Tu benneꞌ xe̱zre Gadara, benneꞌ xuꞌe̱ beꞌ xriwe̱ꞌ
5
Bezrín Jesús,
tu zren nen benneꞌ caꞌ dxusé̱dene̱ꞌ xecha laꞌa nísadauꞌ lu xe̱zr la xu chee̱ benneꞌ Gadara caꞌ.
Jesús expulsa unos demonios (Marcos 5.1-20)
2 Ca bedxúaj Jesús lu da dxedá laweꞌ nísadauꞌ,
naꞌ bzrin tu benneꞌ xuꞌe̱ beꞌ xriwe̱ꞌ naga zua Jesús.
Bedxúaje̱ꞌ lu bluaj naga zaj nagache benneꞌ gate caꞌ.
3 Benneꞌ biu nigá zúaqueze̱ꞌ lu bluaj naꞌ.
Quebe nu dxezúe guchéaj le̱beꞌ chalásaze,
lácala nu guchéaj le̱beꞌ nen du xia.
4 Zaneꞌ lasa buluchéaje̱ꞌ le̱beꞌ nen du xia naꞌabeꞌ,
ne níꞌabeꞌ.
Bzúzrujbeꞌ du xia caꞌ,
naꞌ quegá nu guzeque nna béꞌene̱ꞌ le̱beꞌ.
5 Dxedáquezebeꞌ te zra chizrela lu xiꞌa caꞌ,
ne lu bluaj caꞌ naga zaj nagache benneꞌ gate.
Dxebezre xaꞌabeꞌ,
ne dxeajcházebeꞌ lu xiaj caꞌ,
dxun we̱ꞌ cuínabeꞌ.
6 Gate bleꞌebeꞌ zítuꞌla ba za Jesús,
naꞌ guzá chégubeꞌ,
xeajzú zríbebeꞌ lau Le̱ꞌ.
7 Gunné̱ zizraj beꞌ xriwe̱ꞌ xuꞌubeꞌ,
dxe̱ na Jesús:
―¿Bizra dxaca chiuꞌ nen nedaꞌ,
Jesús,
Zriꞌine Dios szrente̱?
Lu La Xránadxu Dios,
dxataꞌ xuedaꞌ Lueꞌ,
quebe gudéuꞌ nedaꞌ xel-la ziꞌ.
8 Caní gunná na laweꞌ da gunná Jesús,
dxe̱ꞌe̱ na:
―Lueꞌ,
da xriwe̱ꞌ,
bedxúaj lu be̱l-laꞌ dxen chee̱ benneꞌ nigá.
9 Nadxa gunaba Jesús,
dxe̱ꞌe̱ na:
―¿Bi leuꞌ?
Naꞌ beche̱be na:
―Da Zan leaꞌ,
laweꞌ da naxantuꞌ.
10 Gutaꞌ xue na Jesús chee̱ quebe xesel-le̱ꞌ na,
ne quebe gucuase̱ꞌ na zituꞌ lu xe̱zr la xu naꞌ.
11 Zaj zraꞌ gagu lu xiꞌa naꞌ tu cueꞌ cuche zaj zrabaꞌ dxelágubaꞌ.
12 Gulataꞌ xue beꞌ xriwe̱ꞌ caꞌ Jesús,
gulenná na:
―Besel-la netuꞌ lu cuche caꞌ.
Be̱nna lataj chúꞌuntuꞌ le̱baꞌ.
13 Nadxa Jesús be̱ꞌe̱ na lataj.
Naꞌ beꞌ xriwe̱ꞌ caꞌ beledxúaj na lu bénneaꞌ,
naꞌ gulúꞌu na cuche caꞌ.
Zaj nácabaꞌ ca galaj gaxúa cuche caꞌ,
naꞌ buludxixre cuínabaꞌ tu chejéa.
Xeajlecháste̱baꞌ lu nísadauꞌ,
ne gulátete̱baꞌ lu nisa naꞌ.
14 Benneꞌ caꞌ dxuluxúe̱ꞌ cuche caꞌ buluxuzrúnnuje̱ꞌ,
naꞌ xeajlezenne̱ꞌ benneꞌ zaj zre̱ꞌe̱ lu xe̱zre,
ne benneꞌ zaj zre̱ꞌe̱ le̱ꞌe̱ xixreꞌ.
Naꞌ belezrín benneꞌ caꞌ naga zua Jesús,
benneꞌ caꞌ belenne̱ꞌ ca da ba guca.
15 Gate belezrín benneꞌ caꞌ naga zua Jesús,
naꞌ beleléꞌene̱ꞌ bénneaꞌ guxúꞌubeꞌ beꞌ xriwe̱ꞌ caꞌ,
dxeꞌebeꞌ ga zua Jesús,
nácubeꞌ tu ladzeꞌ,
ne ba bezúa xrlátaje lu xichaj lázrdaubeꞌ,
naꞌ gulezrebe̱ꞌ.
16 Benneꞌ caꞌ beleléꞌe ca naca da guca chee̱ benneꞌ guxúꞌubeꞌ beꞌ xriwe̱ꞌ caꞌ,
ne ca guca chee̱ cuche caꞌ buluchálaje̱ꞌ chee̱ da ba guca.
17 Nadxa benneꞌ xe̱zre caꞌ gulataꞌ xuene̱ꞌ Jesús xedxúaje̱ꞌ lu xe̱zr la xu chee̱ꞌ.
18 Ca bexúꞌu Jesús lu da dxedá laweꞌ nísadauꞌ,
naꞌ bénneaꞌ guxúꞌubeꞌ beꞌ xriwe̱ꞌ caꞌ gutaꞌ xuebeꞌ Jesús guꞌe̱ lataj chéajle̱beꞌ Le̱ꞌ.
19 Quebe be̱ꞌ Jesús le̱beꞌ lataj,
san dxe̱ꞌe̱ le̱beꞌ,
gunné̱ꞌ:
―Bexiaj lizruꞌ,
ne xeajchálajle̱ xrtiuꞌ caꞌ ca naca da zren caꞌ da be̱n Xranuꞌ nen lueꞌ,
ne ca bexache lazre̱ꞌ lueꞌ.
20 Nadxa bezáꞌabeꞌ zexíajbeꞌ,
ne guzú laubeꞌ dxuchálajbeꞌ lu xe̱zre caꞌ zaj nababa Decápolis ca naca da zren da be̱n Jesús nen le̱beꞌ.
Belexebánele̱ꞌe̱ xúgute̱ benneꞌ zaj zre̱ꞌe̱ xe̱zre caꞌ.
Bi nuꞌula chee̱ Jairo, ne nuꞌula naꞌ xeajté̱ꞌ zra lana Jesús
21 Begüén Jesús lu da dxedá laweꞌ nísadauꞌ,
naꞌ bezrine̱ꞌ xecha laꞌa nísadauꞌ.
Belezrín benneꞌ zan naga ze̱ꞌ,
naꞌ Le̱ꞌ begáꞌane̱ꞌ dxuꞌa nísadauꞌ.
22 Caꞌan guca bzrin tu benneꞌ xíchaje̱ chee̱ xuꞌu naga dxelúe láꞌana judío caꞌ Dios,
benneꞌ le̱ꞌ Jairo.
Gate bléꞌene̱ꞌ Jesús,
naꞌ bzu zribe̱ꞌ zran niꞌe̱.
23 Gutaꞌ xuene̱ꞌ Jesús,
dxe̱ꞌe̱ Le̱ꞌ:
―¡Bi nuꞌula chiaꞌ ba dxátebeꞌ!
¡Gudá,
bze̱ naꞌu le̱beꞌ chee̱ xexácabeꞌ,
ne xaca banbeꞌ!
24 Nadxa guxíajle̱ Jesús bénneaꞌ,
naꞌ bénneache zan xjácale̱ne̱ꞌ Le̱ꞌ,
ne dxuluchítee̱ꞌ Le̱ꞌ.
25 Ládujla bénneache caꞌ za tu nuꞌula quebe chaweꞌ zue̱ꞌ,
ba zeaj chazrinnu iza nape̱ꞌ we̱ꞌ dxen.
26 Da zren da bulusaca benneꞌ dxelexún bénneache caꞌ nuꞌula nigá,
naꞌ bache be̱n dítaje̱ꞌ xúgute̱ da nape̱ꞌ.
Quegá bi gúcale̱ na le̱ꞌ,
san bzáladxa we̱ꞌ chee̱ꞌ.
27 Gate ben núꞌulaꞌ dxuluchalaj bénneache ca naca chee̱ Jesús,
naꞌ bzrine̱ꞌ cúzrula Jesús ládujla bénneache,
naꞌ xeajté̱ꞌ zra lana Jesús.
28 Caní be̱ne̱ꞌ laweꞌ da gunné̱ꞌ lu xichaj lázrdawe̱ꞌ:
Cun cheajtazaꞌ zra lana Jesús,
naꞌ xexácateaꞌ.
29 La gulézate̱ xel-la we̱ꞌ chie̱ꞌ,
ne la guque béꞌete̱ne̱ꞌ ba bexaca be̱l-laꞌ dxen chee̱ꞌ chee̱ xízrawe̱ꞌ naꞌ.
30 Gúquebeꞌe Jesús be̱n zrin xel-la waca chee̱ꞌ.
Chee̱ le̱ naꞌ bexéchaje̱ꞌ,
dxenné̱ꞌe̱ bénneache caꞌ,
naꞌ gunábene̱ꞌ le̱ꞌ:
―¿Nuzra bedajtá zra lanaꞌ?
31 Nadxa benneꞌ caꞌ dxuse̱de Jesús gulé̱ꞌe̱ Le̱ꞌ:
―Dxeléꞌequeznuꞌ bénneache zan dxuluchíe̱ꞌ Lueꞌ.
¿Bizr chee̱ naꞌ dxenabuꞌ:
“Nuzra bedajtá nedaꞌ?”
32 Jesús guzúe̱ꞌ dxenné̱ꞌe̱ cuite̱ꞌ chee̱ léꞌene̱ꞌ nuaꞌ bedajtá Le̱ꞌ.
33 Nadxa guxíaj nuꞌula nigá,
dxezrízie̱ꞌ dxezrebe̱ꞌ laweꞌ da nézene̱ꞌ ca da ba guca chee̱ꞌ,
naꞌ bzu zribe̱ꞌ lau Jesús,
naꞌ gunné̱ꞌ ca naca da li.
34 Nadxa gunná Jesús,
dxe̱ꞌe̱ nuꞌulaꞌ:
―Bi núꞌuladauꞌ,
ba bexacuꞌ laweꞌ da guxeajlí lazruꞌ nedaꞌ.
Bexíaj,
cútudxa zrebuꞌ.
Ba bexácate̱quezuꞌ chee̱ xízrawe̱ꞌ da guzxacuꞌ.
35 Ne dxuchálajte̱ Jesús gate belezrín benneꞌ gusáꞌaca lizre benneꞌ xíchaje̱ chee̱ xuꞌu naga dxelúe láꞌana judío caꞌ Dios,
naꞌ gulé̱ꞌe̱ xra núꞌuladauꞌ naꞌ:
―Bi núꞌuladauꞌ chiuꞌ ba gútebeꞌ.
¿Bizr chee̱ naꞌ dxunuꞌ zé̱dedxa benneꞌ dxuse̱de nigá?
36 Gate Jesús benne̱ꞌ ca da gulenná benneꞌ caní,
dxe̱ꞌe̱ benneꞌ xíchaje̱ chee̱ xuꞌu naꞌ,
gunné̱ꞌ:
―Quebe zrebuꞌ.
Guxeajlí lazreꞌ nedaꞌ.
37 Quebe be̱ꞌe̱ lataj chjácale̱ bénneache zan caꞌ Le̱ꞌ.
Tuze be̱ꞌe̱ lataj gusáꞌacale̱ Pedro,
ne Jacobo,
ne Juan,
biche Jacobo nigá,
nen Le̱ꞌ.
38 Ca belezrine̱ꞌ lizre benneꞌ xíchaje̱ naꞌ,
naꞌ bleꞌe Jesús bénneache dxelún schaga.
Dxelebezre benneꞌ,
ne dxelebezre xaꞌate̱ꞌ.
39 Nadxa guxúꞌu Jesús lu xuꞌu,
naꞌ dxe̱ꞌe̱ benneꞌ caꞌ,
gunné̱ꞌ:
―¿Bizr chee̱ naꞌ dxunle schaga?
¿Bizr chee̱ naꞌ dxebézrele?
Quegá nate bidauꞌ nuꞌula.
Dxásezebeꞌ.
40 Belún lala benneꞌ caꞌ chee̱ꞌ.
Nadxa Jesús bebéaje̱ꞌ xúgute̱ benneꞌ caꞌ,
naꞌ guché̱ꞌe̱ xrabeꞌ,
ne xrna bidauꞌ nigá,
ne benneꞌ caꞌ zjácale̱ne̱ꞌ Le̱ꞌ,
naꞌ guxúꞌe̱ naga de̱ núꞌuladu naꞌ.
41 Bé̱xrue̱ꞌ naꞌbeꞌ,
ne guzre̱ꞌ le̱beꞌ:
―Bi núꞌuladauꞌ,
lueꞌ dxapaꞌ:
¡Guxasa!