Dxecáꞌa Jesús chazrinnu benneꞌ xelaque̱ꞌ gubáz chee̱ꞌ
10
Nadxa Jesús bláwizre̱ꞌ chazrinnu benneꞌ caꞌ dxusé̱dene̱ꞌ,
naꞌ bnézruje̱ꞌ le̱ꞌ xel-laꞌ dxenná bea chee̱ xelexebéaje̱ꞌ beꞌ xriwe̱ꞌ caꞌ,
ne chee̱ xelexexune̱ꞌ bénneache zaj xuꞌe̱ tu tu cueꞌ xízrawe̱ꞌ ca da dxelezaque̱ꞌ.
2 Caní zaj le̱ chazrinnu benneꞌ gubáz caꞌ chee̱ Jesús:
Benneꞌ nedxu le̱ꞌ Simón,
ne lé̱queze̱ꞌ Pedro.
Xetúe̱ꞌ naque̱ꞌ benneꞌ biche Pedro,
le̱ꞌ Andrés.
Xechupe̱ꞌ zaj le̱ꞌ Jacobo,
ne Juan,
benneꞌ zaj naque̱ꞌ zriꞌine Zebedeo.
3 Xezícala benneꞌ caꞌ zaj le̱ꞌ Felipe,
ne Bartolomé,
ne Tomás.
Xetue̱ꞌ le̱ꞌ Mateo,
benneꞌ wechizruj chee̱ xe̱zre.
Xetue̱ꞌ le̱ꞌ Jacobo,
zriꞌine Alfeo.
Xetue̱ꞌ le̱ꞌ Lebeo,
benneꞌ lé̱queze̱ꞌ Tadeo.
4 Xetúe̱ꞌ le̱ꞌ Simón,
benneꞌ dxeꞌe̱ gunne xue chee̱ xe̱zr la xu Israel.
Xetúe̱ꞌ le̱ꞌ Judas Iscariote,
bénneaꞌ gudée̱ꞌ Jesús lu naꞌ benneꞌ dxeledábague̱ꞌ Le̱ꞌ.
Dxesel-la Jesús benneꞌ gubáz chee̱ꞌ caꞌ cheajlezenne̱ꞌ bénneache xrtizre̱ꞌe̱
5 Nadxa gusel-la Jesús benneꞌ chazrinnu caní.
Guzre̱ꞌ le̱ꞌ:
―Quebe cheajle naga zaj zraꞌ benneꞌ quebe zaj naque̱ꞌ judío,
ne quebe chuꞌule xe̱zre caꞌ zaj nababa Samaria.
6 Le chjaca naga zaj zraꞌ benneꞌ Israel zaj naque̱ꞌ ca zrilaꞌ zaj nanítebaꞌ.
7 Le chjaca cuꞌule lban,
xe̱le bénneache ba bzrin gáguze zra nna bea Dios lu xe̱zr la xu nigá.
8 Le xexún benneꞌ zaj xuꞌe̱ we̱ꞌ guzruꞌ,
ne benneꞌ bila xízrawe̱ꞌ dxeléꞌene̱ꞌ.
Le gusebán benneꞌ gate.
Le xebéaj beꞌ xriwe̱ꞌ da zaj xuꞌu bénneache.
Cáꞌaze guzile xel-laꞌ dxenná bea nigá,
naꞌ cáꞌaze le guchine na,
quebe bi sile.
9 ’Quebe gúale dumí oro,
ne dumí plata,
ne dumí lase.
10 Quebe gúale xixruj xeta da gágule la neza.
Quebe gúale xetú cueꞌ zra lánale,
ne zrélale,
ne xaga da gúxrule.
Benneꞌ we̱n zrin wazrúequeze̱ꞌ da gawe̱ꞌ.
11 ’Gate naꞌ zrinle leꞌe tu xe̱zre zren u tu xé̱zredauꞌ,
le quilaj naꞌ tu benneꞌ du lazreꞌ,
naꞌ le xegáꞌana lizre̱ꞌ ca zrindxa zra xezaꞌale naꞌ.
12 Gate naꞌ chuꞌule lu xuꞌu naꞌ,
le xe̱ bénneaꞌ naca lizre̱ꞌ naꞌ:
“Xela dxebeza zri lazreꞌ suale̱ na leꞌe.”
13 Che benneꞌ caꞌ zaj naca chee̱ꞌ xelezíꞌe̱ xel-laꞌ ba láꞌana caní,
le gucáꞌana cáꞌaze na.
Che quebe zaj naca chee̱ꞌ xelezíꞌe̱ da nigá,
naꞌ quebe gataꞌ chee̱ꞌ.
14 Che quebe lataj dxelune̱ꞌ leꞌe,
ne quebe dxelenne̱ꞌ chee̱le,
le xedxúaj lu xuꞌu naꞌ u lu xe̱zre naꞌ,
naꞌ le xebibe bxrtedu naꞌ zria níꞌale.
15 Da li dxapaꞌ leꞌe,
ca zrin zra guchiꞌa Dios,
Dios gundxe̱ꞌ da ba xaꞌ chee̱ benneꞌ xe̱zre naꞌ quez ca da gune̱ꞌ chee̱ benneꞌ Sodoma,
ne benneꞌ Gomorra,
xe̱zre caꞌ guzría xiꞌe̱.
Xelebé nawe̱ꞌ bi caꞌ chee̱ Jesús
16 Naꞌ gunná Jesús:
―Le naꞌ xque nigá.
Nedaꞌ dxesel-laꞌ leꞌe,
gácale ca zrilaꞌ zaj zrabaꞌ ládujla becuꞌ xiꞌa caꞌ.
Chee̱ le̱ naꞌ,
le gaca sina ca zaj naca be̱laꞌ,
san le gaca dxexruj lazreꞌ ca zaj naca bgúgudu caꞌ.
17 Le guxúe cuínale.
Zaj zraꞌ benneꞌ xuludée̱ꞌ leꞌe lu naꞌ benneꞌ xuꞌu laweꞌ,
ne xuluzálaje̱ꞌ leꞌe lu xuꞌu naga dxulucáꞌana szrene̱ꞌ Dios.
18 Cáꞌanqueze weleché̱ꞌe̱ leꞌe lau benneꞌ xuꞌu laweꞌ caꞌ,
ne lau benneꞌ dxelenná bea laweꞌ da nácale chiaꞌ nedaꞌ.
Caꞌan gaca guchálajle ca naca chiaꞌ nedaꞌ lau benneꞌ caꞌ,
ne lau benneꞌ quebe zaj naque̱ꞌ judío.
19 Gate naꞌ xuludée̱ꞌ leꞌe lu naꞌ benneꞌ dxuchiꞌa da dxaca,
quebe gunne xue cueꞌle ca da nnale u ájala guchálajle,
laweꞌ da gate zrin zra guchálajle,
Dios gunne̱ꞌ ca da guchálajle.
20 Quegá leꞌeze guchálajle,
laweꞌ da Beꞌ Láꞌazxa chee̱ Dios guchálaje̱ꞌ lu dxúꞌale.
21 ’Xuludé bénneache benneꞌ bíchequeze̱ꞌ lu naꞌ benneꞌ xelútie̱ꞌ le̱ꞌ.
Cáꞌanqueze xra xrna xuludée̱ꞌ zríꞌine̱ꞌ,
naꞌ zríꞌine̱ꞌ caꞌ xeledábagabeꞌ xra xrnáquezebeꞌ chee̱ xelátie̱ꞌ.
22 Xúgute̱ bénneache xelezré̱ꞌe̱ leꞌe laweꞌ da nácale chiaꞌ nedaꞌ,
san bénneaꞌ guxru chache̱ꞌ dizraꞌ chee̱ Dios ca zrin zra cheajsé̱ chee̱ꞌ,
la bénneaꞌ.
23 Gate xelebé nawe̱ꞌ leꞌe tu xe̱zre,
le xuzrunnuj xetú xe̱zre.
Da li nedaꞌ,
Benneꞌ Gulje̱ꞌ Bénneache,
dxapaꞌ leꞌe,
xidaꞌ nédxula ca quebe ne tache tale xúgute̱ xe̱zre chee̱ benneꞌ Israel.
24 ’Netú benneꞌ quebe naque̱ꞌ szrendxa ca benneꞌ dxusé̱dene̱ꞌ le̱ꞌ.
Cáꞌanqueze netú benneꞌ we̱n zrin quebe naque̱ꞌ szrendxa ca xrane̱ꞌ.
25 Tu benneꞌ dxuse̱de dxal-laꞌ gun ziꞌ lazre̱ꞌ gaque̱ꞌ ca naca benneꞌ dxusé̱dene̱ꞌ le̱ꞌ,
naꞌ benneꞌ we̱n zrin dxal-laꞌ gun ziꞌ lazre̱ꞌ gaque̱ꞌ ca naca xrane̱ꞌ.
Che benneꞌ naque̱ꞌ xrane xuꞌu dxelé̱ꞌe̱ le̱ꞌ Beelzebú,
da xriwe̱ꞌ,
chezradxa xelenné̱ꞌ chee̱ bi chee̱ꞌ caꞌ.
¿Núzraqueze dxal-laꞌ zrébedxu?
26 Naꞌ gunná Jesús:
―Chee̱ le̱ naꞌ,
quebe zrébele bénneache.
Xúgute̱ da bagácheze gaca béaqueze na,
naꞌ xúgute̱ da dxelaca ga nagache guléꞌe láuqueze na.
27 Da nigá dxapaꞌ leꞌe lu da chul-la,
le guchalaj na te zra.
Da dxapaꞌ leꞌe bagácheze,
le nne̱ zizraj chee̱ xelén xúgute̱ benneꞌ.
28 Quebe zrébele benneꞌ xelútie̱ꞌ be̱l-laꞌ dxen chee̱le.
Quebe xelezéquene̱ꞌ xelútie̱ꞌ bénneꞌdu xuꞌule.
Le zrebe Dios.
Le̱ꞌ dxezéquene̱ꞌ guzría xiꞌe̱ be̱l-laꞌ dxen chee̱le,
ne bénneꞌdu xuꞌule lu lataj ba xaꞌ.
29 ’Dxelútiꞌe̱ chupa bxínnedu caꞌ nen tu dumídauꞌ.
Netubaꞌ quebe gátebaꞌ chee̱ quebe ne güe lataj Xrale.
30 Cáꞌanqueze xicha xíchajle,
xúgute̱ na zaj nababa na.
31 Chee̱ le̱ naꞌ,
quebe zrébele.
Zácadxale leꞌe quézcala be̱ zan bxínnedu caꞌ.
Dxal-laꞌ xeché̱bedxu nácadxu chee̱ Jesucristo
32 Naꞌ gunná Jesús:
―Xúgute̱ benneꞌ caꞌ dxelexeche̱be̱ꞌ zaj naque̱ꞌ chiaꞌ nedaꞌ lau bénneache,
cáꞌanqueze nedaꞌ weché̱bequezaꞌ zaj naque̱ꞌ chiaꞌ nedaꞌ lau Xraꞌ zue̱ꞌ xabáa.
33 Benneꞌ caꞌ quebe dxelexeche̱be̱ꞌ zaj naque̱ꞌ chiaꞌ lau bénneache,
nédaꞌquezaꞌ québequeze xeche̱baꞌ zaj naque̱ꞌ chiaꞌ lau Xraꞌ zue̱ꞌ xabáa.
Da naca Jesús naca na tu da dxun na chupa laꞌa bénneache
34 Naꞌ gunná Jesús:
―Quebe guéquele blaꞌa nedaꞌ chee̱ guzúaꞌ xel-laꞌ dxebeza zri lazreꞌ ládujla bénneache.
Blaꞌa nedaꞌ,
quegá chee̱ guzúaꞌ xel-laꞌ dxebeza zri lazreꞌ,
san chee̱ guzúaꞌ wedil-la.
35 Blaꞌa nedaꞌ chee̱ gunaꞌ tábagaꞌ tu benneꞌ xre̱ꞌ,
ne chee̱ gunaꞌ tábagaꞌ tu bi nuꞌula xrnabeꞌ,
ne chee̱ gunaꞌ tábagaꞌ tu zruꞌa lizre̱ꞌ tau zríꞌine̱ꞌ.
36 Caꞌan gaca,
tu tu benneꞌ tíl-lale̱ xrtía ljwezre̱ꞌ le̱ꞌ.
37 ’Che tu benneꞌ nazríꞌidxene̱ꞌ xra xrne̱ꞌe̱ quezca nedaꞌ,
quebe naca chee̱ꞌ gaque̱ꞌ chiaꞌ,
naꞌ che nazríꞌidxene̱ꞌ bi chee̱ꞌ caꞌ quezca nedaꞌ,
quebe naca chee̱ꞌ gaque̱ꞌ chiaꞌ.
38 Che tu benneꞌ quebe gun cuine̱ꞌ ca tu benneꞌ zéajte̱ꞌe̱ le̱ꞌe̱ xaga béguaj,
ne gune̱ꞌ nedaꞌ tuze,
quebe naca chee̱ꞌ gaque̱ꞌ chiaꞌ.
39 Benneꞌ dxaca lazre̱ꞌ gapa chiꞌe̱ xel-laꞌ nabán chee̱ꞌ gunitie̱ꞌ na.
Bénneaꞌ zúatequeze gudée̱ꞌ xel-laꞌ nabán chee̱ꞌ ne̱ chiaꞌ nedaꞌ,
guselé̱ꞌ xel-laꞌ nabán chee̱ꞌ.
Da gunna Dios dxiꞌu
(Mr. 9.41)
40 Naꞌ gunná Jesús:
―Che tu benneꞌ gape̱ꞌ leꞌe ba láꞌana,
nédaꞌqueze gape̱ꞌ ba láꞌana,
naꞌ bénneaꞌ dxape̱ꞌ nedaꞌ ba láꞌana,
dxápaqueze̱ꞌ ba láꞌana Dios,
Bénneaꞌ gusel-le̱ꞌ nedaꞌ.
41 Che tu benneꞌ gape̱ꞌ ba láꞌana tu benneꞌ dxuchalaje̱ꞌ waláz chee̱ Dios laweꞌ da ze̱ꞌe̱ waláz chee̱ Dios,
benneꞌ nigá wazíꞌqueze̱ꞌ tuze ca da siꞌ bénneaꞌ dxuchálaje̱ꞌ waláz chee̱ Dios.
Naꞌ che tu benneꞌ gape̱ꞌ ba láꞌana tu benneꞌ xrlátaje laweꞌ da naque̱ꞌ benneꞌ xrlátaje,
benneꞌ nigá wazíꞌqueze̱ꞌ tuze ca da siꞌ benneꞌ xrlátaje naꞌ.
42 Nútete̱ze benneꞌ gunézruje̱ꞌ tu zrigaꞌ nisa zaga da xiꞌaj tu bidu caní laweꞌ da naque̱ꞌ chiaꞌ nedaꞌ,
da líqueze waziꞌe̱ da gunezruj Dios le̱ꞌ.