—Yuxin makex kaw iswiꞌehal heyekoj,

kaw yilal heto wintajan bꞌey yul konhobꞌ Cesarea,

tato ay ismul huneꞌ naj tuꞌ yakoj,

haꞌ tuꞌ chisje heyalni wetan tzet ismul naj,

xhi naj.

6 Wal naj Festo tuꞌ xin,

waxajebꞌxanhe tzꞌayik ekꞌ naj yul konhobꞌ Jerusalén tuꞌ,

ismeltzopaxto naj yul konhobꞌ Cesarea.

Haxa yet huneꞌxa tzꞌayik xin,

yapni tzꞌonhno naj yul iskapil yanito naj yiqꞌomal yaꞌ Pablo.

7 Hayet yapni yaꞌ Pablo tuꞌ yinh sat naj,

yok hoyno ebꞌnaj Israel ispeto yul konhobꞌ Jerusalén yinh yaꞌ.

Hantanhe tzet istxꞌojal yako ebꞌnaj ismulo yaꞌ,

yaj machi hunu tzet chiyeniloj tato kaw yeli.

8 Hak tuꞌ xin yu yichiko yaꞌ Pablo iskolni isbꞌa,

yalni yaꞌ hakaꞌ tiꞌ:

—Wal hinan,

machi hunu inmulan wakojan yinh isley ebꞌnaj Israel yebꞌ yinh Yatut Komam Dios,

yebꞌpaxo yinh naj jahaw ay yul konhobꞌ Roma,

xhi yaꞌ.

9 Yaj yu iskan naj Festo tuꞌ kꞌulal yul sat ebꞌnaj Israel,

yuxin isqꞌambꞌe naj tet yaꞌ Pablo tuꞌ hakaꞌ tiꞌ:

—¿Chimhawoche chaxhto yul konhobꞌ Jerusalén,

haꞌ tuꞌ xin chiwilan tzet chaxhelikoj?

xhi naj.

10 Istaqꞌwi yaꞌ Pablo:

—¡Machoj!

Wal xin ayinxaktijan yul kapil ayko yalanh yip naj jahaw ay bꞌey Roma,

haꞌ tuꞌ xin kaw yilal yil-lax tzet chinelikojan,

kat yil-laxi tato ay inmulan hakaꞌ yalni ebꞌnaj Israel tiꞌ.

11 Tato ay inmulan kaw chinaqꞌni kamojan,

kaw mach chiwilojan winhan,

kamojinan;

yaj tato machi nichꞌano isyelal xol sunil inmulan chiyal ebꞌnaj tiꞌ,

machi mak ay yip kinyanikojan yul isqꞌabꞌ ebꞌnaj,

wal xin kaw chinqꞌanan tato haꞌ naj jahaw ay Roma,

chiꞌilni tzet chinelikojan,

xhi yaꞌ tet naj Festo.

12 Hak tuꞌ xin yu yok naj Festo islahtiꞌnhen isbꞌa yebꞌ ebꞌnaj yetbꞌi,

lahwi islahtiꞌnhen isbꞌa ebꞌnaj tuꞌ xin,

yalni naj hakaꞌ tiꞌ:

—Hach chawoche tato haꞌ naj jahaw Roma chiꞌilni tzet chaxhelikoj,

wal tinanh xin,

chaxhwatojan yinh sat naj,

xhi naj.

13 Lahwi hayebꞌ tzꞌayik xin,

isto naj rey Agripa yebꞌ yixal,

haꞌ ton ix Berenice,

yul konhobꞌ Cesarea yilaꞌ naj Festo,

yu xaꞌischah naj ismunil yok gobernadoral.

14 Yaj yu txꞌiꞌal tzꞌayik ehayo naj yebꞌ yixal bꞌey tuꞌ,

yuxin ok naj Festo tuꞌ yalaꞌ tet naj rey yinh tzet ye yaꞌ Pablo,

yalni naj hakaꞌ tiꞌ:

—Ay huneꞌ naj bꞌey tiꞌ,

aykaniko preso yu naj Félix.

15 »Yet inbꞌeykꞌojan yul konhobꞌ Jerusalén,

isbꞌeykꞌo ebꞌnaj yahawil sacerdote yebꞌ ebꞌnaj iswiꞌehal yeko yinh ebꞌnaj Israel isqꞌanaꞌ yinh naj wetan tato chinchejan potxꞌlaxo naj.

16 »Yaj walan tet ebꞌnaj ta koley,

hanhonh romano honh tiꞌ,

chiyala tato mach chiyu ispotxꞌlax hunu anma yalanhto maxhto chiyiliko naj sat ebꞌnaj chiqꞌanni yinh,

kat xin iskolni isbꞌa naj,

kinchihan.

17 »Yuton huneꞌ tuꞌ,

yuxin hayet yulikꞌo ebꞌnaj bꞌey tiꞌ machi tiempo inkꞌayan,

wal xin yinh hunxa tzꞌayik kintohan yul inkapilan wanitojan yiqꞌomal naj Pablo tuꞌ.

18 Haꞌ ebꞌnaj qꞌannhe yinh naj tuꞌ xin,

kaw machi ismul naj kaw xiwkilta yal ebꞌnaj wetan,

hakaꞌ innanihan.

19 Kachannhe huneꞌ kaw chal ebꞌnaj ismulo naj tato txꞌoj istzotel naj yinh isreligión ebꞌnaj yalni.

Yalnipaxo ebꞌnaj tato ay huneꞌ naj,

Jesús isbꞌi,

kamnaxa,

yaj xin chal naj Pablo tuꞌ tato itzitz naj.

20 Yaj yu machi nawi wuhan tzet chiyu inwatxꞌenan huneꞌ tuꞌ,

yuxin inqꞌambꞌenan tet naj Pablo tuꞌ tato chiyoche naj chito naj yul konhobꞌ Jerusalén,

yunhe haꞌ tuꞌ chiꞌil-laxi tzet chiꞌeliko naj yinh hunteqꞌan tuꞌ.

21 Yajaꞌ yu yal naj tato haꞌ naj jahaw Augusto ay yul konhobꞌ Roma chiꞌilni tzet chiꞌeliko naj yalni,

yuxin walan tato wal ismaji naj hayebꞌoxa tzꞌayik,

bꞌaqꞌinhxanhetikꞌa xin chiyu wuhan,

kat wanitojan naj tet naj jahaw tuꞌ,

xhi naj Festo.

22 Yalni xin naj rey Agripa tuꞌ tet naj Festo hakaꞌ tiꞌ:

—Hakintuꞌan chiwochehan wabꞌeninojan tzet chiyal naj,

xhi naj.

Yalni naj Festo tuꞌ xin:

—Kꞌultikꞌa,

yet hekal chawabꞌe tzet chal naj,

xhi naj.

23 Haxa yet hunxa tzꞌayik xin,

yapni naj rey Agripa yebꞌ yixal,

haꞌ ton ix Berenice yul kapiltu,

kaw nanxa islow yu yapni naj yebꞌ ix.

Yapnipaxo ebꞌnaj yahawil soldado yebꞌ xin ebꞌnaj iswiꞌehal yeko yinh konhobꞌ tuꞌ.

Lahwi tuꞌ xin,

yanito naj Festo yiqꞌomal yaꞌ Pablo.

24 Yet ayxako yaꞌ yinh sat ebꞌnaj xin,

yalni naj Festo:

—Hach tiꞌ mam rey Agripa,

yebꞌ xin hex kutxanexiko tiꞌ,

ay naj Pablo tiꞌ lah.

Haꞌ naj tiꞌ chiyal sunil ebꞌnaj Israel tato ay ismul;

ebꞌnaj Israel yul konhobꞌ Jerusalén,

yebꞌpaxo ebꞌnaj yul konhobꞌ Cesarea tiꞌ.

Kaw xin maxhtikꞌa chisbꞌej ebꞌnaj yeliko yaw winhan tato masan chikam naj.

25 Yaj wal yul insatan,

kaw machi ismul naj kaw xiwkilta chiqꞌanni kamikal yinh,

yaj yu haꞌ naj halni tato haꞌ naj jahaw Augusto ay Roma chiꞌilni tzet chꞌeliko naj,

yuxin maꞌel yinh inkꞌulan wanitojan naj tet naj.

26 »Yu matzet tzꞌaj waqꞌaꞌkojan ismulo naj yul teꞌ carta chito tet naj jahaw tuꞌ,

yuxin mawitijan naj yinh hesat,

yebꞌ yinh hasat mam rey Agripa.

Wal tinanh xin,

qꞌambꞌewelo tet naj,

aytaxka ismul naj chiꞌilchalo heyu,

hexxa xin cheyal wetan,

kat intzꞌibꞌnhenayojan yul carta kat wanitojan tet naj jahaw tuꞌ.

27 Yuto kaw maxhtaj ye chiwabꞌehan ta tonhe chiwatojan naj,

machi xin nichꞌano ismul naj chiwaltojan,

xhi naj.