Yinh yet ishelni isbꞌeybꞌal naj Saulo
9
Yet huneꞌ tiempohal tuꞌ,
maxhtikꞌa isbꞌej naj Saulo issayni ebꞌnaj ayxako yul isqꞌabꞌ Komam Jesús,
chal naj ispotxꞌoꞌkamo ebꞌnaj.
Isto naj islahtiꞌnheno isbꞌa yebꞌ naj yahawil yinh ebꞌnaj sacerdote ah Israel.
2 Isqꞌanni naj huneꞌ carta yunhe yok naj yulaj iscapilla ebꞌnaj Israel bꞌey konhobꞌ Damasco yunhe istzabꞌniti naj sunil makta ayxako yinh huneꞌ akꞌ kuybꞌanile.
Sunil ebꞌnaj winaj yebꞌ ebꞌix ix xayako yanma yinh Komam Jesús,
bꞌeh yinito naj yul preso bꞌey yul konhobꞌ Jerusalén yalni.
Conversión de Saulo (Hechos 9.1-19)
3 Hak tuꞌ yu isto naj bꞌey Damasco tuꞌ.
Yet ayko naj yinh isbꞌel tuꞌ xin,
yet lanhanxa yapni naj,
yayilo huneꞌ issajilqꞌinal yul satkanh yapni jopla yinh naj.
4 Yaykꞌay naj sat txꞌotxꞌ,
yabꞌen naj huneꞌ yul nuqꞌe halni hakaꞌ tiꞌ:
—Saulo,
Saulo,
¿tzet yinh yuxin chinhatzumbꞌekꞌojan?
xhi.
5 Isqꞌambꞌen naj:
—Mamin,
¿mak anmahil hach?
xhi naj.
Istaqꞌwi huneꞌ yul nuqꞌe tuꞌ:
—Hanintiꞌan Jesús hinan,
kaw ayachiko kinhatzumbꞌenikꞌojan,
yaj tonhe chawaqꞌ lahwo habꞌa hakaꞌ noꞌ wakax chixanhwa yinh te teꞌ qꞌaqꞌiꞌ iswiꞌ,
xhi huneꞌ tuꞌ.
6 Kaw xin chiluylun naj Saulo tuꞌ yu xiwkilal,
yalni naj xin:
—Mamin,
¿tzet chawoche chinwatxꞌehan?
xhi naj.
Yalni Komam tet naj:
—Ahanhwanoj kat hato yul konhobꞌ tuꞌ,
haꞌ tuꞌ chihal-laxo tawet tzet wal hawuni,
xhi Komam Jesús tuꞌ tet naj.
7 Wal ebꞌnaj yetbꞌi naj Saulo tuꞌ,
kaw sukbꞌikanilo iskꞌul ebꞌnaj yuto kaw yabꞌe ebꞌnaj istzotel huneꞌ yul nuqꞌe tuꞌ,
yaj mach hunu mak yiliko ebꞌnaj yinh.
8 Lahwi tuꞌ xin,
yahwano naj Saulo.
Yet ishajni sat naj matxa chu yilni naj,
yuxin haxa ebꞌnaj yetbꞌi naj ok xeknoto naj yul konhobꞌ Damasco.
9 Yet yapni naj bꞌey tuꞌ,
oxebꞌ tzꞌayik mach chu yilni naj,
mach waꞌ naj,
matzet yukꞌpaxo naj.
10 Yul konhobꞌ Damasco tuꞌ xin,
ay huneꞌ yaꞌ ayxako yul isqꞌabꞌ Komam,
chiyij Ananías.
Yalni Komam Dios yul iswayik yaꞌ yinh sajsatil hakaꞌ tiꞌ:
—Ananías,
xhi Komam.
—¿Tzet chawal Mamin?
xhi yaꞌ.
11 Yalni Komam:
—Ahanhwanoj kat hato yul huneꞌ bꞌeh,
Tohol isbꞌi.
Hayet chaxhapno bꞌey yatut naj Judas,
kat haqꞌambꞌen naj Saulo ah konhobꞌ Tarso,
lanhan istxahli naj bꞌey tuꞌ.
12 Ay huneꞌ tzet manyehan yilaꞌ naj tato chaxhapno iskꞌatanh naj,
kat hawanayo haqꞌabꞌ yibꞌanh iswiꞌ naj.
Haknhe tuꞌ chiyu ishajchaho sat naj,
xhi Komam.
13 Yalni yaꞌ Ananías hakaꞌ tiꞌ:
—Mamin,
yaj txꞌiꞌal tzet xawabꞌehan yinh naj Saulo tuꞌ.
Kaw hanta anma ayko yul haqꞌabꞌ bꞌey Jerusalén,
kaw chꞌekꞌyaꞌ yanma yu naj.
14 Tinanh xin,
xahul naj bꞌey tiꞌ,
xaꞌaqꞌlax hum yul isqꞌabꞌ naj yu naj yahawil sacerdote.
Chul naj istzabꞌato anma ayxako yul haqꞌabꞌ,
xhi yaꞌ tet Komam.
15 Yalnipaxo Komam tet yaꞌ:
—Asiꞌ iskꞌatanh naj Saulo tuꞌ yuto sikꞌbꞌilxalo naj wuhan.
Haꞌ naj chihalnokꞌo intzotiꞌan xol anma mach Israeloj,
yebꞌ tet ebꞌnaj rey,
yebꞌ tet ebꞌnaj Israel hawet konhobꞌ.
16 Yebꞌ chinyehan yilaꞌ naj hanta isyaꞌtajil chaqꞌle naj yu yalni Intzotiꞌan,
xhi Komam tet yaꞌ.
17 Hak tuꞌ yu isto yaꞌ Ananías bꞌey huneꞌ nha tuꞌ.
Yet yapni yaꞌ yokto yaꞌ yul nha,
yanayo yaꞌ isqꞌabꞌ yibꞌanh iswiꞌ naj Saulo,
yalni yaꞌ hakaꞌ tiꞌ:
—Wal tinanh wuxhta Saulo,
Komam Jesucristo isyekanh isbꞌa yul habꞌeh bꞌay makaxhtita,
haꞌ makinchejnitijan takꞌatanh yunhe ishajlo hasat tiꞌ hunelxa,
kat xin hachahnikano Komam Espíritu Santo yinh hawanma,
xhi yaꞌ tet naj Saulo tuꞌ.
18 Hunepixto xin yaykꞌay hunteqꞌan hakaꞌ ismelyaxhil istzꞌumal noꞌ kay ayko yenhelo sat naj Saulo tuꞌ,
hak tuꞌ yu yilnipaxokanh naj hunelxa.
Lahwi tuꞌ xin,
yahkano haꞌ iswiꞌ naj.
19 Iswaꞌpaxokanh naj,
yiqꞌni yip naj hunelxa.
Txꞌiꞌal xin tzꞌayik kankano naj iskꞌatanh ebꞌnaj ayxako yul isqꞌabꞌ Komam bꞌey yul konhobꞌ Damasco tuꞌ.
Yicheko yaꞌ Saulo yalnikꞌo Istzotiꞌ Komam Dios yul konhobꞌ Damasco
20 Lahwi tuꞌ xin,
yekꞌ yaꞌ Saulo yalnokꞌo Istzotiꞌ Komam Cristo yulajla iscapilla ebꞌnaj Israel,
chalni yaꞌ tato kaw yeli Iskꞌahol Komam Dios ye Komam Jesús.
21 Haꞌ anma abꞌen tzet chal yaꞌ,
kaw kꞌaykanokanh iskꞌul.
Yalni hakaꞌ tiꞌ:
—¿Tom maxhtaj naj tiꞌ chitanhtzenilo anma chichahni Komam Jesucristo yul yanma,
bꞌey yul konhobꞌ Jerusalén?
¿Tom maxhtaj naj tiꞌ chihul kꞌalnoto ebꞌnaj ayxako yul isqꞌabꞌ Komam,
kat yinito naj tet ebꞌnaj yahawil sacerdote?
xhi anma tuꞌ yinh yaꞌ.
22 Kaw ahkanokanh yaꞌ Saulo tuꞌ yalni Istzotiꞌ Komam yunhe yohtanhenilo anma tato kaw yeli haꞌ Komam Jesús haꞌ ton Cristo echmabꞌil yuli.
Yuxin ebꞌnaj Israel ay yul konhobꞌ Damasco tuꞌ,
mach chitxumcha yu ebꞌnaj yinh tzet chiyu ispajtzen tet yaꞌ Saulo.
Yet iskolchalo yaꞌ Saulo yul isqꞌabꞌ ebꞌnaj Israel
23 Lahwi yekꞌto hayebꞌ tzꞌayik xin iskutxbꞌan isbꞌa ebꞌnaj yahawil ebꞌnaj Israel,
islahtiꞌnhen isbꞌa ebꞌnaj tato chipotxꞌlaxkamo yaꞌ Saulo tuꞌ.
24 Kaw hunun tzꞌayik yebꞌ hunun aqꞌbꞌal ismajni ebꞌnaj yaꞌ Saulo yul ispultahil chꞌen kꞌubꞌ hoyaniko yinh konhobꞌ tuꞌ yunhe ispotxꞌlaxkamo yaꞌ,
yaj xin yabꞌelo yaꞌ Saulo huneꞌ tuꞌ.
25 Yuxin haꞌ ebꞌnaj ayxako yul isqꞌabꞌ Komam,
hayet aqꞌbꞌalil yayto ebꞌnaj yaꞌ yul huneꞌ niman motx,
yalaxilto yaꞌ yul isventanahil huneꞌ niman kꞌubꞌ tuꞌ,
hak tuꞌ xin yu yayto tꞌunhtꞌun yaꞌ sat kꞌubꞌ tuꞌ,
iskolcha yaꞌ Saulo.
Yet aykꞌo yaꞌ Saulo yul konhobꞌ Jerusalén
26 Haxa yet yapni yaꞌ Saulo yul konhobꞌ Jerusalén,
yoche yaꞌ ishunbꞌa isbꞌa yebꞌ ebꞌnaj ayxako yul isqꞌabꞌ Komam,
yaj kaw chixiw ebꞌnaj tet yaꞌ.
Yuto maxhtikꞌa yayto ebꞌnaj yul yanma tato yeli ayxako yaꞌ Saulo tuꞌ yul isqꞌabꞌ Komam.
27 Haxa yaꞌ Bernabé,
inito yaꞌ Saulo iskꞌatanh ebꞌyaꞌ ischejabꞌ Komam Jesús,
yalni yaꞌ tet ebꞌyaꞌ:
—Kaw yeli yaꞌ Saulo tiꞌ yil yaꞌ Komam Jesús yul bꞌeh,
istzotel Komam tet yaꞌ.
Yuxin kaw machi xiw yaꞌ yalnikꞌo Istzotiꞌ Komam Jesús yul konhobꞌ Damasco,
xhi yaꞌ Bernabé tuꞌ tet ebꞌyaꞌ.
28 Hak tuꞌ yu iskankano yaꞌ Saulo iskꞌatanh ebꞌyaꞌ ischejabꞌ Komam ay bꞌey yul konhobꞌ Jerusalén.
Chixin ekꞌ yaꞌ yinta ebꞌyaꞌ,
chalnikꞌo yaꞌ Istzotiꞌ Komam Jesús yinh sunil yanma yul konhobꞌ.
29 Kaw kuywakanto yaꞌ yinh ebꞌnaj Israel chihalni tzotiꞌ griego,
kat xin isteyelen isbꞌa yaꞌ yebꞌ ebꞌnaj.
Yaj kaw ay yalaꞌ ebꞌnaj tiꞌ tzet chu iskam yaꞌ.
30 Yet yabꞌen ebꞌnaj ayxako yul isqꞌabꞌ Komam huneꞌ tuꞌ,
yinito ebꞌnaj yaꞌ Saulo bꞌey yul huneꞌ konhobꞌ chiyij Cesarea.
Tzujan tuꞌ xin,
ischejlaxkanto yaꞌ yu ebꞌnaj bꞌey yul konhobꞌ Tarso.
31 Yinh huneꞌ tiempohal tuꞌ xin aqꞌankꞌulalxanhe ye makta ayxako yul isqꞌabꞌ Komam Jesús ay yul ismajul Judea yebꞌ xin bꞌey Galilea yebꞌpaxo bꞌey Samaria.
Kaw yiqꞌkanokanh yip ebꞌnaj yu iskolwal Komam Espíritu Santo,
yebꞌ xin kaw ay yelapno ye Komam yul sat ebꞌnaj.
Kaw ahkanokanh ischꞌibꞌ isbꞌisil makta chako isbꞌa yul isqꞌabꞌ Komam.
Yet iskawxikanh naj Eneas
32 Yet huneꞌ tiempohal tuꞌ ekꞌ yaꞌ Pedro yul hunteqꞌan konhobꞌ,
hak tuꞌ yu istuklen yaꞌ ebꞌnaj ayxako yul isqꞌabꞌ Komam bꞌey yul konhobꞌ Lida.
33 Yul huneꞌ konhobꞌ tuꞌ xin apni yaꞌ Pedro iskꞌatanh huneꞌ naj chiyij Eneas.
Kaw waxajebꞌxa habꞌil isto naj Eneas tuꞌ sat txꞌat yuto kaw yanhyonhe isnimanil naj yu huneꞌ yabꞌil.
34 Yalni yaꞌ Pedro tuꞌ tet naj:
—Eneas,
Komam Jesucristo chaxhaqꞌni kawxoj,
yuxin ahanhwano tinanh,
ikanh hawaybꞌal tiꞌ,
xhi yaꞌ Pedro tuꞌ tet naj.
Hak tuꞌ xin yu yahwano naj.
35 Sunil anma ay yul konhobꞌ Lida,
yebꞌ sunil anma ay yul huneꞌxa konhobꞌ chiyij Sarón ilni huneꞌ tuꞌ yet iskawxikanh naj,
hak tuꞌ yu yanikaniko isbꞌa anma yul isqꞌabꞌ Komam Jesucristo.
Yet yitzitzbꞌikanh ix Dorcas
36 Yul konhobꞌ Jope,
haꞌ tuꞌ ay huneꞌ ix ayxako yul isqꞌabꞌ Komam chiyij Tabita,
haꞌ yinh abꞌxubꞌal griego,
Dorcas isbꞌi ix.
Txꞌiꞌal tzettaj ye tuꞌ kꞌul iswatxꞌe ix,
kaw xin kolwa ix yinh anma mebꞌaꞌ.
37 Yaj ay huneꞌ yabꞌil kaw how ok yinh ix,
iskam ix.
Yet kamomxa ix tuꞌ,
yaxhnhelaxkano ix,
yilaxahto ix yul huneꞌ cuarto yinh iskabꞌ piso.
38 Huneꞌ konhobꞌ chiyij Jope tuꞌ,
iskawilal Lida aykoj.
Yet yabꞌen ebꞌnaj ayxako yul isqꞌabꞌ Komam tato haꞌ bꞌey Lida ay yaꞌ Pedro ischejnito ebꞌnaj kawanh ebꞌnaj yalno tet yaꞌ:
«Tonh jintajanh bꞌey yul konhobꞌ Jope tinanh yaj yinh anhe,»
xhi ebꞌnaj tet yaꞌ Pedro tuꞌ.
39 Isto yaꞌ Pedro yinta ebꞌnaj.
Yet yapni yaꞌ xin,
yilaxahto yaꞌ yul huneꞌ cuarto tuꞌ bꞌay ay isnimanil ix Dorcas.
Ay hunteqꞌan ebꞌix hunix aykꞌo iskꞌatanh ix kamom tuꞌ,
kaw chꞌoqꞌkaniko ebꞌix yinh ix.
Ay xil isqꞌap ebꞌix sabꞌil yu ix Dorcas tuꞌ,
chilaisye ebꞌix tet yaꞌ.
40 Lahwi tuꞌ xin,
ischejlaxayti sunil anma yul huneꞌ cuarto yu yaꞌ Pedro.
Yay jahno yaꞌ istxahli yaꞌ tet Komam Dios.
Lahwi istxahli yaꞌ tuꞌ xin,
yalni yaꞌ tet ix Dorcas hakaꞌ tiꞌ:
«Tabita,
ahanhwanoj,»
xhi yaꞌ tet ix.
Yet lahwi yalni yaꞌ tuꞌ xin,
ishajni sat ix,
hayet yilni ix yaꞌ Pedro tuꞌ,
yah tzꞌonhno ix.
41 Yok tzabꞌno yaꞌ yinh isqꞌabꞌ ix,
yah linhno ix.
Yawtenahto yaꞌ Pedro sunil ebꞌnaj ayxako yul isqꞌabꞌ Komam ay bꞌey tuꞌ yebꞌpaxo ebꞌix hunix.
Isyeni yaꞌ tet sunil anma ta hulkanh iskꞌul ix Dorcas tuꞌ.