Da dxuléꞌe na ca naca chee̱ benneꞌ dxaza dxaꞌana
4
Xetú lasa guzú lau Jesús dxusé̱dene̱ꞌ benneꞌ caꞌ dxuꞌa nísadauꞌ,
naꞌ belezraga bénneache zante̱ naga zue̱ꞌ.
Naxánle̱ꞌe̱ benneꞌ,
naꞌ be̱n na ba xen guxúꞌu Jesús tu lu da dxedá laweꞌ nísadauꞌ da dxe naꞌ,
naꞌ gudxéꞌe̱ luꞌule da dxedá laweꞌ nísadauꞌ,
naꞌ bénneache zan caꞌ gulezré̱ꞌe̱ dxuꞌa nísadauꞌ.
2 Nadxa bchalaj Jesús da dxululéꞌe na,
naꞌ bsé̱dene̱ꞌ benneꞌ caꞌ da zante̱.
Ca dxusé̱dene̱ꞌ benneꞌ caꞌ,
naꞌ bchálaje̱ꞌ caní:
3 ―Le xene da nigá.
Tu benneꞌ dxaza dxaꞌana zéaje̱ꞌ guza.
4 Ca zéaje̱ꞌ dxaze̱ꞌ,
naꞌ xeajlechaze bal-la bínnedu caꞌ dxuꞌa neza.
Naꞌ belezrín bxinne,
ne gulágubaꞌ bínnedu caní.
5 Xezícadxa bínnedu caꞌ xeajlechaze na lu xiaj naga quebe dé̱teca xu.
Bínnedu caní belezría na laweꞌ da quebe dé̱teca xu.
6 Ca bdxuaj gubizra,
naꞌ bzezxe na le̱ na,
naꞌ laweꞌ da quebe zaj nun lue na lu da situj,
gulebizre na.
7 Xezícadxa bínnedu caꞌ xeajlechaze na naga dxelezría xixreꞌ xecheꞌ.
Xixreꞌ xecheꞌ caní gulegúladxa na ca le̱ na,
naꞌ bululule na le̱ na,
naꞌ quebe gulebía na da gágudxu.
8 Xezícadxa bínnedu caꞌ xeajlechaze na lu xu be̱be.
Belezría na cháwedauꞌ,
naꞌ belegula na,
ne gulezríale̱ꞌe̱ na da gágudxu.
Bal-la na gulebía na chi dxua tu tu na.
Xebal-la na gulebía na ga xun tu tu na.
Xebal-la na gulebía na tu gaxúa tu tu na.
9 Gunnadxa Jesús,
dxe̱ꞌe̱ benneꞌ caꞌ:
―Che nu benneꞌ zua nague̱ꞌ,
dxal-laꞌ xenne̱ꞌ da nigá.
10 Ca gudé naꞌ,
ca gucuasa Jesús cuita benneꞌ zan caꞌ,
naꞌ gulenaba benneꞌ caꞌ zrále̱ne̱ꞌ benneꞌ caꞌ dxuse̱de Jesús bi zéaje̱ ca naca da dxuléꞌe nigá.
11 Naꞌ gunná Jesús,
dxe̱ꞌe̱ benneꞌ caꞌ:
―Dios dxunne̱ꞌ leꞌe lataj nézele ca naca chee̱ da nagache chee̱ da dxenná bea Le̱ꞌ.
Naꞌa,
ca naca chee̱ benneꞌ caꞌ zaj zre̱ꞌe̱ cúzrela,
dxuchálajle̱naꞌ le̱ꞌ dízraꞌze da dxuléꞌe na.
12 Caní dxunaꞌ laweꞌ da dxelenné̱ꞌe̱,
naꞌ quebe dxelaca lazre̱ꞌ xeleléꞌene̱ꞌ.
Dxelenne̱ꞌ,
naꞌ quebe dxelaca lazre̱ꞌ xeléajniꞌine̱ꞌ,
chee̱ quebe xelexebíꞌi lazre̱ꞌ,
naꞌ chuꞌu xel-la wenite lau chee̱ dul-la da za nabague̱ꞌ.
13 Naꞌ gunnadxa Jesús:
―¿Quebe dxéajniꞌile ca naca da dxuléꞌe nigá?
¿Ájalaqueze chéajniꞌile xezícadxa dizraꞌ caꞌ da dxululéꞌe na?
14 Benneꞌ dxaza dxáꞌane̱ꞌ naque̱ꞌ benneꞌ dxuchálaje̱ꞌ xrtizra Dios.
15 Bal-la bénneache zaj naque̱ꞌ ca bínnedu caꞌ xeajlechaze na dxuꞌa neza.
Dxelenne̱ꞌ xrtizra Dios,
naꞌ ca dxedé naꞌ,
dxezrín Satanás,
naꞌ dxucuasa na dizraꞌ nigá da zua na xichaj lázrdau benneꞌ caꞌ.
16 Benneꞌ xula caꞌ zaj naque̱ꞌ ca bínnedu caꞌ xeajlechaze na lu xiaj.
Ca dxelenne̱ꞌ xrtizra Dios,
naꞌ dxelebéle̱ꞌe̱ne̱ꞌ dxeleziꞌe̱ na.
17 Tu chíꞌidauze dxelune̱ꞌ caní.
Gate dxeledée̱ꞌ xel-la ziꞌ,
ne zua da dxedábaga le̱ꞌ ne̱ chee̱ xrtizra Dios,
naꞌ dxelexecuase̱ꞌ laweꞌ da quebe guxaze xrtizra Dios lúꞌulete̱ xichaj lázrdawe̱ꞌ ca guca chee̱ bínnedu caꞌ quebe belún lue na lu xu situj.
18 Benneꞌ xula caꞌ zaj naque̱ꞌ ca bínnedu caꞌ xeajlechaze na ládujla xixreꞌ xecheꞌ caꞌ.
Dxelenne̱ꞌ xrtizra Dios.
19 Laweꞌ da dxelebeꞌdxe̱ꞌ gunne xue da naca chee̱ xe̱zr la xu nigá dxezí xe̱ xel-la gunníꞌa le̱ꞌ,
naꞌ dxelezá lazre̱ꞌ da zante̱ da dxeleléꞌene̱ꞌ.
Xúgute̱ da caní dxelúꞌu na xichaj lázrdau benneꞌ caní,
naꞌ xuluxunite na dizraꞌ da guxúꞌu xichaj lázrdawe̱ꞌ,
naꞌ quebe gaca gun na ca da dxal-laꞌ gun dizraꞌ nigá.
20 Zaj zraꞌ benneꞌ dxelenne̱ꞌ xrtizra Dios,
ne dxelezíꞌ lu ne̱ꞌe̱ na.
Bal-le̱ꞌ zaj naque̱ꞌ ca bínnedu caꞌ gulebía na chi dxua tu tu na.
Benneꞌ xula zaj naque̱ꞌ ca bínnedu caꞌ gulebía na ga xun tu tu na.
Benneꞌ xula zaj naque̱ꞌ ca bínnedu caꞌ gulebía na tu gaxúa tu tu na.
Xúgute̱ da nagache guléꞌe lawe na
21 Cáꞌanqueze gunná Jesús,
dxe̱ꞌe̱ benneꞌ caꞌ:
―¿Gúadxu xiꞌ,
ne guzúadxu na zran xiꞌina u che zran ga dxásedxu?
Quebe gundxu caꞌ,
san guzúadxu na sibe chee̱ gusení na.
22 Xúgute̱ da nagache guléꞌe lawe na,
naꞌ xúgute̱ da xuꞌu xichaj lázrdaudxu wénqueze na.
23 Che nu benneꞌ zua nague̱ꞌ,
dxal-laꞌ xenne̱ꞌ da nigá.
24 Cáꞌanqueze gunná Jesús:
―¡Le xene xanneꞌ ca da dxénele!
Ca da dxudxíxrele,
nen le̱ naꞌ gudxíxrequeze Dios chee̱le,
naꞌ gúnnadxe̱ꞌ leꞌe dxénele.
25 Caní gaca na,
benneꞌ nape̱ꞌ da naca chee̱ xrtizre̱ꞌe,
gunézrujdxe̱ꞌ chee̱ꞌ,
naꞌ benneꞌ quebe bi nape̱ꞌ,
ca da dauze da nape̱ꞌ xecáꞌate̱ꞌ na.
Da dxuléꞌe na ca naca chee̱ binne da dxegula na
26 Naꞌ gunnáqueze Jesús:
―Da dxenná bea Dios naca na ca da dxaca gate tu benneꞌ dxaze̱ꞌ bínnedu caꞌ lu xu.
27 Dxásie̱ꞌ chizrela,
dxase̱ꞌ te zra,
naꞌ bínnedu caní dxelezría na,
ne dxelegula na,
ne quegá nézene̱ꞌ ájala.
28 Dxaca na caní laweꞌ da nácaqueze ca da dxun xe̱zr la xu.
Nedxu dxebía na xrlegue na,
nadxa za dau,
naꞌ bzé̱bete̱ dxebía na bínnedu caꞌ lu dau.
29 Gate ba gulegula xíxredu caní,
naꞌ dxechugue̱ꞌ na laweꞌ da ba bzrin zra xequé̱ꞌe̱ na.
Da dxuléꞌe na ca naca chee̱ binne mostaza
30 Cáꞌanqueze gunná Jesús:
―¿Ájala gutil-la lé̱bedxu da dxenná bea Dios,
u che bila dizraꞌ da dxuléꞌe na cáꞌadxu da gutil-la lé̱bedxu le̱ na?
31 Naca na ca tu binne mostaza da dxázadxu lu xu.
Bínnedu nigá nácadxa cuideꞌ ca da zaj nnita lu xe̱zr la xu.
32 Gate ba gúzadxu na dxegula na,
naꞌ dxaca na da zrendxa ca xixreꞌ caꞌ da zaj naca na ba dagu,
naꞌ dxebía zruze na zren,
naꞌ dxácate̱ dxelebía bxínnedu caꞌ zran zrula chee̱ na.
Ca bgune Jesús da dxuléꞌe na caní
33 Caní bse̱de Jesús benneꞌ caꞌ xrtizra Dios,
naꞌ bchálaje̱ꞌ zánete̱ da dxululéꞌe na caní,
cadite̱ guléajniꞌine̱ꞌ.
34 Quebe bchálaje̱ꞌ da xula.
Tuze dizraꞌ da dxuléꞌe na bchálajle̱ne̱ꞌ benneꞌ caꞌ.
Bzájlaꞌadxe̱ꞌ ca naca na benneꞌ caꞌ dxusé̱dene̱ꞌ.
Jesús dxebeche zrie̱ꞌ beꞌ bdunuꞌ
35 Lu zra náꞌqueze,
ca gul-la chizrela,
naꞌ gunná Jesús,
dxe̱ꞌe̱ benneꞌ caꞌ dxusé̱dene̱ꞌ:
―Chéajdxu xecha laꞌa nísadauꞌ.
Jesús calma la tormenta (Marcos 4.35-41)
36 Besáꞌaque̱ꞌ naga zaj zraꞌ benneꞌ zan caꞌ,
naꞌ guleché̱ꞌe̱ Jesús lu da dxedá laweꞌ nísadauꞌ naga ba dxéꞌqueze̱ꞌ,
naꞌ gulennita xezícadxa da caꞌ dxeledá laweꞌ nísadauꞌ caꞌ naga zaj zraꞌ benneꞌ,
naꞌ xjácale̱ne̱ꞌ Le̱ꞌ.
37 Nadxa guzú lau dxaca tu beꞌ bdunuꞌ lu nísadauꞌ naꞌ,
naꞌ dxuꞌute̱ nisa lu da dxedá laweꞌ nísadauꞌ.
Caní guca guzú lau dxezrá nisa lu da dxedá laweꞌ nísadauꞌ.
38 Jesús de̱ꞌ dxasie̱ꞌ lu xcúgüe̱ꞌ naga nácadxa sibe lu da dxedá laweꞌ nísadauꞌ.
Naꞌ bulusebane̱ꞌ Jesús,
dxelé̱ꞌe̱ Le̱ꞌ:
―Benneꞌ wese̱de,
¿quebe dxeꞌu gunne xue wátedxu nate ca naꞌa?
39 Nadxa guxasa Jesús,
naꞌ bchálajle̱ne̱ꞌ beꞌ bdunuꞌ,
ne nísadauꞌ.
Dxenné̱ꞌ:
―¡Gudxé zriꞌ!
¡Zrize guzúa!
Gudxé zriꞌ beꞌ bdunuꞌ,
naꞌ nísadauꞌ guzúa zri na.
40 Nadxa gunná Jesús,
dxe̱ꞌe̱ benneꞌ caꞌ dxusé̱dene̱ꞌ:
―¿Bizr chee̱ naꞌ dxezrébele̱ꞌe̱le leꞌe?
¿Quebe dxeajlí lázrele Dios?
41 Belezrébele̱ꞌe̱dxe̱ꞌ,
ne dxelé̱ ljwezre̱ꞌ:
―¿Núzraqueze benneꞌ nigá?
Dxuluzúa dizraꞌ beꞌ bdunuꞌ,
ne nísadauꞌ chee̱ꞌ.