Ok naj Saulo yaqꞌaꞌ ekꞌoyaꞌ makta ayxako yul isqꞌabꞌ Komam Jesucristo
8
Kaw tzalakano iskꞌul naj Saulo yinh iskamikal yaꞌ Esteban.
Yinh huneꞌ tzꞌayik tuꞌ xin ichiko huneꞌ niman isyaꞌtajil yinh makta ayxako yul isqꞌabꞌ Komam bꞌey yul konhobꞌ Jerusalén,
hak tuꞌ xin yu ispujnatoj.
Ay mak tokano yulaj ismajul txꞌotxꞌ Judea,
aypaxo mak tokano yulaj ismajul txꞌotxꞌ Samaria,
kachanxanhe ebꞌyaꞌ ischejabꞌ Komam Jesús kankano bꞌey yul konhobꞌ Jerusalén tuꞌ.
2 Ay xin hunteqꞌan ebꞌnaj ayko yanma yinh Komam kaw kꞌul iskꞌul,
haꞌ ebꞌnaj tuꞌ inito isnimanil yaꞌ Esteban mujuj.
Kaw chꞌoqꞌkaniko ebꞌnaj yinh isnimanil yaꞌ.
3 Wal naj Saulo,
kaw islahkaniko naj istanhtzenilo makta ayxako yul isqꞌabꞌ Komam.
Kaw bꞌeh yok naj yulaj nha,
kat istarnilti naj ebꞌnaj winaj yebꞌ ebꞌix ix yul yatut,
kat yilaxto preso yu naj Saulo tuꞌ.
Pujbꞌalaxikꞌo Istzotiꞌ Komam Jesús bꞌey Samaria
4 Haꞌ ebꞌnaj ayxako yul isqꞌabꞌ Komam xiwilo bꞌey yul konhobꞌ Jerusalén,
nanantaxanhe bꞌay tokanikoj.
Haꞌ bꞌay chilaekꞌ tuꞌ xin chiyalikꞌo Tzotiꞌ Kꞌul yet Kolbꞌanile.
5 Xol ebꞌnaj tuꞌ,
ay huneꞌ yaꞌ Felipe isbꞌi,
apni yul niman konhobꞌ Samaria.
Istzabꞌniko yaꞌ yalnikꞌo Istzotiꞌ Komam Cristo xol anma bꞌey tuꞌ.
6 Kaw yabꞌe anma sunil tzettaj chal yaꞌ Felipe tuꞌ.
Yilnipaxo anma hunteqꞌan kꞌaybꞌalkꞌule isye yaꞌ xol anma tuꞌ.
7 Kaw hantanhe anma ayko ischejabꞌ naj matzwalil yinh kawxikaniloj.
Hayet chiꞌelkano ebꞌnaj yinh anma tuꞌ kaw chiꞌel yaw.
Kaw ay anma kamnajilo isnimanil,
yebꞌ anma mach chu isbꞌelwi,
kaw watxꞌikanh yu yaꞌ Felipe tuꞌ.
8 Yu tzet iswatxꞌe yaꞌ Felipe,
kaw tzalakanh iskꞌul sunil anma yul konhobꞌ Samaria tuꞌ.
9 Ay huneꞌ naj yul konhobꞌ tuꞌ chiyij Simón,
nawal naj;
payxa ichiti yaqꞌni subꞌchaho naj anma,
kaw ay yelapno ye naj yalni.
10 Kaw xin chiyako yanma anma yinh naj,
kat yabꞌelax tzet chal naj.
Sunil anma machi yelapno yehi yebꞌ anma kaw ay yelapno yehi,
chalni yinh naj hakaꞌ tiꞌ:
«Haꞌ yaꞌ Simón tiꞌ,
haꞌ yaꞌ huneꞌ niman yip Komam Dios,»
xhi anma.
11 Kaw chakaniko anma yanma yinh naj Simón tuꞌ,
kaw xin payxa ichiko naj yetan anma,
chalni anma tato kaw tzꞌajan iskꞌul naj.
12 Yalni yaꞌ Felipe Istzotiꞌ Komam Jesucristo xol anma.
Haxa yet yalni yaꞌ yinh tzet chu yok anma yul isqꞌabꞌ Komam Dios kaw txꞌiꞌal ebꞌnaj winaj yebꞌ ebꞌix ix yayto yul yanma yinh tzet chal yaꞌ.
Lahwi tuꞌ xin,
yahkano haꞌ iswiꞌ.
13 Yaj xin yapaxayto naj Simón tuꞌ yul yanma yinh tzet yal yaꞌ Felipe tuꞌ.
Lahwi yahkano haꞌ iswiꞌ naj,
yok tzujno naj yinta yaꞌ Felipe.
Ay xin hunteqꞌan nimeta kꞌaybꞌalkꞌule isye yaꞌ Felipe,
kaw kꞌaykanh iskꞌul naj Simón tuꞌ yet yilni naj.
14 Yet yabꞌen ebꞌyaꞌ ischejabꞌ Komam Jesús bꞌey Jerusalén tato ay anma bꞌey yul konhobꞌ Samaria chahni Istzotiꞌ Komam Dios yul yanma,
ischejnito ebꞌyaꞌ yaꞌ Pedro yebꞌ yaꞌ Juan istukleno ebꞌnaj ayxako yul isqꞌabꞌ Komam bꞌey yul ismajul Samaria tuꞌ.
15 Yet yapni ebꞌyaꞌ kawanh tuꞌ,
yok ebꞌyaꞌ txahlo yebꞌ anma ayxako yul isqꞌabꞌ Komam yunhe ischahnikano Komam Espíritu Santo yul yanma,
16 yuto maxhto hunu ebꞌnaj chichahni Komam Espíritu Santo,
kachannhe yinh isbꞌi Komam Jesucristo ahkano haꞌ iswiꞌ ebꞌnaj.
17 Yanayo yaꞌ Pedro yebꞌ yaꞌ Juan tuꞌ isqꞌabꞌ yibꞌanh iswiꞌ ebꞌnaj.
Hak tuꞌ yu ischahnikano ebꞌnaj Komam Espíritu Santo yul yanma.
18 Yet yilni naj Simón tato yet chiyanayo ebꞌyaꞌ isqꞌabꞌ yibꞌanh iswiꞌ ebꞌnaj ayxako yul isqꞌabꞌ Komam tuꞌ,
kat ischahnikano Komam Espíritu Santo,
yalten naj Simón melyu tet ebꞌyaꞌ ischejabꞌ Komam tuꞌ.
19 Yalni naj hakaꞌ tiꞌ:
—Aqꞌwekano huneꞌ heyip tiꞌ wetan haxinwal makxanhetikꞌa hunu mak chiwayo inqꞌabꞌan yibꞌanh iswiꞌ,
kat ischahnikano Komam Espíritu Santo,
xhi naj tet ebꞌyaꞌ kawanh tuꞌ.
20 Yalni yaꞌ Pedro:
—Hunnhehojabꞌ chu hatanhilo yebꞌ hamelyu tiꞌ yuto chatxumu tato hunu tzet chiyaqꞌ Komam Dios jet chiyu koloqꞌni.
21 Kaw mach chu hawok yinh huneꞌ tzet chijutiꞌanh,
yuto haꞌ ismachiswalil chiꞌekꞌ yul hawanma yul sat Komam Dios.
22 Wal tinanh nah habꞌa,
bꞌejkano huneꞌ hamachiswalilal tiꞌ.
Qꞌan nimankꞌulal tawinh tet Komam Dios,
yuto aytotaxka nimankꞌulal yu Komam tawinh yinh tzet chꞌekꞌ yul hawanma tiꞌ.
23 Yuto chiwilan tato kaw chichiwako hakꞌul hawilni yinh tzet chikowatxꞌe tiꞌanh,
haꞌ ton xin huneꞌ istxꞌojal tiꞌ kꞌalnhe hachayoj,
xhi yaꞌ Pedro tuꞌ tet naj Simón.
24 Istaqꞌwi naj Simón tuꞌ:
—Kaw chinqꞌanan teyet,
qꞌanwe nimankꞌulal winhan tet Komam Dios,
haxinwal machi hunu isyaꞌtajil maxawal tiꞌ chihul wibꞌanhan yu Komam,
xhi naj tet ebꞌyaꞌ.
25 Lahwi yalnikꞌo yaꞌ Pedro yebꞌ yaꞌ Juan yinh ej tzettaj ye tuꞌ ilbꞌilkano yu yinh tzet iswatxꞌe Komam Jesucristo,
yebꞌ kuybꞌanil yinh Komam,
ispaxto ebꞌyaꞌ Jerusalén;
kaw hantanhe yaldeahil Samaria bꞌay ekꞌ ebꞌyaꞌ yalaꞌkꞌo Istzotiꞌ Komam Jesús.
Yaꞌ Felipe yebꞌ huneꞌ naj ah Etiopía
26 Ay huneꞌ yángel Komam Dios halni tet yaꞌ Felipe hakaꞌ tiꞌ:
«Asiꞌ bꞌey sur,
kat hato yul bꞌeh chitit bꞌey Jerusalén,
huneꞌ chiꞌapni yul konhobꞌ Gaza,»
xhi naj ángel tet yaꞌ.
Huneꞌ bꞌeh tuꞌ xin chiꞌekꞌ sat txꞌotxꞌ desierto.
27 Yok yaꞌ Felipe yinh isbꞌel isto yaꞌ.
Istzujcha huneꞌ naj ah Etiopía yul bꞌeh yu yaꞌ.
Haꞌ huneꞌ naj tuꞌ eunuco naj,
yahawil yeko naj yu huneꞌ ix reina chiyij Candace,
yinh iskꞌubꞌan ismelyu ix.
Ispeto naj yul konhobꞌ Jerusalén yu yinayo isbꞌa tet Komam Dios.
28 Ayahto naj yul iscarruaje,
lanhan ispaxto naj iskonhobꞌ,
lahan xin yilni naj kuybꞌanile tzꞌibꞌnhebꞌilkano yu yaꞌ Isaías,
huneꞌ naj ischejabꞌ Komam Dios yet payat.
29 Yalni Komam Espíritu Santo tet yaꞌ Felipe hakaꞌ tiꞌ:
«Hitzanhiko iskꞌatanh huneꞌ teꞌ carruaje tuꞌ,»
xhi tet yaꞌ.
30 Isto yaꞌ yinh anhe,
ishitziko yaꞌ iskꞌatanh teꞌ carruaje tuꞌ yabꞌen yaꞌ tato lanhan yilni naj hunteqꞌan kuybꞌanile tzꞌibꞌnhebꞌilkano yu yaꞌ Isaías.
Yalni yaꞌ Felipe tuꞌ tet naj:
—¿Chimtxumchalo hawu tzet lanhan hawilni tiꞌ?
xhi yaꞌ.
31 Yalni naj ah Etiopía tuꞌ xin:
—¿Tzet chu intxumnilojan tato machi hunu mak chihalni wetan tzet chaliloj?
Ahanhti yul carruaje inkꞌatanhtiꞌan,
kat xin hawalni wetan tzet chaliloj,
xhi naj eunuco tet yaꞌ Felipe.
32 Hak tiꞌ chute yalni teꞌ Hum bꞌay lanhan yilni naj:
«Hakaꞌ hunu noꞌ meꞌ chiꞌilaxto kamoj,
hak tuꞌ chiyu yilaxotoj.
Hakaꞌ hunu noꞌ nichꞌan meꞌ matzet chala yet chiꞌilaxilo xil,
hak tuꞌ chiyuteꞌ isbꞌa,
machi hunu tzotiꞌ chiꞌahti yul istiꞌ.
33 Kaw txꞌixobꞌal chiꞌutelaxi,
machi hunu mak chiwatxꞌen istoholal yinh.
Machi hunu mak chu yalni hanta istxꞌojal anma yet aykꞌo yul sat yibꞌanhqꞌinal tiꞌ,»a
xhi Yum Komam Dios.
34 Lahwi tuꞌ xin isqꞌambꞌenilo naj ah Etiopía tet yaꞌ Felipe:
—Hal wetan,
¿mak yinh chitzotel huneꞌ ischejabꞌ Komam Dios tiꞌ?
¿Tom yinh yaꞌ Isaías tiꞌ chitzoteli,
mato nan mak bꞌay chitzotel tiꞌ?
xhi naj.
35 Yichiko yaꞌ Felipe yalnilo mak yinh chitzotel huneꞌ Hum tuꞌ.
Yalni yaꞌ Tzotiꞌ kꞌul yet Komam Jesucristo;
ichiti yaꞌ yinh huneꞌ Hum lanhan yilni naj tuꞌ.
36 Hayet ayko yaꞌ yebꞌ naj yinh bꞌel tuꞌ xin,
yapni bꞌey huneꞌ ha haꞌ,
yuxin yal naj ah Etiopía tuꞌ tet yaꞌ Felipe hakaꞌ tiꞌ:
—Ay huneꞌ haꞌ bꞌey tiꞌ lah,
¿kꞌulmi yahkano haꞌ inwiꞌan tinanh?
xhi naj tet yaꞌ.
37 Yalni yaꞌ Felipe tuꞌ:
—Chuhi tato kaw yeli chawayto yul hawanma,
xhi yaꞌ.
Istaqꞌwikanh naj:
—Kaw chiwayto yul wanmahan tato kaw yeli Iskꞌahol Komam Dios ye Komam Jesucristo tuꞌ,
xhi naj.
38 Lahwi tuꞌ xin,
ischejni naj ah Etiopía islinhbꞌalax iscarruaje.
Yayto yaꞌ yebꞌ naj xol haꞌ,
yah haꞌ iswiꞌ naj yu yaꞌ Felipe.
39 Yet lahwi yahkanti iskawanhil xol haꞌ tuꞌ,
yinh haꞌmataj yilaxto yaꞌ Felipe yu Komam Espíritu Santo,
maxhtikꞌa yil naj ah Etiopía tuꞌ bꞌaytuꞌwal kaw istoko yaꞌ Felipe.
Toxanhe kaw chitzala naj yet yok naj yinh isbꞌel hunelxa.
40 Hayet yilniti yaꞌ Felipe tuꞌ,
haxa yul konhobꞌ Azoto ay yaꞌ.
Istzabꞌniko yaꞌ ispujbꞌanikꞌo Tzotiꞌ Kꞌul yet Kolbꞌanile yulajla konhobꞌ masan apni yaꞌ yul konhobꞌ Cesarea.