Yet yok ebꞌnaj Israel aqꞌokꞌule yinh yaꞌ Pablo sata naj gobernador Félix
24
Howebꞌxa tzꞌayik yapni yaꞌ Pablo yul konhobꞌ Cesarea,
yapnipaxo naj Ananías,
yahawil yinh ebꞌnaj sacerdote,
yebꞌ hunteqꞌan ebꞌnaj iswiꞌehal yinh ebꞌnaj Israel,
yebꞌ xin huneꞌ naj licenciado,
Tértulo isbꞌi.
Haꞌ ebꞌnaj tiꞌ xin apni yinh sat naj gobernador aqꞌokꞌule yinh yaꞌ Pablo.
2 Hayet yilaxti yaꞌ,
istzabꞌniko naj Tértulo tuꞌ yok aqꞌokꞌule yinh yaꞌ Pablo tet naj gobernador Félix hakaꞌ tiꞌ:
—Yuchꞌandios tawet mam gobernador,
hawu yuxin ay aqꞌankꞌulal koxolanh.
Kaw xin sunil tzet chawatxꞌe kaw kꞌul yu kaw ay hanabꞌal.
3 Kaw yeli sunil bꞌay chijabꞌehanh hakꞌulal yebꞌ xin sunil iskꞌulal tzettaj chawatxꞌe mam Félix,
kaw yuchꞌandios tawet yinh sunil.
4 Yaj yu machi kaw chiwilojan hatiempo,
kaw chinqꞌanan tawet ta chawabꞌe tzet chiwalan hunepoj.
5 Huneꞌ naj tiꞌ,
kaw yeli kaw chꞌetlikano naj jinhanh yuto kaw sunil bꞌay chꞌekꞌ naj aqꞌokꞌule tet anma,
ayko naj ispohnito ebꞌnaj Israel.
Kaw xin iswiꞌehal yeko naj yinh huneꞌ majan ebꞌnaj ayko yinta huneꞌ naj ah Nazaret.
6 Yebꞌpaxo yetato naj Yatut Komam Dios;
yuto yikto naj hunteqꞌan ebꞌnaj mach Israelo yul Yatut Komam,
yuxin kotzabꞌayojanh naj yunhe yay isyaꞌtajil yibꞌanh naj hakaꞌ yalni koleyanh.
7 »Yaj xin yako isbꞌa naj komandante Lisias xol,
istziknilo naj naj Pablo tiꞌ jetanh.
8 Yalni naj tato ebꞌnaj qꞌannhe yinh naj tiꞌ,
tawet chihul ebꞌnaj yalaꞌ.
Hach kaw hach xin chisje haqꞌambꞌen tet naj,
kat xin hawohtanhenilo tato kaw yel chijalanh,
xhi naj Tértulo tuꞌ.
9 Haꞌ hun ebꞌnaj Israel tzujan yinta naj Tértulo chihalni tato kaw yel sunil hunteqꞌan tuꞌ.
Yet iskolni isbꞌa yaꞌ Pablo yinh sat naj gobernador Félix
10 Lahwi tuꞌ xin,
yaqꞌni naj gobernador tuꞌ yechel tet yaꞌ Pablo yunhe istzotel yaꞌ,
yalni yaꞌ Pablo tuꞌ hakaꞌ tiꞌ:
—Mam gobernador,
kaw chintzalahan chinkolni hinbꞌahan yinh hasat,
yuto kaw wohtajan tato hach tiꞌ kaw payxa kaxhok yahawil yinh txꞌotxꞌ Israel tiꞌ.
11 Yaj kaw chisje haqꞌambꞌeniloj ta kaw yel tzet chiwaltiꞌan;
kaw 12 (kabꞌlahonhebꞌixto) tzꞌayik wapnihan yul konhobꞌ Jerusalén winoyo hinbꞌahan tet Komam Dios.
12 Yaj machi hunu mak chiyu yalni ta inteyele hinbꞌahan yebꞌ hunu maka nitam wijbꞌanan hunu mak yinh howal yul Yatut Komam Dios,
maka yulajla capilla maka yul konhobꞌ.
13 Hunteqꞌan ebꞌnaj tiꞌ matzet tzꞌaj yaqꞌbꞌalnhe ebꞌnaj yu isyeniloj tato kaw yeli inmulan hunteqꞌan chisbꞌalkanh ebꞌnaj winhtiꞌan.
14 »Yaj chiwalan,
to ayinikojan inyijenan tzet chiyal isDiosal jichmamanh,
hakaꞌtikꞌa yalni huneꞌ akꞌ kuybꞌanile,
haꞌ xin chiyal ebꞌnaj tiꞌ tato nan yehi.
Chiwapaxaytojan yul wanmahan sunil ley aqꞌbꞌilkano tet jichmamanh yaꞌ Moisés,
yebꞌ sunil tzet tzꞌibꞌnhebꞌilkanayo yu ebꞌyaꞌ ischejabꞌ Komam Dios yet payat.
15 Kaw xin chikawxi wanmahan yinh Komam Dios hakaꞌtikꞌa ebꞌnaj tiꞌ,
yinh tato chiꞌitzitzbꞌikanh anma kamom,
anma kꞌul yebꞌ xin anma txꞌojpaxoj.
16 Yuton huneꞌ tuꞌ,
yuxin kaw aynhetikꞌako yinh innabꞌalan inwatxꞌenan iskꞌulal yul sat Komam Dios yebꞌ yul sat anma.
17 »Lahwi hayebꞌ habꞌil wekꞌan yulaj konhobꞌ xin,
inmeltzotojan yul inkonhobꞌan yunhe inkolwahan yinh anma mebꞌaꞌ yebꞌ xin waqꞌnipaxojan wofrendahan tet Komam Dios.
18 Haꞌ hunteqꞌan tiꞌ lanhan inwatxꞌenan yet yapni hunteqꞌan ebꞌnaj Israel ay yul ismajul Asia yul Yatut Komam tuꞌ yet lahwi insajnhenkano hinbꞌahan hakaꞌ yalni koleyanh.
Haywanhnhe ebꞌnaj ayikto yul Yatut Komam tuꞌ,
kaw xin machi nichꞌano howal jaqꞌanh.
19 Haꞌ xin ebꞌnaj ah Asia tuꞌ,
yilal yul bꞌey tiꞌ yalno tzet inmulan,
tato yeli aytikꞌa tzet chiyako ebꞌnaj inmulojan.
20 Taka mach xin,
yalabꞌ ebꞌnaj aykꞌo tiꞌ tzet hunu inmulan wakojan yet wokan yinh sat ebꞌnaj iswiꞌehal yeko yinh lahtiꞌ xol ebꞌnaj Israel.
21 Makato yu walan yinh kaw ip xol ebꞌnaj hakaꞌ tiꞌ:
“Tinanh chexok heyilaꞌ tzet chinelikojan yuto chiwaytojan yul wanmahan tato chiꞌitzitzbꞌikanh anma kamomxa,
kinchihan,”
xhi yaꞌ Pablo tuꞌ.
22 Wal naj Félix tuꞌ xin,
kaw xatikꞌa yabꞌe naj kuybꞌanile yet Komam Jesucristo,
yuxin hayet yabꞌen naj tzet yal yaꞌ Pablo tuꞌ,
yalni naj:
—Hato yet chihul naj komandante Lisias,
katto wabꞌenojan tzet kaw ye huneꞌ hehowal tiꞌ,
xhi naj.
23 Yalni naj Félix tuꞌ tet naj capitán hakaꞌ tiꞌ:
—Wal istanhelax naj Pablo tiꞌ,
yaj tato ay yamigo naj chul tuklenoj kat yaqꞌni hunu tzet ye tuꞌ tet naj,
kaw machojabꞌ tzet chawala,
xhi naj.
Yal yaꞌ Pablo Istzotiꞌ Komam Dios tet naj gobernador Félix
24 Lahwi hayebꞌ tzꞌayik xin,
yapni naj Félix yebꞌ yixal,
haꞌ ton ix Drusila,
ix tuꞌ xin ah Israel ix.
Yawtenpaxo naj yaꞌ Pablo,
yok naj yabꞌeno tzet chute yalni yaꞌ Pablo tuꞌ yinh tzet chiyu janiko janma yinh Komam Jesucristo.
25 Yaj hayet yalni yaꞌ Pablo tato kaw tohol chijute kobꞌeybꞌal,
yebꞌ xin kokachni kobꞌa kowatxꞌen istxꞌojal,
yebꞌ yet yalnipaxo yaꞌ yinh isyaꞌtajil chiyati Komam Dios yinh islahobꞌal tzꞌayik,
isxiwkanh naj Félix tuꞌ,
yalni naj hakaꞌ tiꞌ:
—Asiꞌ tinanh,
haxa yet kaw matzet chiwuhan kat kaxhwawtenojan,
xhi naj.
26 Wal naj Félix tuꞌ xin,
yechma naj yalten yaꞌ Pablo hanikꞌo melyu tet naj yinh ewantaj,
kat isbꞌejtzon naj yaꞌ Pablo tuꞌ yalni.
Yuton huneꞌ tuꞌ yuxin kaw naunhe chiyawten naj yaꞌ Pablo tuꞌ,
kat istzotel naj tet yaꞌ.
27 Elto kabꞌ habꞌil haknhetikꞌa tuꞌ chiyute naj,
lahwi tuꞌ xin yel naj Félix tuꞌ yinh gobernadoral,
yokkano naj Porcio Festo selelo naj,
yaj yunhe iskan naj Félix tuꞌ kꞌulal yul sat anma Israel,
yuxin kankano yaꞌ Pablo yul preso yu naj.