5 Haxa yet huneꞌxa tzꞌayik xin,

iskutxbꞌaniko isbꞌa ebꞌnaj yahawil yinh anma Israel bꞌey konhobꞌ Jerusalén,

yebꞌ ebꞌnaj ichamta winaj ay ismunil xol anma tuꞌ,

yebꞌpaxo xin ebꞌnaj chikuyni anma yinh isley yaꞌ Moisés.

6 Haꞌ hunpaxo naj Anás,

yahaw yinh ebꞌnaj sacerdote,

aypaxikto naj Caifás,

yebꞌ naj Juan yebꞌ huneꞌxa naj chiyij Alejandro,

yebꞌ sunil mak ay bꞌey yatut naj yahaw yeko yinh ebꞌnaj sacerdote yinh anma Israel tuꞌ.

7 Ischejni ebꞌnaj yilaxoti yaꞌ Pedro yebꞌ yaꞌ Juan,

isqꞌambꞌen ebꞌnaj tet ebꞌyaꞌ kawanh tuꞌ hakaꞌ tiꞌ:

—¿Mak aqꞌni heyip heyaqꞌni kawxo yoj naj tuꞌ?

yebꞌpaxo xin,

¿mak yinh isbꞌi hewatxꞌe hunteqꞌan tiꞌ?

xhi ebꞌnaj tet ebꞌyaꞌ.

8 Wal yaꞌ Pedro tuꞌ xin,

ayko yaꞌ yalanh ischejbꞌanil Komam Espíritu Santo,

yuxin yal yaꞌ tet ebꞌnaj hakaꞌ tiꞌ:

—Hex iswiꞌehal konhobꞌ,

yebꞌ hex ichamta winaj yul konhobꞌ Israel tiꞌ,

9 kaw cheyaqꞌ heqꞌambꞌebꞌal jetanh yinh huneꞌ iskꞌulal kowatxꞌehanh yinh huneꞌ naj maxhtikꞌa chiyu isbꞌelwi tiꞌ yuto cheyoche heyohtanheloj yinh tzet yu iskawxikanh naj.

10 Tinanh xin yilal heyohtanhenkaniloj yebꞌ sunil jet konhobꞌ Israel tato haꞌ naj aykꞌo kokꞌatanh tiꞌ,

kachannhe yu yip Komam Jesucristo ah Nazaret,

yuxin kawxikanh naj.

Haꞌ Komam Jesús tuꞌ xin heyakanh yinh teꞌ kulus,

yaj itzitzbꞌikanh Komam xol anma kamom yu Komam Dios.

11 Hex tiꞌ,

lahan hex hakaꞌ hunu naj watxꞌem nha,

haxa Komam Jesús xin,

lahan Komam hakaꞌ hunu chꞌen chꞌen machi okniko yinh ismunil heyu,

yajaꞌ huneꞌ chꞌen tuꞌ,

haꞌ chꞌen kaw ay yelapno yok xeꞌo nha.^b

12 Machi hunuxa mak chiyu konhiskolni,

yuto matxa hunuxa mak yul sat yibꞌanhqꞌinal tiꞌ aqꞌbꞌil yip yu Komam Dios yu yaqꞌni kokolbꞌanil;

kaw hanhkꞌanhe Komam Jesús chiyu konhiskolni,

xhi yaꞌ Pedro tet ebꞌnaj tuꞌ.

13 Hayet yilni ebꞌnaj iswiꞌehal yinh lahtiꞌ yinh konhobꞌ Israel tuꞌ tato kaw mach chixiw yaꞌ Pedro yebꞌ yaꞌ Juan istzoteli,

waxanhka mach iskuyu ebꞌyaꞌ yebꞌpaxo kaw komon anma ebꞌyaꞌ,

yuxin kaw kꞌaykanh iskꞌul ebꞌnaj yinh ebꞌyaꞌ kawanh tuꞌ.

Isnahnipaxo ebꞌnaj tato ekꞌ tzujtzun ebꞌyaꞌ yinta Komam Jesús.

14 Waxanhka kaw chichiwa iskꞌul ebꞌnaj yinh ebꞌyaꞌ kawanh tuꞌ,

yaj matzet tzꞌaj yalaꞌ ebꞌnaj yinh ebꞌyaꞌ yuto haꞌ hun naj kawxikanh tuꞌ linhaniko iskꞌatanh ebꞌyaꞌ.

15 Yuxin yal ebꞌnaj yahawil konhobꞌ tuꞌ tato chꞌel yaꞌ Pedro yebꞌ yaꞌ Juan tuꞌ xol ebꞌnaj,

iskankano ebꞌnaj yahawil tuꞌ tzotelo ischukil.

16 Yalni ebꞌnaj tet hunun:

—¿Tzet wal juten ebꞌnaj kawanh tuꞌ heyalni?

Kaw sunil anma yul konhobꞌ Jerusalén tiꞌ ohtanhe huneꞌ kꞌaybꞌalkꞌule iswatxꞌe ebꞌnaj,

yuxin mach chu jalni tato leqꞌtiꞌ ebꞌnaj.

17 Tinanh xin,

matxahojabꞌ chispujbꞌakꞌo ebꞌnaj huneꞌ tiꞌ xol anma,

yuxin koxibꞌteꞌwe iskꞌul ebꞌnaj,

haxinwal matxa chiyalikꞌo ebꞌnaj iskuybꞌanil naj Jesús tuꞌ xol anma,

xhi ebꞌnaj yahawil tuꞌ yinh ebꞌyaꞌ.

18 Lahwi tuꞌ xin,

yawtelax ebꞌyaꞌ kawanh tuꞌ hunelxa,

yalni ebꞌnaj tet ebꞌyaꞌ:

—Matxa cheyalikꞌo iskuybꞌanil naj Jesús tuꞌ tet anma,

yebꞌ matxa chekuy anma yinh tzet yelapno ye naj,

xhi ebꞌnaj.

19 Istaqꞌwi yaꞌ Pedro yebꞌ yaꞌ Juan tet ebꞌnaj:

—Yul sat Komam Dios,

¿kꞌulmi tato chikoyijehanh tzet cheyala mato koyijenanh tzet chiyal Komam?

20 Wal xin,

kaw mach chu kobꞌejnikanojanh jalnihanh tzettaj jilanh yebꞌ xin tzet abꞌebꞌil juhanh,

xhi ebꞌyaꞌ tet ebꞌnaj kutxaniko tuꞌ.

21 Lahwi yok ebꞌnaj yahawil konhobꞌ tuꞌ isxibꞌteꞌ ebꞌyaꞌ,

isbꞌejtzolaxto ebꞌyaꞌ.

Machi xin txumcha yu ebꞌnaj tzet wal isbꞌalnikanh yinh ebꞌyaꞌ kawanh tuꞌ yunhe yay isyaꞌtajil yibꞌanh ebꞌyaꞌ,

yuto sunilxa anma kaw kꞌul istzotel yinh Komam Dios yu huneꞌ iskꞌulal iswatxꞌe ebꞌyaꞌ tuꞌ.

22 Wal naj watxꞌilo yoj yu yip Komam Jesús tuꞌ,

ekꞌbꞌalxa 40 (kawinaj) ishabꞌilal naj.

23 Haxa yet bꞌejtzobꞌilxa yaꞌ Pedro yebꞌ yaꞌ Juan tuꞌ,

isto ebꞌyaꞌ iskꞌatanh hunteqꞌanxa yetbꞌi.

Yalni ebꞌyaꞌ sunil tzet hal-lax tet ebꞌyaꞌ yu ebꞌnaj yahawil sacerdote yebꞌ yu ebꞌnaj ichamta winaj xol anma Israel tuꞌ.

24 Yet yabꞌen yuninal Komam tuꞌ sunil tzet yal ebꞌyaꞌ kawanh tuꞌ,

hunxanhe yute istxahli tet Komam Dios,

yalni yinh istxah hakaꞌ tiꞌ:

«Mam Jahawilanh,

Dios hach,

hach hawatxꞌe satkanh yebꞌ sunil tzet ay bꞌey tuꞌ,

yebꞌ txꞌo txꞌotxꞌ yebꞌ haꞌ mar,

yebꞌ sunil tzet ay xol haꞌ,

yebꞌ sunil tzet ay yul sat yibꞌanhqꞌinal tiꞌ.

25 Yu yip Komam Espíritu Santo hawaqꞌ yalaꞌ yaꞌ David hachejabꞌ,

yet yalni yaꞌ hakaꞌ tiꞌ:

27 »Mamin,

kaw yeli naj Herodes,

yebꞌ naj Poncio Pilato,

yebꞌ anma yulajla konhobꞌ,

yebꞌ ebꞌnaj Israel iskutxbꞌako isbꞌa ebꞌnaj yul huneꞌ konhobꞌ tiꞌ yu yaniko ebꞌnaj ishowal yinh Hakꞌahol Jesucristo,

huneꞌ Mak Aqꞌbꞌilxa Ismunil yul isqꞌabꞌ hawu.

28 Kaw yij isbꞌa yu ebꞌnaj sunil tzet halbꞌilkano hawu yet payxa,

yuto el yinh hakꞌul ta hak tuꞌ chiyute isbꞌa.

29 Wal tinanh Mamin,

kaw ilkꞌanabꞌ tzet yal ebꞌnaj jetanh,

yuxin aqꞌ yip janmahanh haxinwal mach chonhxiwanh jalnikꞌojanh Hatzotiꞌ,

yuto kaw hachejabꞌ jehanh.

30 Yuhojabꞌ hawip chikawxikanh anma yaꞌay juhanh,

kat hayeni yechel hawip,

yebꞌ kꞌaybꞌalkꞌule yu yip Komam Jesús hachejabꞌ,

Komam kaw toholkanoj,»

xhi yuninal Komam tuꞌ yinh istxah.

31 Yet lahwi istxahli xin,

istziktzonkanh huneꞌ nha bꞌay kutxaniko tuꞌ yu yip Komam Dios.

Yokkano sunil ebꞌyaꞌ tuꞌ yalanh yip Komam Espíritu Santo.

Kaw xin,

matxa chixiw ebꞌyaꞌ ispujbꞌanikꞌo Istzotiꞌ Komam Dios.

32 Kaw lahanxanhe isnabꞌal sunil anma ayxako yul isqꞌabꞌ Komam tuꞌ,

kaw hunxanhechꞌan yute isbꞌa,

machi hunu mak chiyaliko hunu tzet ye tuꞌ yeto ischukil yuto kaw hunye sunil tzettaj aya.

33 Wal ebꞌyaꞌ ischejabꞌ Komam Jesús tuꞌ,

kaw islahiko ebꞌyaꞌ yalnikꞌoj tato itzitzbꞌikanh Komam Jesús xol kamom.

Kaw xin,

aypaxayo iskꞌulal Komam Dios yibꞌanh sunil anma tuꞌ.

34-35 Kaw machi hunu mak yaꞌta chꞌekꞌ yilaꞌ xol anma tuꞌ,

yuto haꞌ mak ay istxꞌotxꞌ maka yatut,

chistxonhtoj,

kat isbꞌey yaqꞌno istohol tet ebꞌyaꞌ ischejabꞌ Komam Jesús,

haxa ebꞌyaꞌ chiꞌixqꞌanto yinh mak matzet aya.

36 Ay huneꞌ naj tiꞌ chiyij José,

yajaꞌ xin Bernabé okkano isbꞌiho naj yu ebꞌyaꞌ ischejabꞌ Komam Jesús,

huneꞌ bꞌihe Bernabé,

chal yelapnoj Aqꞌomiko Yaqꞌlobꞌal Iskꞌul Anma.

Naj Bernabé tuꞌ,

yuninalto yaꞌ Leví ye naj,

pitzkꞌana naj bꞌey konhobꞌ Chipre.

37 Ay xin huneꞌ istxꞌotxꞌ naj istxonhtoj,

yapni naj yaqꞌnokano istohol yul isqꞌabꞌ ebꞌyaꞌ ischejabꞌ Komam Jesús tuꞌ.