Saylaxilo hujwanh ebꞌyaꞌ diácono ok yinh ismunil Komam
6
Yet huneꞌ tiempohal tuꞌ xin kaw yinh anhe chꞌibꞌkanh isbꞌisil ebꞌnaj juxhtaj yebꞌ ebꞌix janabꞌ,
yaj ebꞌnaj griego ayxako yul isqꞌabꞌ Komam iskajlekanh isbꞌa ebꞌnaj yebꞌ ebꞌnaj hebreo,
yuto yet chiꞌaqꞌlax hunteqꞌan kolwal yinh hunun tzꞌayik yinh ebꞌix hunix,
mach tzꞌajano chꞌaqꞌlax tet ebꞌix hunix griego.
2 Yuxin kutxbꞌalaxiko sunil ebꞌnaj ayxako yul isqꞌabꞌ Komam yu ebꞌyaꞌ 12 (kabꞌlahonhwanh) ischejabꞌ Komam Jesús tuꞌ,
yalni ebꞌyaꞌ:
—Mach kꞌuloj tato chikobꞌejanh jalnikꞌojanh Istzotiꞌ Komam Dios,
kat jokanh jilnihanh tzettaj chiꞌokniko yu ebꞌix janabꞌ hunix tiꞌ.
3 Wal tinanh hex wuxhtaj,
saywelo hujwanho ebꞌyaꞌ juxhta texol,
kaw kꞌul isbꞌeybꞌal,
yebꞌ ay ishelanil yebꞌ ayko yalanh yip Komam Espíritu Santo,
kat yokkano ismunil yilni huneꞌ munil tiꞌ.
4 Wal hanhonhtiꞌanh kaw chikolahikojanh kotxahlihanh yebꞌ jalnikꞌojanh Istzotiꞌ Komam Dios,
xhi ebꞌyaꞌ.
5 Wal xin,
kaw tzalakanh iskꞌul sunil mak ayxako yul isqꞌabꞌ Komam yet yabꞌen huneꞌ tuꞌ.
Hak tiꞌ xin isbꞌi ebꞌyaꞌ sikꞌlaxilo tuꞌ;
yaꞌ Esteban,
yaꞌ juxhta tuꞌ kaw ayko yanma yaꞌ yinh Komam Dios,
yebꞌpaxo kaw ayko yaꞌ yalanh yip Komam Espíritu Santo.
Huneꞌxa yaꞌ chiyij Felipe,
yebꞌpaxo yaꞌ Prócoro,
yebꞌ yaꞌ Nicanor yebꞌ yaꞌ Timón,
yebꞌ yaꞌ Parmenas,
yebꞌ yaꞌ Nicolás ah Antioquía,
yaꞌ yako isbꞌa yinh isreligión ebꞌnaj Israel.
6 Yet lahwi issikꞌlaxilo ebꞌyaꞌ tuꞌ,
yilaxto ebꞌyaꞌ sata ebꞌyaꞌ ischejabꞌ Komam Jesús,
istxahli ebꞌyaꞌ ischejabꞌ Komam yinh ebꞌyaꞌ,
yanayo ebꞌyaꞌ isqꞌabꞌ yibꞌanh iswiꞌ ebꞌyaꞌ yu isyeniloj ta ischah ebꞌyaꞌ hujwanh tuꞌ ismunil yinh yet Komam.
7 Wal Istzotiꞌ Komam xin,
kaw pujnakanh xol anma.
Kaw ekꞌna chꞌibꞌkanokanh isbꞌisil ebꞌnaj ayxako yul isqꞌabꞌ Komam bꞌey yul konhobꞌ Jerusalén tuꞌ.
Xol anma tuꞌ kaw txꞌiꞌal ebꞌnaj sacerdote yako isbꞌa yul isqꞌabꞌ Komam.
Yet istzabꞌlaxayo yaꞌ Esteban
8 Wal yaꞌ Esteban,
kaw ayayo iskꞌulal Komam Dios yibꞌanh yaꞌ,
kaw aypaxiko yip Komam yinh yaꞌ,
yuxin kaw hantanhe kꞌaybꞌalkꞌule yebꞌ yip Komam Dios isyekanilo yaꞌ xol sunil anma.
9 Yaj ay hunmajan ebꞌnaj Israel chiskutxbꞌa isbꞌa yul huneꞌ capilla chihal-lax yetxa isbꞌa ischukil.
Xol hunteqꞌan tuꞌ xin ay ebꞌnaj ah Cirene yebꞌ ebꞌnaj ah konhobꞌ Alejandría,
aypaxo ebꞌnaj ah Cilicia,
yebꞌ ebꞌnaj ay bꞌey Asia.
Istzabꞌniko ebꞌnaj tuꞌ isteyelen isbꞌa yebꞌ yaꞌ Esteban.
10 Yaj machi qꞌoji ebꞌnaj yinh istzotiꞌ yaꞌ Esteban tuꞌ yuto haꞌ Komam Espíritu Santo chiꞌaqꞌni ishelanil yaꞌ.
11 Yuxin istohla ebꞌnaj hunteqꞌan ebꞌnaj yunhe yalni ebꞌnaj tato kaw txꞌoj istzotel yaꞌ Esteban yinh yaꞌ Moisés hakaꞌ tiꞌ:
—Kaw jabꞌehanh isbꞌahwa naj Esteban tiꞌ yinh jichmam Moisés,
yebꞌ xin yinh Komam Dios,
xhi ebꞌnaj.
12 Hak tuꞌ xin yu yaqꞌni somchahoto ebꞌnaj isnabꞌal sunil anma,
yebꞌ ebꞌnaj ichamta winaj aqꞌbꞌil ismunil xol ebꞌnaj Israel,
yebꞌpaxo ebꞌnaj chikuyni anma yinh isley yaꞌ Moisés.
Yapni bꞌulna ebꞌnaj yinh yaꞌ Esteban,
istzabꞌlaxayo yaꞌ yu ebꞌnaj,
yilaxto yaꞌ sata ebꞌnaj yahaw konhobꞌ Israel.
13 Lahwi tuꞌ xin,
issayni ebꞌnaj haywanh ebꞌnaj nanikanh leqꞌtiꞌal yinh yaꞌ Esteban,
yalni ebꞌnaj hakaꞌ tiꞌ:
—Naj Esteban tiꞌ,
kaw mach chisbꞌej nino naj isbꞌahwa yinh Yatut Komam Dios,
huneꞌ kaw yet Komam yehi.
Yebꞌ xin chibꞌahwapaxo naj yinh isley yaꞌ Moisés.
14 Jabꞌenpaxojanh yalni naj hakaꞌ tiꞌ:
—Naj Jesús ah Nazaret,
chiyuchkꞌayo naj huneꞌ yatut Dios tiꞌ,
kat ishelni naj kobꞌeybꞌal aqꞌbꞌilkano yu yaꞌ Moisés,
xhi ebꞌnaj nanikanh leqꞌtiꞌal yinh yaꞌ Esteban tuꞌ.
15 Hayet istꞌanhxiko ebꞌnaj iswiꞌehal yinh lahtiꞌ yinh yaꞌ Esteban tuꞌ,
yilni ebꞌnaj tato kaw lahan yil-lax sat yaꞌ Esteban tuꞌ hakaꞌ jilni sat hunu yángel Komam Dios.