―Xran,

che dxaca lazruꞌ,

waca xexunuꞌ nedaꞌ.

3 Nadxa Jesús guxrúa ne̱ꞌe̱ bénneaꞌ.

Dxe̱ꞌe̱ le̱ꞌ:

―Dxaca lazraꞌ.

Naꞌa dxexunaꞌ lueꞌ.

Ca gunné̱ꞌ caní,

benneꞌ we̱ꞌ naꞌ bexácate̱ꞌ ca naca xízrawe̱ꞌ chee̱ꞌ.

4 Naꞌ Jesús guzre̱ꞌ le̱ꞌ:

―Gunnáꞌ xque.

Quebe nu xuꞌu caꞌ.

Bexíajze naꞌa xeajxeléꞌe cuinuꞌ lau bxruze,

ne xeajnezruj gunaꞌ ca da dxenná bea lu da bdxixruj beꞌe Moisés,

chee̱ xeleléꞌe benneꞌ caꞌ ba bexacuꞌ naꞌa.

5 Ca bexúꞌu Jesús lu xe̱zre Capernaum,

naꞌ bzrin laweꞌ tu benneꞌ Roma,

benneꞌ dxenná beꞌene̱ꞌ benneꞌ caꞌ dxjaque̱ꞌ wedil-la,

naꞌ gutaꞌ xuene̱ꞌ Le̱ꞌ,

6 dxe̱ꞌe̱ Le̱ꞌ:

―Xran,

bi we̱n zrin chiaꞌ de̱beꞌ lizraꞌ.

Naxrúꞌunebeꞌ bine,

ne dxezácale̱ꞌe̱beꞌ.

7 Jesús dxe̱ꞌe̱ le̱ꞌ:

―Wazáꞌa xexunaꞌ-beꞌ.

8 Benneꞌ dxenná beꞌe̱ naꞌ gunné̱ꞌ:

―Xran,

quebe naca chiaꞌ chuꞌu lizraꞌ.

Cun gunne̱ze,

naꞌ xexaca bi we̱n zrin chiaꞌ.

9 Caní waca gunuꞌ laweꞌ da zua benneꞌ dxenná béꞌene̱ꞌ nedaꞌ,

ne cáꞌanqueze nedaꞌ dxenná beꞌedaꞌ benneꞌ caꞌ dxjaque̱ꞌ wedil-la.

Gate dxapaꞌ tubeꞌ:

“Guxíaj”,

naꞌ dxéajbeꞌ.

Naꞌ gate dxapaꞌ bi xula:

“Gudá”,

naꞌ dxídabeꞌ.

Naꞌ gate dxuchínedaꞌ bi we̱n zrin chiaꞌ chee̱ bi da gunbeꞌ,

naꞌ dxunbeꞌ na.

10 Gate bene Jesús da nigá,

bebánene̱ꞌ,

naꞌ guzre̱ꞌ benneꞌ caꞌ zjácale̱ne̱ꞌ Le̱ꞌ:

―Da li dxapaꞌ leꞌe,

ládujla benneꞌ Israel quebe nu ne xezreldaꞌ,

benneꞌ dxéajle̱ꞌe̱ chiaꞌ ca dxun benneꞌ nigá.

11 Nedaꞌ dxapaꞌ leꞌe,

záꞌaca benneꞌ zante̱ chaláꞌa naga dxalaj gubizra,

ne xechaláꞌala naga dxebía gubizra,

naꞌ xelebéꞌe̱ tu zren xelawe̱ꞌ nen Abraham,

ne Isaac,

ne Jacob naga dxenná bea Dios xabáa.

12 Benneꞌ caꞌ gucáꞌa zgaꞌale Dios chee̱ xeluꞌe̱ naga dxenná bea Le̱ꞌ,

guzale̱ꞌ benneꞌ caꞌ lataj chul-la naga xelebezre̱ꞌ,

ne xeláguxaꞌate̱ lazxe̱ꞌ.

13 Nadxa Jesús guzre̱ꞌ benneꞌ dxenná beꞌe̱ naꞌ:

―Bexíaj lizruꞌ.

Waca ca da ba guxéajle̱ꞌu.

Ca lu zra náꞌqueze bexácate̱ bi we̱n zrin chee̱ꞌ.

14 Guxíaj Jesús lizre Pedro,

naꞌ bléꞌene̱ꞌ xrna zruꞌule̱ꞌ de̱ꞌ lu daꞌa,

xuꞌe̱ da la.

15 Xeajté̱ꞌ ne̱ꞌe̱,

naꞌ bedxúaj da la da xuꞌe̱.

Nadxa nuꞌula naꞌ guxase̱ꞌ,

ne guzú lawe̱ꞌ dxuseníꞌe̱ da xelagu benneꞌ caꞌ.

16 Ca guzría gubizra,

naꞌ belezrín benneꞌ zante̱ lau Jesús,

zaj naché̱ꞌe̱ benneꞌ zaj xuꞌe̱ beꞌ xriwe̱ꞌ caꞌ.

Nen dízraꞌze da gunná Jesús,

bebéaje̱ꞌ beꞌ xriwe̱ꞌ caꞌ,

ne bexune̱ꞌ xúgute̱ benneꞌ we̱ꞌ caꞌ.

17 Da nigá guca na ca da gunná Isaías,

benneꞌ bchálaje̱ꞌ waláz chee̱ Dios,

gunné̱ꞌ:

“Le̱ꞌ bequé̱ꞌe̱ xízrawe̱ꞌ caꞌ da nápadxu,

ne gubague̱ꞌ ca da dxezácadxu.”

18 Gate naꞌ bleꞌe Jesús benneꞌ zante̱ zaj naxéchaje̱ꞌ Le̱ꞌ,

naꞌ guzre̱ꞌ benneꞌ caꞌ dxusé̱dene̱ꞌ gulelague̱ꞌ xechaláꞌa nísadauꞌ tu lu da dxedá laweꞌ nisa.

19 Naꞌ bzrin lau Jesús tu benneꞌ dxuxuzájle̱ꞌe̱ da bdxixruj beꞌe Dios,

naꞌ dxe̱ꞌe̱ Le̱ꞌ:

―Benneꞌ Wesede,

dxaca lazraꞌ sále̱naꞌ Lueꞌ gátete̱ze chéajuꞌ.

20 Naꞌ Jesús guzre̱ꞌ le̱ꞌ:

―Bezaꞌ zaj zua bluaj chee̱baꞌ,

naꞌ bxinne zaj zria xrúꞌunebaꞌ,

san nedaꞌ,

Benneꞌ Gulje̱ꞌ Bénneache,

ne naga xrua xíchajaꞌ quebe ga zua.

21 Bzrin xetú benneꞌ naque̱ꞌ benneꞌ ba bsé̱dequeze Jesús,

naꞌ guzre̱ꞌ Le̱ꞌ:

―Xran,

be̱nna nedaꞌ lataj xexáꞌa nedxu chee̱ cheajxecachaꞌ xraꞌ.

22 Nadxa Jesús guzre̱ꞌ le̱ꞌ:

―Gudále̱n nedaꞌ.

Be̱ꞌ lataj benneꞌ gate caꞌ xulucache ljwezre̱ꞌ.

23 Nadxa guxúꞌu Jesús lu da dxedá laweꞌ nísadauꞌ,

naꞌ benneꞌ caꞌ dxusé̱dene̱ꞌ belune̱ꞌ Le̱ꞌ tu zren.

24 Naꞌ guzú lau dxaca tu beꞌ bdunuꞌ laweꞌ nísadauꞌ,

naꞌ xeajxruza chee̱ nísadauꞌ guxúꞌu na lu da dxedá laweꞌ nísadauꞌ naꞌ,

dxácate̱ dxase Jesús.

25 Nadxa benneꞌ caꞌ dxusé̱dene̱ꞌ bulusebane̱ꞌ Le̱ꞌ,

naꞌ dxelé̱ꞌe̱ Le̱ꞌ:

―Xránantuꞌ.

Bselá netuꞌ.

Ba dxázentuꞌ lu nisa.

26 Jesús guzre̱ꞌ le̱ꞌ:

―¿Bizr chee̱ naꞌ dxezrébele̱ꞌe̱le?

Nácale benneꞌ látega dxeleajlí lázreꞌ Dios.

Nadxa guxasa Jesús.

Gudil-le̱ꞌ beꞌ bdunuꞌ,

ne nísadauꞌ,

naꞌ la belebé zrite̱ na.

27 Benneꞌ caꞌ belexebánene̱ꞌ,

gulenné̱ꞌ:

―¿Núzraqueze benneꞌ nigá?

Dxuluzúa beꞌ,

ne nísadauꞌ dizraꞌ chee̱ꞌ.

28 Gate bezrín Jesús xechaláꞌa nísadauꞌ naꞌ lu xe̱zr la xu chee̱ benneꞌ Gadara,

naꞌ chupa benneꞌ biu belexedxúaje̱ꞌ lu bluaj chee̱ benneꞌ gate,

naꞌ belezrine̱ꞌ lau Jesús.

Dxúpate̱ benneꞌ caꞌ zaj xuꞌe̱ beꞌ xriwe̱ꞌ,

ne zaj naque̱ꞌ benneꞌ sníale̱ꞌe̱,

naꞌ netú benneꞌ quebe dxexázrene̱ꞌ xedée̱ꞌ la neza naꞌ.

29 Naꞌ gulezú laweꞌ dxelebézrexe̱ꞌe̱.

Dxelenné̱ꞌ:

―¿Bizr chee̱ naꞌ zaꞌu naga zúantuꞌ,

Jesús,

Zriꞌine Dios?

¿Zaꞌu nigá chee̱ gusaca ziꞌu netuꞌ,

ne quebe ne zrin zra?

30 Tu chi naꞌ zra tu cueꞌ cuche dxelágubaꞌ.

31 Beꞌ xriwe̱ꞌ caꞌ gulataꞌ xue na Jesús,

gulenná na:

―Che Lueꞌ xebéajuꞌ netuꞌ nigá,

be̱nna lataj cheajchúꞌuntuꞌ lu cuche caꞌ.

32 Nadxa Jesús guzre̱ꞌ na:

―Le chjaca xcaꞌ.

Nadxa beꞌ xriwe̱ꞌ caꞌ belexedxúaj na lu benneꞌ caꞌ,

naꞌ belexúꞌu na lu cuche caꞌ.

Nadxa xúgute̱ cuche caꞌ belelázrubaꞌ tu dxuꞌa xiꞌa zren,

naꞌ xeajlecházebaꞌ lu nísadauꞌ naga gulázebaꞌ nisa,

naꞌ gulátebaꞌ.

33 Benneꞌ caꞌ buluxúe̱ꞌ-baꞌ belezrebe̱ꞌ,

naꞌ besáꞌaca chégüe̱ꞌ,

ne belexezrine̱ꞌ lu xe̱zre.

Buluchálaje̱ꞌ ca guca xúgute̱ da caní,

ne ca guca chee̱ benneꞌ caꞌ,

belexedxúaj beꞌ xriwe̱ꞌ zaj xuꞌe̱.

34 Nadxa xúgute̱ benneꞌ zaj zre̱ꞌe̱ lu xe̱zre naꞌ beledxúaje̱ꞌ,

ne belezrine̱ꞌ naga zua Jesús.

Naꞌ ca beleléꞌene̱ꞌ Le̱ꞌ,

gulataꞌ xuene̱ꞌ Le̱ꞌ xezé̱ꞌe̱ lu xe̱zr la xu chee̱ꞌ.