Da bchalaj Jesús ca naca chee̱ benneꞌ dxulusán ljwezre̱ꞌ
19
Ca gudé bchalaj Jesús da caní,
naꞌ bezé̱ꞌe̱ xe̱zre caꞌ zaj nababa Galilea,
naꞌ bezrine̱ꞌ chaláꞌala naga nababa Judea,
da zua chaláꞌala xe̱gu Jordán naga dxalaj gubizra.
2 Benneꞌ zan zjácale̱ne̱ꞌ Le̱ꞌ,
naꞌ bexune̱ꞌ benneꞌ zante̱,
benneꞌ we̱ꞌ.
3 Nadxa bal-la benneꞌ xudauꞌ fariseo gulebigue̱ꞌ naga zua Jesús chee̱ xelebéaje̱ꞌ Le̱ꞌ dizraꞌ chee̱ gaca xelagu zrie̱ꞌ Jesús,
naꞌ buluche̱be̱ꞌ Le̱ꞌ:
―¿Waca nu benneꞌ gusane̱ꞌ zruꞌule̱ꞌ ne̱ chee̱ bítete̱ze da gune̱ꞌ?
4 Beche̱be Jesús:
―¿Quebe ne gulábale leꞌe lu xiche láꞌazxa da naꞌ dxenná na:
“Benneaꞌ be̱ne̱ꞌ benneꞌ caꞌ nédxudaute̱ be̱ne̱ꞌ le̱ꞌ benneꞌ biu,
ne nuꞌula”?
5 Cáꞌanqueze gunné̱ꞌ:
“Chee̱ le̱ naꞌ benneꞌ biu gusane̱ꞌ xra xrne̱ꞌe̱ chee̱ gaque̱ꞌ tuze nen zruꞌule̱ꞌ,
naꞌ dxupe̱ꞌ xelaque̱ꞌ ca tuze benneꞌ.”
6 Caní naca na,
québedxa zaj naque̱ꞌ chupe̱ꞌ,
san tuze benneꞌ zaj naque̱ꞌ.
Chee̱ le̱ naꞌ quebe dxal-laꞌ xeláꞌa bénneache da naꞌ ba nuchaga Dios.
7 Nadxa buluche̱be̱ꞌ Jesús:
―¿Bizr chee̱ naꞌ gunná beꞌe Moisés nu benneꞌ gunézruje̱ꞌ zruꞌule̱ꞌ tu xiche da dxuléꞌe na belexelé̱ꞌe̱,
naꞌ gusane̱ꞌ le̱ꞌ?
8 Jesús guzre̱ꞌ benneꞌ caꞌ:
―Caní be̱ne̱ꞌ laweꞌ da gulaca lazrdau zizraj xra xrtaule.
Moisés be̱nne̱ꞌ lataj gusanle zrúꞌulale,
san nédxudaute̱ quebe guca na caꞌ.
9 Nedaꞌ dxapaꞌ leꞌe,
che tu benneꞌ gusane̱ꞌ zruꞌule̱ꞌ,
ne quebe dxedále̱ne̱ꞌ benneꞌ biu xula,
naꞌ che xezúale̱ne̱ꞌ nuꞌula xula,
benneꞌ nigá gune̱ꞌ dul-la súale̱ne̱ꞌ nuꞌula quebe naque̱ꞌ zruꞌule̱ꞌ,
naꞌ che nu benneꞌ biu xequé̱ꞌe̱ tu nuꞌula nusán benneꞌ chee̱ꞌ,
cáꞌanqueze gun dul-la bénneaꞌ súale̱ne̱ꞌ nuꞌula quebe naque̱ꞌ zruꞌule̱ꞌ.
10 Nadxa benneꞌ caꞌ dxuse̱de Jesús gulé̱ꞌe̱ Le̱ꞌ:
―Che caꞌ dxaca chee̱ benneꞌ zúale̱ne̱ꞌ nuꞌula,
quebe dxal-laꞌ súale̱ntuꞌ nuꞌula.
11 Jesús guzre̱ꞌ benneꞌ caꞌ:
―Quegá xúgute̱ benneꞌ gaca xelezíꞌe̱ dizraꞌ nigá,
san tuze benneꞌ caꞌ ba nun Dios chee̱ꞌ xelezíꞌe̱ na.
12 Zaj zraꞌ benneꞌ quebe dxelezúale̱ne̱ꞌ nuꞌula laweꞌ da quebe zaj naca xánnie̱ꞌ benneꞌ biu.
Naꞌ zaj zraꞌ benneꞌ québedxa zaj naca xánnie̱ꞌ benneꞌ biu laweꞌ da zaj nun bénneache naca caní.
Naꞌ zaj zraꞌ benneꞌ dxelexegáꞌane̱ꞌ cáꞌaze,
quebe nu dxelezúale̱ne̱ꞌ chee̱ gaca xelune̱ꞌ zrin chee̱ Dios,
Bénneaꞌ dxenná beꞌe̱ xabáa.
Benneꞌ gaca siꞌe̱ dizraꞌ nigá dxal-laꞌ siꞌe̱ na.
Jesús dxenabe̱ꞌ gaca chaweꞌ chee̱ bidu caꞌ
13 Nadxa belezrín benneꞌ lau Jesús zaj naché̱ꞌe̱ bal-la bidauꞌ chee̱ guzé̱ ne̱ꞌe̱ bidu caꞌ,
ne nabe̱ꞌ Dios gaca chaweꞌ chee̱beꞌ,
san benneꞌ caꞌ dxuse̱de Jesús gulezú lawe̱ꞌ dxeledil-le̱ꞌ benneꞌ caꞌ zaj naché̱ꞌe̱ bidu caꞌ.
14 Jesús guzre̱ꞌ le̱ꞌ:
―Le güe bidu caꞌ lataj xelelaꞌbeꞌ naga zuaꞌ.
Quebe guzrúnnale-beꞌ,
laweꞌ da benneꞌ zaj naque̱ꞌ ca bidu caní xeluꞌe̱ naga dxenná bea Dios xabáa.
15 Nadxa bze̱ Jesús ne̱ꞌe̱ laweꞌ bidu caꞌ,
naꞌ gudé naꞌ bezé̱ꞌe̱ lataj naꞌ.
Tu benneꞌ cuideꞌ nape̱ꞌ xel-laꞌ gunníꞌa
16 Tu benneꞌ cuideꞌ guxíaje̱ꞌ naga zua Jesús,
naꞌ bche̱be̱ꞌ Le̱ꞌ:
―Benneꞌ Wese̱de chaweꞌ.
¿Bi da xrlátaje dxal-laꞌ gunaꞌ chee̱ gapaꞌ xel-laꞌ nabán zeajlí canna?
17 Jesús guzre̱ꞌ le̱ꞌ:
―¿Bizr chee̱ naꞌ dxuꞌu nedaꞌ,
benneꞌ wese̱de chaweꞌ?
Quebe nu chiláꞌ benneꞌ naque̱ꞌ chaweꞌ,
san tuze Dios.
Che dxaca lazruꞌ zruéꞌenuꞌ xel-laꞌ nabán li lazreꞌ,
bzua dizraꞌ ca bdxixruj beꞌe Dios.
18 Benneꞌ cuideꞌ naꞌ gunné̱ꞌ:
―¿Bila naꞌ?
Jesús guzre̱ꞌ le̱ꞌ:
―Quebe gutiuꞌ benneꞌ.
Quebe súale̱nuꞌ zruꞌula benneꞌ xula.
Quebe cuanuꞌ.
Quebe nneuꞌ da we̱n lazreꞌ chee̱ benneꞌ.
19 Gudapa ba láꞌana xra xrnaꞌu.
Bzriꞌi le saꞌ ljwezruꞌ ca nazríꞌi cuinuꞌ.
20 Benneꞌ cuideꞌ naꞌ gunné̱ꞌ:
―Xúgute̱ da caní dxunaꞌ nácateaꞌ bídauꞌte̱.
¿Bízradxa quebe ne gunaꞌ?
21 Naꞌ guzre Jesús le̱ꞌ:
―Che dxaca lazruꞌ gacuꞌ benneꞌ li lazreꞌ,
bexíaj,
xeaje̱te ca naca da napuꞌ,
ne bnezruj na benneꞌ xacheꞌ caꞌ.
Nadxa gapuꞌ xel-laꞌ gunníꞌa xabáa.
Naꞌ gudátega nen nedaꞌ.
22 Gate benneꞌ cuideꞌ naꞌ benne̱ꞌ da nigá,
bezé̱ꞌe̱ dxexíaje lazre̱ꞌ laweꞌ da nápale̱ꞌe̱ xel-laꞌ gunníꞌa.
23 Nadxa gunná Jesús,
dxe̱ꞌe̱ benneꞌ caꞌ dxusé̱dene̱ꞌ:
―Da li dxapaꞌ leꞌe,
sté̱bele̱ꞌe̱ naca chuꞌu tu benneꞌ gunníꞌa naga dxenná bea Dios xabáa.
24 Da xula dxapaꞌ leꞌe,
chadidxa gaca te tu beaꞌ,
be̱ dxebía bénneache lu negueꞌ tu xecheꞌ zriche,
quézcala chuꞌu tu benneꞌ gunníꞌa naga dxenná bea Dios.
25 Gate belenne̱ꞌ benneꞌ caꞌ dxuse̱de Jesús da nigá,
naꞌ belexebánele̱ꞌe̱ne̱ꞌ,
naꞌ buluche̱be ljwezre̱ꞌ:
―¿Nuzra la xcaꞌ?
26 Jesús guné̱ꞌe̱ benneꞌ caꞌ,
ne guzre̱ꞌ le̱ꞌ:
―Da nigá quebe gaca xelún bénneache,
san Dios waca gune̱ꞌ ca naca.
27 Nadxa gunná Pedro:
―Xran,
netuꞌ ba bcáꞌanantuꞌ ca naca da nápantuꞌ,
ne zéajle̱ntuꞌ Lueꞌ.
¿Bizra gápantuꞌ xcaꞌ?
28 Beche̱be Jesús:
―Da li dxapaꞌ leꞌe,
ca lu zra naꞌ gate naꞌ xúgute̱ xelexaca na cube,
gate nedaꞌ,
Benneꞌ Gulje̱ꞌ Bénneache,
cueꞌa lataj chaweꞌ chiaꞌ naga nna beꞌa,
leꞌe naꞌ ba gudále̱le nedaꞌ cuéꞌquezle lu chazrinnu lataj naga nna beale,
chee̱ guchíꞌale chee̱ chazrinnu cueꞌ benneꞌ Israel,
benneꞌ judío caꞌ.
29 Xúgute̱ benneꞌ caꞌ ba bulucáꞌane̱ꞌ lizre̱ꞌ,
u benneꞌ biche̱ꞌ,
u nuꞌula zane̱ꞌ,
u xre̱ꞌ,
u xrne̱ꞌe̱,
u zruꞌule̱ꞌ,
u zríꞌine̱ꞌ,
u xe̱zr la xu chee̱ꞌ,
chee̱ xelune̱ꞌ zrin chiaꞌ,
xelezíꞌqueze̱ꞌ tu gaxúala na,
ne xelezíꞌqueze̱ꞌ xel-laꞌ nabán zeajlí canna.
30 Benneꞌ zante̱ zaj naca blau naꞌa xelaque̱ꞌ benneꞌ bze̱be,
naꞌ benneꞌ zante̱ zaj naca benneꞌ bze̱be naꞌa xelaque̱ꞌ benneꞌ blau.