Ca dxal-laꞌ gundxu guchálajle̱dxu Dios
(Mt. 6.9-15; 7.7-11)
11
Tu zra Jesús bchálajle̱ne̱ꞌ Dios tu lataj,
naꞌ gate bexuzre bchálajle̱ne̱ꞌ Dios,
naꞌ tu benneꞌ caꞌ dxusé̱dene̱ꞌ guzre̱ꞌ Le̱ꞌ:
―Xran,
bse̱de netuꞌ guchálajle̱ntuꞌ Dios,
ca be̱n Juan,
bsé̱dene̱ꞌ benneꞌ caꞌ zaj de̱ꞌe̱ le̱ꞌ.
2 Jesús gunné̱ꞌ:
―Gate guchálajle̱le Dios,
naꞌ nnale:
Xrantuꞌ Dios,
zuꞌ xabáa,
gaca láꞌazxa Lauꞌ Lueꞌ.
Gudá nna beꞌu.
Gaca ca dxaca lazruꞌ lu xe̱zr la xu,
ca da dxaca xabáa.
3 Be̱nna chee̱ntuꞌ da gáguntuꞌ naꞌa zra.
4 Bnite lau dul-la chee̱ntuꞌ ca dxunite launtuꞌ chee̱ benneꞌ caꞌ dxelune̱ꞌ chee̱ntuꞌ da cale̱la.
Quebe guꞌu lataj da xriwe̱ꞌ cuꞌu na netuꞌ neza chee̱ na,
naꞌ bselá netuꞌ lu naꞌ da cale̱la.
El Padre Nuestro
5 Nadxa Jesús guzre̱ꞌ benneꞌ caꞌ:
―Che tu benneꞌ ládujla leꞌe zua tu ljwezre̱ꞌ,
naꞌ che zrine̱ꞌ lizre benneꞌ ljwezre̱ꞌ naꞌ dxe̱la,
ne xe̱ꞌe̱ le̱ꞌ:
“Bi ljwezraꞌ,
guleaj nedaꞌ chunna xeta xtila
6 laweꞌ da zua tu bi ljwezraꞌ za beláꞌte̱beꞌ lizraꞌ,
naꞌ quebe bi de̱ chiaꞌ gugawaꞌ-beꞌ.”
7 ¿Weche̱be benneꞌ ljwezre̱ꞌ naꞌ,
benneꞌ xuꞌu lu xuꞌu:
“Quebe gunuꞌ nedaꞌ ze̱de.
Naxezxuj dxa xuꞌu chiaꞌ,
naꞌ bi chiaꞌ zaj de̱beꞌ nigá.
Quebe gaca chasaꞌ bi gunnaꞌ chiuꞌ?”
8 Nedaꞌ dxapaꞌ leꞌe,
lácala quebe chase̱ꞌ bi gunézruje̱ꞌ le̱ꞌ laweꞌ da naque̱ꞌ ljwezre̱ꞌ,
san chase̱ꞌ chee̱ québedxa gune̱ꞌ le̱ꞌ ze̱de,
naꞌ gunézruje̱ꞌ le̱ꞌ ca naca da nachínnene̱ꞌ.
9 Caní dxapaꞌ leꞌe:
Le naba,
naꞌ Dios gunne̱ꞌ chee̱le.
Le xexilaj,
naꞌ xezrélele.
Le nne̱ dxuꞌa dxa xuꞌu,
naꞌ xalaj chee̱le.
10 Caꞌ naca na,
laweꞌ da benneꞌ dxenabe̱ꞌ,
naꞌ siꞌe̱,
ne benneꞌ dxexílaje̱ꞌ,
naꞌ xezrélene̱ꞌ,
ne benneꞌ dxenné̱ꞌ dxuꞌa dxa xuꞌu,
naꞌ xalaj chee̱ꞌ.
11 ’Che tu benneꞌ ládujla leꞌe naque̱ꞌ xra xrnaꞌ,
¿waca gunézruje̱ꞌ zríꞌine̱ꞌ tu xiaj che nábabeꞌ tu xeta xtila?
¿Waca gunézruje̱ꞌ-beꞌ tu be̱laꞌ che nábabeꞌ tu bela?
12 ¿Waca gunézruje̱ꞌ-beꞌ tu bé̱xrujni che nábabeꞌ tu zrita?
13 Che leꞌe nácale benneꞌ we̱n da cale̱la,
naꞌ nézele gunézrujle da chaweꞌ chee̱ zríꞌinele,
¿quebe nácadxa Xrale zua xabáa li lazreꞌ chee̱ gunne̱ꞌ chee̱ nu benneꞌ nabe̱ꞌ Beꞌ Láꞌazxa?
Dxelenné̱ꞌ napa Jesús xel-la dxenná bea chee̱ da xriwe̱ꞌ
14 Tu zra Jesús bebéaje̱ꞌ beꞌ xriwe̱ꞌ lu xichaj lázrdau tu benneꞌ,
da nucáꞌana na le̱ꞌ quebe dxaca nnie̱ꞌ,
naꞌ gate bedxúaj beꞌ xriwe̱ꞌ naꞌ,
naꞌ bennéꞌ bénneaꞌ.
Naꞌ benneꞌ caꞌ belexebánene̱ꞌ chee̱ da nigá.
15 Naꞌ bal-le̱ꞌ gulenné̱ꞌ:
―Benneꞌ nigá dxebéaje̱ꞌ beꞌ xriwe̱ꞌ caꞌ,
dxuchínene̱ꞌ xel-la dxenná bea chee̱ Beelzebú,
xrane beꞌ xriwe̱ꞌ caꞌ.
16 Xebal-la benneꞌ gulaca lazre̱ꞌ guléꞌe Jesús xel-la waca chee̱ꞌ,
naꞌ gulenabe̱ꞌ Le̱ꞌ gune̱ꞌ tu xel-la waca da za xabáa.
17 Le̱ꞌ nézene̱ꞌ ca da dxelaca lazre̱ꞌ,
naꞌ guzre̱ꞌ benneꞌ caꞌ:
―Che benneꞌ zaj zre̱ꞌe̱ tu xe̱zre xelaque̱ꞌ chupa laꞌa,
ne xeledil-le̱ꞌ,
wabía xiꞌ xe̱zre naꞌ,
naꞌ che benneꞌ tu lu xuꞌu xelaque̱ꞌ chupa laꞌa,
cáꞌanqueze welebía xiꞌ benneꞌ caꞌ.
18 Cáꞌanqueze,
che da xriwe̱ꞌ caꞌ xelaca na chupa laꞌa,
¿ájazra xegáꞌana xel-la dxenná bea chee̱ na?
Da nigá dxapaꞌ leꞌe laweꞌ da dxenné̱le dxebéajaꞌ beꞌ xriwe̱ꞌ caꞌ,
dxuchínedaꞌ xel-la dxenná bea chee̱ Beelzebú da xriwe̱ꞌ.
19 Che caní naca na,
¿nuzra dxunezruj xel-la dxenná bea benneꞌ caꞌ dxusé̱dele leꞌe chee̱ xelexebéaje̱ꞌ beꞌ xriwe̱ꞌ caꞌ?
Chee̱ le̱ naꞌ,
benneꞌ caníqueze dxululéꞌene̱ꞌ dxeque zréajele.
20 Naꞌa che nedaꞌ dxebéajaꞌ beꞌ xriwe̱ꞌ caꞌ,
dxuchínedaꞌ xel-la dxenná bea chee̱ Dios,
da li xel-la dxenná bea chee̱ Dios ba blaꞌ na ládujla leꞌe.
21 ’Che tu benneꞌ wal-la nape̱ꞌ da guchínene̱ꞌ lu wedil-la,
ne dxuxúequeze̱ꞌ lizre̱ꞌ,
naꞌ da zra lizre̱ꞌ napa chiꞌe̱ na.
22 Che zaꞌ xetú benneꞌ nácadxe̱ꞌ wal-la ca le̱ꞌ,
ne dxucul-le̱ꞌ le̱ꞌ,
nadxa que̱ꞌe̱ ca naca da dxuchínene̱ꞌ lu wedil-la,
da naꞌ dxuxrén lazre̱ꞌ,
naꞌ quisie̱ꞌ da gudapa bénneaꞌ.
23 ’Benneꞌ quebe zue̱ꞌ gácale̱ne̱ꞌ nedaꞌ,
dxedábague̱ꞌ nedaꞌ,
naꞌ benneꞌ quebe dxexequé̱ꞌe̱ nen nedaꞌ dxúsela bénneaꞌ.
Beꞌ xriwe̱ꞌ da dxexezrín na lizre na
24 Gunná Jesús:
―Gate tu beꞌ xriwe̱ꞌ dxedxuaj na lu xichaj lázrdau tu benneꞌ,
dxedá na lataj naga nabizre dxexilaj na naga sua na xezíꞌ lazreꞌ na,
naꞌ gate quebe dxezrele na,
naꞌ dxenná na:
“Wexáꞌa lizraꞌ naga bezáꞌa.”
25 Gate xezrín na,
naꞌ leꞌe na bénneaꞌ naque̱ꞌ ca tu xuꞌu da nalúa luꞌule na,
ne nabáꞌate̱ na.
26 Nadxa zexíaj na,
zeajxezrí na xegazre beꞌ xriwe̱ꞌ da zaj nácadxa na xriweꞌ ca le̱ na,
naꞌ ca naca da caꞌ xelúꞌu na xelezúa na lu xichaj lázrdau bénneaꞌ,
naꞌ naga cheajse̱te̱ chee̱ benneꞌ naꞌ nácadxa da cale̱la chee̱ꞌ ca da guca chee̱ꞌ nédxula.
Da ba neza chee̱ bénneache da naca na li lazreꞌ
27 Dxácate̱ Jesús dxenné̱ꞌ da caní,
tu nuꞌula ládujla benneꞌ caꞌ gunné̱ꞌ zizraj:
―Ba neza zrente̱ naca na chee̱ nuꞌula naꞌ guzane̱ꞌ Lueꞌ,
ne bsegule̱ꞌ Lueꞌ.
28 Naꞌ gunná Jesús:
―Ba neza zrendxa naca na chee̱ benneꞌ caꞌ dxelenne̱ꞌ ca da dxenná Dios,
ne dxune̱ꞌ ca dxenná dizraꞌ naꞌ.
Bendecidos Son Aquellos que Escuchan y Obedecen
Dxelenabe̱ꞌ Jesús gune̱ꞌ tu xel-la waca da za xabáa
29 Benneꞌ caꞌ ne zaj zre̱ꞌe̱ cuita Jesús,
naꞌ Le̱ꞌ guzú lawe̱ꞌ dxuchálajle̱ne̱ꞌ le̱ꞌ,
gunné̱ꞌ:
―Benneꞌ zaj zre̱ꞌe̱ lu zra caní zaj naque̱ꞌ benneꞌ we̱n da cale̱la,
naꞌ dxelenabe̱ꞌ nedaꞌ gunaꞌ tu xel-la waca da za xabáa,
naꞌ québedxa bi xeleléꞌene̱ꞌ ca da bleꞌe Jonás,
bénneaꞌ bchálaje̱ꞌ waláz chee̱ Dios.
30 Ca guca chee̱ Jonás,
guque̱ꞌ tu da bleꞌe na benneꞌ gulezré̱ꞌe̱ lu xe̱zre Nínive,
cáꞌanqueze nedaꞌ,
Benneꞌ Gulje̱ꞌ Bénneache,
gacaꞌ tu da guléꞌe na benneꞌ zaj zre̱ꞌe̱ lu zra naꞌa zra.
31 Lu zra guchiꞌa Dios,
gate Dios guchiꞌe̱ chee̱ benneꞌ zaj zre̱ꞌe̱ lu zra naꞌa zra,
naꞌ chasa nuꞌula naꞌ gunná béꞌene̱ꞌ xe̱zr la xu da zua chaláꞌa naga dxedé gubizra beuꞌ zaga caꞌ,
naꞌ guléꞌene̱ꞌ zaj nabaga zria benneꞌ caní,
laweꞌ da nuꞌula naꞌ guzé̱ꞌe̱ zítuꞌte̱ chee̱ xenne̱ꞌ ca naca xel-la sina chee̱ Salomón,
naꞌ nigá zua tu Benneꞌ nácadxe̱ꞌ blau ca Salomón naꞌ.
32 Lu zra guchiꞌa Dios,
gate Dios guchiꞌe̱ chee̱ benneꞌ zaj zre̱ꞌe̱ lu zra naꞌa zra,
naꞌ xelase̱ꞌ benneꞌ caꞌ gulezré̱ꞌe̱ xe̱zre Nínive,
naꞌ xululéꞌene̱ꞌ zaj nabaga zria benneꞌ caní,
laweꞌ da benneꞌ caꞌ gulezré̱ꞌe̱ xe̱zre Nínive belexebíꞌi lazre̱ꞌ gate Jonás bchálajle̱ne̱ꞌ benneꞌ caꞌ xrtizraꞌ Dios,
naꞌ nigá zua tu Benneꞌ nácadxe̱ꞌ blau ca Jonás naꞌ.
Da dxuseníꞌ lu xichaj lázrdaudxu
33 Gunná Jesús:
―Netú benneꞌ che dxugale̱ꞌ xiꞌ chee̱ꞌ,
quebe guzúe̱ꞌ na tu naga nagache,
ne quebe gudusie̱ꞌ na tu xiꞌina,
san guzúe̱ꞌ na sibe chee̱ xeleléꞌe benneꞌ caꞌ xeluꞌe̱ lu xuꞌu naꞌ.
34 Xiaj laudxu zaj naca na ca tu xiꞌ da dxusení na lu xichaj lázrdaudxu.
Che xiaj lauꞌ zaj naca na chaweꞌ,
ca naca xichaj lázrdaꞌu xuꞌu na leníꞌ,
naꞌ che xiaj lauꞌ quebe zaj naca na chaweꞌ,
naꞌ xuꞌu da chul-la lu xichaj lázrdaꞌu.
35 Bxue xanneꞌ ca naca xiꞌ da napuꞌ chee̱ quebe xexaca na da chul-la.
36 Che ca naca xichaj lázrdaꞌu xuꞌu na leníꞌ,
naꞌ quebe bi xuꞌu da chul-la,
naꞌ leꞌenuꞌ chaweꞌ xúgute̱ ca dxaca gate tu xiꞌ dxusení na lizruꞌ.
Jesús dxedil-le̱ꞌ benneꞌ xudauꞌ caꞌ
37 Gate bexuzre bchalaj Jesús,
naꞌ tu benneꞌ xudauꞌ fariseo gunné̱ꞌ Le̱ꞌ cheajtawe̱ꞌ xeta lizre̱ꞌ.
Naꞌ guxúꞌu Jesús,
gudxéꞌe̱ dxawe̱ꞌ.
38 Naꞌ benneꞌ fariseo naꞌ bebánene̱ꞌ gate bléꞌene̱ꞌ Jesús quebe gudibe ne̱ꞌe̱ ca da zjácale̱ benneꞌ judío gate dxelawe̱ꞌ xeta.
39 Xránadxu guzre̱ꞌ le̱ꞌ:
―Leꞌe,
benneꞌ fariseo,
dxíbele cúzrela zrigaꞌ,
ne xéꞌena,
san luꞌule na,
nazráte̱le ca naca da ba gulanle,
ne da cale̱la da dxunle.
40 Leꞌe,
benneꞌ lázrdau zideꞌ,
¿quebe nézele Bénneaꞌ be̱ne̱ꞌ da zua cúzrela bé̱nqueze̱ꞌ da zua luꞌula?
41 Le gunezruj benneꞌ xacheꞌ caꞌ chee̱ da nápale,
naꞌ ca nácale xegáꞌanale chaweꞌ.
42 ’¡Edxugúa leꞌe,
benneꞌ fariseo caꞌ!
Leꞌe dxunézrujle Dios tu cueꞌ chee̱ da chi cueꞌ chee̱ xixru weaj,
ne chee̱ binne chee̱ ruda,
ne chee̱ xúgute̱ xixreꞌ cuan,
san dxuzúale chaláꞌala ca naca xel-la we̱n xrlátaje,
ne xel-la zriꞌi lazreꞌ chee̱ Dios.
Da caní dxal-laꞌ gunle,
ne quebe gusanle ca da ba dxunle.
43 ’¡Edxugúa leꞌe,
benneꞌ fariseo caꞌ!
Dxaca lázrele gápale lataj blau naga cueꞌle lu xuꞌu naga dxezrágale,
ne dxaca lázrele xelapa benneꞌ leꞌe ba láꞌana laweꞌ xiꞌa caꞌ.
44 ’¡Edxugúa leꞌe,
benneꞌ dxuluxuzájlaꞌa da nadxixruj bea na,
ne leꞌe,
benneꞌ fariseo caꞌ,
benneꞌ dxelúne̱ꞌ láweze da xrlátaje!
Nácale ca xe̱dxu ba caꞌ da quebe zaj naláꞌ,
naꞌ benneꞌ caꞌ dxeledée̱ꞌ láwela na,
ne quebe zaj nézene̱ꞌ da dxululéaje̱ꞌ.
45 Nadxa gunná tu benneꞌ dxuxuzájle̱ꞌe̱ da nadxixruj bea na,
guzre̱ꞌ Jesús:
―Benneꞌ Wese̱de,
gate dxennáuꞌ da nigá,
dxenné̱teuꞌ caꞌ chee̱ntuꞌ.
46 Naꞌ Jesús gunné̱ꞌ:
―¡Edxugúa leꞌe,
benneꞌ dxuluxuzájle̱ꞌe̱ da nadxixruj bea na!
Dxugúale bénneache xua da quebe xelezuéne̱ꞌ,
naꞌ leꞌe netú zrube názele quebe dxaca lázrele gutale na.
47 ’¡Edxugúa leꞌe!
Dxunle luꞌa chee̱ ba caꞌ chee̱ benneꞌ caꞌ buluchálaje̱ꞌ waláz chee̱ Dios,
benneꞌ caꞌ belute xra xrtáule.
48 Ca da dxunle dxuléꞌe na nácale tuze nen da belún xra xrtáule caꞌ.
Benneꞌ caꞌ belutie̱ꞌ le̱ꞌ,
naꞌ leꞌe dxunle luꞌa chee̱ ba chee̱ꞌ caꞌ.
49 ’Chee̱ le̱ naꞌ gunná Dios lu xel-la sina chee̱ꞌ,
gunné̱ꞌ:
“Wasel-laꞌ naga zaj zraꞌ benneꞌ caꞌ benneꞌ xelenné̱ꞌ waláz chiaꞌ,
ne gubáz chiaꞌ caꞌ,
naꞌ bal-le̱ꞌ xelútie̱ꞌ,
naꞌ xebal-le̱ꞌ xeláu ziꞌ xúzrequeze̱ꞌ le̱ꞌ.”
50 Dios gusebague̱ꞌ benneꞌ zaj zre̱ꞌe̱ lu zra naꞌa zra ca naca xel-la gute chee̱ xúgute̱ benneꞌ caꞌ gulenné̱ꞌ waláz chee̱ꞌ,
benneꞌ gulatie̱ꞌ lu naꞌ benneꞌ caꞌ zaj zre̱ꞌe̱ gate bente̱ꞌ xe̱zr la xu,
51 gate naꞌ tu benneꞌ be̱tie̱ꞌ Abel,
zriꞌine Adán,
ca bzrinte̱ zra belutie̱ꞌ Zacarías gachaj láwela naga zua lucugu,
ne naga zua lataj láꞌazxa.
Caꞌan dxapaꞌ leꞌe,
Dios gusebague̱ꞌ benneꞌ zaj zre̱ꞌe̱ lu zra naꞌa zra xel-la gute chee̱ benneꞌ caꞌ.
52 ’¡Edxugúa leꞌe,
benneꞌ dxuluxuzájlaꞌa da nadxixruj bea na!
Xuꞌu lu naꞌle ca naca zren xia chee̱ dxa xuꞌu naga za xel-la sina,
san leꞌe quebe dxuꞌule,
ne quebe dxuele lataj xelúꞌu benneꞌ dxelaca lazre̱ꞌ xeluꞌe̱ naꞌ.