—Hex wet konhobꞌ,

sunilxa tiempo xaꞌelto wibꞌanhan kaw toholnhetikꞌa innabꞌalan,

hakpax tuꞌ tinanh,

kaw kꞌul inbꞌeybꞌalan sata Komam Dios,

xhi yaꞌ tet ebꞌnaj.

2 Yalni xin naj Ananías,

naj yahawil ebꞌnaj sacerdote,

tet ebꞌnaj ayayo iskawilal yaꞌ Pablo,

tato chischꞌatiko ebꞌnaj istiꞌ yaꞌ.

3 Yaj xin taqꞌwikanh yaꞌ Pablo tuꞌ hakaꞌ tiꞌ:

—¡Haꞌ Komam Dios chaxhmaqꞌnoj,

yuto kaw leqꞌtiꞌ hach!

Lahan hach hakaꞌ hunu bꞌitzꞌabꞌ ayko istxohal,

tzꞌonhan hach bꞌey tuꞌ yu hawilni tzet chinelikojan hakaꞌ yalni ley hawalni,

yajaꞌ xin mach chayije tzet chal koley yuto chachejti ebꞌnaj tiꞌ kinismaqꞌaꞌan,

xhi yaꞌ.

4 Yalni ebꞌnaj ayayo iskawilal yaꞌ tuꞌ:

—¿Tzet yinh xin hak tuꞌ chawute hawalni yinh yaꞌ yahawil issacerdote Komam Dios tiꞌ?

xhi ebꞌnaj.

5 Yalnipaxo yaꞌ Pablo tuꞌ xin:

—Hex wet konhobꞌ,

kaw mach wohtajojan tato haꞌ naj tiꞌ yahawil yehiko yinh ebꞌnaj sacerdote.

Wal xin chiyal yul Yum Komam Dios hakaꞌ tiꞌ:

“Mach chawal tzotiꞌ txꞌoj yinh hunu naj yahawil konhobꞌ,”^a

xhihayoj,

xhi yaꞌ.

6 Haxa yet yilni yaꞌ Pablo tato ay ebꞌnaj saduceo,

aypaxo ebꞌnaj fariseo kutxaniko bꞌey tuꞌ,

yalni yaꞌ yinh kaw ip hakaꞌ tiꞌ:

—Hex wet konhobꞌ,

hanintiꞌan fariseo hinan,

fariseopaxo inmaman.

Tinanh xin,

kaw cheyila tzet chinelikojan heyalni,

yuto chiwalan tato chiꞌitzitzbꞌikanh anma kamom,

xhi yaꞌ tet ebꞌnaj.

7 Hayet yalni yaꞌ Pablo huneꞌ tuꞌ xin,

yok ebꞌnaj fariseo yebꞌ ebꞌnaj saduceo isbꞌuchlen isbꞌa,

hak tuꞌ xin yu ispohni isbꞌa ebꞌnaj.

8 Yuto ebꞌnaj saduceo tuꞌ,

chiyal ebꞌnaj tato mach chiꞌitzitzbꞌikanh anma kamom,

chiyalnipaxo ebꞌnaj tato machi ebꞌnaj ángel,

yebꞌ ta machi espíritu.

Wal ebꞌnaj fariseo,

kaw chayto ebꞌnaj yul yanma yinh sunil hunteqꞌan kuybꞌanile tuꞌ.

9 Kaw xin wejchakanh ebꞌnaj istzoteli.

Yahwano hunteqꞌan ebꞌnaj chikuywa yinh isley yaꞌ Moisés ayko yinh ispartido ebꞌnaj fariseo,

yalni ebꞌnaj:

—Huneꞌ naj tiꞌ,

machi hunu istxꞌojal chiswatxꞌe naj.

Chalotaxka hunu espíritu maka hunu ángel chiꞌaqꞌni yalaꞌ naj,

wal xin kaw mach chiyu janiko kohowal yinh Komam Dios,

xhi ebꞌnaj.

10 Kaw nimajal elkaniko yoj huneꞌ howal tuꞌ,

yuxin xiwkanh naj komandante,

yu chálo isxitnito ebꞌnaj yaꞌ Pablo tuꞌ.

Hak tuꞌ xin yu ischejni naj awtelaxo ebꞌnaj soldado yunhe yilaxilo yaꞌ Pablo xol anma,

yilaxto yaꞌ hunelxa yul cuartel.

11 Haxa yet hunxa aqꞌbꞌal xin,

isyeni isbꞌa Komam tet yaꞌ Pablo,

yalni hakaꞌ tiꞌ:

—Pablo,

mach chaxhxiwi,

yuto hakaꞌ yu kinhawalnikꞌojan yul konhobꞌ Jerusalén tiꞌ,

hak tuꞌ chiyu kinhawalnipaxikꞌojan bꞌey yul konhobꞌ Roma,

xhi Komam.

12 Haxa yet hunxa tzꞌayik,

ay hunteqꞌan ebꞌnaj Israel islahtiꞌnhe isbꞌa ispotxꞌnikamo yaꞌ Pablo tuꞌ.

Yalni ebꞌnaj hakaꞌ tiꞌ:

—Mach chonhwaꞌanh masanto chikam naj Pablo juhanh.

Ta mach chij isbꞌa xin,

yaqꞌabꞌti Komam Dios istzꞌaktiꞌ jibꞌanhanh,

xhi ebꞌnaj.

13 Ekꞌbꞌal 40 (kawinaj) ebꞌnaj istaqꞌweko huneꞌ tuꞌ yinh.

14 Isto ebꞌnaj tet ebꞌnaj yahawil sacerdote yebꞌ xin tet ebꞌnaj ichamta winaj iswiꞌehal yeko xol ebꞌnaj Israel,

yalni ebꞌnaj hakaꞌ tiꞌ:

—Wal honhtiꞌanh xajalanh yabꞌeꞌ Komam Dios tato machi nichꞌano tzet chikolohanh masanto chiyij isbꞌa iskam naj Pablo juhanh,

ta mach xin chiyati Komam istzꞌaktiꞌ jibꞌanhanh.

15 Wal tinanh xin,

hex tiꞌ yebꞌ ebꞌyaꞌ iswiꞌehal yeko yinh lahtiꞌ,

halwe tet naj komandante romano tato chiyati naj naj Pablo tuꞌ yinh hesat hekal,

yuto kaw ayto nichꞌanxa tzet chikoqꞌambꞌehanh tet naj yinh kaw nanhkꞌulal,

kexchi.

Wal honhanh xin,

ayonhxayojanh istiꞌ bꞌeh,

kat kopotxꞌnihanh naj yet maxhto chihul naj tekꞌatanh bꞌey tiꞌ,

xhi ebꞌnaj.

16 Yaj xin kꞌuxan yabꞌenilo naj yunin ix yanabꞌ yaꞌ Pablo huneꞌ yal ebꞌnaj tuꞌ,

isto naj yalno tet yaꞌ Pablo yul cuartel.

17 Yawten yaꞌ Pablo tuꞌ huneꞌ naj capitán,

yalni yaꞌ tet naj hakaꞌ tiꞌ:

—Ito huneꞌ naj tzeh tiꞌ iskꞌatanh naj komandante,

yuto ay huneꞌ kaw yilal yalni naj tet naj,

xhi yaꞌ.

18 Hak tuꞌ xin yu yinito naj capitán tuꞌ naj tzeh iskꞌatanh naj komandante,

yalni naj hakaꞌ tiꞌ:

—Yaꞌ Pablo ayko preso,

makinawtenan,

mayalni yaꞌ wetan tato chiwitijan huneꞌ naj tzeh tiꞌ takꞌatanh,

yuto ay huneꞌ tzet kaw yilal yalni naj tawet,

xhi naj capitán tuꞌ.

19 Hak tuꞌ xin yu isxeknito naj komandante tuꞌ naj nichꞌan tzeh bꞌay machi mak chꞌabꞌeni,

isqꞌambꞌen naj tet naj:

—¿Tzet chawoche hawalaꞌ wetan?

xhi naj.

20 Lahwi tuꞌ xin,

yalni naj tzeh tuꞌ:

—Maslahtiꞌnhe isbꞌa ebꞌnaj Israel tato chiyal ebꞌnaj tawet ta chawito yaꞌ Pablo yet hekal yinh sat ebꞌnaj iswiꞌehal yeko yinh lahtiꞌ,

yuto ayto tzet chisqꞌambꞌe ebꞌnaj tet yaꞌ yinh kaw nanhkꞌulal yalni.

21 Yaj mach chawayto yul hawanma yinh tzet chiyal ebꞌnaj,

yuto ekꞌbꞌal 40 (kawinaj) yetbꞌi ebꞌnaj ebꞌabꞌil isbꞌa istiꞌ bꞌeh yechman yekꞌto yaꞌ,

yuto xayawte ebꞌnaj isbꞌi Komam Dios yinh ta mach chiwaꞌ ebꞌnaj masanto chispotxꞌkamo ebꞌnaj yaꞌ Pablo tuꞌ.

Ta mach xin chiyati Komam Dios istzꞌaktiꞌ yibꞌanh ebꞌnaj yalni.

Wal tinanh xin,

kaw toxanhe chiyechma ebꞌnaj tzet chawute hawalni,

xhi naj tzeh tuꞌ.

22 Lahwi tuꞌ xin,

yalni naj komandante tet naj tato machi mak tet chiyal naj huneꞌ tzet bꞌey naj yalaꞌ tuꞌ;

ischejlaxtopaxo naj nichꞌan tzeh tuꞌ.

23 Hak tuꞌ xin yu yawten naj komandante tuꞌ kawanh ebꞌnaj capitán,

yalni naj tet ebꞌnaj tato chiswatxꞌe isbꞌa kabꞌ ciento ebꞌnaj soldado chito yu yoj,

70 ebꞌnaj chito yibꞌanh cheh,

kabꞌ cientopaxo ebꞌnaj chiyiqꞌ islanza,

yuto yinh chꞌen bꞌalonhebꞌ yahbꞌal aqꞌbꞌal chito sunil ebꞌnaj tuꞌ yul konhobꞌ Cesarea.

24 Yalnipaxo naj tato chiꞌaqꞌlax listohal haykꞌonho noꞌ cheh bꞌay chiꞌahto yaꞌ Pablo tuꞌ,

yebꞌpaxo tato kaw chisyaꞌilnhe ebꞌnaj yaꞌ yul bꞌeh,

haxinwal kaw yaꞌ Pablo tuꞌ yet chiꞌalaxiko yaꞌ yul isqꞌabꞌ naj gobernador Félix yu ebꞌnaj.

25 Yanito naj huneꞌ carta tet naj gobernador Félix yinta ebꞌnaj,

chalni hakaꞌ tiꞌ:

26 «Hanin Claudio Lisias intiꞌan,

chiwatojan huneꞌ carta tiꞌ tawet mam gobernador Félix,

chiwalnitojan ta chawil habꞌa yinh hakawil.

27 »Huneꞌ naj chiyij Pablo tiꞌ,

haꞌ ebꞌnaj Israel tzabꞌnhehayo naj,

kaw xin lanhanxa iskam naj yu ebꞌnaj,

yajaꞌ hayet wabꞌenan tato romano naj intohan yebꞌ insoldadohan inkolnolojan naj.

28 Yaj yu wochen wabꞌehan tzet ismul naj,

yuxin witojan naj sata ebꞌnaj iswiꞌehal yeko yinh lahtiꞌ xol ebꞌnaj Israel.

29 Hak tuꞌ xin yu wabꞌenan tato yu isley ebꞌnaj yuxin istzabꞌayo ebꞌnaj naj,

yaj mach chu ispotxꞌni ebꞌnaj naj yu huneꞌ tuꞌ,

maka ismajipaxo naj.

30 Yaj yu mawabꞌehan tato saybꞌilxa yu ebꞌnaj Israel tiꞌ tzet chiyu ispotxꞌnikamo ebꞌnaj naj,

yuxin chiwatojan naj tawet.

Xaxin walan tet ebꞌnaj qꞌannhe yinh naj tuꞌ tato haꞌ tuꞌ chito ebꞌnaj yalaꞌ tawet tzet ismul naj tet ebꞌnaj.

Hanhe tiꞌ xin inchejbꞌanilan tawet,

mam gobernador,»

xhi naj yul iscarta tuꞌ.

31 Hak tuꞌ xin yu isyijen ebꞌnaj soldado ischejbꞌanil aqꞌlax tet,

yinito ebꞌnaj yaꞌ Pablo yet aqꞌbꞌalil,

yapni ebꞌnaj bꞌey yul konhobꞌ Antípatris.

32 Haxa yet hunxa tzꞌayik xin ismeltzokanti ebꞌnaj soldado bꞌelwito yu yoj yul cuartel,

wal ebꞌnaj yibꞌanh cheh aykanh xin,

okpaxo ebꞌnaj yinh bꞌel yebꞌ yaꞌ Pablo tuꞌ.

33 Hayet yapni ebꞌnaj bꞌey yul konhobꞌ Cesarea xin,

yaqꞌni ebꞌnaj teꞌ carta yebꞌ yaꞌ Pablo tuꞌ tet naj gobernador.

34 Lahwi yilni naj gobernador tzet chiyal teꞌ carta tuꞌ,

isqꞌambꞌen naj tzet konhobꞌal yaꞌ Pablo.

Hayet yabꞌen naj tato ah Cilicia yaꞌ xin,

35 yalni naj hakaꞌ tiꞌ:

—Chiwabꞌehan tzet chawala,

yaj hulujabꞌto ebꞌnaj qꞌannhe tawinh,

xhi naj tet yaꞌ.

Lahwi tuꞌ xin yalni naj tato chitanhelax yaꞌ Pablo tuꞌ yu ebꞌnaj soldado yul huneꞌ palacio watxꞌebꞌil yu naj Herodes yet payat.