Jesús dxusédene̱ꞌ chee̱ benneꞌ dxuchiꞌe̱ da dxun le saꞌ ljwezre̱ꞌ
(Lc. 6.37-38, 41-42)
7
Naꞌ gunná Jesús:
―Quebe guchíꞌale da dxelún le saꞌ ljwézrele chee̱ quebe guchiꞌa Dios caní chee̱le leꞌe.
2 Le̱ꞌ guchiꞌe̱ chee̱le leꞌe cáte̱ze dxunle leꞌe chee̱ le saꞌ ljwézrele,
ne cáte̱ze dxunle leꞌe chee̱ le saꞌ ljwézrele,
caꞌan gun Dios nen leꞌe.
3 ¿Bizr chee̱ naꞌ dxenáꞌu bé̱bedauꞌ da xuꞌu xiaj lau le saꞌ ljwezruꞌ,
ne quebe dxenáꞌu da zrente̱ da xuꞌu na xiaj láuquezuꞌ lueꞌ?
4 ¿Ájazra gunuꞌ xuꞌu le saꞌ ljwezruꞌ:
“Be̱nna lataj xebéajaꞌ bé̱bedauꞌ da xuꞌu xiaj lauꞌ”,
che da zrendxa xuꞌu xiaj láuquezuꞌ lueꞌ?
5 Lueꞌ,
benneꞌ dxun xrlátaje cúzreze.
Bebéaj nedxu da zrente̱ da xuꞌu xiaj láuquezuꞌ,
naꞌ gaca leꞌenuꞌ cháwedauꞌ xebéajuꞌ bé̱bedauꞌ da xuꞌu xiaj lau le saꞌ ljwezruꞌ.
6 ’Quebe gunézrujle da naca láꞌazxa chee̱ benneꞌ dxelune̱ꞌ ca dxelún becuꞌ snia,
checa xelexéchaje̱ꞌ,
ne xuluzúzrue̱ꞌ leꞌe.
Quebe guzúale da zaca chee̱le lau benneꞌ dxelune̱ꞌ ca dxelún cuche,
dxuluchuchuj dxululéajbaꞌ da dxugágule-baꞌ.
Dxuchalaj Jesús ca dxal-laꞌ nábadxu, ne xexílajdxu, ne nne̱dxu dxuꞌa dxa xuꞌu
(Lc. 11.9-13; 6.31)
7 Naꞌ gunná Jesús:
―Le naba,
naꞌ Dios gunne̱ꞌ na chee̱le.
Le xilaj na,
naꞌ xezrélele na.
Le nne̱ dxuꞌa dxa xuꞌu,
naꞌ sáluje̱ꞌ chee̱le.
8 Le gun caní laweꞌ da benneꞌ bi dxenabe̱ꞌ,
dxeziꞌe̱ na.
Benneꞌ bi dxexílaje̱ꞌ,
dxeajxraque̱ꞌ na,
naꞌ benneꞌ dxenné̱ꞌ dxuꞌa dxa xuꞌu,
zua nu benneꞌ sáluje̱ꞌ chee̱ꞌ.
9 ’Netule leꞌe quebe gunézrujle zríꞌinele tu xiaj che le̱beꞌ dxenábabeꞌ leꞌe tu xeta.
10 Quebe gunézrujle zríꞌinele tu be̱laꞌ snia che le̱beꞌ dxenábabeꞌ leꞌe tu bela.
11 Che leꞌe,
benneꞌ we̱n da cale̱la,
nézele gunézrujle zríꞌinele da naca na chaweꞌ,
da cháwedxa gunna Xrale Dios zua xabáa,
gunne̱ꞌ da chaweꞌ chee̱ benneꞌ bi dxenábene̱ꞌ Le̱ꞌ.
12 ’Le gun chee̱ le saꞌ ljwézrele ca dxaca lázrele leꞌe xelún le̱beꞌ chee̱le.
Da nigá naca da nadxixruj bea na Moisés,
ne da dxenná na lu xiche naga naxúaj da gulenná benneꞌ caꞌ buluchálaje̱ꞌ waláz chee̱ Dios.
Jesús dxusédene̱ꞌ chee̱ dxa xuꞌu lechideꞌ
13 Naꞌ gunná Jesús:
―Le chuꞌu lu dxa xuꞌu lechideꞌ.
Dxa xuꞌu laga,
ne neza xu zaj naca naga zjaca benneꞌ xelebía xiꞌe̱,
naꞌ benneꞌ zante̱ zjaque̱ꞌ naꞌ.
14 Dxa xuꞌu lechideꞌ,
ne neza lase zaj naca naga zjaca benneꞌ xelezíꞌe̱ xel-laꞌ nabán da zeajlí canna,
naꞌ bábaze benneꞌ dxelexezrelne̱ꞌ na.
Naca bea tu xaga ne̱ chee̱ da zixre dxebía na
15 Naꞌ gunná Jesús:
―Le guxúe cuínale chee̱ benneꞌ we̱n lazreꞌ caꞌ,
benneꞌ dxelenné̱ꞌ zaj naque̱ꞌ benneꞌ dxuluchálaje̱ꞌ waláz chee̱ Dios.
Benneꞌ caní záꞌaque̱ꞌ naga zrale leꞌe,
zaj nun cuine̱ꞌ ca tu benneꞌ dxexruj lazreꞌ ca naca tu zrílaꞌdauꞌ,
san lu xichaj lázrdawe̱ꞌ zaj naque̱ꞌ snia ca tu becuꞌ xiꞌa.
16 Leꞌe xúnbeale le̱ꞌ ne̱ chee̱ da dxelune̱ꞌ.
Da zixre da dxebía lba uva quebe xuchíbedxu na lu xaga xecheꞌ,
naꞌ da zixre da dxebía xaga higo quebe xuchíbedxu na lu xecheꞌ gaꞌ.
17 Caꞌan naca,
xúgute̱ xaga chaweꞌ dxelebía na da zixre chaweꞌ,
naꞌ xaga da quebe naca na chaweꞌ,
quebe dxebía na da zixre chaweꞌ.
18 Xaga chaweꞌ caꞌ quebe dxelebía na da zrinnaj,
naꞌ xaga zrinnaj naꞌ quebe dxebía na da chaweꞌ.
19 Xúgute̱ xaga zrinnaj welechugue na,
naꞌ xelezxe na lu xiꞌ.
20 Caꞌan naca,
leꞌe xúnbeale benneꞌ caꞌ ne̱ chee̱ da caꞌ dxelune̱ꞌ.
Quegá xúgute̱ benneꞌ xeluꞌe̱ naga dxenná bea Dios xabáa
21 Naꞌ gunná Jesús:
―Quebe xeluꞌe̱ naga dxenná bea Dios xabáa xugute̱ benneꞌ caꞌ dxelé̱ꞌe̱ nedaꞌ:
“Xranaꞌ,
Xranaꞌ.”
Welúꞌu tuze benneꞌ caꞌ dxelune̱ꞌ ca da dxaca lazreꞌ Dios zue̱ꞌ xabáa.
22 Ca zrin zra naꞌ,
benneꞌ zante̱ xelé̱ꞌe̱ nedaꞌ:
“Xránantuꞌ,
Xránantuꞌ,
netuꞌ bchálajntuꞌ ne̱ chee̱ Lauꞌ Lueꞌ,
ne bchínentuꞌ Lauꞌ bebéajntuꞌ beꞌ xriwe̱ꞌ caꞌ,
ne nen Lauꞌ Lueꞌ bé̱nle̱ꞌe̱ntuꞌ xel-laꞌ waca caꞌ chee̱ xabáa.”
23 Nadxa nedaꞌ xápaquezaꞌ benneꞌ caꞌ:
“Quebe núnbeꞌa leꞌe.
Le cuasa cuitaꞌ nedaꞌ,
leꞌe,
ba be̱nle da cale̱la.”
Jesús dxusédene̱ꞌ chee̱ chupa lane xuꞌu
24 Naꞌ gunná Jesús:
―Bénneaꞌ dxenne̱ꞌ chiaꞌ,
ne dxune̱ꞌ ca da dxenníaꞌ,
naque̱ꞌ ca tu benneꞌ naxéajniꞌiquezeꞌ,
benneꞌ be̱ne̱ꞌ tu lizre̱ꞌ lu xiaj xre.
25 Guca xiuj,
naꞌ bdxuaj gubaꞌu,
ne guxasa beꞌ bdunuꞌ chee̱ xuluzría xi na xuꞌu naꞌ,
san quebe guzréꞌe na laweꞌ da xuꞌu lane na lu xiaj xre.
26 Bénneaꞌ quebe dxuzé̱ nague̱ꞌ chiaꞌ,
ne quebe dxune̱ꞌ ca da dxenníaꞌ,
naque̱ꞌ ca tu benneꞌ xala,
benneꞌ be̱ne̱ꞌ tu lizre̱ꞌ lu xu dxeze.
27 Guca xiuj,
naꞌ bdxuaj gubaꞌu ne guxasa beꞌ bdunuꞌ chee̱ xuluzría xi na xuꞌu naꞌ,
naꞌ chadite guzréꞌe na,
ne guzría xite̱ na.