Yet yapni yaꞌ Pablo yebꞌ yaꞌ Bernabé yul konhobꞌ Iconio
14
Hayet yapni yaꞌ Pablo yebꞌ yaꞌ Bernabé bꞌey yul konhobꞌ Iconio tuꞌ,
yokto ebꞌyaꞌ yul iscapilla ebꞌnaj Israel.
Kaw kꞌul yute yalnilo ebꞌyaꞌ Istzotiꞌ Komam Dios,
yuxin kaw hantanhe ebꞌnaj Israel yebꞌ hunteqꞌanxa anma mach Israelo anayto yul yanma yinh tzet yal ebꞌyaꞌ.
2 Yaj wal ebꞌnaj Israel mach chahnayto yul yanma yinh Komam,
ok ebꞌnaj aqꞌokꞌule tet ebꞌnaj mach Israelo bꞌey tuꞌ yunhe txꞌoj isnahni ebꞌnaj yinh ebꞌyaꞌ juxhtaj.
3 Yajaꞌ nahatil ekꞌ yaꞌ Pablo yebꞌ yaꞌ Bernabé yul huneꞌ konhobꞌ tuꞌ.
Kaw yinh sunil yanma ebꞌyaꞌ tzotel yinh iskꞌulal iskꞌul Komam Dios.
Yunhe yil-laxi tato yel chal ebꞌyaꞌ,
yaqꞌ Komam ishelanil ebꞌyaꞌ isyeni yechel yip Komam Dios yebꞌ xin ej kꞌaybꞌalkꞌule.
4 Haꞌ anma ay yul huneꞌ konhobꞌ tuꞌ,
ispoh isbꞌa.
Huneꞌ majan ebꞌnaj ok tzujno yinta ebꞌnaj Israel,
mach yayto yul yanma yinh Komam,
hunxa majan ebꞌnaj xin okkano tzujno yinta yaꞌ Pablo yebꞌ yaꞌ Bernabé.
5 Lahwi tuꞌ xin,
islahtiꞌnhen isbꞌa ebꞌnaj Israel yebꞌ anma mach Israeloj,
yebꞌpaxo ebꞌnaj yahawil yeko yinh konhobꞌ tuꞌ,
yok ebꞌnaj yicheniko huneꞌ howal yinh yaꞌ Pablo yebꞌ yaꞌ Bernabé yunhe isqꞌojlaxkamo ebꞌyaꞌ.
6 Yajaꞌ yet yabꞌen ebꞌyaꞌ kawanh huneꞌ tuꞌ,
yelkanh ebꞌyaꞌ,
isto ebꞌyaꞌ bꞌey yul konhobꞌ Listra,
yebꞌ bꞌey konhobꞌ Derbe;
kabꞌebꞌ konhobꞌ tuꞌ ayko yul ismajul Licaonia,
istopaxo ebꞌyaꞌ yul hunteqꞌanxa konhobꞌ hoyaniko bꞌey tuꞌ.
7 Yul hunteqꞌan konhobꞌ tuꞌ okpaxo ebꞌyaꞌ yalaꞌ tet ej anma Tzotiꞌ Kꞌul yet Kolbꞌanile.
Yet isqꞌojlaxkanh yaꞌ Pablo
8 Yul konhobꞌ Listra ay huneꞌ naj txꞌoj ye yoj yettaxtikꞌa ispitzkꞌahi,
maxhtikꞌa xin chibꞌelwi naj.
9 Tzꞌonhanayo naj yabꞌen tzet chal yaꞌ Pablo.
Yilni yaꞌ Pablo tuꞌ tato kaw ayko yanma naj yinh Komam Dios,
yebꞌ ta chu iswatxꞌi naj yu Komam,
yuxin ok tꞌanhno yaꞌ Pablo yinh naj,
10 yalni yaꞌ tet naj yinh ip:
—Ahanhwanoj,
kat hatoholbꞌanhen habꞌa yibꞌanh hawoj,
xhi yaꞌ Pablo.
Yinh haꞌmataj ah linhno naj,
yichiko naj isbꞌelwi.
11 Haxa yet yilni anma tzet iswatxꞌe yaꞌ Pablo tuꞌ,
yah yaw anma yinh kaw ip,
yalni anma yinh abꞌxubꞌal chihal-lax bꞌey txꞌotxꞌ Licaonia tuꞌ hakaꞌ tiꞌ:
«Ilwekꞌanabꞌi lah,
ay kawanh kodiosal mahul koxol mayuteko isbꞌa anmahil.
12 Haꞌ yaꞌ Bernabé tiꞌ,
haꞌ kodiosal Júpiter,
wal yaꞌ Pablo tiꞌ xin,
haꞌ kodiosal Mercurio,a
yuto haꞌ yaꞌ matzotelilto koxol,»
xhi anma.
13 Ay huneꞌ naj sacerdote yet isdiosal Júpiter tuꞌ,
kaw yahawil yeko naj yinh huneꞌ yatut tioxh Júpiter ayko yinh istxam konhobꞌ.
Bꞌey naj yiqꞌati hunteqꞌan noꞌ tzehla wakax yebꞌ hunteqꞌan teꞌ xaj teꞌ,
yu choche naj yebꞌ anma tuꞌ yaqꞌaꞌko xahanbꞌalil tet ebꞌyaꞌ kawanh ischejabꞌ Komam tuꞌ bꞌey ispultahil istxam konhobꞌ.
14 Hayet yabꞌen yaꞌ Bernabé yebꞌ yaꞌ Pablo huneꞌ tuꞌ,
istzilnito ebꞌyaꞌ xil isqꞌap yunhe isyeniloj tato chitak iskꞌul.
Yok ebꞌyaꞌ xol anma,
yalni yinh kaw ip hakaꞌ tiꞌ:
15 —Wal tinanh hex wet anmahil,
¿tzet yinh yuxinto cheyute huneꞌ tiꞌ?
wal honhtiꞌanh kaw anma honhanh hakaꞌ hex tiꞌ,
yuxinto chonhhulanh jalaꞌanh teyet ta chebꞌejkano hunteqꞌan machiswalil chewatxꞌe kaw matzet chaliloj,
kat heyaniko hebꞌa yul isqꞌabꞌ Komam Dios itzitznhetikꞌa yinh sunilbꞌal tiempo.
Haꞌ huneꞌ Komam tiꞌ,
watxꞌenhe satkanh yebꞌ txꞌo txꞌotxꞌ yebꞌ sunil tzet ay sat txꞌotxꞌ,
iswatxꞌenpaxo Komam haꞌ mar yebꞌ sunil tzet ay xol haꞌ.
16 Wal yet yalanhtokanoj tonhe yil Komam Dios tzet chu anma yinh bꞌaytet ejnhetikꞌa chal iskꞌul chiswatxꞌe.
17 Yajaꞌ matolo yu chonhisnahulnheto Komam,
¡machoj!
Wal xin to chisyelo isbꞌa Komam jet yinh ej iskꞌulal chiswatxꞌe,
hakaꞌ yaniti Komam haꞌ nhabꞌ jibꞌanh kat ischꞌibꞌ sunil tzet chikotzꞌunu.
Chaqꞌnipaxo Komam sunil tzet chikolo,
kat yaqꞌnipaxo tzalaho kokꞌul,
xhi ebꞌyaꞌ tet anma tuꞌ.
18 Waxanhka yal yaꞌ Pablo yebꞌ yaꞌ Bernabé hakaꞌ tuꞌ,
yajaꞌ kaw lanho islinhbꞌa anma yalni tato chikam noꞌ wakax yinh xahanbꞌalil tet ebꞌyaꞌ.
19 Yaj wal xin ay hunteqꞌan ebꞌnaj Israel ay yul konhobꞌ Antioquía yebꞌ konhobꞌ Iconio apni yul konhobꞌ Listra tuꞌ.
Yok ebꞌnaj aqꞌokꞌule tet anma,
hak tuꞌ xin yu ishelni anma tuꞌ isnabꞌal,
yok anma isqꞌojnokanh yaꞌ Pablo.
Ham yalni anma tato kam yaꞌ,
yuxin ok anma ishatxaꞌkanilto yaꞌ yintalto konhobꞌ.
20 Yapni ebꞌnaj ayxako yul isqꞌabꞌ Komam iskꞌatanh yaꞌ Pablo tuꞌ,
yok hoyno ebꞌnaj yinh yaꞌ.
Lahwi tuꞌ xin yah linhno yaꞌ,
yokpaxto yaꞌ yul konhobꞌ tuꞌ.
Haxa yinh huneꞌxa tzꞌayik xin,
isto yaꞌ yebꞌ yaꞌ Bernabé yul konhobꞌ Derbe.
21 Hayet yapni ebꞌyaꞌ bꞌey tuꞌ,
yalnikꞌo ebꞌyaꞌ Tzotiꞌ Kꞌul yet Kolbꞌanile.
Tzetkꞌa anma chahni Komam Dios yul yanma yu tzet yal ebꞌyaꞌ.
Lahwi tuꞌ xin ismeltzopaxo ebꞌyaꞌ yul konhobꞌ Listra hunelxa,
yebꞌ bꞌey Iconio,
yebꞌpaxo bꞌey konhobꞌ Antioquía ay yul ismajul Pisidia.
22 Hayet yekꞌ ebꞌyaꞌ yul hunun konhobꞌ tuꞌ,
yiptzenkano ebꞌyaꞌ ebꞌnaj ayxako yul isqꞌabꞌ Komam.
Yalnikano ebꞌyaꞌ hakaꞌ tiꞌ:
«Lahweko heyaniko heyanma yinh Komam yuto hanhonh ayonhxako yul isqꞌabꞌ Komam Dios kaw txꞌiꞌal isyaꞌtajil chꞌekꞌ jibꞌanh,»
xhi ebꞌyaꞌ kawanh tuꞌ.
23 Yul hunun konhobꞌ xol ebꞌnaj ayxako yul isqꞌabꞌ Komam tuꞌ xin,
issaykano ebꞌyaꞌ mak chiꞌok ancianohal.
Lahwi tuꞌ yok ebꞌyaꞌ yinh huneꞌ yet mach chonhwaꞌi yu kotxahli tet Komam Dios,
hak tuꞌ yu yabꞌennhelaxkanto ebꞌnaj tuꞌ yul isqꞌabꞌ Komam Dios,
Komam chabꞌilxa yu ebꞌnaj.
Yet ismeltzo yaꞌ Pablo yebꞌ yaꞌ Bernabé yul konhobꞌ Antioquía yul ismajul Siria
24 Lahwi isqꞌaxponikꞌto yaꞌ Pablo yebꞌ yaꞌ Bernabé yul ismajul txꞌotxꞌ Pisidia,
yapni ebꞌyaꞌ yul ismajul txꞌotxꞌ Panfilia.
25 Yalnikꞌo ebꞌyaꞌ Istzotiꞌ Komam Dios yul konhobꞌ Perge,
tzujan tuꞌ xin yayapno ebꞌyaꞌ yul konhobꞌ Atalía.
26 Haꞌ bꞌey tuꞌ xin,
ok ebꞌyaꞌ yul huneꞌ teꞌ barco,
ismeltzo ebꞌyaꞌ yul konhobꞌ Antioquía hunelxa,
bꞌay taqꞌelaxto ebꞌyaꞌ yul isqꞌabꞌ Komam Dios yu ebꞌnaj juxhtaj yet yichiko ebꞌyaꞌ ismunil yinh yalnikꞌo Istzotiꞌ Komam Dios yulajla konhobꞌ;
wal xin yijkano isbꞌa huneꞌ ismunil ebꞌyaꞌ tuꞌ.
27 Yet yapni ebꞌyaꞌ yul konhobꞌ Antioquía tuꞌ xin,
iskutxbꞌanayo isbꞌa ebꞌnaj juxhtaj,
ayxako yul isqꞌabꞌ Komam,
yok ebꞌyaꞌ yalno yinh hanta iskꞌulal iswatxꞌe Komam Dios yinh ebꞌyaꞌ.
Yalnipaxo ebꞌyaꞌ yinh tzet yu yaqꞌnipaxo Komam iskꞌulal yibꞌanh anma mach Israeloj,
yunhe ischahni anma tuꞌ Komam Iskolomaloj.
28 Yaꞌ Pablo yebꞌ yaꞌ Bernabé nahatilto ekꞌ ebꞌyaꞌ iskꞌatanh ebꞌnaj ayxako yul isqꞌabꞌ Komam bꞌey tuꞌ.