Yinh tzet yal yaꞌ Pedro tet ebꞌnaj creyente ah Jerusalén
11
Yapni isqꞌumal tet ebꞌyaꞌ ischejabꞌ Komam Jesús yebꞌ tet ebꞌnaj ayxako yul isqꞌabꞌ Komam ay yul ismajul Judea tato ay ebꞌnaj mach Israelo yako isbꞌa yul isqꞌabꞌ Komam Dios.
2 Hayet yapni yaꞌ Pedro yul konhobꞌ Jerusalén,
yok ebꞌnaj juxhta Israel bꞌuchwal yinh yaꞌ,
yuto isnahti ebꞌnaj isley yaꞌ Moisés tet yaꞌ.
3 Yalni ebꞌnaj tet yaꞌ:
—¿Tzet yinh yuxinto kaxhok xol ebꞌnaj mach Israeloj,
hawaꞌpaxo yebꞌ ebꞌnaj?
xhi ebꞌnaj.
4 Yichiko yaꞌ Pedro tuꞌ yalnilo sunil tzet yuhi,
yalni yaꞌ hakaꞌ tiꞌ:
5 —Yet ayinikꞌojan bꞌey yul konhobꞌ Jope,
yet lanhan intxahlihan tet Komam Dios,
isyeni Komam wetan yinh kaw sajsatil huneꞌ niman sábana leyantoj ximbꞌil kanhebꞌ istxikin,
yayilo qꞌap insatajan.
6 Wok tꞌanhnojan yinh yunhe wilnihan tzet ayayto yul.
Wilnihan hunteqꞌan no noqꞌ ayayto yul;
ay noꞌ xoltelajil noqꞌ,
noꞌ kanhebꞌ yoj,
aypaxo noꞌ chishatxikꞌo iskꞌul yebꞌ ej noꞌ chꞌik.
7 Lahwi tuꞌ xin,
wabꞌenan huneꞌ yul nuqꞌe halni wetan:
—Pedro,
ahanhwanoj,
potxꞌkamo hunteqꞌan no noqꞌ tiꞌ kat hakꞌuxni noꞌ,
xhi wetan.
8 Intaqꞌwikanhan:
—Mamin,
machoj,
yuto maxhto hunelo chinkꞌuxan hunu tzꞌil-la tzet ye tuꞌ yuto kachbꞌilonhanh yu isley yaꞌ Moisés,
kinchihan.
9 Yalnipaxo wetan hunelxa:
—Sunil tzet sajxa ye yu Komam Dios,
mach chawala tato tzꞌil,
xhi wetan.
10 Oxel yalayti wetan,
lahwi tuꞌ xin yilaxpaxahto huneꞌ niman sábana tuꞌ yul satkanh hunelxa.
11 Hayet lanhan intxumnihan tzet chala,
yapni oxwanh ebꞌnaj kinissaynilojan bꞌay ayinan.
Haꞌ ebꞌnaj tuꞌ xin ispeto bꞌey Cesarea.
12 Yalni Komam Espíritu Santo wetan hakaꞌ tiꞌ:
—Asiꞌ yinta ebꞌnaj,
xhi.
Hak tuꞌ xin yu intohan yinta ebꞌnaj,
yebꞌ wajwanhxa ebꞌnaj juxhta ah Jope tuꞌ.
Hayet japnihanh bꞌey tuꞌ xin kotohanh yatut huneꞌ naj chiyij Cornelio.
13 Yalni naj jetanh ta ay huneꞌ naj ángel apni linhno sata naj yul yatut;
yalni naj ángel tuꞌ tet naj:
—Chejto kawanh oxwanho ebꞌnaj bꞌey yul konhobꞌ Jope,
kat yiniti ebꞌnaj yaꞌ Simón,
yaꞌ chiyijpaxo Pedro.
14 Haꞌ yaꞌ tuꞌ chihalno tawet yinh tzet chu hachahni hakolbꞌanil,
yebꞌ sunil mak ay bꞌey hawatut,
xhi naj ángel tet naj.
15 Haxa yet intzabꞌnikojan intzotelan xol ebꞌnaj tuꞌ,
yayilo Komam Espíritu Santo yibꞌanh ebꞌnaj hakaꞌ yu yul koxol yet bꞌabꞌelal.
16 Hak tuꞌ yu innanitijan yinh tzet yalkano Komam Jesús yet yalanhtokanoj:
—Yinh kaw yeli,
haꞌ yaꞌ Juan,
haꞌ yaꞌ anhekanh haꞌ iswiꞌ anma,
wal hexpaxo xin,
haꞌ Komam Espíritu Santo chiꞌaqꞌlaxo teyet hakaꞌ yahbꞌalo haꞌ hewiꞌ,
xhikano Komam.
17 Kaw yaqꞌ Komam Dios Komam Espíritu Santo tet ebꞌnaj hakaꞌ yu yaqꞌni jet hanhonh tiꞌ yet janayto yul janma yinh Komam Jesucristo.
Yuxin ¿tzet wehan xin chinmanhkꞌohan tzet choche Komam Dios?
xhi yaꞌ Pedro tet ebꞌnaj juxhta tuꞌ.
18 Yet yabꞌen ebꞌnaj juxhta ay bꞌey Jerusalén yinh sunil tzet yal yaꞌ Pedro tuꞌ,
kaw matxa tzet yal ebꞌnaj,
yok ebꞌnaj yaqꞌno tzalaho yanma yinh Komam Dios.
Yalni ebꞌnaj hakaꞌ tiꞌ:
—Kaw yeli yaqꞌpaxo Komam Dios huneꞌ iskꞌulal tiꞌ tet anma mach Israeloj yunhe ishelni isbꞌeybꞌal kat ischahnikano isqꞌinal mach istanhbꞌal,
xhi ebꞌnaj.
Ebꞌnaj ok yul isqꞌabꞌ Komam bꞌey Antioquía
19 Yet lahwi iskamkano yaꞌ Esteban,
yichiko ebꞌnaj Israel issaywa yinh ebꞌnaj ayxako yul isqꞌabꞌ Komam,
yu huneꞌ tuꞌ xin pujnakanto ebꞌnaj.
Ay ebꞌnaj apni bꞌey yul ismajul Fenicia yebꞌ xin bꞌey ismajul Chipre,
yebꞌ yul konhobꞌ Antioquía.
Istzabꞌniko ebꞌnaj yalnikꞌo huneꞌ kuybꞌanil yet kolbꞌanile tet anma bꞌay apni tuꞌ.
Yaj matzet yal ebꞌnaj tet anma mach Israeloj,
kaw hanhkꞌanhe tet anma Israel yal ebꞌnaj.
20 Yaj xin ay haywanh ebꞌnaj ayxako yul isqꞌabꞌ Komam bꞌey Chipre yebꞌ bꞌey Cirene apni bꞌey Antioquía,
yalnikꞌo ebꞌnaj kuybꞌanil yet kolbꞌanile xol anma mach Israeloj.
21 Yuto ayxako yip Komam yinh ebꞌnaj,
yuxin tzetkꞌa mak isbꞌejkano sunil komon bꞌeybꞌale kuybꞌil yu yet yalanhtokanoj,
yaniko isbꞌa yul isqꞌabꞌ Komam.
22 Hayet yabꞌen ebꞌnaj ayxako yul isqꞌabꞌ Komam ay bꞌey konhobꞌ Jerusalén huneꞌ tiꞌ,
ischejnito ebꞌnaj yaꞌ Bernabé bꞌey Antioquía tuꞌ.
23 Hayet yapni yaꞌ yilni yaꞌ hanta iskꞌulal Komam Dios yibꞌanh ebꞌnaj ayxako yul isqꞌabꞌ Komam bꞌey tuꞌ.
Kaw tzala yanma yaꞌ Bernabé yet yaqꞌnikano yaꞌ kuybꞌanile chiꞌiptzen ebꞌnaj yunhe islahniko ebꞌnaj yaniko yanma yinh Komam sunilbꞌal tiempo.
24 Hak tuꞌ yu iskuywakano yaꞌ Bernabé tuꞌ yinh ebꞌnaj yuto kaw kꞌul isnabꞌal yaꞌ,
yebꞌ xin kaw nohnako Komam Espíritu Santo yinh.
Kaw ayko yanma yaꞌ yinh Komam Jesucristo,
yu huneꞌ tuꞌ yuxin kaw ay anma chahnikano Komam yul yanma.
25 Lahwi tuꞌ xin,
isto yaꞌ Bernabé yul konhobꞌ Tarso saywal yinh yaꞌ Saulo.
26 Haxa yet yilcha yaꞌ Saulo tuꞌ,
yinito yaꞌ yaꞌ yul konhobꞌ Antioquía.
Kaw huneꞌ habꞌil ekꞌ ebꞌyaꞌ kawanh tuꞌ xol anma ayxako yul isqꞌabꞌ Komam Jesús bꞌey tuꞌ.
Kaw txꞌiꞌal anma iskuy ebꞌyaꞌ yinh Istzotiꞌ Komam Dios.
Yul konhobꞌ Antioquía tuꞌ,
haꞌ tuꞌ hal-lax bꞌabꞌel Cristianohal yinh anma ayxako yul isqꞌabꞌ Komam.
27 Yet huneꞌ tiempohal tuꞌ,
el haywanh ebꞌnaj juxhta bꞌey Jerusalén yapni bꞌey Antioquía.
Ebꞌnaj tuꞌ xin chischah ebꞌnaj tzotiꞌ tet Komam Dios kat yalni ebꞌnaj tet anma.
28 Ay huneꞌ naj xol ebꞌnaj apni tuꞌ chiyij Agabo.
Yah linhno naj xol ebꞌnaj ayxako yul isqꞌabꞌ Komam,
yalni naj yu Komam Espíritu Santo hakaꞌ tiꞌ:
—Ay huneꞌ niman wahilal chihul yul sunil sat txꞌotxꞌ tiꞌ,
xhi naj.
Kaw hakaꞌ yu yalni naj hak tuꞌ yu yijni isbꞌa yet ayko naj Claudio yahawil Roma.
29 Yuxin ebꞌnaj juxhta ay bꞌey Antioquía el yul yanma iskolwa yinh ebꞌnaj juxhtaj ay bꞌey yul ismajul Judea.
Hatatikꞌa hanta el yinh yanma ebꞌnaj,
hak tuꞌ yaqꞌ ebꞌnaj.
30 Hak tuꞌ yu yinito yaꞌ Saulo yebꞌ yaꞌ Bernabé hunteqꞌan kolwal tuꞌ,
yaqꞌni ebꞌyaꞌ tet ebꞌyaꞌ anciano ay bꞌey Judea.