—Ananías,

¿tzet yinh yuxin maxachayto naj matzwalil yul hawanma?

Chawaniko leqꞌtiꞌal tet Komam Espíritu Santo yet maxawinikano hanikꞌ istohol hatxꞌotxꞌ tiꞌ.

4 Yet maxhto chatxonhto txꞌotxꞌ,

kaw hawet txꞌotxꞌ,

yebꞌ xin yet maxatxonhto txꞌotxꞌ,

kaw hawetpaxo istohol txꞌotxꞌ.

¿Tzet yinh yuxinto maxanah hawuten huneꞌ istxꞌojal tiꞌ?

Wal xin kaw mach anmaho huneꞌ bꞌay maxawako leqꞌtiꞌal tiꞌ,

haꞌ kaw tet Komam Dios bꞌay maxawako leqꞌtiꞌal,

xhi yaꞌ Pedro tuꞌ tet naj.

5 Lahwi yabꞌen naj Ananías huneꞌ tiꞌ yaykꞌay naj,

iskamilo naj xin.

Sunil anma abꞌen isqꞌumal huneꞌ tzet yu tuꞌ,

kaw xiwkanh.

6 Lahwi tuꞌ xin,

yapni hunteqꞌan ebꞌnaj tzehtaj,

ispichniko ebꞌnaj huneꞌ qꞌap yinh isnimanil naj Ananías tuꞌ,

isbꞌey ebꞌnaj ismujnokano naj.

7 Ayxam oxebꞌo hora iskam naj Ananías tuꞌ yapni yixal naj,

yaj xin mach yohtajo ix tato xakam yichamil.

8 Isqꞌambꞌen yaꞌ Pedro tuꞌ tet ix:

—¿Yelmi chal hawichamil tato hak tiꞌ yij istohol txꞌo txꞌotxꞌ hetxonhtoj?

xhi yaꞌ tet ix.

Istaqꞌwi ix:

—Hoꞌ,

kaw hak tuꞌ istohol txꞌotxꞌ,

xhi ix tet yaꞌ.

9 Yalni yaꞌ Pedro tuꞌ tet ix:

—¿Tzet yinh yuxinto maxelahtiꞌnhe hebꞌa heyok heyilweno Komam Espíritu Santo?

Lanhan yul ebꞌnaj mabꞌey mujnokano hawichamil,

wal tinanh xin hachxa chito ebꞌnaj kaxhismujuꞌkanoj,

xhi yaꞌ Pedro tuꞌ tet ix.

10 Yinhnhena tuꞌ xin,

yaykꞌay ix yinh sat yaꞌ Pedro,

iskamilo ix.

Haxa yet yapni ebꞌnaj tzehtaj tuꞌ xin,

yilni ebꞌnaj tato kamnaxapaxo ix yixal naj Ananías,

yinipaxto ebꞌnaj ix mujuj iskꞌatanh yichamil.

11 Yu huneꞌ yu tuꞌ,

yuxin okkano huneꞌ niman xiwkilal yinh sunil anma ayxako yul isqꞌabꞌ Komam,

yebꞌ sunil anma abꞌen huneꞌ tuꞌ.

12 Kaw ay kꞌaybꞌalkꞌule iswatxꞌe ebꞌyaꞌ ischejabꞌ Komam Jesús xol anma,

kaw isyekanilo ebꞌyaꞌ yip Komam Dios tet anma.

Bꞌey huneꞌ istiꞌ Yatut Komam Dios chiyij yamaqꞌil Salomón,

haꞌ tuꞌ chiskutxbꞌa isbꞌa sunil mak ayxako yul isqꞌabꞌ Komam.

13 Wal anma mach ayoko yul isqꞌabꞌ Komam xin,

waxanhka kꞌul istzotel yinh mak ayxako yul isqꞌabꞌ Komam tuꞌ,

yaj yet chiskutxbꞌan isbꞌa,

chixiw anma tuꞌ isto xol.

14 Wal xin,

kaw hantanhe isbꞌisil ebꞌnaj winaj yebꞌ ebꞌix ix yayto yul yanma yinh Komam Dios,

hak tuꞌ yu ischꞌibꞌ isbꞌisil yuninal Komam.

15 Chiyinilti anma isyawubꞌ yulaj bꞌeh.

Ay anma chiꞌinilti isyawubꞌ yibꞌanh txꞌat,

aypaxo anma sat pop chisbꞌatxilti isyawubꞌ,

yunhe hayet chiꞌekꞌto yaꞌ Pedro kat yay yenhel yaꞌ yibꞌanh anma yaꞌay tuꞌ.

16 Kaw ay anma titpaxo yulajla konhobꞌ bꞌey iskawilal Jerusalén tuꞌ.

Ay anma iqꞌbꞌil isyawubꞌ yu,

yebꞌ anma ayko ischejabꞌ naj matzwalil yinh,

kaw xin kawxilo sunil anma yu ebꞌyaꞌ ischejabꞌ Komam Jesús tuꞌ.

17 Yaj wal naj yahawil sacerdote yebꞌ sunil yetbꞌi naj,

ebꞌnaj ayko yinh huneꞌ partido chiyij saduceo,

kaw chichiwa iskꞌul ebꞌnaj yinh ebꞌyaꞌ ischejabꞌ Komam Jesús tuꞌ.

18 Yuxin ok ebꞌnaj istzabꞌayo ebꞌyaꞌ,

yalaxikto ebꞌyaꞌ yul preso.

19 Haxa yet aqꞌbꞌalil xin,

yapni huneꞌ yángel Komam Dios ishajaꞌ istiꞌ teꞌ preso tuꞌ,

yilaxilti ebꞌyaꞌ yu naj ángel,

yal-lax tet ebꞌyaꞌ hakaꞌ tiꞌ:

20 «Asiꞌwe helinhbꞌa hebꞌa yul Yatut Komam Dios kat heyalni sunil kuybꞌanile yinh huneꞌ akꞌ qꞌinale tiꞌ,»

xhi naj ángel tuꞌ tet ebꞌyaꞌ.

21 Yuxin haxa yet issajbꞌilo yinh hunxa tzꞌayik,

isyijen ebꞌyaꞌ tzet yal naj ángel,

isto ebꞌyaꞌ yul Yatut Komam Dios,

yok ebꞌyaꞌ iskuyni anma.

Wal naj yahawil sacerdote yebꞌ yetbꞌi tuꞌ,

yawte ebꞌnaj sunil ebꞌnaj ichamta iswiꞌehal yinh lahtiꞌ xol ebꞌnaj Israel yu islahtiꞌnhen isbꞌa.

Ischejnito ebꞌnaj haywanh ebꞌnaj chitanhen Yatut Komam Dios,

iqꞌwal yinh ebꞌyaꞌ ischejabꞌ Komam tuꞌ.

22 Haxa yet yapni ebꞌnaj yul teꞌ preso xin,

matxa ebꞌyaꞌ ischejabꞌ Komam tuꞌ ayiktoj,

yuxin meltzo ebꞌnaj yalaꞌ tet ebꞌnaj yahawil tuꞌ.

23 Yalni ebꞌnaj:

«Yet makonhapnihanh,

kaw kꞌul yehiko ismajil teꞌ preso tuꞌ,

linhanpaxiko ebꞌnaj tanhem preso tuꞌ istiꞌ teꞌ,

yajaꞌ hayet makohajnihanh teꞌ xin,

matxa ebꞌnaj ayiktoj,»

xhi ebꞌnaj tet ebꞌnaj kaw yahawil tuꞌ.

24 Yet yabꞌen naj yahawil yinh ebꞌnaj sacerdote yebꞌ ebꞌnaj yetbꞌi,

yebꞌpaxo naj yahaw yinh ebꞌnaj chitanhen Yatut Komam Dios tuꞌ,

kaw kꞌayilo iskꞌul ebꞌnaj yabꞌeni.

Kaw maxhtikꞌa chitxumcha yu ebꞌnaj tzet chiꞌelkaniko huneꞌ tuꞌ.

25 Hunepixto tuꞌ xin,

yapni huneꞌ naj yalno tet ebꞌnaj hakaꞌ tiꞌ:

«Ebꞌnaj heyakto yul preso,

ayikto ebꞌnaj yul Yatut Komam Dios tinanh,

kaw ayko ebꞌnaj iskuynikanto anma,»

xhi huneꞌ naj tuꞌ.

26 Hayet yabꞌen ebꞌnaj huneꞌ tuꞌ,

isto naj yahaw yinh ebꞌnaj chitanhen Yatut Komam Dios yebꞌ ebꞌnaj chimunla yinta ebꞌnaj yinoti ebꞌyaꞌ ischejabꞌ Komam tuꞌ;

yajaꞌ yinh aqꞌankꞌulal yuto chixiw ebꞌnaj tet anma;

kꞌuxanta chiqꞌojlaxkanh ebꞌnaj yu anma.

27 Apninhe ebꞌyaꞌ ischejabꞌ Komam Jesús tuꞌ sata sunil ebꞌnaj yahawil tuꞌ.

Yalni naj yahaw sacerdote tuꞌ tet ebꞌyaꞌ:

28 —Kaw xajalanh teyet tato matxa cheyalikꞌo iskuybꞌanil naj Jesús tuꞌ,

¿tom kaw mach cheyije tzet chijalanh?

Kaw xapujnakanh sunil tzet chilaheyaqꞌ iskuyuꞌ anma sunil yul konhobꞌ Jerusalén tiꞌ.

Cheyanipaxiko iskamikal naj Jesús tuꞌ jibꞌanhanh,

xhi ebꞌnaj tet ebꞌyaꞌ.

29 Istaqꞌwikanh yaꞌ Pedro yebꞌ hunteqꞌanxa ebꞌyaꞌ ischejabꞌ Komam Jesús tuꞌ,

yalni ebꞌyaꞌ hakaꞌ tiꞌ:

—Kaw yilal haꞌ tzet chiyal Komam Dios,

haꞌ chikoyijehanh.

Walpaxo tzet chiyal anma,

ta mach chischah isbꞌa yinh tzet chal Komam mach chikoyijehanh.

30 Wal hex hex tiꞌ,

heyako Komam Jesús yul isqꞌabꞌ kamikal,

heyanikanh yinh teꞌ kulus.

Komam isDiosal ebꞌyaꞌ jichmam,

haꞌ Komam Dios tuꞌ xin,

aqꞌni itzitzbꞌokanh Komam Jesús xol kamom.

31 Haꞌ Komam Dios aqꞌni yip Komam Jesús yinh iswatxꞌqꞌabꞌ yul satkanh.

Hak tuꞌ xin yu yokkano Komam tuꞌ Jahawiloj yebꞌ Kokolomalopaxoj.

Hak tuꞌ yu yaqꞌni Komam hamanil jet,

hanhonh Israel honh tiꞌ,

yunhe kotxumniloj tato txꞌoj jekoj,

yuxin yilal komeltzoko yul isqꞌabꞌ Komam,

kat istanhtzenkanilo Komam komul jibꞌanh.

32 Wal hanhonhtiꞌanh,

kaw testigo jehikojanh yinh hunteqꞌan tzet ye tuꞌ xayu tuꞌ,

yebꞌpaxo xin testigo yeko Komam Espíritu Santo,

huneꞌ xayaqꞌ Komam Dios tet sunil anma chiyijen tzet chal Komam,

xhi ebꞌyaꞌ tet ebꞌnaj kutxaniko tuꞌ.

33 Yet yabꞌen ebꞌnaj iswiꞌehal yinh lahtiꞌ yul konhobꞌ Israel huneꞌ tuꞌ,

yah lemna ebꞌnaj yu ishowal yinh ebꞌyaꞌ tuꞌ.

Kaw yoche ebꞌnaj yaqꞌaꞌ kamo ebꞌyaꞌ ischejabꞌ Komam Jesús tuꞌ.

34 Xol sunil ebꞌnaj tuꞌ ay huneꞌ naj fariseo chiyij Gamaliel.

Kaw kuywawom naj yinh isley yaꞌ Moisés,

kaw nime anmapaxo naj yul sat anma.

Yah linhno naj xol ebꞌnaj,

ischejnilto naj ebꞌyaꞌ ischejabꞌ Komam Jesús istinha hunep.

35 Hayet ayilto ebꞌyaꞌ istinha tuꞌ,

yalni naj hakaꞌ tiꞌ:

—Hex wet konhobꞌ Israel,

txumwe yinh kaw istoholal yinh tzet wal heyuten ebꞌnaj tiꞌ.

36 Kotxumuꞌwe yinh naj Teudas yet payxa,

kaw yaliko isbꞌa naj yahawilo xol anma,

aymi kanhebꞌo ciento anma ok tzujno yinta naj.

Haxa yet ispotxꞌlaxkamo naj xin,

ispujnakanto anma ok yinta naj tuꞌ,

istanhilo huneꞌ tuꞌ.

37 »Lahwi tuꞌ xin,

ay huneꞌxa naj chiyij Judas ah Galilea.

Yako isbꞌa naj yahawilo yet yilaxkanh isbꞌisil anma,

kaw hantanhe anma okpaxo yinta naj.

Haxa yet ispotxꞌlaxkamo naj xin,

ispujnakanto sunil anma yako isbꞌa yinta naj.

38 Yuxin chiwalan teyet,

kobꞌejaꞌwekano hunteqꞌan ebꞌnaj tiꞌ,

yilaꞌxam ebꞌnaj.

Tato yet ebꞌnaj ischukil huneꞌ chiswatxꞌe tiꞌ,

chitanholoj.

39 Yaj tato yet Komam Dios xin,

maxhtikꞌa chiyu kotanhtzeniloj.

Konabꞌawe tzet chikowatxꞌe kꞌuxanta yinh Komam Dios chijaqꞌ howal,

xhi naj tet ebꞌnaj.

40 Wal ebꞌnaj yahawil tuꞌ kaw yabꞌeꞌ ebꞌnaj yinh tzet yal naj Gamaliel,

yawtelaxikto ebꞌyaꞌ ischejabꞌ Komam Jesús tuꞌ hunelxa,

ishatelax ebꞌyaꞌ.

Iskachlaxpaxo ebꞌyaꞌ hunelxa tato matxa chiyalikꞌo ebꞌyaꞌ Istzotiꞌ Komam Jesús.

Lahwi tuꞌ,

isbꞌejtzolax ebꞌyaꞌ.

41 Hayet yelti ebꞌyaꞌ ischejabꞌ Komam sata ebꞌnaj yahawil konhobꞌ tuꞌ,

kaw chitzala iskꞌul ebꞌyaꞌ,

yuto yu ischejabꞌ Komam Jesús ye ebꞌyaꞌ yuxinto kaw chꞌay isyaꞌtajil yibꞌanh ebꞌyaꞌ.

42 Hunun tzꞌayik iskuyni ebꞌyaꞌ anma yul Yatut Komam Dios yebꞌpaxo yulaj nha.

Chalnikꞌo ebꞌyaꞌ Istzotiꞌ Komam Jesucristo,

tato haꞌ Komam Iskolomal anma.