9
Cáꞌanqueze guzre Jesús benneꞌ caꞌ:
―Da li dxapaꞌ leꞌe,
zaj zraꞌ nigá benneꞌ quebe xelatie̱ꞌ nédxula ca xeleléꞌene̱ꞌ xida xel-la dxenná bea chee̱ Dios nen xel-la waca chee̱ꞌ.
Ca guca gate bcha ca gunnáꞌ Jesús
2 Ca gudé xrupa zra,
guché̱ Jesús Pedro,
ne Jacobo,
ne Juan,
naꞌ guxíajle̱ne̱ꞌ benneꞌ canize tu lu xiꞌa sibe.
Naꞌ bcha ca gunnáꞌ Jesús lau benneꞌ caꞌ.
3 Zra lana Jesús bexaca na chiche ca bezxeꞌ da dxágute̱ na laudxu.
Quegá nu chiláꞌ benneꞌ lu xe̱zr la xu gaca quibe̱ꞌ zra lane̱ꞌ chee̱ xegáꞌana na chiche ca guca zra lana Jesús.
4 Naꞌ benneꞌ caꞌ dxuse̱de Jesús beleléꞌene̱ꞌ Elías,
ne Moisés,
benneꞌ gulate nédxudaute̱,
dxuluchálajle̱ne̱ꞌ Jesús.
5 Pedro guzre̱ꞌ Jesús:
―Benneꞌ wese̱de,
cháwele̱ꞌe̱ naca zradxu nigá.
Guntuꞌ chunna xuꞌu lágadauꞌ,
tu chiuꞌ,
ne tu chee̱ Moisés,
ne tu chee̱ Elías.
6 Caní gunná Pedro laweꞌ da dxelezrebe benneꞌ caꞌ dxuse̱de Jesús,
naꞌ Pedro quebe nézene̱ꞌ ca da dxenné̱ꞌ.
7 Nadxa betaj tu beuj naga zaj zre̱ꞌe̱,
da bcache na le̱ꞌ,
naꞌ lu beuj naꞌ belenne̱ꞌ tu chiꞌi benneꞌ,
gunné̱ꞌ:
―Benneꞌ nigá naque̱ꞌ Zriꞌinaꞌ nazríꞌite̱ lazraꞌ.
Le xen da dxenné̱ꞌ.
8 Gate gulenné̱ꞌe̱,
québedxa nu naláꞌ nen le̱ꞌ,
san tuze Jesús.
9 Dxácate̱ dxelexétaje̱ꞌ lu xiꞌa naꞌ,
gunná beꞌe Jesús benneꞌ caꞌ quebe nu xuluchálajle̱ne̱ꞌ ca naca da beleléꞌene̱ꞌ gate te naꞌ xebán Benneꞌ Gulje̱ꞌ Bénneache ládujla benneꞌ gate.
10 Chee̱ le̱ naꞌ gulezúe̱ꞌ zrize ca naca da ba guca.
Buluche̱be ljwezre̱ꞌ:
―¿Bizra zéaje̱ da naꞌ,
xebane̱ꞌ ládujla benneꞌ gate?
11 Nadxa buluche̱be̱ꞌ Jesús:
―¿Bizr chee̱ naꞌ dxelenná benneꞌ caꞌ dxuluxuzájle̱ꞌe̱ da nadxixruj bea Dios dxal-laꞌ xeláꞌ Elías nédxula ca Cristo?
12 Beche̱be Jesús,
naꞌ guzre̱ꞌ le̱ꞌ:
―Da li xeláꞌ Elías nedxu,
ne gucáꞌana chawe̱ꞌ xúgute̱.
¿Bizra dxenná da naxúaj na lu xiche chee̱ Dios ca gaca chiaꞌ nedaꞌ,
Benneꞌ Gulje̱ꞌ Bénneache?
Dxenná na da zan da sacaꞌ,
naꞌ xuluzúa bénneache nedaꞌ chaláꞌala.
13 Nedaꞌ dxapaꞌ leꞌe,
ba blaꞌ Elías,
naꞌ belune̱ꞌ chee̱ꞌ ca naca xúgute̱ da gulaca lazre̱ꞌ ca da dxenná na lu xiche chee̱ Dios ca da dxal-laꞌ gaca chee̱ꞌ.
Dxexún Jesús tu benneꞌ cuideꞌ xuꞌubeꞌ beꞌ xriwe̱ꞌ
14 Ca gudé naꞌ belexezrine̱ꞌ naga zaj zraꞌ xezícadxa benneꞌ caꞌ dxuse̱de Jesús,
naꞌ beleléꞌene̱ꞌ benneꞌ zan zaj naxéchaje̱ꞌ le̱ꞌ,
ne zaj zráqueze naꞌ benneꞌ dxuluxuzájle̱ꞌe̱ da nadxixruj bea Dios,
naꞌ dxulutíl-lale̱ne̱ꞌ le̱ꞌ dizraꞌ.
Muchacho con el espíritu impuro (Marcos 9.14-29)
15 Gate beleléꞌene̱ꞌ Jesús,
naꞌ xúgute̱ꞌ belexebánene̱ꞌ,
naꞌ gusíꞌaca chégüe̱ꞌ naga zua Jesús,
ne bulugape̱ꞌ Le̱ꞌ diuzre.
16 Caꞌan guca,
Jesús bche̱be̱ꞌ benneꞌ caꞌ:
―¿Bizra naꞌ dxedíl-lale̱le benneꞌ caꞌ?
17 Nadxa tu benneꞌ ze̱ꞌ ga naꞌ beche̱be̱ꞌ:
―Benneꞌ wese̱de,
nache̱ꞌa zriꞌinaꞌ nigá chee̱ xexunuꞌ-beꞌ laweꞌ da xuꞌubeꞌ beꞌ xriwe̱ꞌ da ba nun na le̱beꞌ bi quebe dxaca nne̱beꞌ.
18 Gátete̱ze naꞌ dxuꞌubeꞌ da xriwe̱ꞌ,
naꞌ dxe̱l-la na le̱beꞌ,
ne dxin na le̱beꞌ lu xu.
Dxezría bzrinaꞌ xúꞌabeꞌ,
ne dxagu lázxabeꞌ.
Chee̱ le̱ naꞌ ba dxéxrujle̱ꞌe̱beꞌ.
Ba gunabaꞌ benneꞌ caꞌ dxusé̱denuꞌ xelexebéaje̱ꞌ beꞌ xriwe̱ꞌ naꞌ,
san quebe gulezéquene̱ꞌ.
19 Beche̱be Jesús:
―Leꞌe,
benneꞌ quebe dxéajle̱le chiaꞌ.
¿Ájate̱ dxal-laꞌ súale̱naꞌ leꞌe?
¿Ájate̱ dxal-laꞌ gacaꞌ benneꞌ zren lazreꞌ nen leꞌe?
Le cheajxríꞌ bi cuideꞌ naꞌ nigá.
20 Naꞌ xeajlexríꞌe̱-beꞌ.
Gate beꞌ xriwe̱ꞌ naꞌ bleꞌe na Jesús,
naꞌ be̱n na gudel-la chunaꞌ bi cuideꞌ naꞌ,
ne gudinna le̱beꞌ xu,
naꞌ dxebixre dxetúl-labeꞌ lu xu,
ne guzría bzrinaꞌ dxúꞌabeꞌ.
21 Nadxa bche̱be Jesús xrabeꞌ:
―¿Bátate̱ dxezácabeꞌ caní?
Gunná xrabeꞌ:
―Gate nácate̱beꞌ bidauꞌ.
22 Zaneꞌ lasa beꞌ xriwe̱ꞌ naꞌ dxugúꞌu na le̱beꞌ lu xiꞌ,
ne lu nisa chee̱ gute na le̱beꞌ.
Che wazéquenuꞌ bi gunuꞌ chee̱beꞌ,
bexache lazreꞌ netuꞌ,
ne gúcale̱ netuꞌ.
23 Naꞌ guzre Jesús le̱ꞌ:
―Che wazéquenuꞌ lueꞌ chéajle̱ꞌu chiaꞌ,
xúgute̱ wazeque chee̱ benneꞌ dxéajle̱ꞌe̱ chiaꞌ.
24 Nadxa xra bi cuideꞌ nigá gunné̱ꞌ zizraj:
―Dxéajle̱ꞌa chiuꞌ.
Gúcale̱ nedaꞌ chee̱ chéajle̱dxaꞌ.
25 Gate bleꞌe Jesús dxelezraga benneꞌ zan,
naꞌ gudil-le̱ꞌ beꞌ xriwe̱ꞌ naꞌ,
dxenné̱ꞌ:
―Lueꞌ,
beꞌ xriwe̱ꞌ,
dxunuꞌ benneꞌ quebe dxaca nnie̱ꞌ,
ne cuezru,
nedaꞌ dxenná beꞌedaꞌ lueꞌ xedxúajuꞌ.
¡Bsan bi cuideꞌ nigá!
¡Québedxa xexúꞌu lu be̱l-laꞌ dxen chee̱beꞌ!
26 Naꞌ beꞌ xriwe̱ꞌ naꞌ gudxezre xaꞌa na,
ne be̱n na gudel-la chunaꞌ bi cuideꞌ naꞌ,
naꞌ bedxúaj na.
Naꞌ begáꞌanabeꞌ ca tu benneꞌ gate.
Caꞌan guca,
gulenná benneꞌ zan caꞌ:
―Ba gútebeꞌ.
27 Nadxa gucáꞌa Jesús naꞌbeꞌ,
bechise̱ꞌ-beꞌ.
Naꞌ benneꞌ cuideꞌ naꞌ beze̱beꞌ.
28 Nadxa guxúꞌu Jesús tu lu xuꞌu,
naꞌ benneꞌ caꞌ dxusé̱dene̱ꞌ buluche̱be̱ꞌ Le̱ꞌ naga zue̱ꞌ tuze̱ꞌ:
―¿Bizr chee̱ naꞌ quebe guzéquentuꞌ netuꞌ xebéajntuꞌ beꞌ xriwe̱ꞌ naꞌ?
29 Nadxa Jesús guzre̱ꞌ benneꞌ caꞌ:
―Ca naca beꞌ xriwe̱ꞌ caní séquele xebéajle na che nábale lau Dios,
ne gunle gubasa.
Jesús dxuchálaje̱ꞌ da xula ca gaca gate gatie̱ꞌ
30 Gate besíꞌaque̱ꞌ naga zaj zre̱ꞌe̱,
naꞌ belexedée̱ꞌ naga nababa Galilea.
Jesús quebe guca lazre̱ꞌ nu neze ga zue̱ꞌ,
31 laweꞌ da dxuzéajniꞌine̱ꞌ benneꞌ caꞌ dxusé̱dene̱ꞌ,
naꞌ guzre̱ꞌ le̱ꞌ:
―Zua tu benneꞌ gudée̱ꞌ nedaꞌ,
Benneꞌ Gulje̱ꞌ Bénneache,
lu naꞌ benneꞌ caꞌ dxeledábague̱ꞌ nedaꞌ,
naꞌ xelútie̱ꞌ nedaꞌ,
san gate gaca chunna zra natiaꞌ,
naꞌ xebanaꞌ.
32 Benneꞌ caꞌ quebe guléajniꞌine̱ꞌ ca da dxe̱ꞌe̱ le̱ꞌ,
ne belezrebe̱ꞌ xuluche̱be̱ꞌ Le̱ꞌ.
Nu benneꞌ naque̱ꞌ blau
33 Nadxa belezrine̱ꞌ lu xe̱zre Capernaum,
naꞌ gate zaj zre̱ꞌe̱ lu xuꞌu naꞌ,
bche̱be Jesús benneꞌ caꞌ dxusé̱dene̱ꞌ:
―¿Bizra dizraꞌ dxutíl-lale̱le ljwézrele zaꞌle la neza?
34 Gulezré̱ꞌe̱ zrize laweꞌ da bulutil-le̱ꞌ dizraꞌ la neza naꞌ che nule̱ꞌ nácadxe̱ꞌ benneꞌ blau.
35 Nadxa Jesús gudxéꞌe̱,
naꞌ gunné̱ꞌ benneꞌ chazrinnu,
benneꞌ caꞌ dxusé̱dene̱ꞌ,
naꞌ guzre̱ꞌ le̱ꞌ:
―Che núlale dxaca lázrele gácale benneꞌ blau,
dxal-laꞌ gácale ca benneꞌ bze̱be,
ne gunle zrin chee̱ xúgute̱ bénneache.
36 Nadxa guqué̱ꞌe̱ tu bidauꞌ,
naꞌ bzue̱ꞌ le̱beꞌ gachaj laweꞌ benneꞌ caꞌ.
Naꞌ bnide̱ꞌ-beꞌ,
ne guzre̱ꞌ benneꞌ caꞌ:
37 ―Benneꞌ naꞌ gape̱ꞌ ba láꞌana tu bidauꞌ ca bidu nigá laweꞌ da nazríꞌine̱ꞌ nedaꞌ,
bénneaꞌ gape̱ꞌ ba láꞌana nedaꞌ,
naꞌ bénneaꞌ gape̱ꞌ ba láꞌana nedaꞌ,
quegá tuzaꞌ nedaꞌ gape̱ꞌ ba láꞌana,
cáꞌanqueze gape̱ꞌ ba láꞌana Xraꞌ nasel-le̱ꞌ nedaꞌ.
Benneꞌ quebe dxedábague̱ꞌ dxiꞌu, dxácale̱ne̱ꞌ dxiꞌu
38 Nadxa Juan guzre̱ꞌ Jesús:
―Benneꞌ Wese̱de,
bléꞌentuꞌ tu benneꞌ dxebéaje̱ꞌ beꞌ xriwe̱ꞌ da xuꞌu bénneache,
dxuchínene̱ꞌ Lauꞌ Lueꞌ,
san bénneaꞌ quebe dxune̱ꞌ dxiꞌu tu zren.
Chee̱ le̱ naꞌ gúzrentuꞌ le̱ꞌ québedxa gune̱ꞌ caꞌ.
39 Jesús guzre̱ꞌ benneꞌ caꞌ dxusé̱dene̱ꞌ:
―Quebe bi xe̱le le̱ꞌ.
Che nu benneꞌ gune̱ꞌ tu xel-la waca,
guchínene̱ꞌ Laꞌ nedaꞌ,
benneꞌ nigá quebe gaca nne̱ꞌ schanniꞌ chiaꞌ.
40 Caní naca na laweꞌ da benneꞌ quebe dxedábague̱ꞌ dxiꞌu,
dxácale̱ne̱ꞌ dxiꞌu.
41 Nútete̱ze benneꞌ gunne̱ꞌ leꞌe tu zrigaꞌ nisa ne̱ chee̱ Laꞌ nedaꞌ laweꞌ da nácale chiaꞌ nedaꞌ,
Cristo,
da líqueze dxenníaꞌ,
wazíꞌqueze̱ꞌ da dxal-laꞌ siꞌe̱.
Ca naca da dxun na dxiꞌu benneꞌ dul-la
42 Gunnadxa Jesús:
―Nútete̱ze benneꞌ guléꞌene̱ꞌ tu bidauꞌ chee̱ gunbeꞌ dul-la,
bidu naꞌ dxéajle̱beꞌ chiaꞌ,
cháwedxa guchéajdxu tu xiaj ziꞌi lba bénneaꞌ,
ne cheajchúꞌunadxu le̱ꞌ lu da situj chee̱ nísadauꞌ.
43 Che naꞌu dxun na gunuꞌ dul-la,
wendxa guchugu naꞌu naꞌ.
Cháwedxa xexúꞌu xabáa naga gaca banuꞌ nen tuze naꞌu quézcala xexíajuꞌ lataj ba xaꞌ nen dxúpate̱ naꞌu,
naga quebe xexula xiꞌ da xezacuꞌ.
44 Lataj ba xaꞌ naꞌ quebe xelate bzugaꞌ,
be̱ dxelágubaꞌ benneꞌ caꞌ dxelune̱ꞌ da cale̱la,
naꞌ xiꞌ naꞌ cabataꞌ xexúl-laqueze na.
45 Naꞌ che niꞌu dxun na gunuꞌ dul-la,
guchugu niꞌu naꞌ.
Cháwedxa xexúꞌu xabáa naga gaca banuꞌ nen tu niꞌu,
quézcala xexíajuꞌ lataj ba xaꞌ nen dxúpate̱ niꞌu,
naga quebe xexula xiꞌ.
46 Lataj ba xaꞌ naꞌ quebe xelate bzugaꞌ,
be̱ dxelágubaꞌ benneꞌ caꞌ dxelune̱ꞌ da cale̱la,
naꞌ xiꞌ naꞌ cabataꞌ xexúl-laqueze na.
47 Che xiaj lauꞌ dxun na gunuꞌ dul-la,
guleaj xiaj lauꞌ naꞌ.
Cháwedxa xexúꞌu naga dxenná bea Dios nen tuze xiaj lauꞌ,
quézcala xexíajuꞌ lataj ba xaꞌ nen dxúpate̱ xiaj lauꞌ.
48 Lataj ba xaꞌ naꞌ quebe xelate bzugaꞌ,
be̱ dxelágubaꞌ benneꞌ caꞌ dxelune̱ꞌ da cale̱la,
naꞌ xiꞌ naꞌ cabataꞌ xexúl-laqueze na.
49 ’Ca dxundxu gate dxugúꞌudxu zedeꞌ be̱laꞌ da guzáladxu lu xiꞌ chee̱ xegáꞌana chaweꞌ na,
caꞌan gaca chee̱ xúgute̱ benneꞌ.
Cáꞌanqueze dxugúꞌudxu zedeꞌ da dxuzézxedxu lau Dios.
50 Zedeꞌ naꞌ naca na da chaweꞌ,
san che xenite xel-la snaꞌa chee̱ na,
¿ájala gundxu chee̱ guchínedxu zedeꞌ naꞌ?
Le gaca leꞌe ca zedeꞌ chaweꞌ naꞌ,
ne le sua lu xel-la zri lázreꞌ tule nen xetule.