Da dxuléꞌe na ca naca chee̱ tu nuꞌula ba gute benneꞌ chee̱ꞌ, ne benneꞌ dxuchiꞌa da dxaca
18
Jesús bchálaje̱ꞌ da dxuléꞌe na ca naca chee̱ gusé̱dene̱ꞌ benneꞌ caꞌ dxal-laꞌ xuluwízrajtecaze̱ꞌ Dios,
ne quebe xelexebigue̱ꞌ.
2 Naꞌ guzre̱ꞌ benneꞌ caꞌ:
―Tu xe̱zre guzúa tu benneꞌ dxuchiꞌe̱ da dxaca,
naꞌ quebe gudape̱ꞌ ba láꞌana Dios,
ne cáꞌanqueze bénneache.
3 Lu xe̱zre náꞌqueze guzúa tu nuꞌula ba gute benneꞌ chee̱ꞌ.
Guxíaje̱ꞌ xeajnabe̱ꞌ lau benneꞌ dxuchiꞌe̱ da dxaca chee̱ guchiꞌe̱ da dxaca chee̱ꞌ nen tu benneꞌ dxune̱ꞌ chee̱ꞌ da cale̱la.
4 Zaneꞌ lásate̱ benneꞌ dxuchiꞌe̱ da dxaca quebe guca lazre̱ꞌ guchiꞌe̱ chee̱ nuꞌula naꞌ,
san ca gudé naꞌ gunné̱ꞌ lu xichaj lázrdawe̱ꞌ:
Lácala quebe dxapaꞌ ba láꞌana Dios,
ne cáꞌanqueze bénneache,
5 san laweꞌ da nuꞌula nigá dxune̱ꞌ nedaꞌ ze̱de,
guchíꞌa chazaꞌ da dxaca chee̱ꞌ chee̱ québedxa xide̱ꞌ gúnle̱ꞌe̱ nedaꞌ ze̱de.
6 Naꞌ gunná Xránadxu:
―Caní naꞌ gunná benneꞌ we̱n da cale̱la naꞌ,
benneꞌ dxuchiꞌe̱ da dxaca.
7 ¿Quebe guchiꞌa Dios da dxaca chee̱ benneꞌ caꞌ ba guqué̱ꞌe̱,
benneꞌ caꞌ dxelenné̱ꞌ Le̱ꞌ te zra,
ne chizrela?
¿Wazrene̱ꞌ xeche̱be̱ꞌ chee̱ benneꞌ caꞌ?
8 Dxapaꞌ leꞌe,
Le̱ꞌ guchiꞌe̱ da dxaca chee̱ꞌ,
ne quebe chene̱ꞌ.
Gate xeláꞌa nedaꞌ,
Benneꞌ Gulje̱ꞌ Bénneache,
¿wazréldxedaꞌ tu benneꞌ lu xe̱zr la xu nigá,
benneꞌ dxéajle̱ꞌe̱ chiaꞌ?
Da dxuléꞌe na ca naca chee̱ tu benneꞌ fariseo, ne tu benneꞌ wechizruj
9 Jesús bchálaje̱ꞌ xetú da dxuléꞌe na,
chee̱ xelene benneꞌ caꞌ dxeléquene̱ꞌ zaj naque̱ꞌ xrlátaje,
san dxuluzúe̱ꞌ chaláꞌala le saꞌ ljwezre̱ꞌ.
10 Gunné̱ꞌ:
―Chupa benneꞌ xjaque̱ꞌ xudauꞌ chee̱ xuluchálajle̱ne̱ꞌ Dios.
Tue̱ꞌ naque̱ꞌ benneꞌ xudauꞌ fariseo,
naꞌ xetúe̱ꞌ naque̱ꞌ wechizruj waláz chee̱ xe̱zre zituꞌ.
11 Benneꞌ xudauꞌ naꞌ guzé̱ꞌ dxuchálajle̱ne̱ꞌ Dios,
gunné̱ꞌ:
“Dios,
xcalenuꞌ quebe nacaꞌ ca benneꞌ xula caꞌ,
zaj naque̱ꞌ gubán,
ne benneꞌ caꞌ dxelune̱ꞌ da cale̱la,
ne benneꞌ dxelún dul-la dxeláchajne̱ꞌ xrba chee̱ wechaga naꞌ,
ne quegá ca benneꞌ wechizruj nigá.
12 Nedaꞌ dxunaꞌ gubasa chupa lasa da gazre zra,
ne dxunnaꞌ chiuꞌ tu cueꞌ chee̱ da chi cueꞌ da dxeziꞌa.”
13 Benneꞌ wechizruj naꞌ guzúe̱ꞌ dxuꞌa dxa xúꞌuze,
ne quebe bexazrjne̱ꞌ chisa lawe̱ꞌ xabáa.
Bé̱le̱ꞌe̱ la chuꞌe̱,
dxenné̱ꞌ:
“Dios,
bexache lazreꞌ nedaꞌ,
nacaꞌ benneꞌ dul-la.”
14 Dxapaꞌ leꞌe,
benneꞌ wechizruj naꞌ bezé̱ꞌe̱ xexíaje̱ꞌ lizre̱ꞌ,
ne bexaque̱ꞌ xrlátaje lau Dios,
san quegá caní guca chee̱ benneꞌ xudauꞌ naꞌ.
Caꞌ guca laweꞌ da benneꞌ dxucáꞌana szren cuine̱ꞌ wexéxrujla bénneaꞌ,
san benneꞌ dxucáꞌana baxacheꞌ cuine̱ꞌ wegáꞌana szrénqueze bénneaꞌ.
Parábola del Fariseo y el Recolector de Impuestos
Jesús dxenabe̱ꞌ gaca chaweꞌ chee̱ bidu caꞌ
15 Belezrín benneꞌ caꞌ zaj naché̱ꞌe̱ bidu caꞌ lau Jesús chee̱ guzé̱ ne̱ꞌe̱ le̱beꞌ.
Gate beleléꞌe benneꞌ caꞌ dxuse̱de Jesús da nigá,
naꞌ gulezú lawe̱ꞌ dxeledil-le̱ꞌ benneꞌ caꞌ.
16 Jesús gunné̱ꞌ benneꞌ caꞌ dxusé̱dene̱ꞌ,
naꞌ dxe̱ꞌe̱ le̱ꞌ:
―Le güe lataj xeleláꞌ bidu caꞌ naga zuaꞌ,
ne quebe guzágale-beꞌ,
laweꞌ da benneꞌ zaj naque̱ꞌ ca bidu caní welexuꞌe̱ naga dxenná bea Dios.
17 Da li dxapaꞌ leꞌe,
benneꞌ quebe siꞌ lu ne̱ꞌe̱ nna bea Dios le̱ꞌ ca dxelún bidu caní,
québequeze chuꞌe̱ naga dxenná bea Dios.
Tu benneꞌ cuideꞌ naque̱ꞌ benneꞌ gunníꞌa
18 Tu benneꞌ xíchaje̱ bche̱be̱ꞌ Jesús:
―Benneꞌ Wese̱de xrlátaje,
¿bi da dxal-laꞌ gunaꞌ chee̱ zruéꞌedaꞌ xel-la nabán zeajlí canna?
19 Jesús guzre̱ꞌ le̱ꞌ:
―¿Bizr chee̱ naꞌ dxennáuꞌ nacaꞌ xrlátaje?
Netú benneꞌ quebe naque̱ꞌ xrlátaje.
Tuze Dios naque̱ꞌ xrlátaje.
20 Lueꞌ núnbeꞌu ca zaj naca xrba chee̱ Dios:
Quebe gunuꞌ dul-la da dxachaj na xrba chee̱ wechaga naꞌ.
Quebe gutiuꞌ benneꞌ.
Quebe cuanuꞌ.
Quebe nneuꞌ chee̱ le saꞌ ljwezruꞌ da quebe naca na.
Gudapa ba láꞌana xra xrnaꞌu.
21 Benneꞌ naꞌ guzre̱ꞌ Jesús:
―Xúgute̱ da caní dxunaꞌ ne nácateaꞌ bídauꞌte̱.
22 Gate ben Jesús da nigá,
naꞌ guzre̱ꞌ-beꞌ:
―Ne dxexázrjenuꞌ xetú da dxal-laꞌ gunuꞌ.
Be̱te ca naca da de̱ chiuꞌ,
naꞌ bnezruj na chee̱ benneꞌ xacheꞌ caꞌ.
Nadxa gapuꞌ xel-la gunníꞌa lu xabáa chee̱ Dios.
Naꞌ gudá sále̱nuꞌ nedaꞌ.
23 Gate benneꞌ cuideꞌ naꞌ benne̱ꞌ da nigá,
bewíꞌinele̱ꞌe̱ne̱ꞌ laweꞌ da nápale̱ꞌe̱ da gunníꞌa.
24 Gate bleꞌe Jesús ca bewiꞌine benneꞌ naꞌ,
gunné̱ꞌ:
―Sté̱bete̱ naca chee̱ benneꞌ gunníꞌa caꞌ xelexúꞌe̱ naga dxenná bea Dios.
25 Chadídxala te tu bea zren lu negueꞌ tu xecheꞌ zriche quegala chuꞌu tu benneꞌ gunníꞌa naga dxenná bea Dios.
26 Naꞌ benneꞌ caꞌ dxelenne̱ꞌ gulenné̱ꞌ:
―Che caꞌ naca na,
¿núzraqueze la?
27 Jesús guzre̱ꞌ benneꞌ caꞌ:
―Da quebe gaca xelún bénneache,
waca Dios gúnqueze̱ꞌ na.
28 Naꞌ gunná Pedro,
guzre̱ꞌ Jesús:
―Xran,
ba bsantuꞌ ca da gudápantuꞌ chee̱ zále̱ntuꞌ Lueꞌ.
29 Nadxa Jesús beche̱be̱ꞌ:
―Da li dxapaꞌ leꞌe,
nútete̱ze benneꞌ gusane̱ꞌ lizre̱ꞌ,
u xra xrne̱ꞌe̱,
u bi biche̱ꞌ,
bi zane̱ꞌ caꞌ,
u zruꞌule̱ꞌ,
u zríꞌine̱ꞌ caꞌ,
chee̱ gune̱ꞌ zrin chee̱ xel-la dxenná bea chee̱ Dios,
30 benneꞌ nigá waziꞌe̱ da zrendxa lu xe̱zr la xu nigá,
naꞌ lu xe̱zr la xu da za zaꞌ waziꞌe̱ xel-la nabán da zeajlí canna.
Jesús dxuchálaje̱ꞌ xecha lasa ca gaca gate gatie̱ꞌ
31 Naꞌ Jesús gunné̱ꞌ chaláꞌala benneꞌ chazrinnu caꞌ dxusé̱dene̱ꞌ,
naꞌ guzre̱ꞌ le̱ꞌ:
―Naꞌa zexíajdxu Jerusalén,
naga gaca li ca naca da buluzúaj benneꞌ caꞌ buluchálaje̱ꞌ waláz chee̱ Dios ca gaca chiaꞌ nedaꞌ,
Benneꞌ Gulje̱ꞌ Bénneache.
32 Benneꞌ zaj zre̱ꞌe̱ Jerusalén xuludée̱ꞌ nedaꞌ lu naꞌ benneꞌ zituꞌ caꞌ,
naꞌ xelún le̱ꞌ chiaꞌ,
ne xelenné̱queze̱ꞌ schanniꞌ chiaꞌ,
ne wuluzráqueze̱ꞌ nedaꞌ zrene̱ꞌ.
33 Welúequeze̱ꞌ nedaꞌ,
naꞌ te naꞌ xelútie̱ꞌ nedaꞌ,
naꞌ zra guxunneꞌ zra xebanaꞌ ládujla benneꞌ gate.
34 Benneꞌ caꞌ quebe guléajniꞌine̱ꞌ da nigá,
ne quebe zaj nézene̱ꞌ bi chee̱ naꞌ dxuchálajle̱ne̱ꞌ le̱ꞌ,
laweꞌ da zaj naca da quebe guca xeléajniꞌiquezne̱ꞌ.
Jesús Predice Su Muerte y Resurrección
Tu benneꞌ la chul-la, benneꞌ zue̱ꞌ xe̱zre Jericó
35 Gate Jesús bzrine̱ꞌ gagu naga zua xe̱zre Jericó,
naꞌ dxeꞌ tu benneꞌ la chul-la dxuꞌa neza dxenabe̱ꞌ gunaꞌ.
36 Gate benne̱ꞌ dxeledé benneꞌ zante̱,
naꞌ benneꞌ la chul-la naꞌ bche̱be̱ꞌ benneꞌ caꞌ bizra naꞌ dxaca na.
37 Naꞌ gulé̱ꞌe̱ le̱ꞌ:
―Jesús,
benneꞌ Nazaret dxedée̱ꞌ nigá.
38 Nadxa gudxezre xaꞌa la chul-la naꞌ,
gunné̱ꞌ:
―¡Jesús,
Zriꞌine David,
bexache lazreꞌ nedaꞌ!
39 Benneꞌ caꞌ zaj zria lawe̱ꞌ lau Jesús guledil-le̱ꞌ benneꞌ la chul-la naꞌ chee̱ sue̱ꞌ zrize,
san gudxezre xáꞌadxa le̱ꞌ,
dxenné̱ꞌ:
―¡Zriꞌine David,
bexache lazreꞌ nedaꞌ!
40 Nadxa gugá Jesús,
naꞌ gunná béꞌene̱ꞌ xeajlexríꞌe̱ le̱ꞌ.
Gate ble̱ꞌe̱ lau Jesús,
naꞌ Jesús bche̱be̱ꞌ le̱ꞌ:
41 ―¿Bi dxaca lazruꞌ gunaꞌ chiuꞌ?
Beche̱be la chul-la naꞌ:
―Xran,
dxaca lazraꞌ xeléꞌedaꞌ.
42 Jesús guzre̱ꞌ le̱ꞌ:
―Gaca ca dxennáuꞌ.
Ba bexacuꞌ laweꞌ da guxéajle̱ꞌu chiaꞌ.
43 Zra náꞌqueze beléꞌe benneꞌ la chul-la naꞌ,
naꞌ guxíajle̱ne̱ꞌ Jesús,
dxue láꞌane̱ꞌ Dios.
Xúgute̱ benneꞌ caꞌ beleléꞌene̱ꞌ da nigá cáꞌanqueze belúe láꞌane̱ꞌ Dios.
Sanación de Bartimeo