—¡Cornelio!

xhi naj.

4 Yok tꞌanhno naj Cornelio yinh naj ángel tuꞌ,

isxiwkanh naj,

istaqꞌwi naj:

—¿Tzet chawal Mamin?

xhi naj.

Yalni naj ángel tuꞌ xin:

—Kaw chabꞌe Komam Dios hatxah,

kaw chilpaxo Komam hakolwal chawaqꞌ tet anma mebꞌaꞌ.

Mach chikꞌayto hunteqꞌan tiꞌ yu Komam.

5 Wal tinanh chejto haywanho ebꞌnaj bꞌey yul konhobꞌ Jope,

iqꞌwal yinh yaꞌ Simón,

yaꞌ chiyij Pedro.

6 Ay yaꞌ bꞌey yatut huneꞌxa naj Simón isbꞌi,

naj watxꞌemilo tzꞌum,

ay bꞌey istiꞌ haꞌ mar.

Haꞌ yaꞌ Pedro tuꞌ chihulo halno tawet tzet wal hawuten habꞌa,

xhi naj ángel tet naj Cornelio tuꞌ.

7 Yet istokano naj ángel tuꞌ xin,

yawtenti naj kawanh iskꞌamteꞌ yebꞌ huneꞌ naj issoldado chikolwa yinh.

Huneꞌ naj tiꞌ aypaxo yanma naj yinh Komam Dios.

8 Sunil tzet hal-lax tet naj yu naj ángel,

yal naj tet ebꞌnaj.

Ischejlaxto ebꞌnaj bꞌey yul konhobꞌ Jope tuꞌ xin.

9 Yet huneꞌxa tzꞌayik yinhmi chuman,

yet lanhanxa yapni ebꞌnaj iskawilal konhobꞌ Jope tuꞌ,

yahto yaꞌ Pedro txahlo yibꞌanh yakꞌalil iswiꞌ teꞌ nha bꞌay aya.

10 Yet ayahto yaꞌ txahlo bꞌey tuꞌ,

isnhohchakanh yaꞌ.

Lanhan xin iswatxꞌelax tzet chislo yaꞌ,

yinhnhena tuꞌ xin,

isyelax yinh sajsatil tet yaꞌ.

11 Ishajni isbꞌa satkanh,

yilni yaꞌ huneꞌ niman sábana leyanayti yinh sat yaꞌ,

ximbꞌilayo kanhebꞌ istxikin qꞌap.

12 Yul huneꞌ sábana tuꞌ,

ayayto sunil no noqꞌ;

noꞌ kanhebꞌ yoj,

noꞌ chishatxikꞌo iskꞌul,

yebꞌ noꞌ chꞌik.

13 Yet yayilo huneꞌ sábana tuꞌ,

yabꞌen yaꞌ Pedro yul huneꞌ nuqꞌe,

halni tet hakaꞌ tiꞌ:

—Pedro,

ahanhwanoj,

potxꞌkamo hunteqꞌan no noqꞌ tiꞌ kat hakꞌuxni noꞌ,

xhi huneꞌ yul nuqꞌe tuꞌ.

14 Yalni yaꞌ hakaꞌ tiꞌ:

—Mamin,

machoj,

yuto kaw maxhto hunelo chinkꞌuxan hunu noꞌ komon noqꞌ tiꞌ,

maka hunuxa tzet ye tuꞌ mach sajoj hakaꞌ yalni isley yaꞌ Moisés,

xhi yaꞌ.

15 Yuxin yal huneꞌ yul nuqꞌe tuꞌ hunelxa tet yaꞌ:

—Sunil tzet sajxa ye yu Dios,

mach chawal tzꞌilal,

xhi.

16 Kaw xin oxel yu hakaꞌ tuꞌ.

Lahwi tuꞌ yilaxto huneꞌ sábana tuꞌ yul satkanh hunelxa.

17 Haxa yet yapni ebꞌnaj ischejabꞌ naj Cornelio yul konhobꞌ Jope,

isqꞌambꞌelo ebꞌnaj tet anma bꞌaytuꞌwal ay yatut naj Simón.

Kaw aytoko yaꞌ Pedro istxumni yinh tzet chal yelapno huneꞌ yil tuꞌ,

yet yapni ebꞌnaj istiꞌ ispultahil teꞌ nha bꞌay ay yaꞌ.

18 Yet ayxa ebꞌnaj bꞌey tuꞌ,

isqꞌambꞌen ebꞌnaj:

—¿Ham tiꞌ aykꞌo yaꞌ Simón,

yaꞌ chiyij Pedro?

xhi ebꞌnaj.

19 Kaw aytoko yinh iskꞌul yaꞌ tzet kaw chalilo huneꞌ yil tuꞌ,

yalni Komam Espíritu Santo tet yaꞌ hakaꞌ tiꞌ:

«Pedro,

ay oxwanh ebꞌnaj chaxhsaynikꞌoj.

20 Ahanhwanoj,

ayanhtoj kat hato yinta ebꞌnaj tinanh yuto haninan chejnheti ebꞌnaj takꞌatanh tiꞌ,»

xhi Komam Espíritu Santo tet yaꞌ.

21 Yayti yaꞌ xin,

yapni yaꞌ iskꞌatanh ebꞌnaj ischejabꞌ naj Cornelio tuꞌ,

yalni yaꞌ:

—Haninan chinhesayikꞌojan.

¿Tzet hechejbꞌanil wetan?

xhi yaꞌ tet ebꞌnaj.

22 Yalni ebꞌnaj hakaꞌ tiꞌ xin:

—Ay huneꞌ yaꞌ chiyij Cornelio,

yahawil yinh hunmajan ebꞌnaj soldado,

haꞌ yaꞌ makonhchejnitijanh.

Kaw toholkano isbꞌeybꞌal yaꞌ,

kaw chiyo isbꞌa yaꞌ tet Komam Dios,

yebꞌ xin kaw kꞌulkano yaꞌ yul sat anma Israel.

Yaj xin ay huneꞌ yángel Komam Dios apni halno tet yaꞌ,

tato yilal hato yatut yaꞌ yu yabꞌenkano yaꞌ tzet chawala,

xhi ebꞌnaj chejabꞌ tuꞌ tet yaꞌ Pedro.

23 Yilaxikto ebꞌnaj yul nha yu yaꞌ Pedro tuꞌ,

haꞌ tuꞌ way ebꞌnaj.

Haxa yet sahabꞌ sakꞌayalil yinh huneꞌxa tzꞌayik isto yaꞌ Pedro yinta ebꞌnaj;

aypaxo haywanh ebꞌnaj juxhtaj ah Jope tuꞌ to yinta yaꞌ.

24 Haxa yet huneꞌxa tzꞌayik xin,

yapni ebꞌnaj yul konhobꞌ Cesarea.

Kaw echmabꞌil yapni ebꞌnaj yu naj Cornelio tuꞌ,

kutxanxako yikꞌal naj yu,

yebꞌ mak ay yul yatut naj tuꞌ,

yebꞌ yamigo naj awtebꞌil yu.

25 Yet yapni yaꞌ Pedro bꞌey tuꞌ,

yelti naj Cornelio ischahno yaꞌ,

yay jahno naj sata yaꞌ.

26 Yaj ilaxkanh naj yu yaꞌ Pedro,

yalni yaꞌ xin:

—Ahanhwanoj yuto kaw lahan anmahonh,

xhi yaꞌ tet naj.

27 Kaw xin tzotelo chu yaꞌ Pedro yebꞌ naj yet yokto ebꞌnaj yul nha.

Hak tuꞌ xin yu yilni yaꞌ Pedro ta kaw hantanhe anma kutxanikoj.

28 Yalni yaꞌ tet anma hakaꞌ tiꞌ:

—Kaw heyohtaj tato hanhonh Israel honhtiꞌanh kachbꞌilonhanh yu isley yaꞌ Moisés kohunbꞌan kobꞌahanh yebꞌ hunuxa anma nan konhobꞌal,

yebꞌ xin joktojanh yul yatut.

Yaj isyelo Komam Dios wetan tato mach chu inyahnihan hunu anma.

29 Yu huneꞌ tuꞌ yuxinto manyijehan intitan yinta ebꞌnaj mabꞌeykininotijan.

Wal tinanh,

halwe wetan ¿tzet yinh yuxinto makinheyawtehan?

xhi yaꞌ Pedro tuꞌ.

30 Yalni naj Cornelio tet yaꞌ hakaꞌ tiꞌ:

—Kanhebꞌxa tzꞌayik tinanh hakaꞌmi hora tiꞌ yinh chꞌen oxebꞌ,

yet lanhan intxahlihan tet Komam Dios,

yinh haꞌmataj isyenikanh isbꞌa huneꞌ naj wetan,

kaw saj jilnikano xil isqꞌap naj,

toxanhe chitzejtzoni.

31 Yalni naj wetan:

“Cornelio,

kaw mayabꞌe Komam Dios hatxah yebꞌ isnahniti sunil hakolwal chawaqꞌ tet anma mebꞌaꞌ.

32 Wal tinanh chejto hun kawanho ebꞌnaj bꞌey yul konhobꞌ Jope,

kat isto yinoti yaꞌ Simón,

chiyijpaxo Pedro.

Ay yaꞌ bꞌey yatut naj Simón,

naj watxꞌemilo tzꞌum.

Ayko yatut naj tuꞌ istiꞌ haꞌ mar.

Yet chihul yaꞌ Pedro tuꞌ kat yalni yaꞌ tzet wal hawuten habꞌa,”

xhi naj wetan.

33 Yuxin inchejtojan ebꞌnaj tiꞌ saywal tawinh.

Kaw yuchꞌandios tawet makaxhtit yinta ebꞌnaj.

Wal tinanh ayonhikꞌojanh kosunilanh sata Komam Dios yu chijoche jabꞌehanh sunil tzet halbꞌilkano tawet yu Komam Dios,

xhi naj Cornelio.

34 Yicheniko yaꞌ Pedro istzotel xol ebꞌnaj sunil,

yalni yaꞌ:

—Wal tinanh kaw chiwohtanhelojan tato kaw lahannhe sunil anma yul sat Komam Dios.

35 Makxanhetikꞌa ay yelapno ye Komam Dios yul sat yebꞌ xin kꞌul isbꞌeybꞌal yul sat Komam,

waxanhka mach Israeloj,

kaw chitzalakano Komam yinh.

36 Komam Dios aqꞌnikano Istzotiꞌ jetanh hanhonh Israel honhtiꞌanh,

yalnikanoj tato chonhok yinh aqꞌankꞌulal yu Komam Jesucristo,

Komam Yahawil sunil anma.

37 Wal hex hex tiꞌ,

kaw heyohtaj tzet yu koxolanh,

hanhonh Israel honhtiꞌanh.

Bꞌey Galilea ichiti huneꞌ tuꞌ yet lahwi ismunil yaꞌ Juan yalnikꞌo Istzotiꞌ Komam Dios,

yebꞌ yanikanokanh yaꞌ haꞌ iswiꞌ anma.

38 Kaw heyohtaj hex tiꞌ tato Komam Dios,

haꞌ aqꞌni Komam Espíritu Santo tet Komam Jesucristo ah Nazaret.

Yaqꞌnikano Komam Dios yip Komam yu iskolwa yinh anma.

Sunil hunteqꞌan anma bꞌay ayko ischejabꞌ naj matzwalil kawxikanokanh yu Komam.

Sunil hunteqꞌan tiꞌ iswatxꞌe Komam yuto ayko Komam Dios yetbꞌihoj.

39 »Wal honhtiꞌanh,

kaw chijaqꞌ kobꞌahanh jalnihanh yinh sunil tzet iswatxꞌe Komam Jesús yul ismajul Judea,

yebꞌ yul konhobꞌ Jerusalén,

yuto jilikojanh yu kosatanh.

Lahwi iswatxꞌen Komam hunteqꞌan tuꞌ xin,

yalaxkanh yinh kulus yu ebꞌnaj Israel,

hak tuꞌ yute yaqꞌnikamo ebꞌnaj Komam.

40 Haxa yinh yox tzꞌayik yulkanh iskꞌul Komam yu yip Komam Dios,

isyeni isbꞌa Komam Jesús tuꞌ jetanh.

41 Yajaꞌ mach tet sunilo jet konhobꞌanh bꞌay isye isbꞌa Komam,

kachannhe jetanh hanhonh saybꞌilonhxahanh yet yalanhtokanoj,

yu jaqꞌni kobꞌahanh jalnikꞌojanh.

Konhwaꞌanh yebꞌ Komam yet lahwi ispitzkꞌakanh xol kamom.

42 Yalkano Komam jetanh tato kaw yilal jekꞌanh jalnokꞌojanh tet anma tato haꞌ Komam Dios aniko Komam Jesús Yahawilo yilni tzet chꞌeliko sunil anma itzitzto yebꞌpaxo mak kamnaxa.

43 Yet payat yalkano ebꞌyaꞌ ischejabꞌ Komam Dios kuybꞌanil yinh Komam Jesús.

Halbꞌilkano yu ebꞌyaꞌ tato haꞌ mak chichahni Komam yul yanma,

chitanhkano ismul yibꞌanh yu yip Komam,

xhi yaꞌ Pedro tuꞌ tet ebꞌnaj.

44 Yet aytoko yaꞌ Pedro tuꞌ istzoteli,

yayilo Komam Espíritu Santo yibꞌanh anma chiꞌabꞌen tzet chal yaꞌ.

45 Kaw kꞌaykanh iskꞌul ebꞌnaj Israel ayxako yul isqꞌabꞌ Komam tit yinta yaꞌ bꞌey Jope,

yuto aqꞌlaxpaxo Komam Espíritu Santo tet anma mach Israeloj.

46 Yabꞌen ebꞌnaj tato nanantaxanhe tzotiꞌal chal hunun ebꞌnaj,

yabꞌenpaxo ebꞌnaj yalni kꞌul-la tzotiꞌ yinh Komam Dios.

47 Lahwi tuꞌ xin,

yalni yaꞌ Pedro tuꞌ:

—¿Chimyu kokachni yahkano haꞌ iswiꞌ ebꞌnaj machahni Komam Espíritu Santo hakaꞌ yu kochahni hanhonh tiꞌ?

xhi yaꞌ.

48 Yalni yaꞌ Pedro tuꞌ xin tato chiꞌahkano haꞌ iswiꞌ ebꞌnaj yinh isbꞌi Komam Jesucristo.

Yet yahkano haꞌ iswiꞌ ebꞌnaj,

yalni ebꞌnaj tet yaꞌ Pedro tato chikan yaꞌ hayebꞌo tzꞌayikal iskꞌatanh ebꞌnaj.