―Da gaca naga dxenná bea Dios xabáa naca na ca da guca gate tu xrane zánete̱ cueꞌ xe̱zr la xu guzé̱ꞌe̱ lizre̱ꞌ che zílala,

zéaje̱ꞌ zeajtílaje̱ꞌ benneꞌ we̱n zrin caꞌ chee̱ cheajlechibe̱ꞌ uva chee̱ꞌ.

2 Bcaꞌana cháwele̱ne̱ꞌ benneꞌ we̱n zrin caꞌ quízruje̱ꞌ tu dumí lazruj chee̱ tu zra,

naꞌ gusel-le̱ꞌ benneꞌ caꞌ zeajlegue̱ne̱ꞌ zrin lu xe̱zr la xu chee̱ꞌ.

3 Ca gudé naꞌ guzé̱ꞌe̱ lizre̱ꞌ ca dxedá na,

naꞌ bléꞌene̱ꞌ benneꞌ zaj zre̱ꞌe̱ laweꞌ xiꞌa zaj nalátajze̱ꞌ.

4 Naꞌ guzre̱ꞌ benneꞌ caꞌ:

“Cáꞌanqueze leꞌe,

le chjaca we̱n zrin lu xe̱zr la xu chiaꞌ,

naꞌ gunnaꞌ leꞌe da naca chaweꞌ.”

Naꞌ benneꞌ caꞌ xjaque̱ꞌ.

5 Xrane naꞌ guzé̱ꞌe̱ da xula wa gubizra,

ne cáꞌanqueze dxexedáꞌ chunna,

ne tuze ca be̱ne̱ꞌ.

6 Xetú du dxedáꞌ gazxuꞌ guxíaje̱ꞌ laweꞌ xiꞌa,

naꞌ bléꞌene̱ꞌ zaj zraꞌ naꞌ benneꞌ zaj nalátajzqueze̱ꞌ,

ne guzre̱ꞌ le̱ꞌ:

“¿Bizr chee̱ naꞌ zrale leꞌe nigá bedú zra quebe bi zrin dxunle?”

7 ’Gulenné̱ꞌ:

“Quebe nu ne xe̱ netuꞌ guntuꞌ zrin chee̱ꞌ.”

’Naꞌ guzre̱ꞌ benneꞌ caꞌ:

“Cáꞌanqueze leꞌe,

le cheajé̱n zrin lu lina chiaꞌ,

naꞌ gunnaꞌ leꞌe da naca chaweꞌ.”

8 Gate gul-laꞌ chizrela,

xrane naꞌ guzre̱ꞌ benneꞌ xuꞌu lu ne̱ꞌe̱ zrin naꞌ:

“Gunné̱ benneꞌ we̱n zrin caꞌ,

ne gudízruje̱ꞌ,

su lauꞌ quízrujuꞌ benneꞌ caꞌ beleláꞌ bzé̱bedxa,

naꞌ bzé̱bete̱ quízrujuꞌ benneꞌ caꞌ beleláꞌ nédxute̱.”

9 Nadxa belezrín benneꞌ caꞌ belúꞌe̱ lu zrin naꞌ gate dxexedadxa gazxuꞌ,

naꞌ tu tu benneꞌ caꞌ beleziꞌe̱ lazruj chee̱ꞌ du naxáꞌ lazruj tu zra we̱n zrin.

10 Gudé naꞌ gate belezrín benneꞌ caꞌ guluꞌe̱ nédxute̱ lu zrin naꞌ,

guléquene̱ꞌ xelezíꞌe̱ da zrendxa,

san cáꞌanqueze gulezíꞌ tu tu benneꞌ caꞌ lazruj tu zra we̱n zrin weaj.

11 ’Gate gulezíꞌe̱ na,

naꞌ gulezú lawe̱ꞌ dxelawe̱ꞌ zria lau xrane zrin naꞌ,

12 dxelenné̱ꞌ:

“Benneꞌ caní beleláꞌ bzé̱bedxa,

tu chíꞌidauꞌze ga belune̱ꞌ zrin,

naꞌ gudízrujquezuꞌ benneꞌ caní ca gudízrujuꞌ netuꞌ,

naꞌ netuꞌ bedú zra be̱ntuꞌ zrin,

ne ca naca da la chee̱ zra nigá bchaga launtuꞌ.”

13 ’Beche̱be̱ xrane naꞌ,

dxe̱ꞌe̱ tu benneꞌ caꞌ:

“Ljwézraꞌdauꞌ,

quebe bi dxunaꞌ chiuꞌ da quebe naca na chaweꞌ.

¿Quebe bcaꞌana cháwele̱naꞌ lueꞌ quízrujaꞌ lueꞌ lazruj tu zra we̱n zrin?

14 Guzíꞌ lazruj chiuꞌ,

ne bexíaj.

Nedaꞌ dxaca lazraꞌ gunézrujaꞌ chee̱ benneꞌ caꞌ belúꞌe̱ bzé̱bedxa ca da gudízrujquezaꞌ lueꞌ.

15 ¿Quebe gaca gunaꞌ ca da dxaca lazraꞌ nen dumí chiaꞌ?

¿Dxacuꞌ xa lazreꞌ laweꞌ da nacaꞌ nedaꞌ benneꞌ xrlátaje?”

16 Naꞌ gunná Jesús:

―Caꞌan naca,

benneꞌ caꞌ zaj naca benneꞌ bze̱be xelaque̱ꞌ benneꞌ blau,

naꞌ benneꞌ blau caꞌ xelaque̱ꞌ benneꞌ bze̱be laweꞌ da ba gunníaꞌ benneꞌ zan,

san bábaze benneꞌ caꞌ xelaque̱ꞌ blau.

17 Gate xuꞌu Jesús neza,

zexíaje̱ꞌ Jerusalén,

guléaje̱ꞌ chee̱ze benneꞌ chazrinnu caꞌ dxusé̱dene̱ꞌ,

ne guzre̱ꞌ le̱ꞌ:

18 ―Dxeléꞌele leꞌe ba zexíajdxu Jerusalén naga nedaꞌ,

Benneꞌ Gulje̱ꞌ Bénneache,

xuludé benneꞌ caꞌ nedaꞌ lau benneꞌ xíchaje̱ caꞌ chee̱ bxruze caꞌ,

ne lau benneꞌ caꞌ dxuluxuzájle̱ꞌe̱ da bdxixruj beꞌe Dios,

naꞌ xelechugue̱ꞌ chiaꞌ gatiaꞌ.

19 Xuludée̱ꞌ nedaꞌ lu naꞌ benneꞌ zituꞌ caꞌ chee̱ xelún le̱ꞌ chiaꞌ,

naꞌ xeluꞌe̱ nedaꞌ,

ne xuludé̱ꞌe̱ nedaꞌ xaga béguaj,

san zra guxunne zra xebanaꞌ.

20 Nadxa gubiga xrna Jacobo,

ne Juan lau Jesús,

bi caꞌ zaj naca be̱ꞌ zriꞌine Zebedeo,

naché̱ꞌe̱ bi caꞌ,

naꞌ bzu zribe̱ꞌ lau Jesús,

dxenabe̱ꞌ culuén.

21 Jesús bche̱be̱ꞌ nuꞌula naꞌ:

―¿Bi naꞌ dxenabuꞌ?

Nuꞌula naꞌ guzre̱ꞌ Jesús:

―Gate zrin zra nna beꞌu,

naꞌ gudxixruj beꞌe cueꞌ tu zriꞌinaꞌ caní chaláꞌa xabe̱la chiuꞌ,

ne xetubeꞌ xéglala.

22 Jesús beche̱be̱ꞌ,

guzre̱ꞌ bi caꞌ:

―Quebe nézele leꞌe bi naꞌ dxenábale.

¿Waca xíꞌajle leꞌe ca da xíꞌajaꞌ nedaꞌ,

da naꞌ naca na ca xel-laꞌ ziꞌ da teaꞌ nedaꞌ,

ne waca siꞌle da naca na ca xel-laꞌ dxedxúa nisa ca da siꞌa nedaꞌ gate chuꞌa lu xel-laꞌ gute?

Naꞌ gulenabeꞌ:

―Wácantuꞌ.

23 Nadxa Jesús guzre̱ꞌ bi caꞌ:

―Da li xíꞌajle ca da xíꞌajaꞌ nedaꞌ,

ne siꞌle da naca ca xel-laꞌ dxedxúa nisa naꞌ da siꞌa nedaꞌ,

san da cueꞌle chaláꞌa xabe̱la chiaꞌ,

ne chaláꞌa xéglala chiaꞌ quebe naca na chiaꞌ gunnaꞌ na leꞌe.

Xraꞌ gunézruje̱ꞌ na chee̱ bi caꞌ ca da ba nucueze̱ꞌ.

24 Gate xechí benneꞌ caꞌ dxuse̱de Jesús belenne̱ꞌ caꞌ,

naꞌ belezré̱ꞌe̱ dxupa bi chee̱ nuꞌula naꞌ.

25 Jesús gunné̱ꞌ benneꞌ caꞌ,

ne guzre̱ꞌ le̱ꞌ:

―Ba nézele leꞌe ca dxelún benneꞌ xíchaje̱ chee̱ xe̱zr la xu caꞌ,

dxelenná béꞌene̱ꞌ benneꞌ caꞌ,

naꞌ benneꞌ nácadxe̱ꞌ blau ládujla benneꞌ caꞌ dxelenná beꞌe̱,

dxuchínene̱ꞌ xel-laꞌ dxenná bea chee̱ꞌ.

26 Leꞌe quebe dxal-laꞌ gunle caꞌ.

Benneꞌ dxaca lazre̱ꞌ gaque̱ꞌ blau ládujla leꞌe dxal-laꞌ gune̱ꞌ zrin chee̱ xezícadxale leꞌe,

27 naꞌ bénneaꞌ dxaca lazre̱ꞌ gaque̱ꞌ xíchaje̱ chee̱le,

dxal-laꞌ gaque̱ꞌ we̱n zrin chee̱ xúgute̱le leꞌe.

28 Dxal-laꞌ gune̱ꞌ ca be̱naꞌ nedaꞌ,

Benneꞌ Gulje̱ꞌ Bénneache,

quebe bidaꞌ chee̱ nu gun zrin chiaꞌ nedaꞌ,

san blaꞌa chee̱ gunaꞌ zrin chee̱ bénneache,

ne chee̱ guzúaꞌ xel-laꞌ nabán chiaꞌ ca da quízrujaꞌ chee̱ guseláꞌ benneꞌ zante̱.

29 Gate dxelexedxúaje̱ꞌ xe̱zre Jericó,

naꞌ benneꞌ zante̱ zjácale̱ne̱ꞌ Jesús.

30 Naga dxeledée̱ꞌ zaj dxeꞌ chupa benneꞌ la chul-la dxuꞌa neza,

naꞌ gate belenne̱ꞌ dxedé Jesús naꞌ gulebezre xe̱ꞌe̱,

dxelenné̱ꞌ:

―Xran,

Zriꞌine David,

bexache lazreꞌ netuꞌ.

31 Benneꞌ zan caꞌ guledil-le̱ꞌ dxúpate̱ꞌ naꞌ chee̱ xelezúe̱ꞌ zrize,

san le̱ꞌ gulebezre xe̱ꞌe̱ zízrajdxa,

dxelenné̱ꞌ:

―Xran,

Zriꞌine David,

bexache lazreꞌ netuꞌ.

32 Nadxa Jesús guleze̱ꞌ,

naꞌ gunné̱ꞌ benneꞌ la chul-la caꞌ,

naꞌ bche̱be̱ꞌ le̱ꞌ:

―¿Bi dxaca lázrele gunaꞌ chee̱le?

33 Belexeche̱be benneꞌ caꞌ:

―Xran,

dxaca lázrentuꞌ xeléꞌentuꞌ.

34 Jesús bexache lazre̱ꞌ benneꞌ caꞌ,

ne bte̱ꞌ xiaj lawe̱ꞌ.

Naꞌ belexeléꞌete̱ benneꞌ la chul-la caꞌ,

naꞌ xjácale̱ne̱ꞌ Jesús.