Yet iskam yaꞌ Jacobo yebꞌ yet yalaxikto yaꞌ Pedro yul preso
12
Yinh huneꞌ tiempohal tuꞌ,
yicheniko naj rey Herodes yaqꞌni ekꞌoyaꞌ yanma haywanh ebꞌnaj juxhta xol ebꞌnaj ayxako yul isqꞌabꞌ Komam Jesús.
2 Ischejni naj potxꞌlaxokamo yaꞌ Jacobo yu chꞌen espada.
Yaꞌ Jacobo tuꞌ yuxhta isbꞌa yaꞌ yebꞌ yaꞌ Juan.
3 Hayet yilni naj rey tato kaw chitzala ebꞌnaj Israel yinh huneꞌ tuꞌ,
yalni naj ta chitzabꞌlaxayo yaꞌ Pedro yinh isqꞌinh ebꞌnaj Israel tuꞌ,
huneꞌ yet chiswahni ebꞌnaj ixim pan machi yanhal.
4 Lahwi yalaxikto yaꞌ yul teꞌ,
yok kanhebꞌ majan ebꞌnaj soldado istanheno yaꞌ,
yaj kanhtawanh ebꞌnaj yinh hunun majan.
Haꞌ chute isnahni naj Herodes ta chinhelahwi qꞌinh Pascua kat yilaxilti yaꞌ Pedro tuꞌ yinh sat sunil anma Israel.
5 Yuxin kaw tanhebꞌil yaꞌ yul teꞌ.
Wal ebꞌnaj ayxako yul isqꞌabꞌ Komam xin,
kaw ayko ebꞌnaj isqꞌanni yinh istxah tet Komam yunhe iskolcha yaꞌ Pedro yul preso.
Yet iskolcha yaꞌ Pedro yul teꞌ preso
6 Yinh huneꞌ aqꞌbꞌal yet yalanhto maxhto chiꞌilaxilti yaꞌ Pedro sata anma Israel yu naj rey Herodes,
ayko yaꞌ xolbꞌal kawanh ebꞌnaj soldado,
kaw xin wayo chu yaꞌ.
Kaw kꞌalbꞌil yaꞌ yu kabꞌebꞌ chꞌen cadena,
aypaxiko hunteqꞌan ebꞌnaj soldado istanhen istiꞌ teꞌ preso tuꞌ.
7 Yapni lemna huneꞌ yángel Komam Dios,
issajhopilo yul preso tuꞌ yu naj.
Ispitni naj ángel tuꞌ ismotx yaꞌ Pedro,
yel iswayanh yaꞌ.
Yalni naj ángel tet yaꞌ:
«Ahanhwano yinh anhe,»
xhi naj.
Ispuhmunalo chꞌen cadena yinh isqꞌabꞌ yaꞌ Pedro.
8 Yalni naj ángel tet yaꞌ:
«Tinanh xin,
kawxeko iskꞌalil hawiktaj,
kat hawaniko haxanhabꞌ,
kat hahukbꞌanpaxiko haqꞌuxil,
kat hawok tzujno wintajan,»
xhi naj.
Isyijen yaꞌ Pedro tuꞌ.
9 Yok tzujno yaꞌ Pedro yinta naj ángel,
yelti yaꞌ yul preso tuꞌ.
Haꞌ chute isnahni yaꞌ ta tonhe chiyelaxiko yinh sat yaꞌ yalni.
Mach istxum yaꞌ tato kaw yeli lanhan yelti yaꞌ yul preso.
10 Yekꞌto naj ángel yebꞌ yaꞌ bꞌay ay ebꞌnaj bꞌabꞌel soldado,
yekꞌpaxto bꞌay ay ebꞌnaj iskabꞌ majan soldado,
yelilo bꞌay ayko huneꞌ pulta nabꞌa chꞌen ayko istiꞌ bꞌeh.
Hayet yapni naj ángel yebꞌ yaꞌ bꞌey pulta tuꞌ,
ishajni isbꞌa ischukil,
yelapno yul bꞌeh.
Hanikꞌxanhe bꞌelwito naj ángel yebꞌ yaꞌ Pedro tuꞌ,
iskankano yaꞌ ischukil.
11 Hak tuꞌ yu isnahnilo yaꞌ yinh tzet yehi,
yalni yaꞌ hakaꞌ tiꞌ:
«Wal tinanh chintxumilojan tato kaw yeli mayati Komam Jesús Jahawil huneꞌ yángel kiniskololojan yul isqꞌabꞌ naj rey Herodes,
yebꞌ sunil tzet chisnako ebꞌnaj wet konhobꞌ Israelan winhan,»
xhi yaꞌ ischukil.
12 Hayet kaw istxumchalo yu yaꞌ Pedro yinh hunteqꞌan tzet yu tuꞌ,
isto yaꞌ bꞌey yatut ix María,
ismiꞌ yaꞌ Juan,
yaꞌ chiyijpaxo Marcos.
Kaw txꞌiꞌal ebꞌnaj yebꞌ ebꞌix ayxako yul isqꞌabꞌ Komam kutxaniko bꞌey tuꞌ yu istxahli yinh yaꞌ Pedro.
13 Hayet yelikto yaw yaꞌ sat ispultahil yamaqꞌil huneꞌ nha tuꞌ,
yelilo huneꞌ ix qꞌopo chimunla yinta ix María,
chiyij Rode,
ishajno teꞌ yalni.
14 Yajaꞌ haxa yet yabꞌen ix yul isnuqꞌ yaꞌ Pedro,
kaw matxa ishaj ix teꞌ,
isto ix yinh anhe yalno yinh tzalahilal tato linhanxako yaꞌ Pedro sat huneꞌ pulta tuꞌ.
15 Yalni ebꞌnaj juxhtaj yebꞌ ebꞌix janabꞌ tet ix Rode tuꞌ:
—¿Tzimi chawal hach tiꞌ?
Matxam iswalil ye yul hawiꞌ,
xhi ebꞌnaj.
Istaqꞌwipaxo ix:
—Machoj,
to kaw yeli mawabꞌehan yul isnuqꞌ yaꞌ,
xhi ix.
Yuxin hal-laxpaxo tet ix:
—¿Machmi taj yaꞌ,
ham naj ángel chitanhen yaꞌ,
haꞌ mahuli?
xhi ebꞌnaj tet ix.
16 Hayet lanhan istzotel ebꞌnaj yebꞌ ix islahniko yaꞌ Pedro iskꞌonhkꞌen teꞌ pulta tuꞌ.
Lahwi tuꞌ xin ishajni ebꞌnaj teꞌ,
iskꞌayilo iskꞌul ebꞌnaj yet yokapno yaꞌ Pedro tuꞌ.
17 Isyeni yaꞌ yu isqꞌabꞌ yunhe isbꞌejni ebꞌnaj istzoteli.
Lahwi tuꞌ xin,
yok yaꞌ yalnolo tzet yu iskol-lax yaꞌ yul preso tuꞌ yu Komam.
Yalni yaꞌ tet ebꞌnaj tuꞌ hakaꞌ tiꞌ:
—Halwe huneꞌ tiꞌ tet yaꞌ Jacobo yebꞌ hunteqꞌanxa ebꞌnaj juxhtaj,
xhi yaꞌ.
Lahwi tuꞌ yelti yaꞌ xol ebꞌnaj,
isto yaꞌ yul huneꞌxa konhobꞌ.
18 Hayet issajbꞌilo xin,
kaw matxa chitxumcha yu ebꞌnaj soldado tzet chute isbꞌa yuto mach yohtajo ebꞌnaj yinh tzet yu yelti yaꞌ Pedro tuꞌ.
19 Haxa yet yabꞌen naj rey Herodes huneꞌ tuꞌ,
yanilto naj issayomal yaꞌ Pedro,
yajaꞌ matxa ilcha yaꞌ yu ebꞌnaj.
Isqꞌambꞌen naj tet ebꞌnaj soldado tuꞌ tzet yu yelti yaꞌ yul teꞌ;
ischejni naj potxꞌlaxokamo ebꞌnaj soldado tuꞌ.
Lahwi tuꞌ xin,
yel naj Herodes yul ismajul Judea,
isto naj yul ismajul Cesarea.
Haꞌ tuꞌ xin ehayo naj.
Iskamikal naj rey Herodes
20 Yinh huneꞌ tiempohal tuꞌ,
kaw tit ishowal naj rey Herodes yinh anma ay bꞌey konhobꞌ Tiro yebꞌ anma ay bꞌey konhobꞌ Sidón.
Yuxin islahtiꞌnhe isbꞌa anma ay bꞌey tuꞌ yinh tzet chu istzotel tet naj rey Herodes tuꞌ.
Yajaꞌ bꞌabꞌel ok anma ismonteꞌ huneꞌ naj chiyij Blasto,
huneꞌ naj iswiꞌehal yinh ebꞌnaj ischejabꞌ naj rey tuꞌ.
Yok naj tzotelo tet naj rey tuꞌ yunhe isqꞌanni aqꞌankꞌulal,
yuto haꞌ yul ismajul bꞌay ay naj chitit tzet chislo ebꞌnaj.
21 Yalni naj rey Herodes tzet tzꞌayikal chꞌapni ebꞌnaj yinh sat naj.
Haxa yet yapni istzꞌayikal tuꞌ xin,
yaniko naj rey huneꞌ xil isqꞌap kaw ay yelapno yehi.
Lahwi tuꞌ xin yokto tzꞌonhno naj yul iskapiltu,
istzabꞌniko naj istzotel tet anma.
22 Lanhantotikꞌa xin,
yah yaw anma sunil,
yalni hakaꞌ tiꞌ:
«Haꞌ huneꞌ chitzotel tiꞌ,
mach anmahoj,
kꞌuxan tato haꞌ hunu dios,»
xhi ebꞌnaj.
23 Hunepixto xin,
yul huneꞌ yángel Komam Dios yanoko yabꞌil yinh naj rey Herodes tuꞌ,
yuto machi yal naj tato hanhechꞌan Komam Dios kaw niman yelapnoj.
Hak tuꞌ xin yu yok noꞌ ha haꞌ islohnoto isnimanil naj,
iskam naj.
24 Wal Istzotiꞌ Komam Dios xin,
kaw pujnakanokanh xol anma yulaj hunun konhobꞌ.
25 Lahwi yijnikano isbꞌa ischejbꞌanil yaꞌ Bernabé yebꞌ yaꞌ Saulo yinh yalnikꞌo Istzotiꞌ Komam bꞌey yul konhobꞌ Jerusalén,
ismeltzoto ebꞌyaꞌ bꞌey konhobꞌ Antioquía,
yinito ebꞌyaꞌ yaꞌ Juan,
yaꞌ chiyijpaxo Marcos.