2 Haꞌ xin yaꞌ Pablo yebꞌ yaꞌ Bernabé ok ebꞌyaꞌ iskajaꞌ hunteqꞌan tzotiꞌ yinh huneꞌ circuncisión tuꞌ.

Yokkano ebꞌyaꞌ tzotelo yibꞌanhilo hunteqꞌan tzotiꞌ tuꞌ yebꞌ ebꞌnaj chalni hun tuꞌ.

Yu maxhtikꞌa watxꞌayo yu ebꞌnaj,

yuxin yal ebꞌnaj juxhta tuꞌ tato chito yaꞌ Pablo yebꞌ yaꞌ Bernabé bꞌey Jerusalén;

istopaxo haywanhxa ebꞌnaj juxhta yinta ebꞌyaꞌ,

kat isqꞌambꞌelax tet ebꞌyaꞌ ischejabꞌ Komam Jesús yebꞌ tet ebꞌyaꞌ anciano ay bꞌey tuꞌ ta kaw yeli chaqꞌ circuncidar isbꞌa ebꞌnaj juxhta mach Israeloj,

mato machoj.

3 Hak tuꞌ yu ischejlaxto ebꞌyaꞌ yu ebꞌnaj ayxako yul isqꞌabꞌ Komam ay yul konhobꞌ Antioquía.

Hayet yekꞌ ebꞌyaꞌ yul ismajul Fenicia yebꞌ Samaria,

yalni ebꞌyaꞌ tet ebꞌnaj ayxako yul isqꞌabꞌ Komam bꞌey hunteqꞌan konhobꞌ tuꞌ tato ay ebꞌnaj mach Israelo yakano huneꞌ icham bꞌeybꞌale iqꞌbꞌiltikꞌa yu,

yaniko isbꞌa ebꞌnaj yul isqꞌabꞌ Komam Jesús.

Hayet yabꞌen ebꞌnaj juxhta isqꞌumal huneꞌ tuꞌ,

kaw tzalakanokanh yanma ebꞌnaj.

4 Hayet yapni ebꞌyaꞌ bꞌey yul konhobꞌ Jerusalén kaw tzalahilal yu ischahlax ebꞌyaꞌ yu ebꞌyaꞌ ischejabꞌ Komam Jesús,

yebꞌ ebꞌyaꞌ anciano,

yebꞌ sunil anma ayxako yul isqꞌabꞌ Komam.

Lahwi tuꞌ xin,

yok yaꞌ Pablo yebꞌ yaꞌ Bernabé yalni hanta tzettaj iskꞌulal iswatxꞌe Komam Dios yinh ebꞌyaꞌ.

5 Yajaꞌ xin ay haywanh ebꞌnaj fariseo xayako isbꞌa yul isqꞌabꞌ Komam Jesucristo yet yalanhtokanoj,

haꞌ ebꞌnaj tuꞌ xin ah linhnoj,

yalni ebꞌnaj:

—Haꞌ ebꞌnaj mach Israelo chichahni Komam Jesús yul yanma,

kaw yilal chꞌaqꞌlax circuncidar ebꞌnaj,

kat jalni tet ebꞌnaj tato kaw chisyije ebꞌnaj tzet chal isley yaꞌ Moisés,

xhi ebꞌnaj fariseo tuꞌ.

6 Hak tuꞌ xin yu iskutxbꞌaniko isbꞌa ebꞌyaꞌ ischejabꞌ Komam yebꞌ ebꞌyaꞌ anciano,

yok ebꞌyaꞌ iskuyni yinh tzet chꞌeliko huneꞌ tuꞌ.

7 Lahwi islahtiꞌnhen isbꞌa ebꞌyaꞌ yinh tzet chukano huneꞌ tuꞌ,

yah linhno yaꞌ Pedro,

yalni yaꞌ hakaꞌ tiꞌ:

—Hex wuxhtaj,

kaw heyohtaj ta yet kaw yalanhtokanoj haꞌ Komam kinsaynilojan texol yu walnikꞌojan Tzotiꞌ yet kolbꞌanile xol anma mach Israeloj,

yu yabꞌeni kat ischahni anma tuꞌ Komam Jesucristo yul yanma.

8 Wal xin Komam Dios ohtanhe tzet ay yul yanma hunun anma,

yuxin yaqꞌ Komam,

Komam Espíritu Santo tet anma mach Israelo hakaꞌ yu yaqꞌni Komam jet.

Hak tuꞌ yute Komam yunhe isyeniloj tato kꞌulpaxo ebꞌnaj jet anmahil tuꞌ yul sat Komam.

9 Wal yul sat Komam Dios xin,

kaw lahanonh yebꞌ anma mach Israeloj,

yuto haꞌ Komam sajnhenkano yanma anma tuꞌ yet ischahni anma Komam Jesucristo Iskolomaloj.

10 Wal tinanh xin,

¿tzet yinh yuxinto mach cheyoche hechahbꞌaꞌ tzet iswatxꞌe Komam Dios tiꞌ?

Hakaꞌ hunu ijatz kaw alkanoj,

matxa chonhah yalanh yu yalil,

hak tuꞌ xin ye isley yaꞌ Moisés.

Kaw maxhtikꞌa qꞌoji ebꞌnaj jichmam iswatxꞌen tzet chal huneꞌ ley tuꞌ,

hakonhpax tuꞌ kaw mach chiꞌijcha ju.

Yuxin ¿tzet yinh yuxinto cheyako huneꞌ tuꞌ yibꞌanh ebꞌnaj mach Israelo xayako isbꞌa yul isqꞌabꞌ Komam?

11 Wal xin kaw johtaxa tato hanhkꞌanhe yu iskꞌulal iskꞌul Komam Jesucristo yuxinto chonhkolchahi.

Hakpax tuꞌ xin chu iskolcha anma mach Israeloj,

xhi yaꞌ Pedro tuꞌ.

12 Hayet yabꞌen ebꞌnaj huneꞌ tuꞌ,

kaw matxa tzet yal ebꞌnaj.

Yabꞌenpaxo ebꞌnaj yet yalni yaꞌ Bernabé yebꞌ yaꞌ Pablo ta kaw hantanhe kꞌaybꞌalkꞌule yaqꞌkano Komam Dios iswatxꞌeꞌ ebꞌyaꞌ yet yekꞌ ebꞌyaꞌ xol anma mach Israeloj.

13 Lahwi istzotel ebꞌyaꞌ,

yalni yaꞌ Jacobo hakaꞌ tiꞌ:

—Hex wuxhtaj,

abꞌewe tzet chiwalan teyet.

14 Xayal yaꞌ Simón Pedro jet tato isye Komam Dios iskꞌulal iskꞌul tet anma mach Israeloj,

yuto lanhan issikꞌnikanh Komam anma tuꞌ yok yuninaloj.

15 Haꞌ huneꞌ lanhan iswatxꞌen Komam tiꞌ,

lanhan yijni isbꞌa tzet yalkano Komam Dios bꞌay tzꞌibꞌnhebꞌil yu ebꞌyaꞌ ischejabꞌ Komam Dios yet payat,

bꞌay chala:

19 Yuxin chintxumilojan ta matxa chu janiko huneꞌ ijatz yet ley yibꞌanh ebꞌnaj mach Israeloj,

yuto xaꞌisbꞌejkano ebꞌnaj hunteqꞌan bꞌeybꞌale iqꞌbꞌiltikꞌa yu,

yu yaniko isbꞌa yul isqꞌabꞌ Komam Dios.

20 Yuxin haꞌ huneꞌ yilal kotaqꞌento yul hunu carta ta matxa chiskꞌux ebꞌnaj noꞌ chibꞌe haltebꞌilxa tet ej tioxh,

yebꞌ xin ta mach chiꞌekꞌ ebꞌnaj yinh ixloj,

yebꞌ mach chiskꞌuxpaxo ebꞌnaj ischibꞌehal no noqꞌ tonhe chihojlax kamoj,

mach chislopaxo ebꞌnaj noꞌ chikꞌ.

21 Chiwalan huneꞌ tiꞌ,

yuto yettax payxa ichikanti yilni ebꞌnaj isley yaꞌ Moisés yulaj iscapilla ebꞌnaj jet Israelal yinh hunun tzꞌayik xewilal.

Hakpax tuꞌ tinanh,

kaw huneꞌnhetikꞌa haꞌ yalnilto ebꞌnaj yul hunun konhobꞌ,

xhikano yaꞌ Jacobo tuꞌ tet ebꞌnaj.

22 Haꞌ tzet yal yaꞌ Jacobo tuꞌ,

kaw ischah yabꞌeꞌ ebꞌyaꞌ ischejabꞌ Komam Jesús yebꞌ ebꞌyaꞌ anciano,

yebꞌpaxo sunil ebꞌnaj ayxako yul isqꞌabꞌ Komam tuꞌ.

Hak tuꞌ xin saylax haywanh ebꞌnaj chito yetbꞌiho yaꞌ Bernabé yebꞌ yaꞌ Pablo yul konhobꞌ Antioquía tuꞌ hunelxa.

Issaylax yaꞌ Judas,

chihal-laxpaxo Barsabás,

yebꞌpaxo yaꞌ Silas.

Haꞌ ebꞌyaꞌ kawanh tiꞌ kaw aykano yelapno ye xol ebꞌnaj ayxako yul isqꞌabꞌ Komam.

23 Lahwi tuꞌ xin,

ischejlaxto ebꞌyaꞌ,

yaqꞌaꞌ teꞌ carta bꞌay chal hakaꞌ tiꞌ:

«Hanhonhtiꞌanh ischejabꞌ Komam Jesús jehanh,

yebꞌ hanhonh anciano honhtiꞌanh,

heyuxhta jehanh yinh Komam Jesucristo,

chikoqꞌambꞌehanh teyet hanikꞌ heye yinh hekawil hex wuxhta mach Israelo ay yul konhobꞌ Antioquía,

yebꞌ yul txꞌotxꞌ Siria yebꞌ yul txꞌotxꞌ Cilicia.

24 »Jabꞌehanh tato ay haywanh ebꞌnaj el koxolanh bꞌey tiꞌ tonhe xin yako yet ebꞌnaj isto bꞌey tuꞌ.

Jabꞌenpaxojanh tato chiyaqꞌ tako ebꞌnaj hekꞌul yu tzet chala,

kat yaqꞌni somchahoto henabꞌal,

chalni ebꞌnaj ta yilal chꞌok huneꞌ circuncisión teyinh,

kat heyijen tzet chal isley yaꞌ Moisés.

25 Yuxinto kolahtiꞌnhe kobꞌahanh,

kosaynilojanh haywanh ebꞌyaꞌ chito texol tuꞌ.

Huneꞌnhe chiyu isto ebꞌyaꞌ yebꞌ juxhta Bernabé yebꞌ juxhta Pablo,

ebꞌyaꞌ kaw xahan ay jutiꞌanh.

26 Ebꞌyaꞌ kawanh tiꞌ,

kaw hinan ebꞌyaꞌ yabꞌen isyaꞌtajil yinh yet Komam Jesucristo,

ayxapaxo bꞌay kaw etza kam ebꞌyaꞌ yu anma.

27 Yuxin chijatojanh juxhta Judas yebꞌ juxhta Silas tekꞌatanh,

haꞌ ebꞌyaꞌ xin chihalni teyet tzet chalilo hunteqꞌan tzotiꞌ ayayo yul carta.

28 Komam Espíritu Santo halni jetanh ta matxa ijatz chijakojanh teyibꞌanh,

hanhkꞌanhe hunteqꞌan kaw yilal ye tiꞌ:

29 Mach chekꞌux ischibꞌehal no noqꞌ xaꞌaqꞌlax xahanbꞌalil tet tioxh.

Machi xin chelopaxo ischikꞌil no noqꞌ,

yebꞌpaxo xin mach chekꞌux ischibꞌehal no noqꞌ chishoj kamo isbꞌa,

mach xin chexekꞌ ixloj.

Ta cheyije hunteqꞌan tiꞌ,

kaw kꞌul tzet chewatxꞌe chal tuꞌ.

Kaw cheyaꞌilnhe hebꞌa,»

xhihayo yul teꞌ carta.

30 Hak tuꞌ yu ischejlaxto ebꞌyaꞌ bꞌey yul konhobꞌ Antioquía.

Hayet yapni ebꞌyaꞌ,

iskutxbꞌanayo isbꞌa sunil anma ayxako yul isqꞌabꞌ Komam bꞌey tuꞌ,

yaqꞌni ebꞌyaꞌ teꞌ carta tuꞌ.

31 Lahwi yilni ebꞌnaj juxhtaj yebꞌ ebꞌix janabꞌ tzet chal teꞌ carta tuꞌ,

kaw tzalakanokanh yuto yaqꞌ teꞌ yaqꞌlobꞌal yanma.

32 Yaꞌ Judas yebꞌ yaꞌ Silas tuꞌ,

yalpaxo ebꞌyaꞌ Tzotiꞌ chitit tet Komam Dios,

hak tuꞌ yu yaqꞌni ebꞌyaꞌ yaqꞌlobꞌal yanma ebꞌnaj ayxako yul isqꞌabꞌ Komam,

yiptzelaxpaxkano ebꞌnaj yinh yet Komam yu ebꞌyaꞌ.

33 Lahwi yekꞌ hayebꞌ tzꞌayik yibꞌanh ebꞌyaꞌ,

istaqꞌlikano ebꞌyaꞌ tet ebꞌnaj yuxhta bꞌey tuꞌ,

yet ismeltzoxato ebꞌyaꞌ iskꞌatanh ebꞌnaj juxhta anheti bꞌey konhobꞌ Jerusalén.

34 Yaj wal yaꞌ Silas,

ok yinh isnabꞌal yaꞌ iskankano bꞌey Antioquía tuꞌ.

35 Kanpaxkano yaꞌ Pablo yebꞌ yaꞌ Bernabé bꞌey Antioquía tuꞌ.

Huneꞌnhe ekꞌ ebꞌyaꞌ yebꞌ hunteqꞌanxa ebꞌnaj juxhtaj ay bꞌey tuꞌ iskuyuꞌ anma,

ispujbꞌanikꞌo Istzotiꞌ Komam Dios.

36 Lahwi yekꞌ hayebꞌ tzꞌayik xin,

yalni yaꞌ Pablo tet yaꞌ Bernabé:

—Tonh jilaꞌ ebꞌnaj juxhta bꞌey yul hunun konhobꞌ bꞌayxatikꞌa konhekꞌ jalaꞌ Istzotiꞌ Komam,

kat jilni hanikꞌ ye ebꞌnaj,

xhi yaꞌ.

37 Haꞌ yaꞌ Bernabé tuꞌ xin,

ay yalaꞌ yaꞌ tato chito juxhta Juan Marcos yetbꞌiho ebꞌyaꞌ.

38 Yajaꞌ yal yaꞌ Pablo tato mach chito yaꞌ,

yuto yet hunel elkano yaꞌ yinta ebꞌyaꞌ bꞌey yul konhobꞌ Panfilia;

haknhe tuꞌ xin,

matxa islah yaꞌ huneꞌ munil tuꞌ.

39 Yuxin iskajlekanh isbꞌa ebꞌyaꞌ kawanh tuꞌ yinh yaꞌ Juan Marcos,

ispohlen isbꞌa ebꞌyaꞌ,

nananta bꞌehal tokano hunun ebꞌyaꞌ.

Hak tuꞌ yu yok tzujno yaꞌ Juan Marcos yinta yaꞌ Bernabé,

yok ebꞌyaꞌ yul huneꞌ teꞌ barco,

isto ebꞌyaꞌ bꞌey txꞌotxꞌ Chipre.

40 Wal yaꞌ Pablo xin,

haxa yaꞌ Silas yito yaꞌ.

Kaw taqꞌelaxkano ebꞌyaꞌ yul isqꞌabꞌ Komam Dios yu ebꞌnaj juxhta ay bꞌey tuꞌ,

tzujan tuꞌ xin isto ebꞌyaꞌ.

41 Yekꞌ ebꞌyaꞌ yul ismajul txꞌotxꞌ Siria yebꞌ yul ismajul txꞌotxꞌ Cilicia yiptzenkano ebꞌyaꞌ juxhtaj yebꞌpaxo ebꞌix janabꞌ yinh iskꞌulal Komam yulajla hunun konhobꞌ bꞌayla ekꞌ ebꞌyaꞌ tuꞌ.