Ca naca da dxun na ga nabágadxu dul-la
17
Jesús guzre̱ꞌ benneꞌ caꞌ dxusé̱dene̱ꞌ:
―Welezúaqueze da xelún na xelebaga bénneache dul-la,
naꞌ edxugúa bénneaꞌ gune̱ꞌ da gun na xebaga benneꞌ xula dul-la.
2 Gácadxa chaweꞌ chee̱ bénneaꞌ che nu guchéaj xiaj xiche lbe̱ꞌ,
naꞌ chuꞌe̱ lu nísadauꞌ naga gátete̱ꞌ quézcala gune̱ꞌ da gun na xebaga bidu caní dul-la.
3 Le guxúe xanneꞌ cuínale.
’Che le saꞌ ljwezruꞌ gune̱ꞌ chiuꞌ da cale̱la,
bzéajniꞌine̱ꞌ,
naꞌ che xebíꞌi lazre̱ꞌ,
bnite lau chee̱ꞌ.
4 Lácala gune̱ꞌ chiuꞌ da cale̱la gazre lasa tu zra,
naꞌ gazre lasa xide̱ꞌ xe̱ꞌe̱ lueꞌ:
“Dxexebíꞌi lazraꞌ”,
dxal-laꞌ gunite lauꞌ chee̱ꞌ.
Desdicha Hacia Aquellos que Hagan Pecar a Otros
Xel-la waca chee̱ xel-la dxeajlí lazreꞌ
5 Benneꞌ gubáz caꞌ chee̱ Xránadxu gulé̱ꞌe̱ Le̱ꞌ:
―Be̱n ga cheajlí lázredxantuꞌ Dios.
6 Nadxa gunná Xránadxu:
―Che leꞌe zruéꞌele xel-la dxeajlí lazreꞌ,
lácala naca na láteze ca tu bínnedu chee̱ mostaza,
waca xe̱le xaga zrente̱ nigá:
“Gucuasa nigá,
ne xeajsúa lu nísadauꞌ,”
naꞌ xaga naꞌ guzúa na dizraꞌ chee̱le.
Da dxal-laꞌ gun benneꞌ we̱n zrin
7 ’Che tu benneꞌ ládujla leꞌe zua tu benneꞌ we̱n zrin chee̱ꞌ,
naꞌ xelé̱ꞌe̱ le̱ꞌe̱ xixreꞌ gate te gudée̱ꞌ be̱zre u guxúe̱ꞌ béadu caꞌ,
¿we̱ꞌe̱ benneꞌ we̱n zrin naꞌ:
“Gudé nigala,
gudxéꞌe gaguꞌ?”
8 Cabí,
san nne̱ꞌ:
“Bcueza da gawaꞌ,
ne gusíꞌ chaweꞌ le̱ꞌu chee̱ gaca caꞌu chiaꞌ da xiꞌaj gawaꞌ.
Te naꞌ waca xiꞌaj gaguꞌ lueꞌ.”
9 ¿We̱ꞌe̱ benneꞌ we̱n zrin naꞌ:
“Xcalenuꞌ”,
laweꞌ da be̱ne̱ꞌ da gunná beꞌe xrane̱ꞌ le̱ꞌ?
Cabí.
10 Cáꞌanqueze leꞌe,
gate xuzre gunle xúgute̱ da gunná beꞌe Dios leꞌe,
dxal-laꞌ nnale:
“Nácantuꞌ benneꞌ we̱n zrin quebe bi zaj zaca,
laweꞌ da quebe bi ne guntuꞌ da zréndxala ca naca da nabágantuꞌ.”
Jesús dxexune̱ꞌ chi benneꞌ zaj de̱ꞌe̱ we̱ꞌ guzruꞌ
11 Ca zexíaj Jesús zéaje̱ꞌ Jerusalén,
gudée̱ꞌ lu xe̱zr la xu chee̱ xe̱zre caꞌ zaj nababa Samaria,
ne xe̱zre caꞌ zaj nababa Galilea.
12 Gate bzrine̱ꞌ tu xé̱zredauꞌ,
bedajlechaga Le̱ꞌ chi benneꞌ zaj de̱ꞌe̱ we̱ꞌ guzruꞌ,
naꞌ belezé̱ꞌ zítuꞌla,
13 ne gulebezre xe̱ꞌe̱,
dxelenné̱ꞌ:
―Jesús,
Benneꞌ Wese̱de,
bexache lazreꞌ netuꞌ.
14 Gate bleꞌe Jesús le̱ꞌ,
naꞌ gunné̱ꞌ:
―Le chjaca le cheajluéꞌe cuínale lau bxruze caꞌ.
Dxácate̱ zjaque̱ꞌ naꞌ,
naꞌ belexexaque̱ꞌ chee̱ xízrawe̱ꞌ chee̱ꞌ.
15 Nadxa tu benneꞌ caꞌ,
gate guque béꞌene̱ꞌ ba bexaque̱ꞌ,
naꞌ bebiꞌe̱,
dxue láꞌane̱ꞌ Dios du lazre̱ꞌ.
16 Bzu zribe̱ꞌ lau Jesús,
ne gudíxrujte̱ꞌ lawe̱ꞌ lu xu,
dxe̱ꞌe̱ Le̱ꞌ:
“Xcalenuꞌ.”
Benneꞌ nigá naque̱ꞌ tu benneꞌ Samaria.
17 Nadxa gunná Jesús:
―¿Quegá chie̱ꞌ naꞌ belexexaque̱ꞌ lu xízrawe̱ꞌ naꞌ?
¿Gazra naꞌ xegué̱ꞌ?
18 ¿Tuze benneꞌ zituꞌ nigá beláꞌ güe láꞌane̱ꞌ Dios?
19 Nadxa Jesús guzre̱ꞌ benneꞌ naꞌ bexaque̱ꞌ:
―Bexasa,
bexíaj.
Ba bexacuꞌ laweꞌ da guxéajle̱ꞌu chiaꞌ.
Ca laꞌ xel-la dxenná bea chee̱ Dios
20 Benneꞌ fariseo caꞌ buluche̱be̱ꞌ Jesús bátala laꞌ xel-la dxenná bea chee̱ Dios,
naꞌ beche̱be Le̱ꞌ:
―Ca laꞌ xel-la dxenná bea chee̱ Dios quebe naca na da léꞌele.
21 Quegá nu nna:
“Nigá zua na”,
u “Naꞌ zua na”,
laweꞌ da ba zua luꞌule leꞌe xel-la dxenná bea chee̱ Dios.
22 Nadxa guzre̱ꞌ benneꞌ caꞌ dxusé̱dene̱ꞌ:
―Wazrín zra gate leꞌe gaca lázrele léꞌele tu zra zuaꞌ nedaꞌ,
Benneꞌ Gulje̱ꞌ Bénneache,
naꞌ quebe léꞌele na.
23 Che xelenná bénneache,
xelé̱ꞌe̱ leꞌe:
“Nigá zue̱ꞌ”,
u:
“Naꞌ zue̱ꞌ”,
quebe chéajle,
ne quebe gaule benneꞌ caꞌ.
24 Ca dxeajsúa xesa chaláꞌa zran xabáa,
naꞌ naláꞌte̱queze na xechaláꞌa zran xabáa,
caꞌan gaca gate xeláꞌ nedaꞌ,
Benneꞌ Gulje̱ꞌ Bénneache,
lu zra xeláꞌa nedaꞌ.
25 Nédxula dxal-laꞌ téle̱ꞌa xel-la ziꞌ,
naꞌ benneꞌ zaj zre̱ꞌe̱ lu zra naꞌa zra xuluzúe̱ꞌ nedaꞌ chaláꞌala.
26 Ca guca lu zra gate zua Noé,
cáꞌanqueze gaca lu zra gate xeláꞌa nedaꞌ,
Benneꞌ Gulje̱ꞌ Bénneache.
27 Lu zra naꞌ zua Noé guléꞌaj gulawe̱ꞌ,
ne buluchaga ne̱ꞌe̱,
ne bulunézruje̱ꞌ bi nuꞌula chee̱ꞌ caꞌ lu xel-la wechaga naꞌ,
cadxa bzrin zra guxúꞌu Noé lu da zren naꞌ da dxedá laweꞌ nísadauꞌ,
naꞌ gúcale̱ꞌe̱ xiuj,
naꞌ gulate xúgute̱ benneꞌ caꞌ.
28 Cáꞌanqueze guca lu zra zua Lot,
guléꞌaj gulawe̱ꞌ,
ne guláꞌawe̱ꞌ,
ne belútie̱ꞌ,
naꞌ gulaze̱ꞌ,
ne belune̱ꞌ lizre̱ꞌ,
29 naꞌ gate Lot bedxúaje̱ꞌ lu xe̱zre Sodoma,
naꞌ ca dxaca gate dxaca xiuj,
caꞌan guca be̱xruj xiꞌ,
ne da gache da dxuzézxele̱ꞌe zran xabáa,
ne bzria xi na ca naca benneꞌ caꞌ.
30 Caꞌan gaca lu zra xeláꞌa nedaꞌ,
Benneꞌ Gulje̱ꞌ Bénneache.
31 ’Lu zra naꞌ,
che nu benneꞌ ze̱ꞌ chjuꞌu chee̱ꞌ,
naꞌ da de̱ chee̱ꞌ zra na lu xuꞌu chee̱ꞌ naꞌ,
quebe dxal-laꞌ chuꞌe̱ cuéaje̱ꞌ na,
naꞌ che nu benneꞌ zue̱ꞌ le̱ꞌe̱ xixreꞌ,
quebe dxal-laꞌ xezrine̱ꞌ lizre̱ꞌ.
32 Le cheajsá lazreꞌ ca guca chee̱ zruꞌula Lot.
33 Benneꞌ dxaca lazre̱ꞌ gapa chiꞌe̱ xel-la nabán chee̱ꞌ gunitie̱ꞌ na,
naꞌ bénneaꞌ wdee̱ꞌ na,
wazruéꞌe bénneaꞌ xel-la nabán.
34 ’Dxapaꞌ leꞌe,
lu zre naꞌ,
chupa benneꞌ xelate̱ꞌ tu zren ga dxelase̱ꞌ.
Tue̱ꞌ xeché̱ꞌe̱,
naꞌ xetúe̱ꞌ xegáꞌane̱ꞌ.
35 Chupa nuꞌula xelezré̱ꞌe̱ dxelútue̱ꞌ.
Tue̱ꞌ xeché̱ꞌe̱,
naꞌ xetúe̱ꞌ xegáꞌane̱ꞌ.
36 Chupa benneꞌ xelezré̱ꞌe̱ le̱ꞌe̱ xixreꞌ.
Tue̱ꞌ xeché̱ꞌe̱,
naꞌ xetúe̱ꞌ xegáꞌane̱ꞌ.
37 Gate belén benneꞌ caꞌ da nigá,
naꞌ buluche̱be̱ꞌ Jesús:
―¿Gazra gaca caꞌ,
Xran?
Le̱ꞌ beche̱be̱ꞌ:
―Naga de̱ tu da nate,
naꞌ xeledúpaqueze laba caꞌ.