Jesús dxexune̱ꞌ tu benneꞌ de̱ xiꞌ ca naca be̱l-laꞌ dxen chee̱ꞌ
14
Tu zra dxulupáꞌana benneꞌ judío caꞌ guxíaj Jesús zeajtawe̱ꞌ lizre tu benneꞌ blau chee̱ benneꞌ fariseo caꞌ,
naꞌ benneꞌ fariseo caꞌ dxuluzuzre̱ꞌ Jesús bi gune̱ꞌ.
2 Zúaqueze lau Jesús tu benneꞌ de̱ xiꞌ ca naca be̱l-laꞌ dxen chee̱ꞌ.
3 Nadxa Jesús bche̱be̱ꞌ benneꞌ caꞌ dxuluxuzájle̱ꞌe̱ da nadxixruj bea na,
ne benneꞌ fariseo caꞌ,
gunné̱ꞌ:
―¿Waca nu benneꞌ xexune̱ꞌ benneꞌ we̱ꞌ lu zra dxupáꞌanadxu,
che cabí?
4 Benneꞌ caꞌ gulezúe̱ꞌ zrize.
Nadxa Jesús guqué̱ꞌe̱ benneꞌ we̱ꞌ naꞌ,
ne bexune̱ꞌ le̱ꞌ,
naꞌ guzre̱ꞌ le̱ꞌ xexíaje̱ꞌ.
5 Nadxa guzre̱ꞌ benneꞌ fariseo caꞌ:
―¿Núlale leꞌe,
che be̱zre chee̱le u bia chee̱le bíxrebaꞌ tu lu xe̱dxu,
quebe xebéajle-baꞌ zra náꞌqueze lácala naca zra dxupáꞌanadxu?
6 Quebe bi guca xelexeche̱be̱ꞌ.
Benneꞌ zaj zre̱ꞌe̱ laní chee̱ wechaga naꞌ
7 Gate bleꞌe Jesús ca dxelún benneꞌ caꞌ,
dxelebéꞌe̱ lataj blaudxa ga dxelawe̱ꞌ,
naꞌ bchálaje̱ꞌ da dxuléꞌe na,
dxenné̱ꞌ:
8 ―Gate tu benneꞌ dxenné̱ꞌ lueꞌ laní chee̱ wechaga naꞌ,
quebe cueꞌu lataj blau,
laweꞌ da che wazá tu benneꞌ nácadxe̱ꞌ blau ca lueꞌ,
9 naꞌ bénneaꞌ gunné̱ꞌ dxúpate̱le xide̱ꞌ xe̱ꞌe̱ lueꞌ:
“Bnezruj lataj nigá benneꞌ nigá.”
Nadxa gun na ba xen xexíajuꞌ lataj bzé̱bedxa lu xel-la stuꞌ.
10 Naꞌa,
gate nu benneꞌ nne̱ꞌ lueꞌ,
gudxéꞌe lataj bzé̱bedxa,
chee̱ gate za bénneaꞌ gunné̱ꞌ lueꞌ,
wanné̱ꞌ:
“Bi ljwezraꞌ,
gudé nigala naga nácadxa blau.”
Caꞌan gaca,
xegáꞌanuꞌ szren lau benneꞌ caꞌ zaj zre̱ꞌe̱ dxelágule̱ne̱ꞌ lueꞌ.
11 Benneꞌ dxucáꞌana szren cuine̱ꞌ,
wexéxrujla bénneaꞌ,
naꞌ benneꞌ dxucáꞌana baxacheꞌ cuine̱ꞌ wegáꞌana szrénqueze̱ꞌ.
12 Nadxa Jesús guzre̱ꞌ benneꞌ naꞌ gunné̱ꞌ Le̱ꞌ:
―Gate gunézrujuꞌ tu zrue u tu xrcheꞌ quebe nneuꞌ bi ljwezruꞌ caꞌ,
ne bi bichuꞌ caꞌ,
ne xrtia ljwezruꞌ,
ne benneꞌ walízr chiuꞌ caꞌ zaj nape̱ꞌ da gunníꞌa,
laweꞌ da benneꞌ caní welenné̱queze̱ꞌ lueꞌ,
naꞌ zruéꞌequeznuꞌ da xelexexunne̱ꞌ chiuꞌ.
13 Gate dxunuꞌ tu laní,
gunné̱ benneꞌ xacheꞌ caꞌ,
ne benneꞌ zaj nadxugu niꞌa ne̱ꞌe̱,
ne benneꞌ zrinnaj caꞌ,
ne benneꞌ la chul-la caꞌ.
14 Caní gaca tu da ba neza chiuꞌ,
laweꞌ da benneꞌ caní quebe gaca xelexexunne̱ꞌ caꞌ chiuꞌ,
naꞌ wazruéꞌenuꞌ lazrjuꞌ gate xelexebán benneꞌ xrlátaje caꞌ.
Da dxuléꞌe na ca naca chee̱ tu xrcheꞌ zren
15 Gate ben tu benneꞌ dxágule̱ Le̱ꞌ da naꞌ,
naꞌ guzre̱ꞌ Jesús:
―Ba neza zrente̱ naca na chee̱ benneꞌ gawe̱ꞌ xeta naga dxenná bea Dios.
16 Jesús guzre̱ꞌ le̱ꞌ:
―Tu benneꞌ guluꞌe̱ tu xrcheꞌ zren,
naꞌ gunné̱ꞌ benneꞌ zan.
17 Ca bzrin zra xelawe̱ꞌ xrcheꞌ naꞌ,
gusél-le̱ꞌ we̱n zrin chee̱ꞌ chee̱ cheaje̱zre̱ꞌ benneꞌ caꞌ gunné̱ꞌ:
“Le da,
laweꞌ da ba nuseniꞌa da gágudxu.”
18 Xúgute̱ꞌ gulezú lawe̱ꞌ dxelenabe̱ꞌ guꞌe̱ le̱ꞌ lataj quebe xelide̱ꞌ.
Benneꞌ nedxu gunné̱ꞌ:
“Za bezíteaꞌ tu cueꞌ xe̱zr la xu chiaꞌ,
naꞌ dxal-laꞌ cheajnnáꞌa na.
Dxataꞌ xuedaꞌ lueꞌ si zrenuꞌ chiaꞌ.”
19 Xetúe̱ꞌ gunné̱ꞌ:
“Za bezíteaꞌ gazxuꞌ cueꞌ be̱zr chiaꞌ,
naꞌ guxúaꞌ aja xelunbaꞌ.
Dxataꞌ xuedaꞌ lueꞌ si zrenuꞌ chiaꞌ.”
20 Naꞌ xetúe̱ꞌ gunné̱ꞌ:
“Za bchágate̱ naꞌa,
naꞌ quebe gaca xidaꞌ.”
21 Gate bezrín benneꞌ we̱n zrin naꞌ,
guzre̱ꞌ xrane̱ꞌ ca naca da nigá.
Nadxa bzraꞌa xrane̱ꞌ naꞌ,
naꞌ guzre̱ꞌ we̱n zrin naꞌ:
“Guxíaj naꞌa la neza caꞌ,
ne neza chee̱ xe̱zre nigá,
naꞌ xeajxríꞌ xúgute̱ benneꞌ xacheꞌ caꞌ,
ne benneꞌ zaj nadxugu niꞌa ne̱ꞌe̱,
ne benneꞌ zrinnaj caꞌ,
ne benneꞌ la chul-la caꞌ.”
22 Ca gudé naꞌ gunná benneꞌ we̱n zrin naꞌ:
“Xran,
ba be̱naꞌ ca gunnáuꞌ,
naꞌ ne de̱dxa lataj.”
23 Nadxa gunná xrane̱ꞌ naꞌ:
“Guxíaj naꞌa la neza caꞌ,
ne neza lásedu caꞌ,
naꞌ xeajé̱n ba xen xelelé̱ꞌe̱,
chee̱ chaꞌ lizraꞌ nigá.
24 Dxapaꞌ leꞌe,
netú benneꞌ caꞌ gunnéaꞌ nédxula quebe xelawe̱ꞌ xrcheꞌ chiaꞌ.”
Xel-la ziꞌ da te benneꞌ chéajle̱ne̱ꞌ Jesús
25 Benneꞌ zan zjácale̱ne̱ꞌ Jesús,
naꞌ Le̱ꞌ bexéchaje̱ꞌ,
naꞌ guzre̱ꞌ benneꞌ caꞌ:
26 ―Che nu benneꞌ ze̱ꞌe̱ naga zuaꞌ,
ne quebe guzúe̱ꞌ chaláꞌala xre̱ꞌ,
ne xrne̱ꞌe̱,
ne zruꞌule̱ꞌ,
ne zríꞌine̱ꞌ caꞌ,
ne bi biche̱ꞌ caꞌ,
ne bi zane̱ꞌ caꞌ,
ne xel-la nabán chee̱ꞌ,
quebe gaca gaque̱ꞌ nedaꞌ tuze.
27 Benneꞌ quebe sáꞌle̱ne̱ꞌ nedaꞌ lácala dxal-laꞌ te̱ꞌe̱ xaga béguaj,
quebe gaca gaque̱ꞌ nedaꞌ tuze.
28 Che tu benneꞌ ládujla leꞌe dxaca lazre̱ꞌ gune̱ꞌ tu xuꞌu sibe,
¿quebe cueꞌe̱ nedxu gune̱ꞌ xrbaba chee̱ꞌ che wazúene̱ꞌ xuzrte̱ꞌ na?
29 Che quebe gune̱ꞌ caní,
ne che cueche̱ꞌ lane na,
naꞌ ca te naꞌ quebe suene̱ꞌ xuzre̱ꞌ na,
naꞌ xúgute̱ benneꞌ xeleléꞌene̱ꞌ na xelezú lawe̱ꞌ xelún le̱ꞌ chee̱ bénneaꞌ,
30 naꞌ xelenné̱ꞌ:
“Benneꞌ nigá guzú lawe̱ꞌ dxune̱ꞌ tu xuꞌu.
Quebe guque̱ꞌ gune̱ꞌ ca naca.”
31 Che tu benneꞌ wenná bea dxal-laꞌ cheajtíl-lale̱ne̱ꞌ xetú benneꞌ wenná bea,
¿quebe cueꞌe̱ gune̱ꞌ xrbaba chee̱ꞌ che wazúene̱ꞌ nen tu gaxúa gaxúa benneꞌ dxjaque̱ꞌ wedil-la cheajtíl-lale̱ne̱ꞌ bénneaꞌ zaꞌ nen chupa gaxúa gaxúa benneꞌ dxjaque̱ꞌ wedil-la?
32 Che quebe séquene̱ꞌ,
gate benneꞌ wenná bea naꞌ xetú ne ze̱ꞌe̱ zituꞌ,
naꞌ sel-le̱ꞌ gubáz chee̱ꞌ caꞌ xelenabe̱ꞌ gataꞌ xel-la dxebeza zri lazreꞌ.
33 Caꞌ naca na,
nútete̱ze benneꞌ ládujla leꞌe,
che quebe gusane̱ꞌ ca naca da nape̱ꞌ,
quebe gaca gaque̱ꞌ nedaꞌ tuze.
Zedeꞌ da québedxa naca na snaꞌa
34 Naꞌ gunná Jesús: