.
10 Lahwi yilni yaꞌ Pablo huneꞌ tuꞌ xin,
jokanh koqꞌuynu jetanh kotohanh bꞌey txꞌotxꞌ Macedonia,
yuto kotxumanh tato haꞌ Komam chonhinitojanh jalaꞌkꞌojanh Tzotiꞌ yet kolbꞌanile tet anma ay bꞌey tuꞌ.a
Yet yaniko isbꞌa huneꞌ ix chiyij Lidia yul isqꞌabꞌ Komam Jesús bꞌey konhobꞌ Filipos
11 Lahwi tuꞌ xin,
jokanh yul teꞌ barco bꞌey Troas tuꞌ,
kaw rinhan kotohanh bꞌey konhobꞌ Samotracia.
Haxa yet hunxa tzꞌayik xin japnihanh bꞌey yul konhobꞌ Neápolis.
12 Kobꞌelwitojanh,
japnihanh yul konhobꞌ Filipos ayko yalanh yip ebꞌnaj romano.
Haꞌ huneꞌ konhobꞌ tuꞌ,
kaw aykano yelapno ye xol sunil konhobꞌ ay yul ismajul txꞌotxꞌ Macedonia.
Kaw xin txꞌiꞌal tzꞌayik konhekꞌanh yul huneꞌ konhobꞌ tuꞌ.
13 Yinh tzꞌayik xewilal xin kotohanh istiꞌ huneꞌ ha haꞌ chꞌayto istxam konhobꞌ tuꞌ yuto kotxumanh tato haꞌ bꞌey tuꞌ chiskutxbꞌa isbꞌa anma Israel istxahli.
Hayet japnihanh jay tzꞌonhnojanh,
jichikojanh jalnihanh Istzotiꞌ Komam tet hunteqꞌan ebꞌix ix iskutxbꞌa isbꞌa bꞌey tuꞌ.
14 Ay xin huneꞌ ix ah konhobꞌ Tiatira chiyij Lidia,
ayko xol ebꞌix kutxaniko tuꞌ,
txonhom qꞌape ix,
qꞌap kaw ay istohol,
kajmutzꞌmunhe jilni qꞌap.
Huneꞌ ix tiꞌ xin,
kaw chiyo isbꞌa ix tet Komam Dios.
Yet yabꞌen ix kuybꞌanile yal yaꞌ Pablo tuꞌ,
yaniko isbꞌa ix yul isqꞌabꞌ Komam Jesucristo.
15 Tzujan tuꞌ xin yahkano haꞌ iswiꞌ ix yebꞌ sunil mak ay bꞌey yatut ix.
Yalni ix jetanh hakaꞌ tiꞌ:
—Ta kaw yeli ayko wanmahan yinh Komam cheyila,
tonhwe bꞌey watutan,
xhi ix jetanh.
Hak tuꞌ yu kokankanojanh bꞌey yatut ix.
Yet yalaxikto yaꞌ Pablo yebꞌ yaꞌ Silas yul preso
16 Haꞌ hunel xin,
yet lanhan kotohanh bꞌay chiskutxbꞌa isbꞌa anma istxahli,
kochahnayojanh huneꞌ ix qꞌopo ayko ischejabꞌ naj matzwalil yinh.
Huneꞌ ix tuꞌ,
ahbꞌelom ix,
ischejabꞌ hunteqꞌan ebꞌnaj ye ix.
Kaw xin chischah ebꞌnaj melyu yinh ismunil ix.
Conversión del carcelero (Hechos 16.16-40)
—Haꞌ hunteqꞌan ebꞌyaꞌ tiꞌ,
ischejabꞌ Komam Dios ye ebꞌyaꞌ,
huneꞌ Dios kaw aykano yip.
Haꞌ ebꞌyaꞌ chihalnikꞌo teyet tzet chiyu hekolchahi,
xhi ix.
18 Kaw txꞌiꞌal tzꞌayik yal ix hakaꞌ tuꞌ,
kaw xin tibꞌayo yu yaꞌ Pablo yabꞌen tzet chal ix,
yuxin meltzo yaꞌ,
yok tꞌanhno yaꞌ yinh ix,
yalni yaꞌ tet ischejabꞌ naj matzwalil ayko yinh ix hakaꞌ tiꞌ:
—Yinh isbꞌi Komam Jesucristo chiwalan tawet,
elanh yinh ix tiꞌ,
xhi yaꞌ Pablo.
Yet yabꞌen ischejabꞌ naj matzwalil huneꞌ tuꞌ,
yelkano naj yinh ix.
19 Haxa yet yilni ebꞌnaj yahaw ix tuꞌ tato matxa melyu chischah ebꞌnaj yinh ismunil ix,
istzabꞌnayo ebꞌnaj yaꞌ Pablo yebꞌ yaꞌ Silas,
yilaxto ebꞌyaꞌ kawanh tuꞌ sata ebꞌnaj yahaw konhobꞌ bꞌey kapil.
20 Haxa yet yalaxiko ebꞌnaj sata ebꞌnaj yahaw konhobꞌ tuꞌ,
yalni ebꞌnaj tzabꞌnayo yaꞌ Pablo yebꞌ yaꞌ Silas tuꞌ:
—Haꞌ ebꞌnaj Israel tiꞌ,
kaw tonhe chihul ebꞌnaj yaqꞌaꞌ somchahokanh isnabꞌal sunil jet konhobꞌ tiꞌ.
21 Yuto lanhan iskuynikano ebꞌnaj anma yinh hunteqꞌan kuybꞌanile mach ischah isbꞌa yebꞌ koley.
Kaw xin mach chu kochahni ijaꞌ tzet chal ebꞌnaj isyayil hanhonh tiꞌ romano honh,
xhi ebꞌnaj.
22 Lahwi tuꞌ xin yah bꞌulna anma yinh yaꞌ Pablo yebꞌ yaꞌ Silas.
Ischejni ebꞌnaj yahaw konhobꞌ tuꞌ istzil-laxilo xil isqꞌap ebꞌyaꞌ yunhe ishatelax ebꞌyaꞌ yu teꞌ hitxꞌom kꞌax.
23 Lahwi ishatelax ebꞌyaꞌ txꞌiꞌal el,
yalaxikto ebꞌyaꞌ yul teꞌ preso.
Yalni ebꞌnaj yahaw tuꞌ tet naj tanhem preso:
—Kaw kaw chawutekto ebꞌnaj yul preso tuꞌ,
xhi ebꞌnaj.
24 Haxa yet yabꞌen naj tanhem preso huneꞌ tuꞌ,
yanikanikto naj ebꞌyaꞌ kawanh bꞌay kaw nahat yekanikto yul teꞌ preso.
Yanikanikto naj yoj ebꞌyaꞌ yul islotꞌil teꞌ cepo.
25 Haxa yet chuman aqꞌbꞌal xin,
chibꞌitni yaꞌ Pablo yebꞌ yaꞌ Silas tet Komam Dios,
chitxahlipaxo ebꞌyaꞌ.
Kaw xin chabꞌe hunteqꞌanxapaxo ebꞌnaj presowom tzet chal ebꞌyaꞌ.
26 Yinh haꞌmataj xin yekꞌ huneꞌ niman txixkabꞌ,
kaw toxanhe chiyukyun isxeꞌal teꞌ preso yu.
Ishajlo sunil ispultahil teꞌ preso tuꞌ,
yaykꞌaypaxo chꞌen cadena ayko yinh ebꞌnaj presowom.
27 Haxa yet yel iswayanh naj tanhem preso,
yilni naj tato hajan sunil ispultahil teꞌ preso,
yuxin yihti naj yespada yul yatut yu ispotxꞌni isbꞌa naj yalni,
yuto haꞌ yute istxumni naj ta xaꞌelkanh sunil ebꞌnaj ayikto yul preso tuꞌ.
28 Yajaꞌ ah yaw yaꞌ Pablo tet naj hakaꞌ tiꞌ:
—Mach chapotxꞌ habꞌa,
kosunilanh ayonhiktijanh yul preso tiꞌ,
xhi yaꞌ.
29 Isqꞌanni naj chitanhen preso tuꞌ isqꞌaꞌ yu ismujli,
isto naj bꞌay ay ebꞌyaꞌ tuꞌ;
kaw toxanhe chiluylun naj yu xiwkilal.
Isjahbꞌanayo isbꞌa naj sata yaꞌ Pablo yebꞌ sata yaꞌ Silas.
30 Lahwi tuꞌ xin,
yinilti naj ebꞌyaꞌ kawanh tuꞌ,
isqꞌambꞌen naj tet ebꞌyaꞌ:
—Wal tinanh,
¿tzet wal wuten hinbꞌahan yunhe inchahnikanojan inkolbꞌanilan?
xhi naj.
31 Yalni ebꞌyaꞌ tet naj tanhem preso:
—Ako hawanma yinh Komam Jesucristo kat hakolchahi yebꞌ sunilal mak ay bꞌey hawatut,
xhi ebꞌyaꞌ tet naj.
32 Lahwi tuꞌ xin,
yok ebꞌyaꞌ yalno Istzotiꞌ Komam Dios tet naj,
yebꞌ tet sunil mak ay bꞌey yatut naj.
33 Yinhtikꞌa huneꞌ aqꞌbꞌalil tuꞌ xin,
ok naj istxꞌahalo islahwilal ebꞌyaꞌ kawanh tuꞌ.
Lahwi tuꞌ xin,
yahkano haꞌ iswiꞌ naj yebꞌ sunilal mak ay bꞌey yatut naj.
34 Yinito naj ebꞌyaꞌ kawanh tuꞌ bꞌey yatut,
iswaꞌ ebꞌyaꞌ.
Kaw xin chitzala yanma naj yebꞌ sunilal mak ay bꞌey yatut tuꞌ yuto yako yanma naj yinh Komam Dios.
35 Haxa yet huneꞌxa sakꞌayalil xin,
ischejnito ebꞌnaj yahawil konhobꞌ tuꞌ hunteqꞌan ebꞌnaj mayor,
yalni ebꞌnaj tet naj tanhem preso tuꞌ hakaꞌ tiꞌ:
—Wal tinanh hajilti naj Pablo yebꞌ naj Silas,
xhi ebꞌnaj.
36 Yuxin yal naj tanhem preso tet yaꞌ Pablo:
—Wal tinanh,
chexinbꞌejtzohan yalni ebꞌnaj wahawan,
yuxinto asiꞌwej,
paxanhweto yinh aqꞌankꞌulal,
xhi naj.
37 Yajaꞌ xin yal yaꞌ Pablo tet ebꞌnaj mayor tuꞌ:
—Wal hanhonhtiꞌanh,
romano honhanh,
yaj jijanh yu ebꞌnaj yinh sat sunil anma,
machi nino isqꞌambꞌe ebꞌnaj tato ay komulanh.
¿Tom xin haxa tinanh ewantajil chonhbꞌejtzolaxanh,
yalni ebꞌnaj?
¡Wal xin,
machoj!
Hulujabꞌ ebꞌnaj yahaw tuꞌ,
haꞌ kaw ebꞌnaj chul konhinoltojanh,
xhi yaꞌ Pablo.
38 Hak tuꞌ xin yu isto ebꞌnaj yalno tet ebꞌnaj yahaw tuꞌ.
Yuxin hayet yabꞌen ebꞌnaj tato romano yaꞌ Pablo yebꞌ yaꞌ Silas,
isxiwkanh ebꞌnaj.
39 Isto ebꞌnaj isqꞌanno nimankꞌulal yinh tet yaꞌ Pablo yebꞌ tet yaꞌ Silas.
Lahwi tuꞌ xin,
yilaxilti ebꞌyaꞌ yul preso,
yal-laxkano tet ebꞌyaꞌ tato chꞌel ebꞌyaꞌ yul konhobꞌ tuꞌ.
40 Lahwi yelti ebꞌyaꞌ yul preso tuꞌ,
isto ebꞌyaꞌ bꞌey yatut ix Lidia,
haꞌ tuꞌ xin yilayo isbꞌa ebꞌyaꞌ yebꞌ makta ayxako yul isqꞌabꞌ Komam.
Lahwi yiptzelax ebꞌnaj juxhta yebꞌ ebꞌix janabꞌ bꞌey tuꞌ,
yel ebꞌyaꞌ kawanh yul konhobꞌ tuꞌ.