Dxexún Jesús tu benneꞌ zaj zua zri niꞌa ne̱ꞌe̱
9
Nadxa Jesús guxúꞌe̱ tu lu da dxedá laweꞌ nísadauꞌ,
naꞌ gulague̱ꞌ xechaláꞌa nísadauꞌ,
naꞌ bezrine̱ꞌ lázrequeze̱ꞌ.
2 Naꞌ bedajleguꞌe̱ tu benneꞌ biu lau Le̱ꞌ,
zaj zua zri niꞌa ne̱ꞌe̱,
zaj naxrúe̱ꞌ benneꞌ naꞌ tu lu taꞌa blagaꞌ.
Gate bleꞌe Jesús ca dxeléajle̱ꞌe̱ chee̱ꞌ,
naꞌ gunné̱ꞌ,
dxe̱ꞌe̱ benneꞌ we̱ꞌ:
―Be̱n dipa lazruꞌ,
zríꞌinaꞌdauꞌ.
Dul-la chiuꞌ dxunite lawaꞌ.
3 Nadxa bal-la benneꞌ dxuluxuzájle̱ꞌe̱ da nadxixruj bea Dios gulenné̱ꞌ lu xichaj lázrdawe̱ꞌ:
“Benneꞌ nigá dxucáꞌana dítaje̱ꞌ Dios nen xrtizre̱ꞌ.”
4 Laweꞌ da neze Jesús ca gulenné̱ꞌ lu xichaj lázrdawe̱ꞌ,
naꞌ dxe̱ꞌe̱ benneꞌ caꞌ,
gunné̱ꞌ:
―¿Bizr chee̱ naꞌ dxennale caní lu xichaj lázrdaule?
5 ¿Bízrala da quebe nácadxa ste̱be gunaꞌ?
¿Nniaꞌ:
“Dul-la chiuꞌ ba bnite lawaꞌ”,
u che nniaꞌ:
“Bexasa,
guzá?”
6 Chee̱ le̱ naꞌ guléꞌedaꞌ leꞌe nedaꞌ,
Benneꞌ Gulje̱ꞌ Bénneache,
napaꞌ xel-laꞌ dxenná bea lu xe̱zr la xu nigá gunite lawaꞌ dul-la.
Nadxa dxe̱ꞌe̱ benneꞌ zaj zua zri niꞌa ne̱ꞌe̱,
gunné̱ꞌ:
―Bexasa.
Becáꞌa taꞌa chiuꞌ.
Bexíaj lizruꞌ.
7 Bénneaꞌ zaj zua zri niꞌa ne̱ꞌe̱ bexase̱ꞌ,
naꞌ zexíajte̱ꞌ lizre̱ꞌ.
8 Gate beleléꞌe bénneache da nigá,
naꞌ belezrebe̱ꞌ,
ne belúe láꞌane̱ꞌ Dios laweꞌ ba bnézruje̱ꞌ xel-laꞌ waca caní chee̱ bénneache.
Jesús dxuláwizre̱ꞌ Mateo
9 Ca bezá Jesús naꞌ,
naꞌ bléꞌene̱ꞌ tu benneꞌ biu le̱ꞌ Mateo,
dxeꞌe̱ lataj naga dxuchízruje̱ꞌ waláz chee̱ xe̱zre Roma,
naꞌ dxe̱ꞌe̱ le̱ꞌ,
gunné̱ꞌ:
6 ―Be̱n nedaꞌ tuze.
Nadxa Mateo nigá guxase̱ꞌ zéajle̱ne̱ꞌ Jesús.
10 Gate naꞌ dxeꞌ Jesús dxawe̱ꞌ xeta lizre Mateo nigá,
benneꞌ zante̱ wechizruj,
ne benneꞌ dul-la belezrine̱ꞌ,
ne gulebéꞌqueze̱ꞌ dxelawe̱ꞌ cuita Jesús,
ne benneꞌ caꞌ dxusé̱dene̱ꞌ.
11 Benneꞌ xudauꞌ fariseo caꞌ,
gate beleléꞌene̱ꞌ da nigá,
dxelé̱ꞌe̱ benneꞌ caꞌ dxuse̱de Jesús,
gulenné̱ꞌ:
―¿Bizr chee̱ naꞌ Benneꞌ dxusédene̱ꞌ leꞌe dxágule̱ne̱ꞌ benneꞌ wechizruj caꞌ,
ne benneꞌ we̱n da zrinnaj caꞌ?
12 Jesús benne̱ꞌ da nigá,
naꞌ dxe̱ꞌe̱ benneꞌ caꞌ,
gunné̱ꞌ:
―Quebe dxelechine benneꞌ chaweꞌ nu benneꞌ dxexune̱ꞌ bénneache.
Benneꞌ we̱ꞌ dxelechínene̱ꞌ le̱ꞌ.
13 Le chjaca,
le cheajse̱de ca da dxenná da naxúaj na lu xiche chee̱ Dios,
dxenné̱ꞌ:
“Nedaꞌ dxaca lazraꞌ xexache lázrele le saꞌ ljwézrele,
quegá gútele be̱ xíxreꞌdu caꞌ lu cugu chiaꞌ.”
Blaꞌ nedaꞌ,
quegá chee̱ guláwizraꞌ benneꞌ xrlátaje.
Dxuláwizraꞌ benneꞌ dul-la chee̱ xelexebíꞌi lazre̱ꞌ.
Jesús dxusédene̱ꞌ ca naca chee̱ gubasa
14 Nadxa belezrín lau Jesús benneꞌ caꞌ dxeledále̱ne̱ꞌ Juan,
bénneaꞌ dxuchúe̱ꞌ bénneache nisa,
naꞌ gulenábene̱ꞌ Le̱ꞌ:
―¿Bizr chee̱ naꞌ quebe dxelún gubasa benneꞌ dxusé̱denuꞌ Lueꞌ,
ca dxuntuꞌ netuꞌ,
ne ca dxelún benneꞌ xudauꞌ fariseo caꞌ?
Tu dxúnzquezentuꞌ gubasa.
15 Naꞌ Jesús dxe̱ꞌe̱ benneꞌ caꞌ,
gunné̱ꞌ:
―¿Ájala chee̱ naꞌ xelezúa ba xácheze benneꞌ zaj zue̱ꞌ laní chee̱ wechaga naꞌ dxácate̱ zua benneꞌ wechaga naꞌ nen le̱ꞌ?
Wazrín zra gate dua benneꞌ wechaga naꞌ.
Nadxa xelúnqueze̱ꞌ gubasa.
16 ’Quegá nu dxudá tu ladxeꞌ cube le̱ꞌe̱ tu zra lánadxu gula,
laweꞌ da gate cheajxedxéꞌ da cube naꞌ,
ne xrube xu na da gula naꞌ,
naꞌ dxézadxa da gula naꞌ.
17 Cáꞌanqueze quebe nu benneꞌ que̱ꞌe̱ xrise uva wal-la cube lu bzude xide gula laweꞌ da che caꞌan gune̱ꞌ,
gate cueꞌ chiꞌi xrise uva wal-la,
naꞌ dxeza bzude xide naꞌ,
naꞌ xelebía xiꞌ xrise uva wal-la naꞌ,
ne bzude xide naꞌ.
Chee̱ le̱ naꞌ dxal-laꞌ caꞌadxu xrise uva wal-la cube lu bzude xide cube.
Che caꞌan gundxu,
xelegáꞌana chaweꞌ dxúpate̱ na.
Bchalaj Jesús da caní ca naca chee̱ benneꞌ caꞌ dxelezíꞌ lu ne̱ꞌe̱ xrtizre̱ꞌ.
Dxexún Jesús bi nuꞌula chee̱ Jairo, ne nuꞌulaꞌ, xeajté̱ꞌe̱ zra lana Jesús
18 Dxácate̱ naꞌ dxuchalaj Jesús da nigá,
naꞌ bzrin tu benneꞌ xíchaje̱ chee̱ benneꞌ judío caꞌ,
naꞌ bzu zribe̱ꞌ lau Jesús,
dxenné̱ꞌ:
―Bi nuꞌula chiaꞌ za gútete̱beꞌ.
Che Lueꞌ xiduꞌ ne guzé̱ naꞌu le̱beꞌ,
wexaca banbeꞌ.
19 Naꞌ guxasa Jesús,
guxíajle̱ne̱ꞌ le̱ꞌ nen benneꞌ caꞌ dxusé̱dene̱ꞌ.
20 Nadxa bzrin tu nuꞌula we̱ꞌ cúzrula Jesús,
ba naca chazrinnu iza dxéꞌene̱ꞌ tu we̱ꞌ dxaque dxen,
naꞌ xeajté̱ꞌe̱ zra lana Jesús.
21 Dxenné̱ꞌ lu xichaj lázrdawe̱ꞌ:
“Che cheajtazaꞌ zra lane̱ꞌ,
naꞌ xexacaꞌ.”
22 Jesús guxéchaje̱ꞌ,
guné̱ꞌe̱ nuꞌulaꞌ,
naꞌ dxe̱ꞌe̱ le̱ꞌ:
―Be̱n dipa lazruꞌ,
zríꞌinaꞌdauꞌ.
Bache bexacuꞌ laweꞌ da dxéajle̱ꞌu chiaꞌ.
La bexácate̱ nuꞌula naꞌ.
23 Gate naꞌ bzrin Jesús lizre benneꞌ xíchaje̱ chee̱ benneꞌ judío caꞌ,
naꞌ bléꞌene̱ꞌ zaj zraꞌ benneꞌ wil-la xulucache̱ꞌ bi nuꞌula naꞌ,
ne benneꞌ zaj zre̱ꞌe̱ dxelune̱ꞌ zralaj.
24 Gunná Jesús,
dxe̱ꞌe̱ benneꞌ caꞌ:
―Le xedxúaj nigá.
Quegá nate bi núꞌuladauꞌ nigá.
Dxásezebeꞌ.
Naꞌ buluzrizre̱ꞌ chee̱ꞌ.
25 Gudé bebéaje̱ꞌ benneꞌ caꞌ,
naꞌ guxúꞌu Jesús,
ne bé̱xrue̱ꞌ naꞌ bi nuꞌula naꞌ,
naꞌ guxásabeꞌ.
26 Du ca naca xe̱zre caꞌ bzriluj dizraꞌ chee̱ da be̱n Jesús.
Dxexún Jesús chupa benneꞌ la chul-la
27 Ca bedxúaj Jesús naꞌ,
naꞌ chupa benneꞌ xjaque̱ꞌ cuzru Le̱ꞌ,
dxelenné̱ꞌ zizraj:
―Bexache lazreꞌ netuꞌ,
Lueꞌ,
Zriꞌine David.
28 Ca guxúꞌu Jesús lu xuꞌu naga zúaqueze̱ꞌ,
naꞌ benneꞌ la chul-la caní gulebigue̱ꞌ lau Le̱ꞌ,
naꞌ Jesús guzre̱ꞌ benneꞌ caꞌ:
―¿Dxéajle̱le wazéquedaꞌ xexunaꞌ leꞌe?
Naꞌ gulé̱ꞌe̱ Le̱ꞌ:
―Aweꞌ,
Xran.
29 Nadxa Jesús gudane̱ꞌ xiaj lau benneꞌ caꞌ,
dxenné̱ꞌ:
―Gaca chee̱le ca dxéajle̱le.
30 Belexaca xiaj lawe̱ꞌ.
Nadxa Jesús gunné̱ xuene̱ꞌ benneꞌ caꞌ,
gunné̱ꞌ:
―Le guxúe xanneꞌ chee̱ quebe nu neze da nigá.
31 Gate beledxúaje̱ꞌ,
naꞌ buluchálaje̱ꞌ du ca naca xe̱zre caꞌ ca da be̱n Jesús chee̱ꞌ.
Dxexún Jesús tu benneꞌ quebe dxaca nnie̱ꞌ
32 Ca bezáꞌ Jesús nen benneꞌ caꞌ,
naꞌ belezrín bal-la benneꞌ zaj naché̱ꞌe̱ tu benneꞌ biu quebe dxaca nnie̱ꞌ,
benneꞌ xuꞌe̱ beꞌ xriwe̱ꞌ.
33 Cáte̱ze bebéaj Jesús beꞌ xriwe̱ꞌ nigá,
naꞌ benneꞌ quebe dxaca nnie̱ꞌ bezú lawe̱ꞌ dxuchálaje̱ꞌ.
Naꞌ benneꞌ caꞌ belexebánele̱ꞌe̱,
dxelenné̱ꞌ:
―Cabataꞌ ne léꞌedxu gaca caní ládujla benneꞌ Israel caꞌ.
34 Benneꞌ xudauꞌ fariseo caꞌ gulenné̱ꞌ:
―Benneꞌ nigá dxebéaje̱ꞌ beꞌ xriwe̱ꞌ,
dxuchínene̱ꞌ xel-laꞌ waca chee̱ da xriwe̱ꞌ,
da naꞌ dxenná beꞌe na beꞌ xriwe̱ꞌ caꞌ.
Dxexache lazreꞌ Jesús bénneache caꞌ
35 Gudé Jesús tu tu xe̱zre zren,
ne tu tu xé̱zredauꞌ,
dxusé̱dene̱ꞌ benneꞌ caꞌ lu xuꞌu caꞌ naga dxulucáꞌana szrene̱ꞌ Dios tu tu lataj caꞌ.
Guluꞌe̱ lban chee̱ dizraꞌ chaweꞌ ca nna bea Dios,
ne bexunte̱ꞌ bénneache zaj nape̱ꞌ tu tu cueꞌ xízrawe̱ꞌ ca da dxelezaque̱ꞌ.
36 Gate bleꞌe Jesús bénneache caꞌ,
naꞌ bexache lazre̱ꞌ le̱ꞌ laweꞌ da zaj zre̱ꞌe̱ xácheze̱ꞌ,
ne dxelecuán lazre̱ꞌ.
Zaj naque̱ꞌ ca zrilaꞌ caꞌ quebe zua benneꞌ guxúe̱ꞌ-baꞌ.
37 Nadxa guzre̱ꞌ benneꞌ caꞌ dxusé̱dene̱ꞌ: