Yet yichiko ismunil yaꞌ Bernabé yebꞌ yaꞌ Saulo
13
Xol ebꞌnaj ayxako yul isqꞌabꞌ Komam bꞌey yul konhobꞌ Antioquía,
ay ebꞌnaj yaqꞌ Komam Dios ismunil yalni Tzotiꞌ chitit tet Komam,
aypaxo ebꞌnaj ok kuywawomal yinh ebꞌnaj ayxako yul isqꞌabꞌ Komam.
Hunteqꞌan ebꞌnaj tuꞌ,
haꞌ ton yaꞌ Bernabé,
yebꞌ naj Simón,
naj chihal-lax qꞌejsatil,
yebꞌ huneꞌxa naj chiyij Lucio,
naj tit bꞌey ismajul Cirene.
Yebꞌ yaꞌ Saulo,
yebꞌ naj Manaén,
naj hun yu ischꞌibꞌ yebꞌ naj Herodes,
naj ok yahawilo txꞌotxꞌ Galilea.
2 Yet hunel xin,
kutxaniko ebꞌnaj juxhta tuꞌ yu yaqꞌni tzalaho iskꞌul yinh Komam Dios,
chiyekꞌtzen ebꞌnaj huneꞌ txah yet mach chonhwaꞌi,
yalni Komam Espíritu Santo tet ebꞌnaj:
«Iwelo yaꞌ Bernabé yebꞌ yaꞌ Saulo texol,
yuto chiꞌok ebꞌyaꞌ yinh huneꞌ munil bꞌay awtebꞌil wuhan,»
xhi Komam Espíritu Santo tet ebꞌnaj.
3 Lahwi yekꞌtzen ebꞌnaj huneꞌ txah yet mach chonhwaꞌi,
yanayo isqꞌabꞌ ebꞌnaj yibꞌanh iswiꞌ ebꞌyaꞌ kawanh tuꞌ.
Tzujan tuꞌ xin ischejlaxto ebꞌyaꞌ yu ebꞌnaj.
Yet istanhilo ismujlubꞌal huneꞌ naj nawal
4 Yet ischejlaxto yaꞌ Bernabé yebꞌ yaꞌ Saulo yu Komam Espíritu Santo,
isto ebꞌyaꞌ yul huneꞌ konhobꞌ chiyij Seleucia.
Yul huneꞌ konhobꞌ tuꞌ ok ebꞌyaꞌ yul teꞌ barco,
lahwi tuꞌ xin,
isto ebꞌyaꞌ bꞌey yul ismajul Chipre,
huneꞌ txꞌotxꞌ hoyaniko haꞌ mar yinhla iskꞌul.
5 Yapni ebꞌyaꞌ bꞌey huneꞌ txꞌotxꞌ chiyij Salamina,
yekꞌ ebꞌyaꞌ yalnokꞌo Istzotiꞌ Komam Jesucristo yulaj iscapilla ebꞌnaj Israel.
Haꞌ hun yaꞌ Juan Marcos,
kolwa yinta ebꞌyaꞌ.a
6 Lahwi tuꞌ xin yekꞌto ebꞌyaꞌ sunil yinh isqꞌatanil sat txꞌotxꞌ Chipre tuꞌ,
yapni ebꞌyaꞌ bꞌey konhobꞌ Pafos.
Haꞌ tuꞌ xin ischahleyo isbꞌa ebꞌyaꞌ yebꞌ huneꞌ naj Israel,
chiyij Barjesús.
Huneꞌ naj tuꞌ nawal naj,
tonhe chiyal naj tato ischejabꞌ Komam Dios ye naj.
7 Haꞌ huneꞌ naj tuꞌ,
yamigo isbꞌa naj yebꞌ naj Sergio Paulo,
naj yahawil yeko yinh ismajul Chipre.
Kaw xin itzꞌat iswiꞌ naj Sergio tuꞌ.
Yawten naj yaꞌ Bernabé yebꞌ yaꞌ Saulo iskꞌatanh,
yuto choche naj yabꞌeꞌ Istzotiꞌ Komam Dios.
8 Huneꞌ naj nawal tuꞌ,
Elimas isbꞌi naj yinh abꞌxubꞌal griego,
kaw ok naj kajwal yinh ebꞌyaꞌ kawanh tuꞌ,
yuto mach choche iskꞌul naj tato chako naj Sergio tuꞌ Istzotiꞌ Komam Dios yul yanma.
9 Yuxin haꞌ yaꞌ Saulo,
yaꞌ chiyijpaxo Pablo,
nohnako Komam Espíritu Santo yinh,
yokkano tꞌanhno yaꞌ yinh huneꞌ naj nawal tuꞌ,
10 yalni yaꞌ:
—Hach tiꞌ,
iskꞌahol naj matzwalil hawehi,
ayko hahowal yinh sunil tzet kaw kꞌul yebꞌ xin kaw chawaqꞌ subꞌchaho anma yu leqꞌtiꞌal,
kaw ayachiko hawetanto kuybꞌanile chiyaqꞌ Komam Dios.
11 Wal tinanh xin,
haꞌ Komam Dios chiꞌanayo isyaꞌtajil tawibꞌanh,
chitanholo hamujlubꞌal,
nahatil mach chubꞌ hawilno yoj tzꞌayik,
xhi yaꞌ Pablo tuꞌ tet naj.
Hayet yalni yaꞌ Pablo hakaꞌ tuꞌ,
istanhkanilo ismujlubꞌal naj,
matxatikꞌa chiyu yilni naj.
Istzabꞌniko naj yekꞌ matxmoni,
issayni naj hunu mak chixeknitoj,
yuto matxatikꞌa chiyu yilni naj.
12 Hayet yilni naj yahawil konhobꞌ Chipre huneꞌ tuꞌ,
yaniko naj yanma yinh Komam Dios.
Kaw kꞌaykanh iskꞌul naj yet yabꞌen naj sunil kuybꞌanile yet Komam Jesús.
Yet yapni yaꞌ Pablo yebꞌ yaꞌ Bernabé bꞌey Antioquía
13 Yok yaꞌ Pablo yul barco yebꞌ ebꞌyaꞌ tzujan yinta tuꞌ.
Hak tuꞌ xin yu yel ebꞌyaꞌ yul konhobꞌ Pafos,
yapni ebꞌnaj bꞌey konhobꞌ Perge yul ismajul Panfilia.
Wal yaꞌ Juan Marcos xin,
yikanilo isbꞌa yaꞌ,
ismeltzoto yaꞌ bꞌey yul konhobꞌ Jerusalén.
14 Lahwi tuꞌ xin yel ebꞌyaꞌ yul konhobꞌ Perge,
yapni ebꞌyaꞌ yul konhobꞌ Antioquía ay yul ismajul Pisidia.
Yinh istzꞌayikal xewilal okto ebꞌyaꞌ yul iscapilla anma Israel,
yay tzꞌonhno ebꞌyaꞌ.
15 Hayet yil-lax isley Komam Dios tzꞌibꞌnhebꞌilkano yu yaꞌ Moisés yebꞌ hunteqꞌanxa kuybꞌanile tzꞌibꞌnhebꞌilpaxkano yu ebꞌyaꞌ ischejabꞌ Komam Dios yet payat,
yanito ebꞌnaj yahaw capilla tzotiꞌ tet yaꞌ Pablo yebꞌ tet yaꞌ Bernabé bꞌay tzꞌonhan tuꞌ,
yalni ebꞌnaj hakaꞌ tiꞌ:
—Hex wet konhobꞌ,
ta ay hunu tzotiꞌ cheyoche cheyaqꞌ yokbꞌalo yip janmahanh,
halwe tinanh,
xhi ebꞌnaj.
16 Lahwi tuꞌ xin,
yah linhno yaꞌ Pablo,
isyeni yaꞌ yu isqꞌabꞌ yunhe islinhbꞌan anma istzoteli,
yalni yaꞌ tet anma hakaꞌ tiꞌ:
—Hex wet konhobꞌ Israel,
yebꞌ hex mach Israelo cheyiyo hebꞌa tet Komam Dios,
abꞌewe tzet chiwalan.
17 »Haꞌ koDiosal hanhonh Israel honh tiꞌ,
haꞌ sikꞌlenilo ebꞌnaj jichmam yet payat.
Yet ayko xol anma nan konhobꞌal bꞌey Egipto,
haꞌ Komam aqꞌni chꞌibꞌo isbꞌisil yunhe iswatxꞌen Komam huneꞌ iskonhobꞌ kaw nimajal yinh ebꞌnaj.
Lahwi tuꞌ xin,
yilaxilti ebꞌnaj yul konhobꞌ Egipto yu yip Komam.
18 Hayet ay ebꞌnaj bꞌey txꞌotxꞌ desierto yinh 40 (kawinaj) habꞌil,
kaw yaqꞌ techaho Komam isbꞌeybꞌal ebꞌnaj jichmam tuꞌ.
19 »Lahwi tuꞌ xin,
istanhtzenilo Komam hujebꞌ nimeta konhobꞌ bꞌey txꞌotxꞌ Canaán,
yaqꞌni Komam istxꞌotxꞌ ebꞌnaj tet ebꞌnaj jichmam tuꞌ.
20 Lahwi tuꞌ xin issaylaxilo ebꞌnaj chꞌok juesal yu Komam Dios yunhe istanhelax ebꞌnaj jichmam yinh yikta ishoꞌ ciento habꞌil,
masanta yinh ishabꞌilal yaꞌ Samuel,
huneꞌ ischejabꞌ Komam Dios yet payat.
21 »Tzujan tuꞌ xin,
isqꞌanni ebꞌnaj jichmam huneꞌ isreyal tet Komam Dios yunhe istanhelax ebꞌnaj.
Hak tuꞌ xin yu yok yaꞌ Saúl isreyalo ebꞌnaj yinh 40 (kawinaj) habꞌil.
Yaꞌ Saúl tuꞌ,
iskꞌahol naj Cis yehi,
iskꞌaholto yuninal yaꞌ Benjamín.
22 »Lahwi yilaxilo yaꞌ rey Saúl yinh ismunil yu Komam Dios,
yaniko Komam yaꞌ David selelo yaꞌ,
yalnipaxo Komam Dios hakaꞌ tiꞌ:
“Saybꞌilxa yaꞌ David wuhan,
iskꞌahol yaꞌ Isaí.
Yinh kaw yeli chintzalahan yinh yaꞌ,
yuto chisyije yaꞌ sunilal tzet chiwalan,”
xhi Komam.
23 Yaj xin ay huneꞌ yaꞌ,
titna yinh yuninal yaꞌ rey David tuꞌ,
Jesús isbꞌi.
Haꞌ Komam tiꞌ yati Komam Dios yunhe iskolcha sunil jet Israel,
hakaꞌ yu yalnikano Komam yet yalanhtokanoj.
24 »Yet yalanhto maxhto chiꞌichiko ismunil Komam,
yok yaꞌ Juan iskuyni anma Israel ta yilal isbꞌejnikano yaniko ismul kat xin yahkano haꞌ iswiꞌ anma.
25 Yaj hayet toxa chitanh ismunil yaꞌ Juan,
yalni yaꞌ hakaꞌ tiꞌ:
“¿Hex tiꞌ ham hetxumni ta hanintiꞌan chiwijan Cristo,
Hekolomal?
¡Wal xin machoj!
Komam Cristo Kokolomal,
tzujanto chul wintajan,
yajaꞌ kaw ay yelapno Komam.
Wal hinan,
matzet welapnojan nitam wokan inpuhnolojan istxꞌanhal isxanhabꞌ Komam yinh yoj,”
xhi yaꞌ Juan tuꞌ.
26 Hex wet konhobꞌ Israel hex titna yinh jichmam Abraham,
yebꞌ xin sunil hex mach Israeloj,
hex cheyiyo hebꞌa tet Komam Dios,
wal xin jet kosunil huneꞌ kuybꞌanile yet kolbꞌanile tiꞌ.
27 Yaj anma Israel ay yul konhobꞌ Jerusalén,
yebꞌpaxo ebꞌnaj yahawil anma tuꞌ,
mach chitxumchalo yu tato haꞌ Komam Jesús Iskolomal ebꞌnaj.
Wal xin hunun tzꞌayik xewilal chabꞌen ebꞌnaj tzet tzꞌibꞌnhebꞌilkano yu ebꞌyaꞌ ischejabꞌ Komam Dios yet payat,
yaj machi nachalo yu ebꞌnaj tzet yehi.
Yuxin hayet iskawxeniko ebꞌnaj kamikal yibꞌanh Komam Jesús yijnikano isbꞌa tzet tzꞌibꞌnhebꞌil yu ebꞌyaꞌ ischejabꞌ Komam yet payat.
28 Kaw machi nichꞌano istxꞌojal ilchalo yinh Komam,
yunhe yaqꞌnikamo ebꞌnaj Komam,
yaj xin ok ebꞌnaj yalaꞌ tet naj Pilato ta chaqꞌ kamo naj Komam.
29 Kaw sunil hakaꞌ tzet tzꞌibꞌnhebꞌilkano yinh Komam,
yijkano isbꞌa,
lahwi tuꞌ yinayo ebꞌnaj isnimanil Komam yinh teꞌ kulus isbꞌey ebꞌnaj ismujnokano isnimanil Komam yul huneꞌ chꞌen panteón.
30 »Yaj xin itzitzbꞌikanh Komam Jesús xol kamom yu Komam Dios.
31 Kaw txꞌiꞌalto tzꞌayik xin isye isbꞌa Komam tet ebꞌyaꞌ ekꞌ tzujtzun yinta Komam yinh isbꞌel bꞌey Galilea chiꞌapni bꞌey Jerusalén yet maxhto chikam Komam.
Haxa tinanh xin,
haꞌ ebꞌyaꞌ tuꞌ chihalnikꞌo Istzotiꞌ Komam koxol hanhonh Israel honhanh tiꞌ.
32 »Hakonhpax tuꞌanh,
lanhan jalnihanh tzotiꞌ kꞌul teyet,
huneꞌ tzet halbꞌilkano yu Komam Dios tet jichmam yet payat.
33 Yij isbꞌa huneꞌ tiꞌ jet hanhonh titnajonh yinh jichmam tuꞌ yet yitzitzbꞌikanh Komam Jesucristo xol kamom,
hakaꞌ yu istzꞌibꞌnhelaxkano yinh Salmo yinh iskabꞌ capitulo bꞌay chala:
“Hach tiꞌ,
hach Inkꞌaholan,
yinh huneꞌ tzꞌayik tiꞌ chiwaqꞌkanojan haqꞌinal,”b
xhi Komam yul Yum.
34 »Yalnipaxkano Komam Dios yul Yum tato chiꞌitzitzbꞌikanh Komam Jesús xol anma kamom yunhe mach chiqꞌato isnimanil Komam.
Chalni hakaꞌ tiꞌ:
“Machi yekꞌbꞌanil waqꞌnihan iskꞌulal inkꞌulan waltekanojan tet yaꞌ David,”c
xhihayoj.
35 Chalnipaxo yinh hunxa salmo:
“Mamin,
mach chawaqꞌ qꞌajoꞌto innimanilan hanin sikꞌbꞌil hinan hawu tiꞌ,”d
xhihayoj.
36 Wal yaꞌ David tuꞌ,
munla yaꞌ xol anma hakaꞌ chal iskꞌul Komam Dios yulbꞌal yet ayikꞌo yaꞌ yul sat yibꞌanhqꞌinal tiꞌ;
yajaꞌ yet iskam yaꞌ xin,
ismujlax yaꞌ bꞌay mujbꞌil yichmam,
isqꞌato isnimanil.
37 Yaj wal Komam Cristo ilaxkanh Komam yu Komam Dios xol anma kamom,
machi qꞌato isnimanil.
38-39 »Yuxin chiwalan heyabꞌeꞌ hex wet konhobꞌ,
tato kachan Komam Jesús chu yaqꞌni tanho komul;
yuxin chꞌaqꞌlax huneꞌ tzotiꞌ tiꞌ teyet yuto isley yaꞌ Moisés mach chiqꞌoji yinilo komul jibꞌanh.
Yajaꞌ mak chako isbꞌa yul isqꞌabꞌ Komam Jesús,
sunil ismul tuꞌ chitanhkano yu Komam.
40 Yuxin ilwe tzet wal heyuten hebꞌa,
ta machoj chihul teyibꞌanh sunil tzet tzꞌibꞌnhebꞌilkano yu ebꞌyaꞌ ischejabꞌ Komam Dios bꞌay chal hakaꞌ tiꞌ:
41 “Hakaꞌ hex bꞌuchwawom hex tiꞌ,
ilwekꞌanabꞌi,
kꞌayojabꞌ hekꞌul heyilni kat hekꞌayiloj,
yuto hanin Dios intiꞌan,
ay tzet chinwatxꞌehan yinh huneꞌ tiempohal bꞌay ay hex tiꞌ.
Waxanhka ay mak chihalni teyet yinh tzet chinwatxꞌetiꞌan,
yaj mach cheyayto yul heyanma,”e
xhi Komam Dios yul Yum.
42 Hayet lanhan yelti yaꞌ Pablo yebꞌ yaꞌ Bernabé yul iscapilla ebꞌnaj Israel tuꞌ,
isqꞌanni ebꞌnaj mach Israelo tet ebꞌyaꞌ ta chitzotel ebꞌnaj hunelxa yinh huneꞌ kuybꞌanile tuꞌ yinh huneꞌxa istzꞌayikal xewilal.
43 Lahwi culto tuꞌ xin,
txꞌiꞌal anma Israel yebꞌ anma mach Israelo ayko yinh isreligión ebꞌnaj Israel tuꞌ ok tzujno yinta yaꞌ Pablo yebꞌ yaꞌ Bernabé.
Yuxin ok ebꞌyaꞌ kawanh tuꞌ yiptzeꞌ ebꞌnaj yunheto mach chisbꞌejkano ebꞌnaj iskꞌulchꞌanil Komam Dios chabꞌilxa yu.
44 Haxa yet yayilo huneꞌxa tzꞌayikal xewilal xin,
etza sunil anma ay yul konhobꞌ tuꞌ apni abꞌeno Istzotiꞌ Komam Dios.
45 Haxa yet yilni ebꞌnaj yahawil ebꞌnaj Israel tato kaw hantanhe anma kutxaniko yabꞌen tzet chal ebꞌyaꞌ kawanh tuꞌ,
kaw chíwa iskꞌul ebꞌnaj yinh ebꞌyaꞌ.
Yalni ebꞌnaj tato leqꞌtiꞌal tzet chal yaꞌ Pablo,
yokpaxo ebꞌnaj bꞌuchwal yinh kuybꞌanile yal yaꞌ.
46 Yajaꞌ kaw yiti yip yanma yaꞌ Pablo yebꞌ yaꞌ Bernabé yalni ebꞌyaꞌ hakaꞌ tiꞌ:
—Hex wet konhobꞌ Israel,
yilal haꞌtikꞌa teyet bꞌabꞌel chonhhulanh jalaꞌanh Istzotiꞌ Komam Dios,
yajaꞌ mach cheyoche hechabꞌ yul heyanma yinh tzet chal Komam.
Yuxin etza mach chechah huneꞌ qꞌinal mach istanhbꞌal.
Wal tinanh xin chonhtohanh tet anma mach Israeloj,
kat jalnihanh huneꞌ kuybꞌanil tiꞌ tet.
47 Yuto hak tuꞌ yute yalni Komam Dios Jahawil jetanh hakaꞌ tiꞌ:
“Xakexwakojan heyenilo huneꞌ issajilqꞌinal tet anma mach Israeloj,
yunhe iskolcha anma ay yulajla konhobꞌ masanta bꞌay chikachnakan apno yul sat yibꞌanhqꞌinal tiꞌ,”f
xhikano Komam,
xhi ebꞌyaꞌ.
48 Yajaꞌ wal anma mach Israeloj,
kaw tzalakanokanh yet yabꞌen huneꞌ tuꞌ,
yalni anma tuꞌ tato kaw kꞌul Istzotiꞌ Komam Dios Jahawil.
Yuxin anma sikꞌbꞌilxalo yu Komam Dios yu ischahni isqꞌinal mach istanhbꞌal,
kaw yako yanma yinh Komam.
49 Haknhe tuꞌ xin yu ispujnalto Istzotiꞌ Komam Jesús yul sunil hunteqꞌan konhobꞌ yul ismajul Antioquía.
50 Haxa ebꞌnaj yahawil xol ebꞌnaj Israel ok aqꞌokꞌule yinh yaꞌ Pablo yebꞌ yaꞌ Bernabé tet ebꞌnaj iswiꞌehal konhobꞌ Antioquía,
yebꞌpaxo tet hunteqꞌan ebꞌix mach Israelo ayko yanma yinh Komam Dios,
kaw aypaxo yelapno ye ebꞌix yul sat anma yul konhobꞌ tuꞌ.
Yu tzet yal ebꞌnaj yahawil xol ebꞌnaj Israel tuꞌ,
yuxin ichiko huneꞌ isyaꞌtajil yu anma ah konhobꞌ tuꞌ yinh yaꞌ Pablo yebꞌ yinh yaꞌ Bernabé;
istzumbꞌelaxilti ebꞌyaꞌ yul ismajul Antioquía tuꞌ.
51 Yuxin istzikkanilo ebꞌyaꞌ kawanh tuꞌ pojoj yinh yoj yet yel ebꞌyaꞌ yul konhobꞌ tuꞌ yunhe isyenilo isbꞌa tato matxa yok ebꞌyaꞌ yinh hunteqꞌan anma tuꞌ.
Lahwi tuꞌ xin,
isto ebꞌyaꞌ yul konhobꞌ Iconio.
52 Wal anma ayxako yul isqꞌabꞌ Komam Dios bꞌey Antioquía tuꞌ,
kaw ayko huneꞌ tzalahilal yul yanma,
nohnapaxiko Komam Espíritu Santo yinh.