2 Ay huneꞌ naj tiꞌ xin,

kaw mach chu isbꞌelwi yichitax ispitzkꞌahi.

Kaw xin hunun tzꞌayik isbꞌey yalaxokano naj istiꞌ ispultahil Yatut Komam tuꞌ,

huneꞌ chiyij Kꞌulchꞌan Jilni,

yu isqꞌanni naj ismelyu tet anma chiꞌokto bꞌey tuꞌ.

3 Hayet yilni naj yokto yaꞌ Pedro yebꞌ yaꞌ Juan yul pulta tuꞌ,

isqꞌanni naj melyu tet ebꞌyaꞌ kawanh tuꞌ.

4 Yok tꞌanhno yaꞌ Pedro yebꞌ yaꞌ Juan yinh naj,

yalni yaꞌ Pedro hakaꞌ tiꞌ:

—Okanh tꞌanhno jinhanh,

xhi yaꞌ.

5 Yok tꞌanhno naj yinh ebꞌyaꞌ,

haꞌ yute istxumni naj to melyu chiꞌaqꞌlax tet naj yu ebꞌyaꞌ kawanh tuꞌ yalni.

6 Yalni yaꞌ Pedro:

—Wal hanintiꞌan,

mach inmelyuhan,

yaj wal huneꞌ iqꞌbꞌil wuhan chiwaqꞌan tawet.

Yu yip Komam Jesucristo ah konhobꞌ Nazaret,

ahanhwanoj kat xin habꞌelwi,

xhi yaꞌ Pedro tuꞌ tet naj.

7 Yok tzabꞌno yaꞌ Pedro tuꞌ yinh iswatxꞌqꞌabꞌ naj,

isxeknikanh yaꞌ naj.

Kaw xin yinh anhe okkano yip yoj naj,

yiqꞌnipaxkanokanh yip isnuqꞌ yoj naj tuꞌ.

8 Yah linhno naj xin,

istzabꞌniko naj isbꞌelwi,

yokto naj yul Yatut Komam Dios yinta ebꞌyaꞌ kawanh tuꞌ.

Kaw chitꞌujla yah naj yu tzalahilal,

chiyalni naj kꞌul-la tzotiꞌ yinh Komam Dios.

9 Wal sunil anma ilni isbꞌelwi naj,

yebꞌ yabꞌen yalni naj tzotiꞌ kꞌul yinh Komam Dios,

10 kaw kꞌayilo iskꞌul yebꞌ kaw xiwpaxo anma yilni huneꞌ tuꞌ,

yuto yohta anma tato kaw hunun tzꞌayik yay tzꞌonhno naj qꞌano melyu tet anma istiꞌ ispultahil Yatut Komam Dios chiyij Kꞌulchꞌan Jilni.

11 Haꞌ naj kawxikanh tuꞌ,

hunelxanhe istzabꞌiko naj yinh yaꞌ Pedro yebꞌ yaꞌ Juan yet ay ebꞌyaꞌ istiꞌ Yatut Komam Dios,

huneꞌ chiyij Yamaqꞌil Salomón.

Yapni bꞌulna anma yilno naj,

kaw xin chikꞌay iskꞌul anma.

12 Yet yilni yaꞌ Pedro yapni anma tuꞌ,

yalni yaꞌ xin:

«Hex wet konhobꞌ Israel,

¿tzet yinh yuxinto kaw chikꞌaykanh hekꞌul yu huneꞌ tiꞌ?

¿Tzet yinh yuxin kaw tꞌanhan hexiko jinhanh?

¿Ham henani ta yu kohelanilanh maka yu jipanh yuxin mabꞌelwikanh huneꞌ naj tiꞌ?

13 Machoj,

to haꞌ Komam Dios,

isDiosal jichmam Abraham,

Isaac yebꞌ Jacob,

haꞌ yeni isqꞌaqꞌal yip yinh Iskꞌahol Jesucristo.

Haꞌ Komam Jesús tuꞌ,

heyako yul isqꞌabꞌ naj Pilato,

yoche naj isbꞌejtzoꞌ Komam,

yaj machi heje hex tiꞌ.

14 Kaw machi nino istxꞌojal yinh Komam Jesús,

kaw toholkanoj,

yaj wal hex tiꞌ,

maxhtikꞌa heje ta chibꞌejtzolax Komam.

Wal xin haꞌ huneꞌ naj potxꞌom anma hebꞌejtzo selelo Komam.

15 Yaj heyaqꞌ kamo Komam chiꞌaqꞌni koqꞌinal;

yaj itzitzbꞌipaxokanh xol anma kamom yu yip Komam Dios.

Yinh huneꞌ tiꞌ xin,

kaw chijaqꞌ kobꞌahanh testigohal.

16 »Wal huneꞌ naj cheyil tiꞌ,

kaw heyohta naj,

haꞌ Komam Jesús maꞌaqꞌni yip yoj naj,

yuxin mawatxꞌilo naj.

Yuto yu ayko janmahanh yinh Komam yuxin mawatxꞌikanilo yoj naj yinh hesat.

17 »Wal tinanh hex wet konhobꞌ,

wohtajan ta hayet iskam Komam Jesús heyu,

hewatxꞌe huneꞌ tuꞌ yu hesukal.

Hakpax tuꞌ ebꞌnaj yahaw konhobꞌ,

mach yohtajo ebꞌnaj tzet iswatxꞌe.

18 Yajaꞌ hak tuꞌ yu yijni isbꞌa yu Komam Dios tzet yalkano yul Yum yet payat yu sunil ebꞌyaꞌ ischejabꞌ,

tato yilal chiꞌekꞌyaꞌ yanma Komam aqꞌbꞌil ismunil yu Komam Dios.^a

19 Yuxin bꞌejwekano istxꞌojal,

aweko habꞌa yul isqꞌabꞌ Komam,

kat istanhtzelaxkanilo hemul.

Tato cheyije hakaꞌ tuꞌ,

chihul huneꞌ tiempohal bꞌay chiyaqꞌ Komam Dios tzalahilal jet hanhonh Israel honh tiꞌ.

20 Hak tuꞌ xin chati Komam Dios yaqꞌlobꞌal hekꞌul haꞌ ton Komam Jesús,

huneꞌ haltebꞌilkano jet yet payat.

21 Yajaꞌ yilal iskankano Komam yul satkanh masanto chꞌapni istiempohal yet chaqꞌni akꞌbꞌolo Komam Dios sunil tzet ay yul sat yibꞌanhqꞌinal tiꞌ.

Hakaꞌ yu yalnikano Komam yu ebꞌyaꞌ ischejabꞌ ekꞌlena yet payat.

22 Yalpaxo yaꞌ Moisés tet ebꞌyaꞌ jichmam hakaꞌ tiꞌ:

»“Komam Dios Jahawil chisayni hunu ischejabꞌ texol,

hakaꞌ yu kinyanikojan texol.

Yuxin kaw yilal cheyabꞌe sunil tzet chal teyet.

23 Wal sunil mak mach ishajbꞌa istxikin yabꞌen tzet chal ischejabꞌ Komam Dios chihul tuꞌ,

maqꞌbꞌil istanhtzelaxkanilo xol anma jet konhobꞌ tiꞌ,”

xhikano yaꞌ Moisés.

24 »Sunil ebꞌyaꞌ ischejabꞌ Komam Dios ekꞌlena yet payat tuꞌ,

ichikanti yinh istiempohal jichmam Samuel,

sunil ebꞌyaꞌ tuꞌ halnikano yinh tzet chiyu yinh huneꞌ tiempohal tiꞌ.

25 Wal hex tiꞌ,

yuninalto ebꞌyaꞌ jichmam ischejabꞌ Komam Dios heyehi.

Yet iswatxꞌen Komam Dios istrato yebꞌ ebꞌyaꞌ jichmam yet payat tuꞌ,

iswatxꞌenpaxkano Komam istrato jet,

hanhonh tiꞌ.

Hak tiꞌ yu iswatxꞌenkano Komam istrato yebꞌ jichmam Abraham hakaꞌ tiꞌ:

»“Sunil anma yul sat yibꞌanhqꞌinal tiꞌ chischabꞌ iskꞌulal yu ej yuninal hawuninal,”

xhikano Komam Dios tet jichmam Abraham tuꞌ.

26 Yuxin hayet yitzitzbꞌikanh Komam Jesucristo,

Iskꞌahol Komam Dios,

haꞌ jet bꞌabꞌel chejlaxtij,

yu kochahnikano iskꞌulal,

kat kobꞌejnikano kotxꞌojal hununonh,»

xhi yaꞌ Pedro.